Ebùlù 10 - Mundani

¹ Mbɨ̧ Musì ndâ ntsě ngule èghɨ ntsɔ̧̀ bu nga ekɨꞋɨ la, wu wuê àfəa èghɨ mbɔŋ. Mbɨ̀Ꞌɨ̀ àa ale la, banyà̧ bu bòt e li ngua nɨa nkɨ̀Ꞌa a ngo̧ a ngò̧ èngùꞋebȩ ègème nkɨ̧̀ɨ̧̀ma mbɨ̀Ꞌɨ̀ mbɨ̧tsə tèa nkɨà la be li be ka lâ ngua ngɨ̀à bòt e wua àghɨa bɔ bɔ ndɨ bɔ̀ɔ wu yùà la a mbì Mbɔ̧ɔ̧mà.

² Bòt bu bɔ li ngua ngùꞋta Mbɔ̧ɔ̧mà la, e li me wu ale pème ane kàbɔ̀ŋ wɔb, ko mèntɨ̧ɨ̧ mɔb nàa ka tsi fèèlè àwɔb ane ànəa kàbɔ̀ŋ. Ko bɔ̀ɔ kà tsi nkɨ̧̀ɨ̧̀me banyà̧.

³ Mbɨ̀Ꞌɨ̀ àa anè la, a wu nê, banyà̧ ba bɔ li ngua nkɨ̧̀ɨ̧̀ma èngùꞋ ègème la be li ngua ngɨ̀à bòt e ku̧u̧tà nê bɔɔ ngɨa kàbɔ̀ŋ.

⁴ Nkàà nê, àlo̧ mpɔ̀ŋtsə nè àyea dzətsə aa kà ghɨ̀ Mbɔ̧ɔ̧mà waꞋa mènəè kàbɔ̀ŋ bòt.

⁵ Ale, Yesò Klistò li me kɨꞋɨ a sitsǎꞋ ale shu abua Mbɔ̧ɔ̧mà nê, “Èntɨ̧ɨ̧ wê e ntsě ane banyà̧ bu bòt àa nkɨ̧̀ɨ̧̀ma la, nè èghɨ bu bòt àa ŋǎ abua yê la, mbɔ̂ à ghɨ̂ e mbɔ mbɨ̧̀ ènyit màa ŋa la.

⁶ Ànəa banyà̧ bu bɔ̀ɔ ntò̧ la, fɔɔle nè è bu bɔ̀ɔ nkɨ̧̀ɨ̧̀ma mbɨ̀Ꞌɨ̀ e ghɨ̌ aa waꞋa bèkàbɔ̀ŋ bòt la à ka mê ngua mbɔ̀ àwê.

⁷ Ale e nê, ‘Mbɔ̧ɔ̧mà, ye am e wu, mâ kɨꞋɨ e ghɨ̀ àghɨa àa nkɨà la, wuê mbɨ̀Ꞌɨ̀ bɔ shɨ a èbem mbɨ̧ tê ane èlen laã la.’ ”

⁸ Yesò Klistò li mbɨ̀ shu abua Mbɔ̧ɔ̧mà nê, “Èntɨ̧ɨ̧ wê e ntsě ane banyà̧ bu bɔ̀ɔ nkɨ̧̀ɨ̧̀ma la, nè èghɨ bu bòt àa ŋǎ abua yê la, nè banyà̧ bu bɔ̀ɔ ntò̧à ŋǎ abua yê la, ndɔ̀Ꞌ nè èbu bɔ̀ɔ nkɨ̧̀ɨ̧̀ma mbɨ̀Ꞌɨ̀ e ghɨ̌ aa waꞋa bèkàbɔ̀ŋ bòt la. Èghɨ baa aà kà bɔ awê.” Tà li mbɔ̂ me shu ale, bɔ wua ŋa mbɨ̀Ꞌɨ̀ mbɨ̧ è shu la.

⁹ Yesò mè nê, “Mbɔ̧ɔ̧mà, ye am e wu, mâ kɨꞋɨ e ghɨ̀ àghɨa àa nkɨà la.” Ale, Mbɔ̧ɔ̧mà tsɔꞋɔ mènkàꞋa mbì mu mbɨ̀Ꞌɨ̀ ezǐ me Yesò Klistò abot.

¹⁰ Ndɨ̀ wu Yesò Klistò li nkɨ̀Ꞌɨ̂ ŋà àtsəa zi ngò̧ yemɔ̀Ꞌ mbɨ̀Ꞌɨ̀ Mbɔ̧ɔ̧mà kɨa la, ba tsiꞋi mbɨ̀Ꞌɨ̀ bòt kà ghɨa kàbɔ̀ŋ.

¹¹ Ntsìà mèpɨ̧̀ Mbɔ̧ɔ̧mà ègème li ngua ngɨ̀à àfàꞋ àzi àli àgème, nkɨ̧̀ɨ̧̀ma banyà̧ ŋǎ abua Mbɔ̧ɔ̧mà a ngo̧ a ngò̧, ka banyà̧ mbɔŋ bè ka wua nkoà ngɨ̀à Mbɔ̧ɔ̧mà waꞋa bèkàbɔ̀ŋ bòt.

