Bìoball air-loidhne

ÀfaꞋa 23 - Mundani

¹ Pɔ̂l bê ntsìte àghɨ azi adù̧ bòt èsaꞋa bu mbɔ̂ nê, “Bɔnyɨ bɔ̧ bòt Izəèlȩê, èntɨ̧ɨ̧ am aà kà feele am ngu nê, ekɨꞋɨ ŋa laane waa, mâ ghɨ̂ wuê mènəè mu Mbɔ̧ɔ̧mà nàa nkɨà la.”

² Ànàniàs, àtsəa bèntsìà mèpɨ̧̀ Mbɔ̧ɔ̧mà shu abua bòt bu bɔ tɨ̧ a ngèt Pɔ̂l la nê, bɔ̀ tsɔ̌ ètsəê tò.

³ Pɔ̂l tsɔ̧ atò nê, “Tè Mbɔ̧ɔ̧mà tsɔ̀ awê mɨ̧̂. Ye àghɨa mɔꞋ ngaa mbɨ̀Ꞌɨ̀ mbɨ̧̀ lob bɔ lɔɔbe la. À tseke a si ŋu mbɨ̀Ꞌɨ̀ wòt tà wu esaꞋa am ndɨ mbɨ̧tsə tèa nkɨà la, mbɔ̂ mbèle wuê àwɔ̀ mpààtè mbɨ̧ tu nê bɔ̀ tsɔ̌ ètsəê am.”

⁴ Bòt bu a ngèt Pɔ̂l la e biite atò nê, “À ghɨ̀ na ka me tsɔ̧̀ɔ̧̀tè àtsəa bèntsìà mèpɨ̧̀ Mbɔ̧ɔ̧mà à?”

⁵ Pɔ̂l bɨ̀ɨ̀lè nê, “Bɔnyɨ bɔ̧ bòt Izəèlȩê, mâ ghɨ̂ è nka ko nê tà wu àtsəa bèntsìà mèpɨ̧̀ Mbɔ̧ɔ̧mà. Àkata Mbɔ̧ɔ̧mà a laꞋnê, ‘À ka ndaꞋa kàbɔ̀ŋ adù̧ wòt tà wu àtsəa bòt bê la’.”

⁶ AfɨꞋa Pɔ̂l è ye nê àbəèꞋ àko ane bòt bu wu Bèsadùsiì, èbeko wu Bèfalèsiì la, tà ŋȩ̂ a èbem lob èsaꞋa yu nê, “Bòt Izəèlȩê, e ngu wòt Falèsiì, bètǎt nyaꞋ bɔ̧ e wu Bèfalèsiì mɨ̧̂. Bɔ wua sàꞋa am a si ŋàa nê, mâ bɔ ntɨ̀ nê Mbɔ̧ɔ̧mà naa li ghɨ̌ bòt bɔ pfəꞋte la, aa yu̧u̧me.”

⁷ Mbɨ̀Ꞌɨ̀ tà bê ndàꞋà èngà̧ waa la, Bèfalèsiì nè Bèsadùsiì e bùꞋ me yɔ̌ a kètsìà wɔb tè ènɔ̧̂ wɔb wu e ghàbtè.

⁸ (Aa abua Bèsadùsiì, bòt bɔ pfəꞋte la, è ka wu li eyu̧u̧me, àghɨ ako à ka mê nguê bɔ̀ɔ ntɔ nê wu bɔntu̧ Mbɔ̧ɔ̧mà la, ka wuê àghɨa ko àa ngȩȩne ane fo la. Ka Bèfalèsiì e bɨ̧ɨ̧nè nê èghɨ bàagème aà və.)

⁹ Àŋȩte yu a me kɔꞋɔ ngà wuê nè ègwet, tè bènyɨꞋtà mbɨ̧te Musì ko bɔ̀ le wu akwene Bèfalèsiì bu la, e lɔ̀Ꞌɔ a si me ŋȩa ntù̧a àyɔb mɨ̧̂, shua nê, “Ba bakà ye ànəa kàbɔ̀ŋ ako mbê waa è ghɨ̀ la. Ateko wantu̧ Mbɔ̧ɔ̧mà kǒ, kò wuê fo kǒ leꞋ, è làꞋa abua tò ane nkûŋ.”

¹⁰ Àŋȩte yu a ghɨ̀ ale, mè nkwèèle, tè tǎt banyà̧ wu tsiꞋa mbɔ̀ɔ mbɨ̀Ꞌɨ̀ bòt bu e saãaãte a Pɔ̂l. Ale, tà tsàà bèshujà bi bu nê, bɔ̀ chu ngà a kètsìà bòt bu faa a Pɔ̂l nɨŋ ngà nɔŋe a èbem lob kèkweelè yɔb yu.

¹¹ È lɔ̀Ꞌ me wu ètsəꞋ, Waã Mbɔ̧ɔ̧mà è kɨ̀Ꞌɨ̂ è shu abua Pɔ̂l nê, “Ka mbɔ̀a! Mbɨ̀Ꞌɨ̀ à nyɨꞋte nkûŋ yu à ko ane yaã a Jèlusalèm ŋaa la, à bɔ ndɨ àa ghɨ̀ wuê a èlɨ mbɔŋ a Luêm la.”

