Bìoball air-loidhne

Efesɔ̀s 3 - Mundani

ÀfaꞋa Pɔ̂l ayɔɔ bòt kà wu Bèjuê

¹ Àyaa a ghɨ̂, mmɔ̌ Pɔ̂l wu è ngu a tèfȩ nkàà èngǎ̧ Yesò Klistò wu màa ndàꞋà abua yɨ̧ bɨ̀a bòt kà wu Bèjuê la, e me tsàꞋte a Mbɔ̧ɔ̧mà.

² Mâ mɨɨtè nê bɨ zə ndɨ Mbɔ̧ɔ̧mà nyɨꞋte a ntsɔ̧̀ vi, ŋǎ àfàꞋ yaa abua am nê è me fàꞋa nɨa ntɨ̀ŋa wɨ̧ la.

³ Mbɔ̧ɔ̧mà zìambɔŋ li shu am ànəa ndò̧ àzi yu a li à kà tuꞋa àbȩ bòt aa ko la. Mâ nyaꞋà shɨ adzìꞋ ane ànəa mbɔŋ abua yɨ̧.

⁴ Bɨ tɔ àghɨa mâ shɨ la ko bɨa ye ndɨ mâ ko ànəa ndò̧ a Mbɔ̧ɔ̧mà yaa ane Yesò Klistò la.

⁵ È li ngu tê àfɨꞋa mbì, Mbɔ̧ɔ̧mà kà tuꞋu ànəa ndò̧ yaa abua bɔbȩ, ka nè àfɨ̀Ꞌ yaa Fo Mbɔ̧ɔ̧mà è tùꞋu abua bɔntu̧ Mbɔ̧ɔ̧mà nè bèndàꞋàtɔŋ tò.

⁶ Ànəa ndò̧ mbɔŋ wu nê Ntu̧ Ntsɔ̧̀ Mbɔ̧ɔ̧mà è ghɨ̀ bòt kà wu Bèjuê e wu li bɔ èghɨ ntsɔ̧̀ bu Mbɔ̧ɔ̧mà nàa ngɨa ane bòt Izəèlȩê la mɨ̧̂. Bɔ tsiꞋi mbɨ̧̀ ènyit yemɔꞋ, mè mbɔ̀ è wɔb ne èghàb ane èghɨ ntsɔ̧̀ bu Mbɔ̧ɔ̧mà kàꞋa bòt bi la, ndɨ̀ wu bɔ̀ tsiꞋi àghɨ yeamɔꞋ nè Yesò Klistò la.

⁷ Mbɔ̧ɔ̧mà li ngɨ̀ e ngu wafàꞋ a màntsɔta Ntu̧ Ntsɔ̧̀ yaa. E ntsɔ̀ta ane èghab wu tà ŋa abua am la. Tà li ŋa am èghab waa ane mètàŋ mi.

⁸ Mâ batè nkuà nè kwèn tè ntse a tandiakwèn ane bòt Mbɔ̧ɔ̧mà, ka Mbɔ̧ɔ̧mà li nkɔ̀ŋkè am, ŋà am àfàꞋ yaa nê, è me tsɔ̀te Ntu̧ Ntsɔ̧̀ abua bòt kà wu Bèjuê shua awɔb ànəa èwuu èghɨ ntsɔ̧̀ bu Yesò Klistò nàa ŋǎ la.

⁹ ÀfàꞋ am li mè ngu a màngɨa bòt bàgème aa ye ndɨ Mbɔ̧ɔ̧mà nàa ghɨ̌ ànəa ndò̧ àzi ya aa wu la. Mbɔ̧ɔ̧mà wu tà ghɨ àghɨ àgème la li ndò̧ ànəê yaa abua bòt tê àfɨꞋa mbì.

