Bìoball air-loidhne

Ètsə 14 - Mundani

Èkû̧ bòt bɔ peme la

¹ E mèè ndȩ̀ me ye ndze Wanjɨ̀ wu tà tɨ̧ɨ̧ a ègwet èbȩ Zayɔ̀n la. Bòt bètɔsì ènkɨ̀ nè èghem yekwì ntsɔ̀b bakwì bɔ shɨ èlen tò nè è le Tǎt tò a mèsi mɔb la, e tɨ̧ɨ̧te bɔ̂ tò ba abot.

² E ndzə àtɔŋ ko a dzə a ègwet la, a me jùꞋù mbɨꞋɨ̀ mèdzî nchua a ègwet èbȩ la, mè me jùꞋù mbɨꞋɨ̀ èfâŋ kekweelè. Àtɔŋ mbɔŋ a me bɔ̀ mbɨ̀Ꞌɨ̀ àyea bòt ndùꞋa lèkɨŋ la.

³ Bòt ngaa bàgème e tɨ̧ɨ̧te a mbì àtɨ̧a kèfɔ̧̀ yu, nè èghɨ bu bekwì è wu yu̧ la, nè bɔɔjuŋ bu èghem yebe ntsɔ̀b bakwì la, me kɔ̧ɔ̧ ètsəèkù̧ fi. Wòt kǒ tà li ngu eko ètsəèkù̧ mbɔŋ tsa la è li kà wuê, kà wu bòt bu bètɔsì ènkɨ̀ nè èghem yekwì ntsɔ̀b bakwì, bɔ chùꞋù ètsə bɔb a sitsǎꞋ la.

⁴ Bòt baa wu bòt bu bɔ nɔ̀ŋè ènyit yɔb ntsɔ̧̀, bɔ̀ ka li mè paꞋte àvi la. Bɔ li ngua nkùŋà Wanjɨ̀ wu àdziꞋ àgème tàa ngà la. Eyaa wu bòt bɔ làà àwɔb nchùꞋù ètsə bɔb ayɔɔ bɔbȩ, mbɨ̀Ꞌɨ̀ èghɨ mbì bɔ fuꞋu ŋa abua Mbɔ̧ɔ̧mà bɔ̂ Wanjɨ̀ wu e nɨ nyɨꞋte nê èbu bɔ̀ bele ka fùꞋù la e wu abua tò la.

⁵ Bɔ bakà li me làꞋà mèfà̧, àghɨa à ka meè ngu betsiꞋa wòt fèèlè àwɔb adù̧ la.

Bɔntu̧ Mbɔ̧ɔ̧mà batat

⁶ ÀfɨꞋa mbɔŋ, e mèè ndze wantu̧ Mbɔ̧ɔ̧mà kǒ ndèa a ègwet la. Tà nɨ Ntu̧ Ntsɔ̧̀ kà wu elìa me nɨa nkɨ̀Ꞌa elàꞋa abua bòt bu bɔ̀ɔ ntsèka a sitsǎꞋ la, bòt èlaꞋ ègème, nè èndà̧ ègème, nè ndɨ̧ tègème, mè nè tèwuute bòt tègème.

⁷ Tà ŋȩ ane àtɔŋ nɨ̧ nê, “Bɨ̀ bɔa Mbɔ̧ɔ̧mà, ŋa mèngùꞋte abua tò, nkàà nê àfɨꞋa tàa saꞋa bòt bàgème la a kuêꞋ. È wu ale, bɨ̀ wùꞋte atò wu tà ghɨ̀ ègwet nè sitsǎꞋ nè *èdzî, mè nè badzì bàgème la.”

⁸ Wantu̧ Mbɔ̧ɔ̧mà kǒ, è kùŋe we mbì wu la nê, “A kwen ɔɔ̀. Àpfəèa nɨ̧ yu bɔɔ ntɔ ane Babilɔ̀n la a kwen. Àpfəèa mbɔŋ a ghɨ̂ èlaꞋ ègème e nu mèlùꞋ kèkweelè àbɨ̧ tò yu tàa mpàꞋtâ la.”

⁹ Wekǒ nè wantu̧ Mbɔ̧ɔ̧mà, è wu we betat la, è kùŋè àwɔb, me ŋȩ ane àtɔŋ nɨ̧ shua nê, “Wòt tà wùꞋte nyà̧mɔ̀Ꞌ yu, nè wamâlem tò wu, mè mbɨ̧̀ɨ̧̀ne bɔ zì àlȩê a èsi tò kò adù̧ àbu atò leꞋ la,

¹⁰ tà kò nê ntsǒ Mbɔ̧ɔ̧mà naa nɔ̀ŋke àtsəa tò. Taa nu mèlùꞋ kèkweelè Mbɔ̧ɔ̧mà, è wu ntsǒ tò la. Ntsǒ mbɔŋ naa wu mbɨ̀Ꞌɨ̀ mèlùꞋ kà bɔ fȩ̀ȩ̀tè nè mèleb. Tàa li nyi a èbem èwet àa nkòòla mbɨ̀Ꞌɨ̀ èkem la, e me ye ngoꞋ kèkweelè a mbì bɔntu̧ Mbɔ̧ɔ̧mà nè Wanjɨ̀ wu.

