Ètsə 12 - Mundani

Àvi kǒ bɔ̂ dlagɔ̀n

¹ Àghɨa ko à ghe la a pùùlà a ègwelebuule. Àvi kǒ wu abot, àtaãnyèm a buule atò, tà tɨ̧ɨ̧ a ègwet èŋu, kwaãaã ntà̧ kèfɔ̧̀ bɔ ghɨ ane těnto̧tsə ntsɔ̀b tebe la.

² Tà li nkɔt àfɨꞋa màmbia a kùꞋ, tà me lu̧u̧ta ndɨ̀à kwàꞋ ànyaꞋne, mbɨ̀Ꞌɨ̀ tàa nkɨ bi la.

³ Àyea ko nè àghɨ a ghe la, a mè mpùùlà a ègwelebuule. E ndze taꞋa nyà̧ kǒ mèmbaŋ è fəə dlagɔ̀n la, è bɔ̀ ètsə besà̧à̧mbe, nè ndɔŋtsə èghem, mè nkwaãaã ntà̧ nàà nyɨ̀Ꞌta mètàŋ tò la adù̧ àtsə àgème.

⁴ Tà nɨ èku̧ li səè àbâ těnto̧ yeamɔꞋ ntsàà a si, ane těnto̧tsə tègème a ègwelebuule bɔ ghàbte ane èdzìꞋ betat la. Dlagɔ̀n wu tɨ̧ɨ̧ a mbì àvi wu nkɨ bi la, me chɨ̀Ꞌɨ àvi wu naa bi waã wu yea kwele.

⁵ Tà ghɨ̀ ale, mbi wambâ̧, è wu wòt tàa me nɨ ambàŋ àtɨ̧ɨ̧na mbà̧aã èlaꞋ ègème kà ku tèsȩ la. Tà bi waã wu ale bɔ bê nɨa tò ndùùlà ngà abua Mbɔ̧ɔ̧mà nè àdziꞋa àtɨ̧a kèfɔ̧̀ atò à wu la.

⁶ Àvi wu lùùlà nga àbâ àlaꞋ àyuube, àdziꞋa Mbɔ̧ɔ̧mà e taŋke abua tò, ejɨ atò ane èlibȩ tɔsì nè ènkɨ̀ yebe nè èghem yentùa la.

⁷ ÀfɨꞋa mbɔŋ èbet e kwen a ègwet. TaꞋà wantu̧ Mbɔ̧ɔ̧mà wu èlen tò wu Mȩkèl la bɔ̂ bɔntu̧ ko e me nû nkɨ̀Ꞌnè dlagɔ̀n wu. Dlagɔ̀n wu bɔ̂ bɔntu̧ bi e nù àyɔb mɨ̧̂,

⁸ ka Mȩkèl bɔ̂ bɔntu̧ ko bu e tsè àwɔb, tè bɔ̀ ka tsi mbɔ̀ àdziꞋa màntseka a ègwet.

⁹ Bɔ ghɨ̀ ale, màꞋà taꞋà dlagɔ̀n wu a sitsǎꞋ. Wu dlagɔ̀n wu è li ndzaŋe wu bɔ̀ɔ ntɔ ane fɔ̧̀ fote kàbɔ̀ŋ nè Satàn la, tà mè me fɨte bòt ngɔ̀ŋ bàgème la. Bɔ li màꞋà atò a sitsǎꞋ bɔ̂ bɔntu̧ bi.

¹⁰ E me zə àtɔŋ ko a me ŋȩ a ègwet shua nê, “Mèmpème Mbɔ̧ɔ̧mà wa, nè mètàŋ tò nè kèfɔ̧̀ tò è kɨꞋɨ abua ya àfɨ̀Ꞌ yaa. Fɔ̧̀ wu tà yɔꞋ ntsà la è nyɨꞋte mètàŋ mi, nkàà nê bɔ tsì wòt wu tàa ntɨ̧a mbì Mbɔ̧ɔ̧mà àlia àgème ndzìà mènəè àtsəa bɔnyɨ ba la tè maꞋa a si.

¹¹ Wu àlo̧ Wanjɨ̀ wu nè èngǎ̧ nkûŋ tò wu bɔ̀ɔ ndàꞋà la ka bɔnyɨ ba e nɨŋ nù atò tè ntsè la. Bɔ li bɔ̀ ka nɨ mèntsèke mɔb mbɨ̀Ꞌɨ̀ àghɨa ko, nê è màà ngu wuê èvə ko bɔɔ pfə.

¹² È wu ale, tsiꞋ ègwet nè bòt bu a ègwet la è wùꞋtè àwɔb! Ka ngoꞋ naa wua sitsǎꞋ nè èbèm èdzî, nkàà nê Satàn e chu a si nè àlɨ̀ŋ àghɨ a zi, ndɨ̀ wu tà ko nê àfɨ̀Ꞌ àzi a nyɨꞋ la.”

¹³ Mbɨ̀Ꞌɨ̀ dlagɔ̀n wu ye ndɨ bɔ màꞋà àvi a sitsǎꞋ la, tà bùꞋ me kɨ̀ŋe àvi wu tà bi wambâ̧ wu la.

¹⁴ Ka bɔ ŋa tèbaabe taꞋa èfaã kekweelè ko àa ndèa a ègwet la tebe nê tà nɨŋ nde ndùùla dlagɔ̀n wu nga àbâ àlaꞋ àyuube, àdziꞋa bɔ taŋke ejɨɨ atò ane èngùꞋebȩ yetat nè àtem la.

¹⁵ Nyà̧kàbɔ̀ŋ yu tɨɨ mèleb a ètsəê vi mbɨ̀Ꞌɨ̀ èdzî ntsàà akwen àvi wu mbɨ̀Ꞌɨ̀ mèleb mu nàa ŋeꞋe atò enɨ gha.

¹⁶ Ka sitsǎꞋ tɨŋe àvi wu, ngàꞋa ètsəê vi mɨ̀ɨ̀lè mèleb mu dlagɔ̀n wu è tɨɨ a ètsəê vi la.

¹⁷ A ghɨ̀ ale, dlagɔ̀n wu tsǒ ane àvi wu kwàꞋ ànyaꞋne, tè ngà è màꞋà èbet nè àbəꞋa bòt àndǎ̧ atò, è wu bòt bu bɔ̀ɔ nɔ̀ŋà mbɨ̧te Mbɔ̧ɔ̧mà mè bɨ̧̀ɨ̧̀ne nê èghɨ bu Yesò nyɨꞋte la wu nkûŋ la. Dlagɔ̀n wu tɨ̧ɨ̧ a ngèt *èdzî.