Bìoball air-loidhne

Kɔ̀losìà 4 - Mundani

¹ Bɨ̀a wu bɨ̀ wu bètǎt a ègwet èbùꞋ la, bɨ̀ me baãaãte èbùꞋ bɨ̧ ntsɔ̧̀. Bɨ̀ ka ndèènè nê bɨ bɔ a Tǎt a ègwet mɨ̧̂.

Nkɨ̀atsə

² TsiꞋ è shu abua yɨ̧ bàgème àfɨ̀Ꞌ yaa nê bɨ̀ me tsàꞋte Mbɔ̧ɔ̧mà àfɨ̀Ꞌ àgème. Bɨ̀ ghɨ̀ bɨ̀ me tsàꞋte, bɨ me zə wuê ànəa bɨ shua abua tò la, mè me ŋa mènkɔ̀ŋke abua tò.

³ Bɨ̀ me tsàꞋte a Mbɔ̧ɔ̧mà ane ya mɨ̧̂, mbɨ̀Ꞌɨ̀ tà wu ghaꞋa wa èlu̧ baa me làꞋa èngǎ̧ tò wu è wû ànəa ndò̧ ane ànəa Yesò Klistò la abua bòt. Wu ànəa èngǎ̧ mbɔŋ ka a ghɨ̂ e ngu a tèfȩ anè la.

⁴ È wu ale, bɨ tsàꞋta Mbɔ̧ɔ̧mà nê, è nko ntsɔ̀tè ntu̧ yaa ane ndɨ mâ bɔ ndɨ màa làꞋa bòt àa nèète ezə la.

⁵ Bɨ̀ me ghɨ̀ mènəè mɨ̧ a mbì bòt bu kà zi mèntɨ̧ɨ̧ mɔb ane Yesò la nè èyì. Àfɨ̀Ꞌ àgème èlu̧ e dzəâ a si la, bɨ nyɔ̀Ꞌtè ndze nê, bɨ ghɨ̂ bɔ ko nê bɨ wu bòt Yesò. Àfɨ̀Ꞌ a dzə a si, bɨ nyɔ̀Ꞌtè ndaꞋa abua bòt mbɔŋ.

⁶ Bɨ̀ tsiꞋ mèngǎ̧ mɨ̧ wu me nàa mbɔ̀, bòt e mè me kɔ̀ŋke eyute la. Bɨ̀ me ghɨ̀ ale, mbɨ̀Ꞌɨ̀ me koa ntsɔꞋɔ èngǎ̧ waa waa ane ndɨ bɔ̀ɔ zə la.

MèntsàꞋte enɨ lìa

⁷ Tȩ̀kɨkùs, wanyɨ wa wu ba taꞋa wua nkɔ̀ŋkà tò la naa shua wɨ̧ ànəê am àgème. Tà wu ngule wɔ̀fàꞋ ba tò ba àa fɔ̀ta faꞋa abua Tè Yesò la.

⁸ Lə e ntsaa tò abua yɨ̧ la wu nê, tà kɨꞋɨ ndzì mèntɨ̧ɨ̧ mɨ̧, mè ngɨ̀ bɨ̀ ko àghɨa àa ngɨa ane ya la.

⁹ Tà gha ekɨꞋɨ bɔ̂ wanyɨ wa Ònesìmùs wu tà wu wòt kǒ ayɔɔ yɨ̧, mè nèètè ndzì èntɨ̧ɨ̧ vi ane Yesò la. Bɔɔ shu awɨ̧ ànəê àgème àa ntsea a si ŋàa la.

¹⁰ Àlistakùs wu ba tò è wu a tèfȩ nɔ̂ la nàà ntsàꞋtà wɨ̧. Mak wu tà wù waã wanyɨ Bànabasì la nàà ntsàꞋtà wɨ̧ mɨ̧̂. Bɨ ko nê mâ yaŋe shua wɨ̧ ndɨ bɨ yea Mak bɨ ghɨ̀ la. Ale, taa kɨꞋɨ bɨ sèe atò.

¹¹ Yesò wu èlen tò ko wu Justùs la nàà ntsàꞋtà wɨ̧ mɨ̧̂. Ane Bèjuê bu bɔ zì mèntɨ̧ɨ̧ mɔb ane Yesò Klistò la, wu ndàꞋà bòt baa batat ba tò ba àa fàꞋà nɔ̂ mbɨ̀Ꞌɨ̀ e ghɨ̌ Kèfɔ̧̀ Mbɔ̧ɔ̧mà naa kɨꞋɨ la. Bɔ taꞋa tɨŋe am.

¹² Èpaflàs wu tà wu wòt kǒ ayɔɔ yɨ̧, mè ngu wafàꞋ Yesò Klistò la nàà ntsàꞋtà wɨ̧. Tà taꞋa wua ntsàꞋta Mbɔ̧ɔ̧mà ane yɨ̧ nè èntɨ̧ɨ̧ vi ègème. Tàa ngɨ̀ tà me tsàꞋte nê Mbɔ̧ɔ̧mà ghɨa mèntɨ̧ɨ̧ mɨ̧ kweele ane ànəa Yesò Klistò, tè àghɨ à ka tsi mbû ane yɨ̧, bɨ̀ mèe nko ndɨ bɨ̀a me ghɨ̌ àghɨ àgème Mbɔ̧ɔ̧mà nàa nkɨà la.

¹³ Mmɔ̌ mbɔŋ mâ ye ndɨ tà lâ fàꞋ a màntɨŋa wɨ̧ bɨ bòt bu a Làoêdisìà la, nè èbu a Èlapolìs la.

¹⁴ Ngule shu̧ ya Luêk wu tàa mbəèa bòt la bɔ̂ Demàs aa ntsàꞋtà wɨ̧.

¹⁵ Bɨ̀ tsàꞋtè bɔnyɨ ba bu a Làoêdisìà la, mè ntsàꞋtè wanyɨ wa waàvi Nimfà nè bòt chɔsì bu bɔ̀ɔ mbu̧u̧ta a lob tò la.

¹⁶ Bɨa tɔ letà waa, bɨ nyɔ̀Ꞌtè ngɨ̀ bɔ tɔ yùà a èbem chɔsì wu a Làoêdisìà la. Bɨ̀a mbɔŋ è nyɔꞋta ntɔ wùà nè letà bòt Làoêdisìà àa tsàà abua yɨ̧ la wu a èlɨ mbɔŋ.

¹⁷ Bɨ̀ shu abua Achipùs nê, “Ye nê à paa àfàꞋ yu bɔ̀ le ŋa abua ye nê faꞋa mbɨ̀Ꞌɨ̀ wòt ntɨ̀ŋa Tè Yesò la.”

¹⁸ E ntsiꞋa shɨa àdziꞋ ya ane àbu am mmɔ̌ mbɔŋ nê: Mmɔ̌ Pɔ̂l maà tsàꞋtà àwɨ̧. Bɨ̀ ka ndèènè nê e ngu a tèfȩ. Maà ntsàꞋtà nê Mbɔ̧ɔ̧mà me nyɨꞋte a ntsɔ̧̀ vi abua yɨ̧.

« Roimhe

Air adhart »

Lean sinn:

Ceanglaichean taic

Sanasan