Kɔ̀losìà 3 - Mundani

¹ Mbɔ̧ɔ̧mà li njù̧ù̧me awɨ̧ nè Yesò, è wu ale bɨ̀ nɔ̀ŋè mèntɨ̧ɨ̧ mɨ̧ ane èghɨ è wu a ègwet adzìꞋa Yesò Klistò è tseke adù̧ àtɨ̧a kèfɔ̧̀ vi, àbâ àbualu̧ a Tǎt vi Mbɔ̧ɔ̧mà la.

² Bɨ̀ me mɨ̀ɨ̀te mè nkɨ̀a wuê èghɨ bu a ègwet la, bɨ̀ ka ndzì mèntɨ̧ɨ̧ mɨ̧ ane èghɨ ba a sitsǎꞋ ŋàa la.

³ Bɨ li mpfəèꞋte mèntsèke mbì mu è lìà, tè mèntsèke mɨ̧ tsiꞋi a tèkitebu Yesò Klistò mbɨ̀Ꞌɨ̀ Mbɔ̧ɔ̧mà nɔ̀ŋè la.

⁴ Wu Yesò Klistò ka betsiꞋa tà ghɨ̀ mèntsèke ma lâ ngu àghɨ la. Naa li ngu àfɨꞋa tà mê mpuula a sitsǎꞋ ŋàa la, bɨ̀ambɔŋ e wu nè tò, mè mbɔ̀ èwuu ènɨ̧ wu tà bɔ la.

⁵ Ale, bɨ̀ waꞋa èghɨ sitsǎꞋ bu ègème mbɨ̧te ènyit tɨ̧ tèa nkɨà la. Èghɨ mbɔŋ wu mànkuŋa bèzi kò mbâ̧tsə leꞋ ane balu̧ bàgème, nè mèmɨ̀ɨ̀te kàbɔ̀ŋ, nè mànkɨa nê ye wu me nɨ nɨ, na àyaa à wua nyɨ̀Ꞌta nê wòt kɔ̀ŋke èghɨ mbɔŋ tè e tsiꞋi mbɨ̀Ꞌɨ̀ a mbɔ̧ɔ̧mà tò la.

Mènəè nyǎꞋ nè me fi

⁶ Ntsǒ Mbɔ̧ɔ̧mà nàà nkɨ̀Ꞌa [enɔ̀ŋke àtsəa bòt bu bɔ̀ɔ ka zə atò la, nkàà èghɨ bàa bɔ̀ɔ ngɨ̀a la.]

⁷ È lè wu àfɨ̀Ꞌ àko mèntsèke mɨ̧ bê ndù̧ ne èwuu mènəè kàbɔ̀ŋ mbɔŋ.

⁸ Ka bɨ bɔ ndɨ bɨ̀a waꞋa èwuu èghɨ bàagème àfɨ̀Ꞌ yaa la. Èghɨ mbɔŋ wu ntsǒtsə, nè èntɨ̧ɨ̧ nendu̧, nè màmbɔ mèmɨ̀ɨ̀te kàbɔ̀ŋ adù̧ bòt, nè màndaꞋa kàbɔ̀ŋ adù̧ bòt, kò màndaꞋa mèngǎ̧ àtsəa kɔꞋɔ leꞋ. Èwuu mèngà̧ maa ka ndɔ̀Ꞌ ane àlia ndzə a ètsəê wòt kǒ ane yɨ̧.

⁹ Bɨ̀ ka me fɨte bɔnyɨ bɨ̧ ndɨ̀ wu bɨ te ntsě àghɨa bɨ̀ le wu yùà afɨꞋa mbì la, bɨ̀ ka tsi ngua ngɨ̀à àghɨa bɨ̀ le wua ngɨ̀à la.

¹⁰ Bɨ tsiꞋi bòt fi. Mbɔ̧ɔ̧mà wu tà ghɨ̀ àwɨ̧ ale la nàà ntsèka àfɨ̀Ꞌ àgème ngɨ̀à a èlɨ bɨ̀a tsiꞋi mbɨꞋɨ̀ zìambɔŋ, mbɨ̀Ꞌɨ̀ eko avi te paa la.

¹¹ Mbɔ̧ɔ̧mà ghɨ a èlɨ̀ waa ale, Bèjuê è ka tsi ngu tsa, bòt kà wu Bèjuê aa wu tsa. Bòt bɔ naŋè àwɔb la è ka wu tsa, èbe kà bɔ naŋè àwɔb aa wu tsa. Bòt Sintìà è ka mê ngu tsa, bòt tèbemtebàꞋ aa wu tsa, èbùꞋ è ka wu tsa, bòt kà wu èbùꞋ aa wu tsa. Wòt bɔ yea àfɨ̀Ꞌ yaa la wu ndàꞋ Yesò Klistò, è mè ngu tòà tà wu ane yɨ̧ bɨ̀agème la.

¹² Ale, ndɨ̀ wu bɨ̀ wu bòt Mbɔ̧ɔ̧mà tà kɔ̀ŋkà wɨ̧ ndàà àwɨ̧ la, bɨ̀ me ku tèsȩte bòt, mè ngɨa ntsɔ̧̀ abua bòt ko. Bɨ̀ me nɨ awɨ̧ a si, njùa ane mènəè mɨ̧, bɨ̀ ka mè me yàŋa ntsòa ane bòt.

