Ebùlù 11 - Mundani

Màndzia èntɨ̧ɨ̧ ane Mbɔ̧ɔ̧mà

¹ Ba zìà èntɨ̧ɨ̧ wa ane Mbɔ̧ɔ̧mà, è wu mànkoa nkûŋ nkûŋ nê baa bɔ èghɨ bu ba chɨ̀Ꞌà la, mè nko nkûŋ nkûŋ nê èghɨ bu bàa ka ye la aà və.

² Wu èntɨ̧ɨ̧ wu baliambì e li ndzi ane Mbɔ̧ɔ̧mà la ka e li ngɨ̀ èntɨ̧ɨ̧ tò e me bɔ̌ ane yɔb la.

³ Èntɨ̧ɨ̧ wu ba zi ane Mbɔ̧ɔ̧mà la e ghɨ̂ ba bɨ̧ɨ̧nè nê tà li nɨ èngǎ̧ vi ka nɨŋ ngɨ̀ ngɔ̀ŋ yaa, nko nê ye nɨ àghɨa bɔ̀ɔ ka ye la nɨŋ ngɨ̀ àghɨa bɔ̀ɔ ndzèa la.

⁴ Èntɨ̧ɨ̧ wu Abèl li ndzi ane Mbɔ̧ɔ̧mà la e li ngɨ̀ tà ŋà èghɨ e bɔ̂ŋ ntsè èbe Kên la abua Mbɔ̧ɔ̧mà. Èntɨ̧ɨ̧ mbɔŋ tà li ndzi ane Mbɔ̧ɔ̧mà la, e li ngɨ̀ Mbɔ̧ɔ̧mà nɨ atò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la. Ba ko anè nkàà nê Mbɔ̧ɔ̧mà li mbɨ̧̀ɨ̧̀ne nɨ èghɨ bu tà ŋa abua tò la. Abèl li mbàte mpfə ale ka ba bɔ̂ mbèla ndzəa ànəa àghɨa tà li ngɨ̀ la, nkàà èntɨ̧ɨ̧ wu tà li ndzi ane Mbɔ̧ɔ̧mà la.

⁵ Èntɨ̧ɨ̧ wu Enɔ̀k li ndzi ane Mbɔ̧ɔ̧mà la, e li ngɨ̀ tà nɨ atò nɨŋ nga a ègwet kà tà pfə, tè wòt kà tsi ndze atò nkàà nê Mbɔ̧ɔ̧mà li nɨa tò nɨŋ nga a ègwet. Àkata Mbɔ̧ɔ̧mà a laꞋnê, Mbɔ̧ɔ̧mà li me nɨ Enɔ̀k enɨ ghǎ a ègwet ale ngu ndɨ àghɨa tà li ngɨ̀ la a li mbɔ̀ a Mbɔ̧ɔ̧mà la.

⁶ Wòt bakà zi èntɨ̧ɨ̧ vi ane Mbɔ̧ɔ̧mà ko aa kweele ka èntɨ̧ɨ̧ Mbɔ̧ɔ̧mà e me bɔ̌ ane tò. Aa ale nkàà nê, wòt ègème tà kɨꞋɨ abua Mbɔ̧ɔ̧mà la, è bɔ ndɨ tàa bɨ̧ɨ̧ne nê tàà və la, mè ngu wòt tàa ŋǎ àbȩ̀ bòt bu bɔ̀ɔ nkɨà tò nè èntɨ̧ɨ̧ wɔb wemɔꞋ la.