¹² Ka Yesò Klistò li ŋà àtsəa zi ngò̧ yemɔ̀Ꞌ, ane mènəè kàbɔ̀ŋ bòt, a bê nkùꞋ ale ane àlia nè àlia, mbɔ̂ ngà ntsèke àbâ àbualu̧ a Mbɔ̧ɔ̧mà.

¹³ È bùꞋu àfɨꞋa mbɔŋ me ghà ne mbì, tà wua nchɨ̀Ꞌà àfɨꞋa Mbɔ̧ɔ̧mà nàa ghɨ̌ taa tsite èka bi a ègwet bɔmbù̧ bi la.

¹⁴ Tà ŋà àtsəa zi ngò̧ yemɔ̀Ꞌ ale, ngɨ̀ bòt bu Mbɔ̧ɔ̧mà shùù mènəè kàbɔ̀ŋ mɔb la e tsiꞋi àghɨa bɔ wu ewu yùà la ane àlia nè àlia.

¹⁵ Fo Kèfə shua wa mènəè maa mɨ̧̂. Tà bɨ̀ nê,

¹⁶ “Eyaa wu mènkàꞋa kèkweelè mu màa nga e ghɨ̀ ba bòt Izəèlȩê la, mbɨ̀Ꞌɨ̀ Mbɔ̧ɔ̧mà shu la. ÀfɨꞋa mbɔŋ aa li nkùꞋ, e ndzì mbɨ̧ taã a mèntɨ̧ɨ̧ mɔb, mè shɨ tùà a ètsə bɔb.”

¹⁷ Tà mè nê, “È ka tsi ku̧u̧te mènəè kàbɔ̀ŋ mɔb bɔ̂ èbɨꞋte ènəê bɔb a.”

¹⁸ Mbɔ̧ɔ̧mà nàa ngɨ̀ tà waꞋa mènəè kàbɔ̀ŋ bòt, bɔ̀ ka tsi mbɔ̌ ndɨ bɔ̀ɔ mèe me kɨ̧ɨ̧me banyà̧ ŋǎ ambo mènəè kàbɔ̀ŋ bòt la.

Bà səèꞋtè àwa nkɨ̀Ꞌɨ̂ a ngèt Mbɔ̧ɔ̧mà

¹⁹ Bɔnyɨ bɔ̧, ale betsiꞋa ba ko nyi àdziꞋa ntsèm a mbì a Mbɔ̧ɔ̧mà kà bɔ̀a nkàà àlo̧ a Yesò.

²⁰ Tà ghaꞋa èlu̧ fi abua ya, è wù èlu̧ mèmpème la. Tà sà̧à̧ taꞋà ndǐ yu, a lob Mbɔ̧ɔ̧mà è kaba àdziꞋa ntsèm a mbì a Mbɔ̧ɔ̧mà la. Tà ghɨ̀ àyaa ane mbɨ̧̀ ènyit zi.

²¹ Ba bɔ taꞋà ntsìà mèpɨ̧̀ tà wu àtsəa lob Mbɔ̧ɔ̧mà la.

²² Ale, bà ghǎ ndàꞋà a ngèt Mbɔ̧ɔ̧mà nè èntɨ̧ɨ̧ kèfə kà màkè ànəê àko ane èngǎ̧ tò. Bà gha a ngèt tò nè mèntɨ̧ɨ̧ bɔ shùù è fə tê è kà tsi ngua fèèlà wa nê ba wu bòt kàbɔ̀ŋ la, mè nkɨ̀Ꞌɨ̂ nè mbɨ̧te ènyit tèa mbɨꞋɨ̀ è te bɔ shùù ne mèleb ntsɔ̧̀ la.

²³ Bɨ̀ ghɨa bà neeta nɔ̀ŋè ntɨ̀ ya adù̧ àghɨ yu bàa ndàꞋà ànəa yùà la ntsɔ̧̀, nkàà nê Mbɔ̧ɔ̧mà nàa nkàꞋà ànəê tè tà ghɨ̀.

²⁴ Bà bɔ èntɨ̧ɨ̧ ane bɔnyɨ ba, me tɨŋe awɔb nyɨ̀Ꞌta èkɔŋ, ngɨ̀a ntsɔ̧̀ ane yɔb.

²⁵ Bà ka me tseke ka wua mbù̧ù̧tà mbɨ̀Ꞌɨ̀ bòt ko àa ngɨ̀à la. Bɨ̀ ghɨa bà me lɔ̀ktè mèntɨ̧ɨ̧ bɔnyɨ ba tè ntsè ndɨ bàa ndzìà ngɨ̀à la, ndɨ̀ wu bàa ndzèa nê, Àlia Mbɔ̧ɔ̧mà aà nkɨ̀Ꞌa la.

