Bìoball air-loidhne

Ebùlù 3 - Mundani

Yesò tsě a Musì

¹ Bɔnyɨ bɔ̧ bu Mbɔ̧ɔ̧mà làà wa ba nɨ̧̀ ba ayɔɔ bòt nɨ̀ awa ane bòt bi la, bɨ̀ kwàꞋtè èwuu wòt Yesò wu wùà la. Yesò wu wantu̧ Mbɔ̧ɔ̧mà mè ngu àtsəa bèntsìà mèpɨ̧̀ a Mbɔ̧ɔ̧mà yu àa ntɨ̀ŋa wa ane mènəè mu ba bɨ̧ɨ̧nè nê wu nkûŋ la.

² Tà li ngua ngɨ̀à àghɨ àgème Mbɔ̧ɔ̧mà wu ta lȩ̂ atò la shu nê tà ghɨa la wuê mbɨ̀Ꞌɨ̀ Musì li ngua nèètà ndzəa wuê ànəa àfàꞋ àzi a èbem lob Mbɔ̧ɔ̧mà ègème la.

³ Yesò kùꞋu wòt bɔ̀ɔ me ŋa kènuke abua tò nyaŋ tè ntsè a Musì la wuê mbɨ̀Ꞌɨ̀ bɔ̀ɔ nkùkta wòt tà bɔ̧ lob la, tè ntsè lob mbɔŋ la.

⁴ Lob ègème bɔ wòt tà bɔ̧ la, ka Mbɔ̧ɔ̧mà bɔ̂ ngu wòt tà ghɨ àghɨa àgème la.

⁵ Musì li ngua ngɨ̀à àghɨa Mbɔ̧ɔ̧mà è shu nê tà ghɨa la a èbem lob tò, nɨa nyɨ̀Ꞌta àghɨa Mbɔ̧ɔ̧mà nàa li lɔ̀Ꞌɔ e shu la.

⁶ Ka Yesò Klistò Waã Mbɔ̧ɔ̧mà wu àtsəa lob tò, mè me ghɨ̀ wuê àghɨa Mbɔ̧ɔ̧mà laꞋnê tà ghɨ la a èbem lob Mbɔ̧ɔ̧mà. Bàa mbɔŋ e wu lob Mbɔ̧ɔ̧mà na ba nèètà mbà̧aã ànəa àghɨ yu ba chɨ̀Ꞌà la kà ye kèbɔɔ, ngàꞋtà àwa adù̧ la.

Mèndzète abua bòt Mbɔ̧ɔ̧mà

⁷ Mbɨ̀Ꞌɨ̀ Fo Kèfə è shu la nê, “Bɨ zə ànəa Mbɔ̧ɔ̧mà shu la laane,

⁸ bɨ̀ ka ngɨ̀ mèntɨ̧ɨ̧ mɨ̧ me kweele mbɨ̀Ꞌɨ̀ bètǎt nyaꞋ bɨ̧ e li ngɨ̀ la. Bɔ li ntù̧u̧ eyute ànəa Mbɔ̧ɔ̧mà shu la, àfɨ̀Ꞌ yu bɔ li ngu àbâ àlaꞋ àyuube nyɔ̀Ꞌta Mbɔ̧ɔ̧mà nkɨ eye àghɨa tàa ghɨ̀ la.

⁹ Bètǎt nyaꞋ bɨ̧ e li nyɔ̀Ꞌtè am abàꞋ və, me kɨ eye àghɨa màa ghɨ̀ la tè ndzè àghɨa e ndi ngɨ adù̧ yɔb ane èngùꞋebȩ èghem yekwì la.

¹⁰ Eyaa wu àghɨa a li ngɨ̀ e ntsoo ane bòt ngaa tè nê, ‘Mèntɨ̧ɨ̧ bòt ba te ntsě ane yaã, bɔ mè ntû̧ eko àghɨa màa kɨa nê bɔ̀ me ghɨ̀ la.’

¹¹ E ndi ntsǒ tê ndzì nkà̧ nê, ‘Bɔ̀ ka lɔ̀Ꞌ àlia ekɨꞋɨ àdzìꞋ yu màa ghɨ̌ bɔɔ yètè laa.’ ”

¹² Bɔnyɨ bɔ̧, bɨ̀ me ko awɨ̧ mbɨ̀Ꞌɨ̀ ka wòt kǒ wu ane yɨ̧ nè èntɨ̧ɨ̧ kàbɔ̀ŋ, tè ntù̧u̧ a Mbɔ̧ɔ̧mà yû̧, tà kà tsi ngua nkuŋa tò.

¹³ Ka bɨ̀ me tɨŋe bɔnyɨ bɨ̧ àlia àgème, mbɨ̀Ꞌɨ̀ bɨ̀ bela ndzəa èngà̧ wu nê “Laane” la, mbɨ̀Ꞌɨ̀ ka wòt kǒ ghɨ a kàbɔ̀ŋ è kubte èntɨ̧ɨ̧ tò tà tsiꞋi me kweelè àtsəa abua Mbɔ̧ɔ̧mà.

¹⁴ Bɨ̀ ghɨ̀ ale, nkàà nê bà tsiꞋi àghɨ yeamɔꞋ nè Yesò Klistò na èntɨ̧ɨ̧ wa wu ba li ndzi ane Mbɔ̧ɔ̧mà la e me kweele tê ngà ndzə a mèndìa la.

¹⁵ Àkata Mbɔ̧ɔ̧mà a laꞋnê, “Bɨ zə ànəa Mbɔ̧ɔ̧mà shu la laane, bɨ̀ ka ngɨ̀ mèntɨ̧ɨ̧ mɨ̧ me kweele mbɨ̀Ꞌɨ̀ bètǎt nyaꞋ bɨ̧ e li ngɨ̀ la. Bɔ li ntù̧u̧ eyute ànəa Mbɔ̧ɔ̧mà shu la.”

¹⁶ Bòt bu bɔ li ndzə ànəa Mbɔ̧ɔ̧mà shu la nkwèèle àtsə la wu wà ba à? Ka wu bòt bu Musì li nɨ̀a wɔb ndzə a Ejìb la à?

¹⁷ Bòt bu Mbɔ̧ɔ̧mà li ngua ntsoa ane yɔb ane èngùꞋebȩ èghem yekwì la wu wà ba à? Ka wu bòt bu bɔ li ngɨa kàbɔ̀ŋ, mpfəèꞋta àbâ àlaꞋ àyuube la à?

¹⁸ Bòt bu Mbɔ̧ɔ̧mà li mè ndzì nkà̧ nê bɔ̀ ka li lɔ̀Ꞌɔ̀ àlia ekɨꞋɨ àdziꞋa yea ghɨ̌ bɔɔ yètè la wu wà ba à? Ka wu bòt bu bɔ li ntû̧ ebɨ̧ɨ̧ne ànəa tà shu la à?

¹⁹ Ale, ba ye nê bɔ li bɔ̀ ka nyi a èbem àdziꞋa mbɔŋ nkàà nê bɔ li bɔ̀ ka bɨ̧ɨ̧ne ànəa Mbɔ̧ɔ̧mà shu la.

« Roimhe

Air adhart »

Lean sinn:

Ceanglaichean taic

Sanasan