⁷ Èntɨ̧ɨ̧ wu Noà li ndzi ane Mbɔ̧ɔ̧mà la e li ngɨ̀ tà zə ànəa Mbɔ̧ɔ̧mà səèŋkè àtû̧ atò shu ane àghɨa à bele ne mbì kà tà ye la. Tà zə ale, ngɨ̀ ànkànuꞋ bɔ̂ àndà̧ zi a nyi a èbèm mpem. Tà li ngɨ̀ àyaa ale a nyɨ̀Ꞌte nê bòt ngɔ̀ŋ wu bòt kàbɔ̀ŋ. Tà li ngɨ̀ àyaa ale ntsìꞋi wòt ntsɔ̧̀ a mbì Mbɔ̧ɔ̧mà è wu àbȩ̀ a wòt nàa mbɔ̌ nkàà èntɨ̧ɨ̧ wu tà zi ane Mbɔ̧ɔ̧mà la.

⁸ Èntɨ̧ɨ̧ wu Abàlàghâm li ndzi ane Mbɔ̧ɔ̧mà la, e li ngɨ̀ tà zə ànəa Mbɔ̧ɔ̧mà shu la, ndzə àlaꞋ zi nga àlaꞋ ako Mbɔ̧ɔ̧mà li nkàꞋ nê yea ŋa abua tò la. Tàà ndzəa ngà ale, tà kà lem nko àdziꞋa ye ghà la.

⁹ Èntɨ̧ɨ̧ wa tà li ndzi ane Mbɔ̧ɔ̧mà la e li ngɨ̀ tà me tseke mbɨ̀Ꞌɨ̀ gɨ̧̀ a èbem àlaꞋ yu Mbɔ̧ɔ̧mà li nkàꞋ atò la. Tà li ngua tseke a tèbêmte bayò bɔ̂ waã vi Asàk nè Jàkɔ̂b waã Asàk wu Mbɔ̧ɔ̧mà li nê bɔɔ bɔ àghɨa ye kàꞋà la mɨ̧̂.

¹⁰ Tà li ngua nchɨ̀Ꞌà e ghɨ̌ tseke a èbem àpfəèà nɨ̧ yu Mbɔ̧ɔ̧mà fɨ̀Ꞌtè mbɔ̧̀ɔ̧ zìambɔŋ la, è wu àpfəa àa wu ane àlia nè àlia la.

¹¹ Sàda mɨ̧̂ li ndzì èntɨ̧ɨ̧ ane Mbɔ̧ɔ̧mà tà ghɨ̀ tà bi waã àfɨꞋa tà li ntsìꞋi kwàꞋ ndènè àvi la, nkàà nê tà li nko nê Mbɔ̧ɔ̧mà naa ghɨ̀ àghɨa tà kàꞋà la.

¹² Ale, Abàlàghâm wu li mbàte ndèn kwat tè ntsìꞋi mbɨ̀Ꞌɨ̀ wòt tà pfə la, ka àndǎ̧ a li ndzə ane tòà waa wemɔ̀Ꞌ la, a li ndzà̧à̧ tê ngu mbɨ̀Ꞌɨ̀ těnto̧ tu a ègwelebuule la, mè ndzà̧à̧ te ngu mbɨ̀Ꞌɨ̀ těsɔŋ tu a ngèt èdzî betsiꞋa wòt kà ko mpà̧ la.

¹³ Bòt baa bàgème bɔ tɨ̧ɨ̧ tèlen tɔb la e li me pfəꞋte mèntɨ̧ɨ̧ mɔb bele wuê ane Mbɔ̧ɔ̧mà, mbɔ̂ me pfəꞋte ale èghɨ bu Mbɔ̧ɔ̧mà li nkàꞋ la e bele kà ko àfɨꞋa àa li lɔ̀Ꞌɔ̀ ewu la. Ka bɔ li ndzaŋe eye bùà tea a endɨ̌ sèè. Mbɨ̀Ꞌɨ̀ bɔ ye ale la, bɔ bɨ̧ɨ̧nè nê bɔ wu bègɨ̧̀, mè ngu bòt ntsèa tsě a sitsǎꞋ ŋàa la.

