ÀfaꞋa 9 - Mundani

Yesò kùbte èntɨ̧ɨ̧ Sɔ̂l

¹ Mbɨ̀Ꞌɨ̀ mènəè maa nàa ntsèà la, Sɔ̂l me ghǎ wuê nè mbì nkàà, nkɨ ekɨɨme wuê bɔkatè bu bɔ zì mèntɨ̧ɨ̧ mɔb ane Yesò la. Tà li ngà fɔ̀ɔ̀le abua àtsəa bèntsìà mèpɨ̧̀ Mbɔ̧ɔ̧mà

² nê tà ŋa mèkatè nàa nyɨ̀Ꞌta wòt ye wu wùà la, ye nɨŋ nga a lobte Mbɔ̧ɔ̧mà àpfəèà nɨ̧ a Dàmaskɔ̀s. Mbɨ̀Ꞌɨ̀ ye gha abàꞋ və, yè ye bòt bɔ̀ɔ nkùŋà alu̧ Yesò la, ye ko mbà̧à̧ àwɔb, mbâ̧ nè àvi nɨŋ nkua akwèn nkɨ̀Ꞌɨ̂ a Jèlusalèm.

³ Mbɨ̀Ꞌɨ̀ tà ghà tê ntsìꞋa nkɨ enyi a Dàmaskɔ̀s la, me ko àbȩ a kàꞋ a ègwelebuule nchu a si adù̧ tò.

⁴ Tà debe a si me zə àtɔŋ ako a shu abua tò nê, “Sɔ̂l, Sɔ̂l, ghǎ ghɨ̂ ka à me ghɨa kàbɔ̀ŋ ane yaã à?”

⁵ Tà bììte nê, “À wu wàà a Tè?” Àtɔŋ yu a nê, “E ngu Yesò wu àa nkɨà àtsəa tò enɨ la.

⁶ Ka, lɔ̀Ꞌɔ a si nga a èbem àpfəèà nɨ̧ yu, ko bɔɔ shu awê àghɨa à bɔ̂ ndɨ àa ghɨ̌ la.”

⁷ Bòt bu ngȩ̀ȩ̀nà bɔ̂ Sɔ̂l ba la e tɨ̧̂, èngǎ̧ e tsè àwɔb. Bɔ li ndzə àtɔŋ yu ka bɔ̀ ka ye wòt.

⁸ Sɔ̂l lɔ̀Ꞌɔ a si, ngàꞋtè àghɨ azi, ka tà kà ntsi ndzě èdziꞋ. Mbɨ̀Ꞌɨ̀ àghɨ atò a leme la, bɔ baãaã àbu atò, nɨ atò nga a Dàmaskɔ̀s.

⁹ Èli e me tsè betat, tà kà ye èdziꞋ, tà kà jɨ àghɨ, ko enu mèleb leꞋ.

¹⁰ Wakatè Yesò kǒ li ngu a Dàmaskɔ̀s və èlen tò wû Ànàniàs la. Tà li ndzè àtsə, Yesò shu abua tò nê, “Ànàniàs à?” Tà nê, “Ye am e wàà a Tè.”

¹¹ “Lɔ̀Ꞌɔ a si nga a lob Judàs a alu̧ wu bɔ̀ɔ ntɔ nê wu Alu̧ Ndɨŋndɨ̀ŋ la. À gha abot, à bììte wòt kǒ tà dzə àpfəèà nɨ̧ a Tasɔ̀s, èlen tò wu Sɔ̂l, tàa ntsàꞋta Mbɔ̧ɔ̧mà la.

¹² Tà ye àtsə, wòt kǒ èlen tò wu Ànàniàs la kɨꞋɨ̀ nɔ̀ŋè èbu bi àtsə atò mbɨ̀Ꞌɨ̀ e ghɨ̌ taa mě me ye èdziꞋ.”