¹¹ NdiꞋte èwet wu ntò̧à àwɔb la, te me kɔꞋɔ ngà a ègwet ane àlia nè àlia. Bɔ̀ɔ̀ wàa bàgème bɔ̀ɔ ngùꞋtà nyà̧mɔ̀Ꞌ yu nè wamâlem tò wu la, mè mbɔ àlȩê èlen tò ane yɔb la, è ka li bɔ mèndzète ane àlia ègème, nèngû̧ kò ètsəꞋ leꞋ a.”

¹² Ale, a nyɨꞋtè nê bòt Mbɔ̧ɔ̧mà è kuule mèntɨ̧ɨ̧ mɔb, bòt bu bɔ̀ɔ nɔ̀ŋà mbɨ̧te Mbɔ̧ɔ̧mà mèè me kùŋa Yesò nè èntɨ̧ɨ̧ wɔb wemɔꞋ la.

¹³ E me zə àtɔŋ a dzəè a ègwet me shu nê, “Shɨ àghɨ yaa a si: Ntsɔ̧̀ wu bòt bu bɔ̀ɔ pfə mbɨ̀Ꞌɨ̀ bòt Yesò e bùꞋu àfɨ̀Ꞌ yaa me ghà ne mbì la.” Fo Mbɔ̧ɔ̧mà nê, “Oo, wu nkûŋ. Bɔɔ yète ane àfàꞋ àyɔb, nkàà nê àfàꞋa ntsɔ̧̀ àyɔb aa li kùŋè àwɔb.”

¹⁴ E mè ndȩ̀, ndzě mbàꞋ kèfə. Wòt kǒ mbɨ̀Ꞌɨ̀ Waã Wòt tsèke a ègwet mbàꞋ mbɔŋ kwaãaã ntà̧ kèfɔ̧̀ bɔ ghɨ ane goêl la àtsə azi, mè mbèà nyi tètɔ àbu azi.

¹⁵ Wekǒ nè wantu̧ Mbɔ̧ɔ̧mà è dzə a èbem lob nɨ̧ Mbɔ̧ɔ̧mà me ŋȩ shua abua wòt wu tà tseke a ègwet mbàꞋ yu la nê, “Nɨ nyi yè yu mbùꞋ me fùꞋu. ÀfɨꞋa màfuꞋa a kuêꞋ, èghɨ bɔ̀ɔ fuꞋu a sitsǎꞋ la e kuꞋa màfuꞋa.”

¹⁶ Ale, wòt wu tà tseke a ègwet mbàꞋ yu la mì nyi zi fuꞋu èghɨ bu a sitsǎꞋ ègème.

¹⁷ Wantu̧ Mbɔ̧ɔ̧mà kǒ mè ndzəè a èbem lob nɨ̧ Mbɔ̧ɔ̧mà yu a ègwet la, mbɔ̀ nyi tètɔ mɨ̧̂.

¹⁸ Wekǒ nè wantu̧, àfàꞋa tò wu màndȩa èwet la, èdzə àdziꞋ yu bɔ̀ɔ ntò̧à banyà̧ adù̧ ŋa abua Mbɔ̧ɔ̧mà la, ŋȩ ntɔ wòt wu tà bɔ nyi tètɔ yu la nê, “Nɨ nyi yè nkààlè ntsàꞋte àyɨt vȩn yu a sitsǎꞋ la. Tètaãaãte tò te bâŋ.”

¹⁹ Ale, wantu̧ Mbɔ̧ɔ̧mà wu nɨ nyi zi ndòòte tètaãaãte àyɨt tu màꞋtè a èbem àdziꞋ yu bɔ̀ɔ ngɨ̀à mèlùꞋ, à wua nyɨ̀Ꞌtâ ntsǒ Mbɔ̧ɔ̧mà la.

²⁰ ÀdziꞋ yu bɔ̀ɔ ntsəèꞋa tètaãaãte àyɨt tu la a ntsě a èbem àpfəèà nɨ̧ yu. Bɔ tsəꞋə tètaãaãte àyɨt tu ale, àlo̧ a dzəè abot la, a ghà si mbɔŋe ane èmaꞋà yebe, nchu ngà à tsɔꞋɔ mbɨ̀Ꞌɨ̀ èdzî ane bèmȩl ènkɨ̀ yebe, mè nchu ngà a èbem si ane èka betà̧â̧.

« Roimhe

Air adhart »

Lean sinn:

Ceanglaichean taic

Sanasan