¹⁴ Bòt àa ngɨ̀ bɔ me laꞋ nê bɔ wu bègɨ̧̀ àdzìꞋ àko, bɔ wua shua nê bɔ wua nchɨ̀Ꞌà e li tseke a èbem àlaꞋ a tsa è wu ndaŋa ayɔb la.

¹⁵ Bèŋût e ghɨ̀ ale, ngua mbèla mɨ̀ɨ̀tà àlaꞋ yu bɔ dzə adù̧ la, ko betsiꞋa bɔ mè nko nkua akwèn.

¹⁶ Ka mbɨ̀Ꞌɨ̀ àa la, bɔ li ngua nkɨà àlaꞋ a bɔŋ te ntsè àyùà la, è wu àlaꞋ yu à wu a ègwet la. Ale, àtsəa Mbɔ̧ɔ̧mà aà kà kɔꞋ màmbɨ̧ɨ̧na laꞋnê ye wu Mbɔ̧ɔ̧mà wɔb nkàà nê tà tàŋke àpfəèà nɨ̧ abua yɔb.

¹⁷ Èntɨ̧ɨ̧ wu Abàlàghâm li ndzi ane Mbɔ̧ɔ̧mà la e li ngɨ̀ tà ŋa Asàk afɨꞋa Mbɔ̧ɔ̧mà li nyɔꞋta tò la, tòà wu tà li mbɔ̀ mènkàꞋa mu la tsiꞋa nkɨ kɨ̧ɨ̧me ndàꞋ waã vi,

¹⁸ wu Mbɔ̧ɔ̧mà li nkàꞋ atò nê, “Asàk ka tàa li ghɨ̌ aa bɔ àndǎ̧ yê la.”

¹⁹ Abàlàghâm li nko nê betsiꞋa Mbɔ̧ɔ̧mà ghɨ̀ bòt e yu̧u̧me. Wuê mbɨ̀Ꞌɨ̀ betsiꞋa wòt shu la, Asàk wu ghà tè ndzè èvə, Mbɔ̧ɔ̧mà ghɨ̀ tà mè njù̧ù̧mê nkua akwèn nkɨ̀Ꞌɨ̂ abua tǎt vi.

²⁰ Èntɨ̧ɨ̧ wu Asàk li ndzi ane Mbɔ̧ɔ̧mà la e li ngɨ̀ tà fà̧à̧te a Jàkɔ̂b bɔ̂ Esaɔ̀, ndàꞋ ànəa ntsɔ̧̀ wu Mbɔ̧ɔ̧mà nàa li lɔ̀Ꞌɔ ghɨ̌ bɔɔ ye la.

²¹ Èntɨ̧ɨ̧ wu Jàkɔ̂b li ndzi ane Mbɔ̧ɔ̧mà la e li ngɨ̀ tà me pfə fà̧à̧te waã ègème ane bɔ̧ Jòsêb ane èlen Mbɔ̧ɔ̧mà, nkàble a ègwet ambàŋ vi ngùꞋtè a Mbɔ̧ɔ̧mà.

²² Èntɨ̧ɨ̧ wu Jòsêb li ndzi ane Mbɔ̧ɔ̧mà la e li ngɨ̀ tà me pfə, ndàꞋ ndɨ bòt Izəèlȩê àa nga li edzəâ a Ejìb la, mè shu nê bɔɔ me dzəâ bɔ nɨ èkwȩ bi ngà ntu àdziꞋa bɔ gha etseke la.

²³ Èntɨ̧ɨ̧ wu bètǎt Musì e li ndzì ane Mbɔ̧ɔ̧mà la e li ngɨ̀ bɔ bi atò ndò̧ atò ane èŋu yetat, nkàà nê bɔ li ndze nê tàà mbɔ̀, bɔ̀ ka meè ngua mbɔ̀ɔ etu̧u̧ ànəa fɔ̧̀ shu la.

²⁴ Èntɨ̧ɨ̧ wu Musì li ndzi ane Mbɔ̧ɔ̧mà la e li ngɨ̀ tà tsə ntu̧u̧ nê bɔ̀ ka me shu nê nyɨ̌ vi wu waã Felɔ̀.

