Ebùlù 4 - Mundani

Àlia bòt Mbɔ̧ɔ̧mà àa li yètè la

¹ Ndɨ̀ wu Mbɔ̧ɔ̧mà bakà kùbte mènkàꞋa mi nê baa li ekɨꞋɨ àdziꞋa yea ghɨ̌ baa yètè la, bɨ̀ me ko awɨ̧ mbɨ̀Ꞌɨ̀ ka wòt kǒ ane yɨ̧ bela ngɨ̀à tà kà tsi nkùꞋù è we tàa nyi àdziꞋa mbɔŋ la.

² Ba li ndzəâ Ntu̧ Ntsɔ̧̀ Mbɔ̧ɔ̧mà wuê mbɨ̀Ꞌɨ̀ bɔ li ndzə la, ka ndzə ale èngǎ̧ mbɔŋ è ka ghɨ a ntsɔ̧̀ ko ane yɔb nkàà nê, bɔ li bɔ̀ ka bɨ̧ɨ̧nè a mèntɨ̧ɨ̧ mɔb nê Mbɔ̧ɔ̧mà naa ghɨ̀ mbɨꞋɨ̀ tà shu la.

³ Bàa wu ba bɨ̧ɨ̧ne èngǎ̧ Mbɔ̧ɔ̧mà la aa nyia àdziꞋa mbɔŋ ndzètà wù mbɨ̀Ꞌɨ̀ Mbɔ̧ɔ̧mà shu la nê, “E ndi ntsǒ tê ndzì nkà̧ nê, ‘Bɔ̀ ka lɔ̀Ꞌ àlia ekɨꞋɨ àdziꞋa màa ghɨ̌ bɔɔ yètè la a!’ ” Tà li me làꞋà àyaa ale mbɔ̂ ndzaŋe taŋke àfàꞋ àzi te àfɨꞋa ngɔ̀ŋ li mbùꞋ la.

⁴ Àkata Mbɔ̧ɔ̧mà a làꞋà ànəa àli yu è wu èli besà̧à̧mbe ane nkàb la adzìꞋa ko nê, “Mbɔ̧ɔ̧mà li fàꞋ àfàꞋ àzi àgème, è me wu ane àli yu è wu èlibȩ besà̧à̧mbe ane nkàb la tà yètè.”

⁵ Tà li mè shu a èbem àdziꞋa àkata mbì yu nê, “Bɔ̀ ka lɔ̀Ꞌ àlia ekɨꞋɨ àdziꞋa màa ghɨ̌ bɔɔ yètè la a.”

⁶ Bòt bu bɔ li mbɨ̀ ndzəâ Ntu̧ Ntsɔ̧̀ Mbɔ̧ɔ̧mà la, e li bɔ̀ ka nyi àdziꞋa tàa ghɨ̌ bɔɔ yètè la, nkàà nê bɔ li ntù̧u̧ eyute ànəa tà shu la. A li mbàte ngu ale, ka bòt ko e bɔ̂ ngu bɔ̀ɔ nyi taa ghɨ̌ bɔɔ yètè la.

⁷ Ale, Mbɔ̧ɔ̧mà mê nɔ̀ŋè àli ako me tɔ nê “Laane”. MèngùꞋebȩ ko li ntaꞋa tsě, tà ghɨ̀ Dàbid làꞋ mèngà̧ maa ba tɔ a èbem Àkata Mbɔ̧ɔ̧mà tè ndɔ̀Ꞌ la nê, “Bɨ zə ànəa Mbɔ̧ɔ̧mà shu la laane, bɨ̀ ka ngɨ̀ mèntɨ̧ɨ̧ mɨ̧ me kweele.”

⁸ Joshùà li ngɨ̀ ale ngɨ̀ bɔ yètè a èlɨ̀ wu Mbɔ̧ɔ̧mà li nkàꞋ nê yea ghɨ̀ la, ko Mbɔ̧ɔ̧mà li tà meè ndàꞋ ànəa àli ako tsa.

⁹ Ale, bòt Mbɔ̧ɔ̧mà e bèla mbɔ̌ àliapfəèa àko bɔ̀ɔ yètè la, mbɨ̀Ꞌɨ̀ Mbɔ̧ɔ̧mà li fàꞋ è me wu ane èlibȩ besà̧à̧mbe tà yètè la.

¹⁰ Wòt gème tà nyi àdzìꞋa màndzeta yaa mbɨ̀Ꞌɨ̀ Mbɔ̧ɔ̧mà li nkàꞋ la, è paa àfàꞋ àzi tè me yète mbɨ̀Ꞌɨ̀ Mbɔ̧ɔ̧mà li ndzètè ane àzi la.

¹¹ Ale, bà nyɔ̀Ꞌtà ndze nê ba nyi àdzìꞋ yu Mbɔ̧ɔ̧mà nàa ghɨ̌ baa yètè la. Bà ka mbɨ̧̀ɨ̧̀ne wòt kǒ ane ya tseke kà nyi mbɨ̀Ꞌɨ̀ bɔ li nkwèèle àtsə bɔ̀ kà kǒ nyi la.

¹² Èngǎ̧ Mbɔ̧ɔ̧mà e wu èyu̧ mè mbɔ̀ mètàŋ. E tɔɔ te ntsè nyi èbà bebe. Aà sɔ̀ɔ̀bà tè ngà ndzə àdziꞋa àlɨ̀ŋka wɔ̀bȩ̂ nè fo tò à wu abot la, mè sɔ̀ɔ̀bà tè ngà ngu a èbem èkwȩ bɔ̂ mbɔ̀ɔ̀latsə. Aa ngɨ̀à Mbɔ̧ɔ̧mà ko àghɨa wòt nàa mɨ̀ɨ̀tà la nè àyea tàa nkɨ e ghɨ̀ la.

¹³ Àghɨa ko a ntsě betsiꞋa a lò̧ò̧tè a mbì Mbɔ̧ɔ̧mà la. Tàà ndzea àghɨ àgème a ngɔ̀ŋ ŋaa mbɨ̀Ꞌɨ̀ àa la, è mè ngu abua tò bàa li làꞋà ànəê àghɨ àgème bàa ngɨ̀à la.

Yesò wu àtsəa bèntsìà mèpɨ̧̀ Mbɔ̧ɔ̧mà

¹⁴ Yesò Waã Mbɔ̧ɔ̧mà wu àtsəa bèntsìà mèpɨ̧̀ a Mbɔ̧ɔ̧mà àya, tà kɔꞋ ngà tè ntsè ègwet la. È wu ale, bà baãaã ànəa mèntɨ̧ɨ̧ ma mu ba zi ane Yesò la ntsɔ̧̀ me nɨa ngà nè mbì.

¹⁵ Àtsəa bèntsìà mèpɨ̧̀ a Mbɔ̧ɔ̧mà yaa ntsě èwuu wòt wu betsiꞋa tà kà ko nkù tèsȩ ta ane mènəè mu bàa njùa adù̧ la. Ka, tà wu wòt bɔ li nkɨke atò ane balu̧ bàgème wuê mbɨ̀Ꞌɨ̀ bàa, ka tà kà ghɨa kàbɔ̀ŋ la.

¹⁶ È wu ale, bà ka mbɔ̀a a mà nkɨꞋa a mbì Mbɔ̧ɔ̧mà wu tàa nyɨ̀Ꞌta ntsɔ̧̀ vi abua bòt la. Bà kɨꞋɨ mbɨ̀Ꞌɨ̀ taa ku tèsȩ ta, enyɨꞋte èkɔŋ vi ane ya, e mě tɨŋe awa.