Bìoball air-loidhne

Ètsə 20 - Mundani

MèngùꞋebȩ tɔsì

¹ ÀfɨꞋa mbɔŋ e ndze wantu̧ Mbɔ̧ɔ̧mà kǒ nchua a ègwet, tà bèà nkȩ̀ȩ̀te èbɨ lu kà ye ndìa la àbu azi, mè mbèà taꞋa èkuê.

² Tà ghà mbà̧à̧ taꞋa dlagɔ̀n wu è fəə nyà̧kàbɔ̀ŋ la nkùùle atò ndzì a tèfȩ ane mèngùꞋebȩ tɔsì. Nyà̧kàbɔ̀ŋ mbɔŋ li ndzaŋe wu, è wu fɔ̧̀ fote kàbɔ̀ŋ tu bɔ̀ɔ ntɔ ane Satàn la.

³ Wantu̧ Mbɔ̧ɔ̧mà wu è ghɨ̀ ale, màꞋa atò a èbem èbɨ lu kà ye ndìa la, mbɔ ntsènè nkȩ̀ ane ndɨ tà kà ko etsi dzəâ e fɨte bòt èlaꞋ ngɔ̀ŋ la, tè mèngùꞋebȩ mu tɔsì la è tsè. MèngùꞋ mbɔŋ nàa tsě bɔ tsɔꞋɔ atò ane kètem àfɨ̀Ꞌ àko.

⁴ E mè ndzè ètɨ̧ kèfɔ̧̀ bɔ ŋa mètàŋ abua bòt bɔ tsekte a ègwet la, bɔɔ me saꞋa mènəè. Mè ndzě èlɨ̀ŋkè bòt bu bɔ li ndòòte ètsə bɔb nkàà ndɨ bɔ̀ɔ shua nê bɔ bɨ̧ɨ̧ne ane Yesò Klistò, mè me làꞋa èngǎ̧ Mbɔ̧ɔ̧mà la. Eyaa wu bòt bu bɔ li bɔ̀ kà wuꞋtè nyà̧mɔ̀Ꞌ yu bɔ̂ wamâlem tò wu la, mè ntu̧ enɨ àlȩê tò yu a mèsi mɔb nè èbu bɔb la. Bòt mbɔŋ e li njù̧ù̧me me baãaã èlaꞋ bɔ̂ Yesò Klistò ba mbɨ̀Ꞌɨ̀ bèfɔ̧̀ ane mèngùꞋebȩ tɔsì.

⁵ Èbeko nè bèmpfəà be li bè ka yu̧u̧mè tè mèngùꞋebȩ mu tɔsì la è tsè. Eyaa wu ngo̧ mbì bòt àa yu̧u̧me la.

⁶ Ntsɔ̧̀ wu bòt bu bɔ̀ɔ li yu̧u̧me ayɔɔ bòt mbì bàa la. Bɔ wu bòt Mbɔ̧ɔ̧mà. Èvə lu wòt nàa mpfəa mè mpfəa la è ka li tsi e bɔ mètàŋ a ègwet lɔb a. Bɔɔ li wu bèntsìà mèpɨ̧̀ Mbɔ̧ɔ̧mà bɔ̂ Yesò Klistò ba, e mě me baãaã èlaꞋ mbɨ̀Ꞌɨ̀ bèfɔ̧̀ nè Yesò ane mèngùꞋebȩ tɔsì.

Bɔ maꞋa Satàn a èwet

⁷ ÀfɨꞋa mèngùꞋebȩ mu tɔsì nàa lìà la, bɔɔ tsǐ a Satàn a èbem tèfȩ tu.

⁸ Tàa dzəâ e ghǎ bètɔ̀Ꞌa ngɔ̀ŋ bàgème è wu Gog bɔ̂ Magòg la, e fɨte bòt. Satàn nàa li fete bòt mbɔŋ bɔ̀ɔ ndzǎ̧ mbɨ̀Ꞌɨ̀ těsɔnke *èdzî la, nê bɔ̀ màꞋà èbet adù̧ Mbɔ̧ɔ̧mà.

⁹ Bɔ ghɨ̀ ale, saŋe a sitsǎꞋ ègème, ngà ngààle àdziꞋa bòt Mbɔ̧ɔ̧mà àa ntsèke la, nè àpfəèà nɨ̧ a Mbɔ̧ɔ̧mà yu tàa nkɔ̀ŋkà la. Bɔ ghaale ale, èwet e dzəè a ègwet nchu a si ndììme awɔb bàgème.

¹⁰ Bɔ ghɨ̀ ale, maꞋa Satàn wu tà fɨte awɔb la a èwet ko àa mbɨ̀Ꞌɨ̀ èlemè nkòòla nè èkem adù̧, bɔ zǐ màꞋa nyà̧mɔ̀Ꞌ yu bɔ̂ ndàꞋàtɔŋ fɨ̀te wu a èbèm la. Bɔ̀ɔ me ye ngoꞋ a èbèm, ètsəꞋ nè nèngû̧ ane àlia nè àlia.

ÈsaꞋa ndìa ngɔ̀ŋ

¹¹ ÀfɨꞋa mbɔŋ e ndze taꞋa àtɨ̧a kèfə. Wòt kǒ wu a ègwet tà tseke la. SitsǎꞋ bɔ̂ ègwet e nyɔ̂ a mbì ŋut tè bɔ̀ ka tsi ndze.

¹² E mè ndze bòt bɔ li mpfəèꞋtê la, bɔjûŋ nè bɔ̀techɨɨle, bɔ tɨ̧ɨ̧te a mbì àtɨ̧a kèfɔ̧̀ yu. Bɔ ghaꞋa èkatè ko. Bɔ ghɨ̀ ale, mè ngaꞋa àyea ko nè àkatè, è wù àkatè mèmpème la. Bɔ ghaꞋte èkatè bu saꞋa bòt bu bɔ li mpfəèꞋtê la ane mènəè bɔ li ngɨ̀ la.

¹³ ÀfɨꞋa mbɔŋ *èdzî e ŋa bòt bu bɔ li mpfəèꞋtê a èbèm la, èvə nè àlaꞋ a bèmpfəà a mèè ŋa è bu nè bòt abot la, bɔ saꞋa awɔb bàgème ane àghɨa waa waa li ngɨ̀ la.

¹⁴ Bɔ ghɨ̀ ale, màꞋà èvə nè àlaꞋ a bèmpfəà a èbem èwet ko àa mbɨ̀Ꞌɨ̀ èlemè nkòòla nè èkem adù̧ la. Èlemè waa èwet àa nkòòla adù̧ la wu èvə lu wòt nàa mpfəa mè mpfəa la.

¹⁵ Bɔ nɨ a waa waa èlen tò è le kaꞋa wu a èbem àkata mèmpème yu la, maꞋa a èbem èlemè wu nkòòla la.

« Roimhe

Air adhart »

Lean sinn:

Ceanglaichean taic

Sanasan