²⁵ Tà li nkɔ̀ŋkè nê yea ye ngoꞋ bɔ̂ bòt Mbɔ̧ɔ̧mà, tè ntsè ndɨ yèa me ghɨ a kàbɔ̀ŋ, ndzəa ntsɔ̧̀ ane àfɨ̀Ꞌ à tentem la.

²⁶ Tà li nko nê ye tseka ane ngɨ̧̀ɨ̧̀nè nkàà ànəa Yesò Klistò, ko aa taꞋa bɔ̀ te ntsě ndɨ yea bɔ èghɨ ntsɔ̧̀ ègème a Ejìb la. Tà li ngɨ̀ anè nkàà nê èntɨ̧ɨ̧ tò e li ngu wuê ane àbȩ̀ yu tàa li lɔ̀Ꞌɔ ebɔ la.

²⁷ Èntɨ̧ɨ̧ wu tà li ndzi ane Mbɔ̧ɔ̧mà la e li ngɨ̀ tà dzə a Ejìb kà bɔ̀a laꞋnê fɔ̧̀ naa me tsoo ane zi. Tà li nkùùle èntɨ̧ɨ̧ vi ngà, mbɨ̀Ꞌɨ̀ wòt tà ye a Mbɔ̧ɔ̧mà wu kà bɔ wua ndzea tò la.

²⁸ Èntɨ̧ɨ̧ wàa Musì li ndzi ane Mbɔ̧ɔ̧mà la e li ngɨ̀ tà ghɨ̀ bòt Izəèlȩê e bùꞋ me jɨ èpǎ̧ Màntsea a ègwet, mè ngɨ̀ bɔ nɨ̀ àlo̧ mììte a mètsələèꞋ mɔb, mbɨ̀Ꞌɨ̀ wantu̧ Mbɔ̧ɔ̧mà wu nkɨ̀Ꞌa bùŋe bɔ̧ mbì, è wu bɔmbâ̧ la kɨꞋɨ tà ye, tà kà baãaãtè bɔ̧ bɔb.

²⁹ Èntɨ̧ɨ̧ wu bòt Izəèlȩê e li ndzi ane Mbɔ̧ɔ̧mà la e li ngɨ̀ bɔ tu̧u̧ èdzî wu bɔ̀ɔ ntɔ nê *Èdzî Mèmbaŋ la a si è tsìꞋi si yùùbe la, ka àfɨꞋa bòt Ejìb e kɨꞋɨ nê bɔ kɨ etu̧u̧ ayɔb mɨ̧̂ la, èdzî wu e fəèəèlè àwɔb a si bɔ lem.

³⁰ Èntɨ̧ɨ̧ wu bòt Izəèlȩê e li ndzi ane Mbɔ̧ɔ̧mà la e li ngɨ̀ àkaã yu bɔ bɔ̧ nɨŋ ngààle àpfəèà nɨ̧ a Jèlikò la a kwèà nkwèle a si, àfɨꞋa bɔ li ntɔ̀Ꞌ ngààle àyùà ane èlibȩ besà̧à̧mbe la.

³¹ Èntɨ̧ɨ̧ wu ghȩ̀ȩ̀nè ghȩ̀ȩ̀ne wu èlen tò li ngu Leghàb la li ndzi ane Mbɔ̧ɔ̧mà la, e li ngɨ̀ tà bà̧à̧ bɔntu̧ bu bòt Izəèlȩê e li ntsàà bɔɔ kɨꞋɨ eye abot egha shu awɔb la ntsɔ̧̀. Àyaa a li ngɨ̀ bɔ̀ ka bùŋe atò ayɔɔ bòt bu bɔ li ngua nkwèèla àtsə abua Mbɔ̧ɔ̧mà la.

