Bìoball air-loidhne

Ètsə 16 - Mundani

TèpfəꞋte ntsǒ Mbɔ̧ɔ̧mà

¹ ÀfɨꞋa mbɔŋ e me zə àtɔŋ ko a me ŋȩ a èbem lob nɨ̧ Mbɔ̧ɔ̧mà yu shua abua bɔntu̧ Mbɔ̧ɔ̧mà bu basà̧à̧mbe la nê, “Bɨ̀ ghǎ nɨ tèpfəꞋ tu tesà̧à̧mbe nè ntsǒ Mbɔ̧ɔ̧mà a tèbèm la ntsəè a sitsǎꞋ.”

² A làꞋà ale wantu̧ mbì ghà ntsəè è li ne èpfəèꞋ a sitsǎꞋ. Tà tsəè ale, fɨŋtsə te bê ntu ane bòt bu bɔ bɔ àlȩê a nyà̧mɔ̀Ꞌ yu, mè me wùꞋte a wamâlem tò wu la. Fɨŋ te mbɔŋ te taꞋa wua sàa.

³ We babe ane bɔntu̧ Mbɔ̧ɔ̧mà bu tsəè è li ne èpfəèꞋ a èbem *èdzî. Tà tsəè ale, mèleb mu gheblè ntsìꞋi mbɨ̀Ꞌɨ̀ àlo̧ a mpfəà. Àghɨa yu̧ àgème àa a èbem mèleb mbɔŋ la a pfə.

⁴ We betat ane bɔntu̧ Mbɔ̧ɔ̧mà bu tsəè è li ne èpfəèꞋ a èbem mèdzî nè badzì bàgème, be gheblè ntsìꞋi àlo̧ mɨ̧̂.

⁵ E me zə wantu̧ Mbɔ̧ɔ̧mà wu àtsəa àfàꞋ atò wu màndȩa mèleb la nê, “Àwɔ̀ wu à wuê ndàꞋà Mbɔ̧ɔ̧mà la, Àwɔ̀ wu àa və mè ndzaŋe wu tea mèmbùꞋu la, Àà saꞋa mènəè mê wuê ndɨŋndɨ̀ŋ.

⁶ Bòt baa e li mbùŋè bòt bê nè bèndàꞋàtɔŋ bê, à ŋa àlo̧ bɔ nu. Bɔ wua ndzèa ngoꞋ è kùꞋu ane àfàꞋ àyɔb la.”

⁷ AfɨꞋa mbɔŋ e ndzə àtɔŋ ko a dzəâ adzìꞋ yu bɔ̀ɔ ntò̧à banyà̧ adù̧ ŋa abua Mbɔ̧ɔ̧mà la a nê, “Mbɔ̧ɔ̧mà Lefɨ̀Ꞌ Àtsèàngɔ̀ŋ leꞋ, A wu wòt nkûŋ mè me saꞋa mènəè mê wuê ndɨŋndɨ̀ŋ!”

⁸ We bakwì ane bɔntu̧ Mbɔ̧ɔ̧mà bu tsəè è li ne èpfəèꞋ ntsǒ Mbɔ̧ɔ̧mà adù̧ àtaãnyèm, ngɨ̀ a me tò̧ò̧te bòt mbɨ̀Ꞌɨ̀ èwet.

⁹ Àtaãnyèm yu a tò̧ò̧tè àwɔb ale, bɔ tsiꞋi me tsàà tèntsɔ̧̀ɔ̧̀mètsə adù̧ èlen Mbɔ̧ɔ̧mà wu tà bɔ mètàŋ a ègwet ngoꞋte mbɔŋ la. Ngɨ̀ ale ntu̧ kubte ane mènəè kàbɔ̀ŋ mɔb e ŋa mèngùꞋte abua Mbɔ̧ɔ̧mà.

¹⁰ ÀfɨꞋa mbɔŋ we betà̧â̧ ane bɔntu̧ Mbɔ̧ɔ̧mà bu tsəè è li ne èpfəèꞋ adù̧ àtɨ̧a kèfɔ̧̀ nyà̧mɔ̀Ꞌ yu. KèbìꞋà bê nkwen a èbem kèfɔ̧̀ mbɔŋ, bòt e me kwele tèlɨ̧ tɔb nkàà ndɨ àa saa awɔb kwàꞋ ànyaꞋne la.

