Kɔ̀losìà 2 - Mundani

¹ Maà nkɨà bɨa ko ndɨ màa ndèbà ènyit yaã mbɨ̀Ꞌɨ̀ è ngu etɨŋe awɨ̧ nè bòt Làoêdisìà, nè bòt ko bu bàgème kà li tè mè ye am la.

² E ngɨ̀à ale mbɨ̀Ꞌɨ̀ enɨ lɔ̀ktè mèntɨ̧ɨ̧ mɨ̧, e ghɨ̌ bɨa tsiꞋi bòt bɔ̀ɔ ndâ nkɔ̀ŋkà bɔnyɨ bɔb tè ntsìꞋi àghɨ yeamɔꞋ la. A wu anè ko bɨa lâ eko nkûŋ ane ànəê yu Mbɔ̧ɔ̧mà li ndò̧, ka me wu àfɨ̀Ꞌ yaa ngɨ̀ ba ko la. Nkûŋ ya wu ane ànəa Yesò Klistò zìambɔŋ.

³ Wu Yesò waa ka tà ghɨ̂ bòt e ko èyǐ Mbɔ̧ɔ̧mà, nè àghɨa àa àtsəa tò la, è wù èghɨ ntsɔ̧̀ bu e li ndò̧ò̧tè la.

⁴ E shua wɨ̧ àyaa mbɨ̀Ꞌɨ̀ ka wòt kǒ nɨ ètsəê nendɨ̧ fɨ̀te awɨ̧ ngɨ̀ bɨ fà̧à̧tè èka bɨ̧.

⁵ Bɨ̀ ko nê, mâ batè è nka wu adzìꞋ yu ba nɨ̧̀ ba ale, mbɔ̂ mbèla mɨ̀ɨ̀tà wɨ̧ àfɨ̀Ꞌ àgème. Aa mbɔ̀ am ndɨ̀ wu mâ ye bɨ lâ fɔtè ntɨ̧̀ɨ̧ me kweele ane mèntɨ̧ɨ̧ mɨ̧ mu bɨ zi ane Yesò Klistò la.

Mèntsèke ntsɔ̧̀ ane Yesò Klistò

⁶ Ndɨ̀ wu bɨ bɨ̧ɨ̧ne nê Yesò Klistò wu Tǎt wɨ̧ la, bɨ̀ tsiꞋi me ghɨ̀ mènəè mɨ̧ mbɨ̀Ꞌɨ̀ bɨ tò ba e tsiꞋi àghɨ yeamɔꞋ.

⁷ Bɨ̀ neeta ndzì àwɨ̧ ane tò me kweele, mè ngɨ̀ mèntsèke mɨ̧ wu mbɨꞋɨ̀ tàa nkɨà la. Bɨ̀ mèe me zì mèntɨ̧ɨ̧ mɨ̧ ane tò nɨa ngà nè mbì. Eyaa wu èghɨ bɔ li nyɨ̀Ꞌte awɨ̧ la. Bɨ̀ me ghɨ̀ ale, bɨ me ŋa mènkɔ̀ŋke abua Mbɔ̧ɔ̧mà.

⁸ Bɨ̀ me ko awɨ̧ mbɨ̀Ꞌɨ̀ ka wòt kǒ nɨ mèmɨ̀ɨ̀te àkû mu nàa fɨ̀ta bòt la ngɨ̀ bɨ tsiꞋi èbùꞋ. Èwuu mèmɨ̀ɨ̀te maa dzə ane èghɨ bu bɔbȩ àa nyɨ̀Ꞌta nê bòt è me ghɨ̀ la, mè ndzə abua fo tu tèa mbǎ̧ ngɔ̀ŋ yaa la. Mènəè mbɔŋ ka dzə abua Yesò Klistò.