¹³ Ànàniàs bɨ̀ɨ̀lè nê, “Tè Yesò, bòt nyaŋ e taꞋa làꞋa ànəa mbê waa, e dzə. Bɔ shu èwuu èbɨꞋte èghɨ ègème tà ghɨ ane bòt Mbɔ̧ɔ̧mà a Jèlusalèm la mɨ̧̂.

¹⁴ Ko nê, bètǎt bèntsìà mèpɨ̧̀ Mbɔ̧ɔ̧mà e tu̧u̧ atò, nê tà kɨꞋɨ a Dàmaskɔ̀s ŋaa mbà̧aã bòt bɔ̀ɔ ntsàꞋtà awê la.”

¹⁵ Tè Yesò mè shu abua Ànàniàs nê, “Ghà wuê ghǎ, nkàà nê mâ lȩ̀ atò nê tà faꞋa àfàꞋ am. Nê tà tɨŋe bòt kà wu Bèjuê bɔ̂ bèfɔ̧̀ bɔb, nè bòt Izəèlȩê bàgème bɔ ko wòt è ngu wùà la.

¹⁶ Mmɔ̌ mbɔŋ, maa nyɨꞋte atò ngoꞋ tàa ye mbɨ̀Ꞌɨ̀ e ghɨ̌ bòt àa ko am la.”

¹⁷ Mbɨ̀Ꞌɨ̀ tà shu ale la, Ànàniàs è gha a lob və, ndze a Sɔ̂l, nɔ̀ŋè èbu bi àtsə atò. Mbɔ̂ shu nê, “Wanɔ̧ Sɔ̂l, Yesò Lefɨ̀Ꞌ wu tà lè saꞋa a mbì lê a alu̧ mbɨ̀Ꞌɨ̀ à lè wua nkɨ̀Ꞌa abàꞋ ŋaa la è tsàà am. Tà tsàà am mbɨ̀Ꞌɨ̀ aa mě me ye edziꞋ, Fo Kèfə naa mě nyi a èntɨ̧ɨ̧ wê.”

¹⁸ KwàꞋ àfɨꞋa mbɔŋ, àghɨ ako mbɨ̀Ꞌɨ̀ èfaa asəâ a dzəè àghɨ a Sɔ̂l nkwènte a si, tà bùꞋ mè me ye èdziꞋ. Mbɨ̀Ꞌɨ̀ àghɨ atò a ghaꞋtè la, tà lɔ̀Ꞌɔ a si bɔ zì atò a èdzî.

¹⁹ Tà jɨ èghɨjɨ tè tà lɔꞋɔ, mètàŋ tò nkuà. Sɔ̂l ghɨ̀ ale, ntsèke èli mbɔ̀ŋè besòꞋà leꞋ a Dàmaskɔ̀s bɔ̂ bɔkatè Yesò bu abot və la.

Sɔ̂l è làꞋa èngǎ̧ Yesò a Dàmaskɔ̀s

²⁰ Tà li ndɔ̀Ꞌɔ abot mbê ngà nè lob Mbɔ̧ɔ̧mà Bèjuê mbùꞋ me làꞋà mènəè Yesò, shua nê, “Tà wu Waã Mbɔ̧ɔ̧mà.”

²¹ Bòt bàgème bɔ zə ndɨ tà làꞋà la, e ghaꞋa mètsəê mɔb ànəê a tsè awɔb la, me biite a kètsìà awɔb nê, “Ka mbê waa wu wòt wu a Jèlusalèm tàa mbùŋa a waa waa tàa ntsàꞋtà a Yesò la à? Ka tà ghɨ̂ me chu a si ŋàa ale ngua nchua mbɨ̀Ꞌɨ̀ ebaãaã bòt enɨ awɔb eghǎ vəèə abua bètǎt bèntsìà mèpɨ̧̀ Mbɔ̧ɔ̧mà à?”

