Ebùlù 8 - Mundani

Yesò, Àtsəa bèntsìà mèpɨ̧̀ àya

¹ Ngule ànəê yu ba shua ane èngà̧ waa la wu nê, ba bɔ àtsəa bèntsìà mèpɨ̧̀ Mbɔ̧ɔ̧mà mbɨ̀Ꞌɨ̀ è waa tà tseke a ègwet àtɨ̧a kèfɔ̧̀ a ègwet àbâ àbualu̧ a Mbɔ̧ɔ̧mà àtsəa ngɔ̀ŋ la.

² Tàà fàꞋà mbɨ̀Ꞌɨ̀ àtsəa bèntsìà mèpɨ̧̀ àdziꞋa ntsèm a Mbɔ̧ɔ̧mà, è wù ngule àdziꞋa bɔɔ nguꞋta Mbɔ̧ɔ̧mà, Tǎt wa Mbɔ̧ɔ̧mà zìambɔŋ vəèəè ka wu wɔ̀bȩ̂ tà vəèəè la.

³ Bɔɔ̀ ngɨ̀ bɔ̀ me zi wòt ègème ane àtsəa bèntsìà mèpɨ̧̀ Mbɔ̧ɔ̧mà, bɔ wua nkɨà mbɨ̀Ꞌɨ̀ taa me ŋa èghɨ, mè nkɨ̧̀ɨ̧̀ma banyà̧ ŋǎ abua Mbɔ̧ɔ̧mà. Ale, a li mbɔ̀ŋ nê àya nè àtsəa bèntsìà mèpɨ̧̀ Mbɔ̧ɔ̧mà à bɔ àghɨa ko tàa ŋa abua Mbɔ̧ɔ̧mà la mɨ̧̂.

⁴ Tà li ngɨ̀ ale ngu a sitsǎꞋ, ko betsiꞋa tà kà bê ngu ntsìà mèpɨ̧̀, nkàà nê, bòt e yàŋe wu bɔ̀ɔ ŋǎ èghɨ abua Mbɔ̧ɔ̧mà mbɨ̀Ꞌɨ̀ mbɨ̧te Bèjuê tèa nkɨà la.

⁵ ÀfàꞋ yu bèntsìà mèpɨ̧̀ Mbɔ̧ɔ̧mà ba àa ngɨ̀à la, wu àfəa àghɨa à wu a ègwet la. Àa mbɨ̀Ꞌɨ̀ a li ngu ane Musì la. È li ngu àfɨꞋa tàa nkɨ e ghɨ̀ àdziꞋa ntsèm yu a èbem lob Mbɔ̧ɔ̧mà la, Mbɔ̧ɔ̧mà səèŋkè àtû̧ atò nê, “Ye nê, à ghɨ̌ àghɨ àgème wuê mbɨ̀Ꞌɨ̀ e ndi nyɨ̀Ꞌte awê a ègwet èbȩ la.”

⁶ Ka mbɨ̀Ꞌɨ̀ ndɨ àa la, àfaꞋa Mbɔ̧ɔ̧mà ŋa abua Yesò Klistò la a taꞋa tsè àyɔb, wuê mbɨ̀Ꞌɨ̀ mènkàꞋa kèkweelè mu Yesò tɨ̧ɨ̧ a kètsìà adù̧ la è tsě e me nyǎꞋ la. MènkàꞋa màà wu adù̧ ngule èghɨ ntsɔ̧̀ bu bɔbȩ àa li bɔ bùà la.

⁷ MènkàꞋa Kèkweelè mbì maa li ngɨ̀ ale ngu ko èghɨ àghɨ àgème mbɨ̀Ꞌɨ̀ Mbɔ̧ɔ̧mà kɨa la ko tà li tà kà tsi ngɨ̀ è me ko tsa.

⁸ Ale, Mbɔ̧ɔ̧mà li ndze nê, bɔ bakà kuꞋ a màngɨa àghɨ mbɨ̀Ꞌɨ̀ ye kɨa la ale, tà nê, “Naa li ngu àfɨ̀Ꞌ àko e ngɨ̀ mènkàꞋa kèkweelè fi mɔ̧, ba bòt àndǎ̧ Izəèlȩê, nè bòt àndǎ̧ Judà.

⁹ MènkàꞋa Kèkweelè Fi màa ka li wu mbɨꞋɨ̀ mènkàꞋa kèkweelè mu e ndi ngɨ̀ nè bètǎt nyaꞋ bɔb, àfɨꞋa e ndi mbà̧aã àbu ayɔb ndzə a èbem àlaꞋ a Ejìb la a. Mmɔ̌ Tǎt wɨ̧ Mbɔ̧ɔ̧mà e ngua shua nê, bɔ lè kaꞋa ghɨ̂ mbɨ̀Ꞌɨ̀ ba tò ba e li nɔ̀ŋè la, ale e ntsì àbu am ane yɔb.

¹⁰ Eyaa wu mènkàꞋa kèkweelè mu màa ghɨ̀ ba bòt Izəèlȩê la. Mmɔ̌ Tǎt wɨ̧ Mbɔ̧ɔ̧mà e ngua shua nê, àfɨꞋa mbɔŋ aa li nkùꞋ, e ndzì mbɨ̧ taã a ètsə bɔb, mè ndzì tua a mèntɨ̧ɨ̧ mɔb. Maa li wu Mbɔ̧ɔ̧mà wɔb, bɔɔ wu bòt bɔ̧.

¹¹ Wòt kǒ ane yɔb ka li wu nyɨꞋtà wanyɨ vi a, wòt kà meè ngu li eshu abua wanyɨ vi nê, tà ko a Mbɔ̧ɔ̧mà. Aa ale nkàà nê, bɔɔ li enɨ am bàgème ane Mbɔ̧ɔ̧mà wɔb, e bùꞋu ane e we tèchɨɨle ane yɔb, e gha wu ane bɔɔjuŋ.

¹² Maa nga eku tèsȩ tɔb ane mènəè bɔ fà̧à̧tè la, mè ngwaꞋa mènəè kàbɔ̀ŋ mɔb.”

¹³ Mbɔ̧ɔ̧mà me làꞋa ànəa mènkàꞋa kèkweelè fi ale, ngɨ̀ me mbì mu è tsìꞋi àku. Bɔ̀ɔ ngɨ̀ bɔ̀ baka tsi ngua mbà̧à̧ta àghɨ, tè à tsìꞋa ndènà lène bɔ ko nê, bɔ bele elèène ànəa yùà.