¹⁰ Tà li me ghɨ̀ àyaa ngua nkɨà mbɨ̀Ꞌɨ̀ è wu àfɨ̀Ꞌ yaa tà nyɨ̀Ꞌte àghɨ àgème a ègwet àa mbà̧aã èlaꞋ me ntsìta mènəè la ndi ye bɔ èyì ane àghɨ àgème la. Tà li ngɨ̀ bɔ ye àyaa ane èghɨ tàa ngɨ̀à ane chɔsì la.

¹¹ Mbɔ̧ɔ̧mà li ngɨ̀ àyaa wuê mbɨ̀Ꞌɨ̀ tà li ndzaŋe taŋke a mèmbùꞋu la. Tà li ngɨ̀ Yesò Klistò Lefɨ̀Ꞌ wa ghɨ̀ a tsè wuê mbɨ̀Ꞌɨ̀ tà li ntàŋke la.

¹² Ndɨ̀ wu ba tsiꞋi àghɨ yeamɔꞋ nè Yesò Klistò mè ndzì mèntɨ̧ɨ̧ ma ane tò la, baa ko eghǎ a mbì Mbɔ̧ɔ̧mà elàꞋà ba tò ba kà ye kèbɔɔ.

¹³ Mâ shu̧u̧te awɨ̧ nê bɨ̀ ka mbɨ̧̀ɨ̧̀ne ntɨ̀ yɨ̧ yu ane Mbɔ̧ɔ̧mà nkàà nê e ndzea ngoꞋ ya ambo yɨ̧. Àbȩ̀ a ngoꞋ ya gha jɨ bɨ̀a.

Èkɔŋ Yesò Klistò

¹⁴ Àyaa a ghɨ̂ e teme tènjûŋ taã a si a mbì Tǎt wa Mbɔ̧ɔ̧mà

¹⁵ wu tà ghɨ̂ àndà̧ àgème a ègwet nè sitsǎꞋ a bɔ èlen li la.

¹⁶ Maà ntsàꞋta Mbɔ̧ɔ̧mà nê tà ghǎ ane èghɨ bi bu a ègwet e ghe la, nɨ Fo zi ngɨ̀ èŋa awɨ̧ mètàŋ mbɨ̀Ꞌɨ̀ mèntɨ̧ɨ̧ mɨ̧ naa me kweele.

¹⁷ E mè me tsàꞋte nê bɨ̀ ghɨa Yesò Klistò me tseke a mèntɨ̧ɨ̧ mɨ̧, ndɨ̀ wu bɨ̀a ndzìà èntɨ̧ɨ̧ wɨ̧ ane tò la. Maà ntsàꞋtà nê, tsiꞋ è wu èkɔŋ wɨ̧ ka e baãaã àghɨ àgème bɨ̀a ngɨ̀à la,

¹⁸ mbɨ̀Ꞌɨ̀ bɨ bòt Mbɔ̧ɔ̧mà ko bàgème aa bɔ mètàŋ e nèète ko ndɨ Yesò Klistò nàa ndâ nkɔ̀ŋkà àwɨ̧ la ane ebà àgème,

¹⁹ e mě, kɨꞋɨ te ndzə àdziꞋa bɨ̀a ko èkɔŋ Yesò Klistò la, mbɔ̂ èkɔŋ mbɔŋ e faŋ ntsè àghɨ betsiꞋa bòt e koê la. Bɨ koa èkɔŋ Yesò waa ko bɨa bɔ èntɨ̧ɨ̧ wu Mbɔ̧ɔ̧mà bɔ la nènkèm.

²⁰ Bà ŋa mèngùꞋte abua Mbɔ̧ɔ̧mà wu tàa faꞋa ane ya nyaŋ tè ntsè ndɨ betsiꞋa ba mɨ̀ɨ̀tè kò shuê la.

²¹ TsiꞋ Mbɔ̧ɔ̧mà bɔ mèngùꞋte nkàà bòt chɔsì nè Yesò Klistò àfɨ̀Ꞌ àgème ane àlia nè àlia. Àmèn.

« Roimhe

Air adhart »

Lean sinn:

Ceanglaichean taic

Sanasan