⁹ Bɨ̀ lùùlà èwuu mènəè maa nkàà nê Yesò Klistò wu bɔ bi atò mbɨ̀Ꞌɨ̀ wɔ̀bȩ̂ la, bê ngu wuê mbɨ̀Ꞌɨ̀ Mbɔ̧ɔ̧mà ane balu̧ bàgème,

¹⁰ Mbɔ̧ɔ̧mà mè ŋa wɨ̧ ngule mèmpème ndɨ̀ wu bɨ tò ba è tsiꞋi àghɨ yeamɔꞋ la. Tà tsě fo tègème tèa mbà̧aã èlaꞋ mè ntsìta mènəè la.

¹¹ Mbɨ̀Ꞌɨ̀ bɨ Yesò Klistò ba è tsiꞋi àghɨ yeamɔꞋ la, tà naŋe awɨ̧ ane ènɔ̧̂ bòt Mbɔ̧ɔ̧mà, ka tà kà naŋe ane èwuu èlɨ̀ wu bɔbȩ àa nàŋa bòt la. Tà tsiꞋi naŋe awɨ̧ ane e vi ne èlɨ̀, è wu ndɨ̀ wu bɨ̀a ka tsi ngɨ̀ èbɨꞋte ènəê bu è le wua ndzəa a èbem mèntɨ̧ɨ̧ mɨ̧ la.

¹² Bɔ li ndzì àwɨ̧ a èdzî ale a wu nê bɨ pfəꞋtè bɔ tu awɨ̧ bɨ Yesò Klistò ba nɔ̂, bɔ mè ntsì àwɨ̧ ale a wu nê Mbɔ̧ɔ̧mà yu̧u̧me awɨ̧ bɨ Yesò ba nɔ̂. A li ngu anè nkàà nê, bɨ li ndzì èntɨ̧ɨ̧ wɨ̧ ane mètàŋ Mbɔ̧ɔ̧mà mu tà li nɨŋ njù̧ù̧me a Yesò la.

¹³ È lè wu àfɨ̀Ꞌ àko, bɨ wu mbɨ̀Ꞌɨ̀ bòt bɔ pfəꞋte la a mbì Mbɔ̧ɔ̧mà ndɨ̀ wu bɨ̀ le wua ngɨa kàbɔ̀ŋ, mè ngu bòt kà ko a Mbɔ̧ɔ̧mà, bɨ̀ ka ko mbɨ̧te Musì la. Ka Mbɔ̧ɔ̧mà è yu̧u̧me àwɨ̧ àfɨ̀Ꞌ yaa, ŋà wɨ̧ mèmpème bɨ Yesò Klistò ba. Mbɔ̧ɔ̧mà li ngwaꞋa mènəè kàbɔ̀ŋ ma bǎgème.

¹⁴ Tà lè saãaãtè àkatè njû ta tu ba li mbɔ̌ ndɨ bàa tsə nkàà nê ba pààte mbɨ̧te Mbɔ̧ɔ̧mà la. Bɔ li ngù̧ù̧te a Yesò a mbɨ̧̀ mbasa nko nê ànəa njû ta tu a mî, tè tè ka tsi mbɔ̀ mètàŋ a ègwet la.

¹⁵ Yesò Klistò li mpfə a mbɨ̧̀ mbasa ale ngɨ̀ fo tu tèa mbà̧aã èlaꞋ mè ntsìta mènəè la tè ka tsi mbɔ̀ mètàŋ. Tà li ntsè awɔb tè nkùùla awɔb ngɨ̀ bɔ tsiꞋa ngȩȩna akwen tò waa waa yea.

¹⁶ È wu ale, bɨ̀ ka mbɨ̧̀ɨ̧̀nê wòt tsìte mbɨ̧tsə ane èghɨ bɨ̀a njɨ̀a mè nua la. Bɨ̀ ka mè mbɨ̧̀ɨ̧̀ne wòt tsìte mbɨ̧tsə ane ànəa èli èpfəè bu bɨ bɔ ndɨ bɨ̀a nɔ̀ŋe ane e be Mbɔ̧ɔ̧mà la, kò wu àli a èpǎ̧ ko leꞋ, kò ntseit èŋu nè àliapfəèa Bèjuê leꞋ.