¹¹ Bɔ me tsàà tèntsɔ̧̀ɔ̧̀mètsə adù̧ Mbɔ̧ɔ̧mà wu a ègwet la, nkàà ngoꞋ tɔb nè fɨŋ tu ane yɔb la. Ngɨ̀ ale bɔ̀ ka bɨ̧ɨ̧ne ekubte ane mènəè kàbɔ̀ŋ mɔb.

¹² We bantùa ane bɔntu̧ Mbɔ̧ɔ̧mà bu tsəè è li ne èpfəèꞋ a èbem èdzî wu bɔ̀ɔ ntɔ ane Yuflètìs la. Èdzî wu e yu̧ nenkèm, mbɨ̀Ꞌɨ̀ bèfɔ̧̀ bu be dzəâ àbâ yu nyèm nàa saꞋa la aa ko etu̧ èdzî wu.

¹³ E me ye fote kàbɔ̀ŋ ko tetat tè nɔ̀ŋkè mbɨ̀Ꞌɨ̀ èghɔɔbe la, te me dzəâ a ètsəê dlagɔ̀n wu, nè ètsəê nyà̧mɔ̀Ꞌ yu, mè nè ètsəê bèndàꞋàtɔŋ fɨte bu.

¹⁴ Fo tàa wu bɔntu̧ Satàn, mbɔ̀ mètàŋ a màngɨa ènəê kà ye àfəa, ngà abua bèfɔ̧̀ sitsǎꞋ bàgème e fèta wɔb bɔɔ taŋke enû a Mbɔ̧ɔ̧mà Àtsèàngɔ̀ŋ ane àlia nɨ̧ yu tàa nyɨꞋte ntsǒ zi la.

¹⁵ “Bɨ̀ yute, maa kɨꞋɨ mbɨ̀Ꞌɨ̀ tsɔŋ. Ntsɔ̧̀ wu wòt wu tà tseke àtatsi me lȩ, nɔ̀ŋè ndǐ ti a ngèt zi mbɨ̀Ꞌɨ̀ ye ghà kà kwaãaã ndǐ me bɔ àtsəa kɔꞋɔ la.”

¹⁶ Fo tu te ghɨ̀ ale, fete bèfɔ̧̀ bu àdziꞋa ko bɔɔ ntɔ ane ndɨ̧ Ebùlù nê Àmagedòn la.

¹⁷ We basà̧à̧mbe ane bɔntu̧ Mbɔ̧ɔ̧mà bu tsəè è li ne èpfəèꞋ a èbem fo. TaꞋà àtɔŋ ko a dzə a ègwet àtɨ̧a kèfɔ̧̀ a Mbɔ̧ɔ̧mà a èbem lob nɨ̧ Mbɔ̧ɔ̧mà nê, “A mî!”

¹⁸ MèkàꞋà me kàꞋa, èfâŋ e mè gwet, sitsǎꞋ mè nyìꞋnè kwàꞋ ànyaꞋne. SitsǎꞋ bakà li mè nyìꞋne a èlɨ mbɔŋ mbɨ̀Ꞌɨ̀ Mbɔ̧ɔ̧mà li ngɨ̀ wɔ̀bȩ̂ la. MènyiꞋi sitsǎꞋ mbɔŋ li mbê ngɨ̀Ꞌnê.

¹⁹ TaꞋà àpfəèà nɨ̧ yu a li ngàbtè ane èbâ betat, èpfəè nɨ̧ a ngɔ̀ŋ ègème e kwèà. Ale, Mbɔ̧ɔ̧mà kù̧ù̧te àpfəèà nɨ̧ yu bɔ̀ɔ ntɔ ane Babilɔ̀n la, ngɨ̀ ntsǒ zi nɔ̀ŋke a ègwet a yùà tè ngà ndìà. Ntsǒ mbɔŋ wu mbɨ̀Ꞌɨ̀ ndɔŋ mèlùꞋ nàa ndìà, bɔ̀ɔ ŋɨꞋɨ wòt tàa nu la.

²⁰ ÈdziꞋ si èyuube ègème a èbem èdzî e bê nyɔ̂, bɔ̀ ka tsi ndzè tèbȩtsə.

²¹ TaꞋà èwèt ko e chu nkwènte ègwet bɔbȩ. Kèmbèm èwèt kemɔꞋ ke me lèlè mbɨ̀Ꞌɨ̀ mbe sìmen. NgoꞋ mbɔŋ li mbê nge tê bòt e tsiꞋa ntsàà tèntsɔ̧̀ɔ̧̀mètsə adù̧ Mbɔ̧ɔ̧mà.

« Roimhe

Air adhart »

Lean sinn:

Ceanglaichean taic

Sanasan