Bìoball air-loidhne

Ètsə 10 - Mundani

Wantu̧ Mbɔ̧ɔ̧mà kǒ nè awa àbaa àkatè kǒ

¹ E mè ndze wantu̧ Mbɔ̧ɔ̧mà kǒ tà taꞋa bɔ mètàŋ la nchua ègwet. MbàꞋ è kàba atò mbɨ̀Ꞌɨ̀ ndǐ, nàmbəabaŋ la èghààle àtsəa tò. Èsi tò e me kàꞋtè mbɨ̀Ꞌɨ̀ àntaãnyèm, èka tò e mè nɔ̀ŋkè mbɨ̀Ꞌɨ̀ àlo̧a èwet nkɔ̀Ꞌa la.

² Awa àbaa àkatè kǒ wu àbu tò bɔ ghaꞋa la. Tà tsia àka àbualu̧ zi a èbem *èdzî, mè ntsia àyeantɔŋ aguŋ.

³ Tà ghɨ̀ ale, ŋȩ ane àtɔŋ nɨ̧ mbɨ̀Ꞌɨ̀ sambàŋ ndèmà la. Tà ŋȩ ale, èfâŋ e gwet yesà̧à̧mbe.

⁴ Èfâŋ yu yesà̧à̧mbe e gwet ale, e mbê nê e nkɨ shɨ ànəa e làꞋà la, me zə àtɔŋ ko a dzəè a ègwet nê, “Ka ntùꞋu mènəè mu èfâŋ yu yesà̧à̧mbe e shu la, à ka shɨa a si.”

⁵ Wantu̧ Mbɔ̧ɔ̧mà wu mâ ye tà tsia àka zia ko a èbem *èdzî nè yea ko aguŋ la, lɔ̀kè àbualu̧ azi ntsàà ègwet.

⁶ Tà tsàà ale nkà̧ ane èlen Mbɔ̧ɔ̧mà wu tà wu ane àlia nè àlia, e wu tà ghɨ̀ ègwet nè àghɨa ègème àa èbèm la, nè sitsǎꞋ nè àghɨa ègème àa a èbèm la, mè nè mèleb nè àghɨa ègème àa èbèm la nê, “Mbɔ̧ɔ̧mà ka tsi tsòkè àfɨ̀Ꞌ a màngɨa àghɨa tà taŋke e ghɨ̀ la a.

⁷ ÀfɨꞋa wantu̧ Mbɔ̧ɔ̧mà wu, è wu we basà̧à̧mbe la è tɔ èsɔndɨk li la, mènəè ndò̧ Mbɔ̧ɔ̧mà nàa te, mbɨ̀Ꞌɨ̀ tà li shu bɔfàꞋ bi bu, è wu bèndàꞋàtɔŋ tò la, nê naa wu la.”

⁸ AfɨꞋa mbɔŋ àtɔŋ yu e ndi ndzaã ndzəâ a ègwet la a mè ndàꞋà abua am nê, “Ghǎ nɨ̀ àkatè yu a ghaꞋà àbu wantu̧ Mbɔ̧ɔ̧mà wu àka tò àko a tɨ̧ɨ̧ a èbem *èdzî àyea ko a tɨ̧ɨ̧ aguŋ la.”

⁹ Ale, e ngà abua wantu̧ Mbɔ̧ɔ̧mà wu nê tà ŋa awa àkatè wu abua am. Tà nê, “Nɨŋ nkwet, àa me lǐ a èbèm lê, mbɔ̂ ngu me lɨ̧̀ɨ̧ a ètsəê wê mbɨ̀Ꞌɨ̀ dzə.”

¹⁰ E nɨ awa àkatè wu àbu wantu̧ Mbɔ̧ɔ̧mà wu nkwet. A me lɨ̧̀ɨ̧ mbɨ̀Ꞌɨ̀ dzə a ètsəê am, ka mbɨ̀Ꞌɨ̀ mâ mɨ̀ɨ̀lè la, a tsiꞋi me lì li a a èbèm laã.

¹¹ Bɔ mè shu abua am nê, “À bɔ ndɨ àa mě làꞋa èngǎ̧ Mbɔ̧ɔ̧mà ane ànəa bòt èlaꞋ ègème, nê bòt ndɨ̧ tègème mè nè bèfɔ̧̀ bàgème la.”

« Roimhe

Air adhart »

Lean sinn:

Ceanglaichean taic

Sanasan