²⁶ Ba ko nkûŋ tè ndɔ̀Ꞌ, mbɔ̂ mè me ghɨ̀ wuê a kàbɔ̀ŋ, ko àghɨa ko a te ntsě bɔ̀ɔ mèe kɨ̧ɨ̧me ane mènəè kàbɔ̀ŋ ma la.

²⁷ Àghɨa bàa tsiꞋi me chɨ̀Ꞌɨ̀ ne kèbɔɔ la wu èsaꞋa Mbɔ̧ɔ̧mà, nè èwet kekweelè wu àa nga etô̧ bɔmbù̧ Mbɔ̧ɔ̧mà la.

²⁸ Wòt li nguê tàa ngɨ̀ tà bəꞋə mbɨ̧ Musì, tè bòt babe kò batat leꞋ, è làꞋà nê bɔ ye, bɔ mbuŋe a ŋut kà ku tèsȩ.

²⁹ Tè a wu ewu anè ane bòt baa, ko bɨ mɨɨtè nê, àa wu na ane wòt wu tà waa Waã Mbɔ̧ɔ̧mà la à? Àa wu na nè wòt wa tà nɨ̀ àlo̧ yu bɔ nɨŋ ngɨ̀ mènkàꞋa kèkweelè mu è shùa kàbɔ̀ŋ tò la, mbɨ̀Ꞌɨ̀ è ntsě àghɨ, mè ndaꞋa kàbɔ̀ŋ adù̧ Fo Mbɔ̧ɔ̧mà yu nàa nyɨ̀Ꞌta a ntsɔ̧̀ Mbɔ̧ɔ̧mà la à? Bɨ̀ la nkwàꞋtè èwuu ngoꞋ ŋut wu nàa eye la!

³⁰ Ba ko wòt wu tà li nê, “E ngu wòt màa vəèəè èsiꞋ la, maà nga vəèəè àghɨa bɔ ghɨ̀ la.” Ŋut li mè nê, “Mbɔ̧ɔ̧mà naa saꞋa bòt bi.”

³¹ Wu ànəa àwèntè abua wòt taa kwene a tèkitebu Mbɔ̧ɔ̧mà yu̧.

³² Bɨ̀ ku̧u̧te èli mbì bu bɨ li mbɨ̀ nko nê èngǎ̧ Mbɔ̧ɔ̧mà wu nkûŋ la. Bɨ li ntàꞋa ye ngoꞋ ka bɨ̀ ka tsi mèntɨ̧ɨ̧ mɨ̧ ane Mbɔ̧ɔ̧mà.

³³ Bɔ li ngua ntsɔ̧̀ɔ̧̀tà wɨ̧ àfɨ̀Ꞌ àko ayɔɔ banɔ̧̀, è wu àfɨ̀Ꞌ àko bɨ me kɔ̀ŋke e tɨ̧ɨ̧ a mbɨ̧̀ bòt bu bɔ li ngua ngɨ̧̀ɨ̧̀nà wɔb a èlɨ waa la.

³⁴ Bɨ li ndzě ngoꞋ nè bòt bu bɔ zì àwɔb a tèfȩ la, bɔ mè fà èghɨ bɨ̧ ègème, ka àyea ngaa à ka ye awɨ̧, bɨ me wùꞋtè wuê awɨ̧ nkàà nê, bɨ li nko nê bɨ bela mbɔ̌ ngule èghɨ ntsɔ̧̀ bu Mbɔ̧ɔ̧mà li nkàꞋ la, è wù èghɨ àa tèꞋa ane àlia nè àlia la.

³⁵ Ale, bɨ̀ ka ntsì èntɨ̧ɨ̧ wɨ̧ nkàà nê, bɨa nga bɔ taꞋà àbȩ̀.

³⁶ Bɨ bɔ ndɨ bɨ̀a kuule èntɨ̧ɨ̧ wɨ̧ mbɨ̀Ꞌɨ̀ ghɨ̀ àghɨa Mbɔ̧ɔ̧mà nàa nkɨà la, ebɔ àbȩ̀ yu tà kàꞋà la.

³⁷ Àkata Mbɔ̧ɔ̧mà a laꞋnê, “AdzìꞋ naa me wù̧ù̧ne, wòt wu nga ekɨꞋɨ la naa kɨꞋɨ, tà ka tsòke àfɨ̀Ꞌ a.

³⁸ Mbɔ̂ bòt bɔ̧ bu bɔ̀ɔ ngɨ̀à mènəè ndɨŋndɨ̀ŋ la aa peme nkàà èntɨ̧ɨ̧ wu bɔ zi ane yaã la. Ka wòt tà tsǐ èntɨ̧ɨ̧ vi ane yaã la, ba tò è ka tsi wu ane ntsɔ̧̀ a.”

³⁹ Ba ntsě èwuu bòt bu bɔ̀ɔ ntsìà èntɨ̧ɨ̧ wɔb ane Mbɔ̧ɔ̧mà ndema la. Ka ba wu èwuu bòt bu bɔ̀ɔ ndzìà mèntɨ̧ɨ̧ mɔb ane Mbɔ̧ɔ̧mà mbɔ̌ mèmpème la.