²² Sɔ̂l li ndàꞋà mènəè Yesò ane èlɨ kekweelè tè Bèjuê bu a Dàmaskɔ̀s la e ka tsi nko ntsɔ̀Ꞌɔ èngǎ̧ tò. A li me wu ale, ngû ndɨ̀ wu èghɨ tà nɨŋ nyɨ̀Ꞌte nê, Yesò wu Fɔ̧̀ wu Mbɔ̧ɔ̧mà li ndzɔꞋ etsàà la, wu èghɨ betsiꞋa wòt kà ko ntu̧ la.

²³ Èli ko e mè nyaꞋa ntsè, Bèjuê ko e bù̧ù̧tè ntàŋke nê bɔ kɨ ebùŋe a Sɔ̂l.

²⁴ Ka bòt ko e kùùtè atò è shuê Sɔ̂l àghɨa bɔ taŋkè me kɨ e ghɨ̀ la. Bɔ me nyaꞋa màꞋtà àghɨ yɔb àli àgème, nèngû̧ bɔ̂ nyèmtèsi ndɨ̀ŋkà ètsəêkaã yu bɔ kut ndzì àpfəèà nɨ̧ yu a èbèm la, mbɨ̀Ꞌɨ̀ tà me tsě bɔ bùŋe atò.

²⁵ Ka è wu ètsəꞋ ane àli ako, bèshu̧ Sɔ̂l bɔ̂ tò ba e zì mèntɨ̧ɨ̧ mɔb ane Yesò la, e zi atò a èbem ankà̧ ntsaa ane èləèꞋ ko e ghaꞋa a mbɨ̧̀ àkaã yu la, tà me ghǎ.

Sɔ̂l è wene a Jèlusalèm

²⁶ Sɔ̂l ghɨ̀ ale, ngwènè a Jèlusalèm me kɨ enyɔ̀Ꞌte enyi ayɔɔ bɔkatè Yesò, ka bɔ̀ ka wua mbɨ̧̀ɨ̧̀nâ nê tà wu bɔ̂ tò ba nɔ̂.

²⁷ Ka wòt kǒ ane yɔb bɔ̀ɔ ntɔ atò nê Bànabasì la tɨŋe atò nɨ atò nga a mbì bɔntu̧ Yesò bu, shu awɔb ndɨ Sɔ̂l li ndze a Tè Yesò alu̧ Dàmaskɔ̀s la, mè shu awɔb ndɨ Tè Yesò li ndaꞋa abua tò la. Tà ghɨ̀ ale, shu fɔ̀ɔ̀le ndɨ Sɔ̂l li ndàꞋà ane èlen Yesò a Dàmaskɔ̀s kà bê mbɔ̀ɔ̂ la.

²⁸ Mbɨ̀Ꞌɨ̀ Bànabasì è làꞋ ale la, Sɔ̂l tsèke bɔ̂ bɔntu̧ ko bu, me ghȩ̀ȩ̀na ndàꞋà èngǎ̧ Yesò a èdzìꞋ ègème a Jèlusalèm kà bê mbɔ̀â.

²⁹ Tà ghɨ̀ tà làꞋa, tà me kààne bɔ̂ Bèjuê bu bèa ndàꞋà wuê a Glɨ̂k la, ka bɔ bɔ me kɨ wuê atò ebùŋe.

³⁰ ÀfɨꞋa bɔnyɨ bu e zə nê, bɔɔ̀ nkɨ ebùŋe a Sɔ̂l la, bɔ nɨ atò nchu nga a Sìsalìà, ntsàà nê tà me ghǎ a Tasɔ̀s.

³¹ Eyaa wu ndɨ a li tsè ka chɔsì wu a èlaꞋ a Jùdià, bɔ̂ Galìlî, nè Sàmalìà la e nyaꞋa ntsèke ntsɔ̧̀ la. Bɔ̀ li nkwèèlê, nkwèꞋnê ntàꞋa yaãaã, mbɨ̀Ꞌɨ̀ bɔ li ngua ntsèkâ ntsàꞋta a Tè Yesò la. A li ngu a èlɨ̀ waa nkàà nê Fo Kèfə li ngu ane yɔb.