¹³ Bɨ̀ me baãaã mèntɨ̧ɨ̧ mɨ̧, mè ngwaꞋà bèkàbɔ̀ŋ bɔnyɨ bɨ̧ ane àghɨ àgème bɔ ghɨ̂ bɨ me fèèlè àwɔb adù̧ la. Bɨ̀ me waꞋa bèkàbɔ̀ŋ bɔnyɨ bɨ̧ wuê mbɨ̀Ꞌɨ̀ Yesò Klistò Lefɨ̀Ꞌ waꞋa è bɨ̧ la.

¹⁴ Waa waa me kɔ̀ŋkè wanyɨ vi nɨ̀a nkweꞋna ane èghɨ bàa ègème, nkàà nê èkɔŋ aa fèta bòt ngɨ̀à bɔ tsiꞋa àghɨ yeamɔꞋ, wuê mbɨ̀Ꞌɨ̀ a wu ewu la.

¹⁵ Bɨ me kɨ èghɨ àghɨ, bɨ ye nê bɨ ghɨ̀ ne àlàŋkè yu a kètsìà wɨ̧ a dzə abua Yesò Klistò la. Mbɔ̧ɔ̧mà lâ ntɔ awɨ̧ nê bɨ̀ kɨꞋɨ ntsìꞋi mbɨ̧̀ ènyit yemɔ̀Ꞌ mbɨ̀Ꞌɨ̀ ebɔ èwuu àlàŋkè yaa. È wu ale bɨ me ŋa mènkɔ̀ŋke abua Mbɔ̧ɔ̧mà.

¹⁶ Bɨ̀ tsiꞋ èngǎ̧ Yesò Klistò è ghe a mèntɨ̧ɨ̧ mɨ̧. Bɨ̀ me nɨ èyì ègème ndàꞋà èngǎ̧ mbɔŋ abua bɔnyɨ bɨ̧ nkɨ̀ɨ̀ta awɔb. Bɨ̀ me kɔ̧ɔ̧ mètsəkû̧ è dzəâ a èbem àkata Mbɔ̧ɔ̧mà la, nkɔ̧̂ mètsəkû̧ Yesò, mè nkɔ̧̂ mètsəkû̧ Fo Mbɔ̧ɔ̧mà ghɨ̀ la. Bɨa me kɔ̧ɔ̧, bɨ me ŋa mènkɔ̀ŋke abua Mbɔ̧ɔ̧mà a èbem mèntɨ̧ɨ̧ mɨ̧.

¹⁷ Bɨ̀ me ghɨ̌ àghɨ àgème, mè ndàꞋà ànəê àgème wuê ane èlen Yesò Lefɨ̀Ꞌ, mbɨ̀Ꞌɨ̀ bɨ̀a ntsea ane tò ŋǎ mènkɔ̀ŋke abua Tǎt wa Mbɔ̧ɔ̧mà la.

Mèntsèke ntsɔ̧̀ bòt Yesò Klistò

¹⁸ Bèzi, bɨ̀ me zə bèlu̧ bɨ̧ nkàà nê wu àghɨa bɨ̀a bòt Tè Yesò ebɔ ndɨ bɨ̀a me ghɨ̀ la.

¹⁹ Bèlu̧, bɨ̀ me kɔ̀ŋkè bèzi bɨ̧, bɨ̀ ka me tsoote ane yɔb.

²⁰ Bɔ̧, bɨ̀ me zə bètǎt bɨ̧ bɔ̂ bènyɨ̀ bɨ̧ ane àghɨ àgème, nkàà nê wu àghɨa Mbɔ̧ɔ̧mà nàa nkɔ̀ŋkà nê bòt Yesò è me ghɨ̀ la.

²¹ Bètǎt, bɨ̀ ka me ghɨ̌ bɔ̧ bɨ̧ e me tsoo, mbɨ̀Ꞌɨ̀ mèntɨ̧ɨ̧ mɔb dzə ane mènəè.

²² ÈbùꞋ, bɨ̀ me zə bòt bu bɔ bɔ awɨ̧ la ane mènəè ègème. Bɨ̀ ka me fàꞋa abua yɔb wuê àfɨꞋa bɔ̀ɔ ndzèa wɨ̧ la nɨa nkɨà nê bɔ̀ me kɔ̀ŋkè àwɨ̧. Ka bɨ̀ me fàꞋa abua yɔb nè èntɨ̧ɨ̧ kèfə nkàà nê bɨa nkùkta Tè Yesò.

²³ Bɨ̀ baãaã àghɨ àgème bɨ̀a ngɨ̀à la nè èntɨ̧ɨ̧ wɨ̧ wemɔꞋ, fàꞋà mbɨ̀Ꞌɨ̀ bɨ faꞋa abua Tè Yesò, kà wua faꞋa abua wɔ̀bȩ̂.

²⁴ Bɨ̀ me ghɨ ale ndɨ̀ wu bɨ ko nê, Tè Yesò naa li eŋa wɨ̧ àghɨa tà paŋe abua bòt bi la ane àbȩ̀ a yɨ̧, nkàà nê wu Tè Yesò Klistò ka tà wu ngule wòt bɨ faꞋa abua tò la.

²⁵ Waa Waa tàa ngɨa kàbɔ̀ŋ la naa li ye ngoꞋ nkàà kàbɔ̀ŋ vi, ka ŋut màà ngu wu wà leꞋ, nkàà nê Mbɔ̧ɔ̧mà nàà sàꞋa bòt kà lȩ mèsi.