¹⁷ Èwuu èghɨ mbɔŋ li ngu wuê àlɨ̀ŋka èghɨ nga li ekɨꞋɨ la. Nkûŋ yu ane èghɨ mbɔŋ la wu Yesò Klistò à.

¹⁸ Bɨ̀ ka mbɨ̧̀ɨ̧̀nê wòt kǒ tà mɨɨtè nê ye tsě bòt nkàà ndzò̧ tu tàa ndzèa la è fɨ̀ta awɨ̧. Eyaa èwuu bòt bu bɔ̀ɔ shɨ̀ɨ̀bà nê, bòt è me nɨa wɔb a si mè shua nê, bòt è me ŋa kènuke wuê abua bɔntu̧ Mbɔ̧ɔ̧mà la. MènkwàꞋte tò mbɨ̀Ꞌɨ̀ è me bòt ko nàà ngɨ̀à tà wu̧a nkùꞋ zi kà ye lə.

¹⁹ Ŋut nàà kà tsi ndzəèa Yesò wu tà wu àtsəa ènyit yu è wu bòt Mbɔ̧ɔ̧mà la. Wu Yesò Klistò ka tàa ngɨ̀à ènyit mbɔŋ e bɔ èghɨjɨ, mè ngɨ̀à èdziꞋ ènyit ègème e tsəꞋnà ngua mbɨ̧̀ yemɔ̀Ꞌ, ale ngɨ̀à è tsəa ndɨ Mbɔ̧ɔ̧mà nàa nkɨà nê è me tsə la.

Mèmpfə nè mèntsèke ane Yesò Klistò

²⁰ Ndɨ̀ wu bɨ pfəꞋte ne Yesò Klistò, tè bɨ̀ ka tsi ngu a èten fo tu tèa mbǎ̧ ngɔ̀ŋ yaa la, è ghǎ ghɨ̂ ka bɨ mè me ghɨ̀ mènəè mɨ̧ mbɨ̀Ꞌɨ̀ bòt ngɔ̀ŋ ya à? Bɨ ghɨ̀ na ka mbèla nkùŋà mbɨ̧ tu tèa shua nê,

²¹ “Ka mbèa èghɨ bàa”, “Ka njùte èghɨ bìa”, “Ka mbà̧à̧te èghɨ ko bìa” la à?

²² Mbɨ̧ tàa tègème te wu adù̧ èghɨ bòt àa mbà̧à̧ta ka è ka wua ngù̧ù̧nà la. Wu bɔbȩ ka bɔ ghɨ mbɨ̧te mbɔŋ mè me nyɨꞋte bòt la.

²³ Bòt aa mɨ̀ɨ̀tà nê, ngule èyì ko aa ane èwuu mbɨ̧te mbɔŋ ka è ka lem nguê. Mbɨ̧te mbɔŋ teà nyɨ̀Ꞌta nê, bòt e bɔ ndɨ bɔ̀ɔ me ŋa kènuke wuê abua bɔntu̧ Mbɔ̧ɔ̧mà la, mè nyɨ̀Ꞌta èlu̧ bòt e bɔ ndɨ bɔ̀ɔ me nɨ ènyit yɔb a si, ka è kà wu we ntsɔ̧̀ la. Teà nyɨ̀Ꞌta mɨ̧̂ nê, bòt è me nɔ̀ŋè ènyit yɔb ane ngɨ̧̀ɨ̧̀nè nê bɔ wua nkuŋa Mbɔ̧ɔ̧mà. Ka mbɨ̧te mbɔŋ te bakà lem mbɔ̀ mètàŋ ekale wòt laꞋ nê tà ka ngɨ̀ èbɨꞋte èghɨ bu mbɨ̧̀ ènyit tò nàa nkɨà la.