ÀfaꞋa a Pità a Lidà nè Jopà

³² Mènəè maa li me tsè ale, Pità taꞋa wua ngȩ̀ȩ̀nà a èdzìꞋ nyaŋ. È li ngu ane àli ako, tà nê ye gha eye bòt Mbɔ̧ɔ̧mà a Lidà.

³³ Tà ghà ale, ndzě wòt kǒ èlen tò wu Enìàs la. Ènyit ŋut e ko nê e pfə tê tà nɔ̀ŋke a ègwet èku̧ ane èngùꞋebȩ yefà̧aã kà lɔꞋɔ a si.

³⁴ Pità shu abua tò nê, “Enìàs, mâ shu awê nê Yesò Klistò naa ghɨ̌ awê aa peme àfɨ̀Ꞌ yaa. È wu ale, lɔ̀Ꞌɔ a si nkààle a matà wê nɨŋ me ghǎ.” Mbɨ̀Ꞌɨ̀ tà shu ale la, ŋut bê ndɔ̀Ꞌ a si.

³⁵ Bòt bàgème a Lidà nè àlaꞋ a Shalɔ̀n e ye atò, ndɨ tà peme la, nkùbte ane mènəè kàbɔ̀ŋ mɔb, ntsìꞋi me kùŋe a Yesò.

³⁶ Àvi kǒ li ngu a Jopà, èlen tò wu Tàbità, tà wu wakatè Yesò la. (Ane ndɨ̧ Glɨ̂k èlen tò lu wu Dɔkàs, ngua shua nê tà wu èmvə.) Tà li ntàꞋa wua ngɨ̀à ntsɔ̧̀ mè ntɨ̀ŋa bòt ntseb àfɨ̀Ꞌ àgème.

³⁷ È me wu àfɨ̀Ꞌ àko tà kwen àghɔ̧ mpfə. Bɔ shuu atò, nɔ̀ŋe a èbem àtsəa lob a ègwet.

³⁸ Èndɨ̌ e li è ka wua saa elɔ̀Ꞌɔ a Jopà eghǎ a Lidà. AfɨꞋa bòt Yesò a Jopà e zə nê Pità wu a Lidà la, bɔ lɔ̀kè bòt babe ntù̧ awɔb nê, bɔ̀ gha shù̧ù̧te atò nê tà kɨꞋɨ kwàla ndzè àwɔb.

³⁹ Pità bê ndɔ̀Ꞌ a si ngà bɔ̂ tò ba. AfɨꞋa tà tà nyi abot la, bɔ nɨ atò nkɔꞋ ngà àtsəa lob a ègwet yu bɔ̀ le nɔŋa mpfəà wu a èbèm la. Bènempfə be li ntaꞋa kɨꞋɨ̀ ngààle atò abot, me dɨ̀a nyɨ̀Ꞌta atò ndìte èten tɔb bɔ̂ te ègwet, è wù te Dɔkàs wu le ghɨ àfɨꞋa tà bele ka pfə la.

⁴⁰ Pità fəè bòt bàgème ntsaa àbȩ, mbɔ̂ ntem tènjûŋ ti a si ntsàꞋte a Mbɔ̧ɔ̧mà, mbɔ̂ ngèble avi è shu abua mpfəà wu nê, “Tàbità, lɔ̀Ꞌɔ a si.” Tà ghàꞋa àghɨ azi ndze Pità me lɔ̀Ꞌɔ a si.

⁴¹ Pità tsàà àbu azi ntɨ̀ŋe atò, tà lɔ̀Ꞌɔ a si. Tà tɔ bòt Mbɔ̧ɔ̧mà nè bènempfə bu ŋa atò tà yu̧u̧me la abua yɔb.

⁴² Ànəê yaa a bùà a èdziꞋ ègème a Jopà. ÀfɨꞋa mbɔŋ bòt nyaŋ e zì mèntɨ̧ɨ̧ mɔb ane Tè Yesò.

⁴³ Pità ghɨ ale nteꞋa a Jopà a lob Simùn wu tà wû wòt tàa faꞋa ane gubtenyà̧ la.