³² Màa mèe shu nê ghà tsa à? E mbakà tsi mbɔ̌ àfɨꞋa màa mèe me làꞋa ane ànəa Gidìòn nè Balàk nè Samsèn nè Jebtà nè Dàbid bɔ̂ Samùèl ndɔ̀Ꞌ nè bèndàꞋàtɔŋ Mbɔ̧ɔ̧mà la.

³³ Èntɨ̧ɨ̧ wu bɔ̀ɔ wàa e li ndzi ane Mbɔ̧ɔ̧mà la e li ngɨ̀ bɔ nù èlaꞋ ntsè, ngɨ̀ àghɨa Mbɔ̧ɔ̧mà nàa nkɨa la, tà ŋà àwɔb àghɨa tà li nkàꞋ la. Bɔ li mè ngɨ̀ bèsambàŋ e katè mètsəê mɔb,

³⁴ ndììme mèwet kèkweelè, ndɔ̀Ꞌ ndùùlà bòt nkɨ ebùŋè àwɔb nè nyitsə la. Bòt baa e li mbàte ngua njùa ka mbɔ̂ ntsìꞋi bòt kekweelè a mànua èbet tè ndènè bèshujà èlaꞋ tsa ngɨ̀ bɔ lùùlà.

³⁵ Èntɨ̧ɨ̧ mbɔŋ bɔ zi ane Mbɔ̧ɔ̧mà la e ghɨ̀ bèzi e mè ndze bòt bɔb bɔ li mpfəèꞋte Mbɔ̧ɔ̧mà mè ngɨ̀ bɔ yu̧u̧me la. Bɔ li ngɨ̧̀ɨ̧̀nè èbeko tè bɔ pfəꞋtè, ngu ndɨ bɔ tu̧u̧ ebɨ̧ɨ̧ne bɔɔ sà àwɔb la, bɔ̀ɔ nkɨ mbɨ̀Ꞌɨ̀ li eyu̧u̧me e bɔ mèntsèke ntsɔ̧̀ la.

³⁶ Bɔ li ngwȩ̀ȩ̀tè èbeko, shù̧ù̧ àwɔb mè nkùùle èbeko ane fȩtsə màꞋà wɔb a lob tèfȩ.

³⁷ Bɔ li ntèmte awɔb ane àti, saãaã awɔb èbâ bebe, mè nɨ nyi mbùŋè àwɔb. Bɔ li ngua ngèèba wuê nè ngubte njɨ̀tsə bɔ̂ ngubte dzətsə a mbɨ̧̀ tɔb, ntsèka kà bê ndzè àyɔb, bòt e kɨa àtsəa yɔb enɨ mè ngɨ̧̀ɨ̧̀nà àwɔb.

³⁸ Bòt baa e li mbɔ̀ŋ tè ntsè èbe bɔ̀ɔ mèe me tseke a sitsǎꞋ ŋàa la. Bɔ li ntsìꞋa ngèèba mbɨ̀Ꞌɨ̀ bòt èbet etaa awɔb la a èbem àlaꞋ àyuube, bɔ̂ tègwet tèbȩtsə, ntsèka a èbem mbəèꞋtsə nè mèləèꞋ a èbem si.

³⁹ Èntɨ̧ɨ̧ wu bòt baa e li ndzi ane Mbɔ̧ɔ̧mà la e li mbàte ngɨ̀ bɔ bɔ èlen ntsɔ̧̀, ka bɔ̀ ka lem mbɔ̀ àghɨa Mbɔ̧ɔ̧mà li nkàꞋ àwɔb la.

⁴⁰ A li ngu ale nkàà nê Mbɔ̧ɔ̧mà taŋkè àghɨa ntsɔ̧̀ àko abua ya, mbɨ̀Ꞌɨ̀ bɔɔ fɔte ba tò ba ka ebɔ, è wù àghɨa bɔ bɔ ndɨ bɔ̀ɔ wu yùà la.