Bɔ me kɨ ebùŋe a Pɔ̂l

¹² ÈtsəꞋ e li ntsi, Bèjuê ko e bù̧ù̧tè, ntǎ̧ ànəa ko, mbɔ̂ ndzì nkà̧ nê bɔ̀ ka jɨ àghɨa, bɔ̀ ka wu nu mèleb, tè bɔ ghɨ̀ mbuŋe a Pɔ̂l yaꞋ.

¹³ Bɔ̀ɔ̀ba wu bɔ li ndzì nkà̧ yaa la e li ngu te me tsě èghem yekwì.

¹⁴ Bɔ ghɨ̀ ale, mbɔ̂ nga abua bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ àlaꞋ, è shu abua yɔb nê, “Ba zǐ nkà̧ kèkweelè nê ba bakà bùŋe a Pɔ̂l, bà kà jɨ àghɨ, bà kà lem nù mèleb.

¹⁵ È wu ale, bɨ bòt èsaꞋa e tsàà ntu̧ abua tǎt banyà̧ Luêm nê tà nɨ a Pɔ̂l nchu ŋǎ abua yɨ̧. Bɨ̀ me tsɔ̀te ntu̧ yu, bɨ fɨtè nê bɨ kɨ nèète ekɨ mènəè mu bòt e shua ane tò la. Ka bàambɔŋ e taãaã ndɨ bàa bùŋe atò kà tà lem nkɨ̀Ꞌɨ̂ te nyi a si ŋàa la.”

¹⁶ Mbɨ̀Ꞌɨ̀ bɔ̀ɔ ntà̧aã ale la, wambâ̧ kǒ è wu waã wanyɨ Pɔ̂l la zə, ndùùlà nga a èbem lob kèkweelè banyà̧ yu, è shu atò.

¹⁷ Pɔ̂l wu, tɔ wajûŋ banyà̧ kǒ, shu abua tò nê, “Nɨ wakèsà waa nga abua tǎt banyà̧ wu, tà bɔ ànəê àko tàa nkɨ eshu abua tò la.”

¹⁸ Wajûŋ banyà̧ wu nɨ a mbalù̧ yu nga abua tǎt banyà̧ è shu nê, “Pɔ̂l wɔ̀tèfȩ wu è laꞋnê è nɨ a mbalù̧ yaa nkɨ̀Ꞌɨ̂ abua yê, nkàà nê tà bɔ ànəê àko tàa nkɨ e shu awê la.”

¹⁹ Tǎt banyà̧ wu zìambɔŋ baãaã àbu atò, nɨ atò nga a ntsèm, mbììte atò nê, “Wu ka ànəê à kɨ eshu abua am à?”

²⁰ Mbalù̧ yu nê, “Bɔɔjuŋ Bèjuê e laŋkè nê bɔɔ sàꞋa atetsɔꞋ, e ghɨ̌ aa nɨ a e Pɔ̂l nɨ chu a lob èsaꞋa. Nê, bɔɔ fɨte awê nê bɔ kɨ atò mbɨ̀Ꞌɨ̀ nèète ghaꞋte mènəè mu bòt e shua ane tò la.

²¹ Ka à ka njùte ànəa bɔ shua la, ngu nê bòt aà mbɔ̀ŋè èghem yekwì bɔ̀ɔ sàꞋa lò̧ò̧te me chɨ̀Ꞌɨ atò ebùŋè la. Bɔ zǐ nkà̧ nê, bɔ bakà bùŋe atò, bɔ̀ kà jɨ àghɨ, bɔ̀ ka lem nù ka wuê mèleb. Bɔ tsite ànəê àgème tè ndɔ̀Ꞌ, tè ntsìꞋa nchɨ̀Ꞌà ezə ànəa àa shu la.”

²² Tǎt banyà̧ wu nê, “Ko mbɨ̀Ꞌɨ̀ à shu wòt kǒ nê ye kɨꞋɨ tê ntùꞋ ànəê yaa abua am.” Bɔ làꞋ ale, tà tsaa a mbalù̧ yu nê tà me ghà avi.

Bɔ tsaa a Pɔ̂l abua Gɔvanɔ̀ Felìk

²³ ÀfɨꞋa mbɔŋ, tǎt banyà̧ wu tɔ bɔɔjuŋ banyà̧ ko babe, shu abua yɔb nê, “Bɨ̀ taŋke banyà̧ ènkɨ̀ yebe, bɔ̀ɔ gha Sìsalìà la. Bɨ̀ taŋke beko èghem yesà̧à̧mbe bèa kɔꞋɔ a ègwet bèloà la, fɔ̀ɔ̀lè ne èbeko ènkɨ̀ yebe bèa bèà tèghɔŋtsə la. Bɨ̀ me taŋke ale, bɨ ko nê, naa me wu ane nyèm tebəèꞋa ètsəꞋ waa, bɨ lɔꞋɔ a mànga.

²⁴ Bɨ̀ kɨ bèloà ko Pɔ̂l nàa kɔꞋɔ a ègwet və la, mbɔ̂ nɨ atò ntsɔ̧̀ ngà ŋǎ abua Gɔvanɔ̀ Felìk.”

²⁵ Tǎt banyà̧ wu bɔ̂ shɨ̀ àkatè yaa ŋǎ abua yɔb:

²⁶ Wu mmɔ̌ Klɔdìàs Lȩsìàs mâ shɨ àkatè yaa abua yê: Ndì Gɔvanɔ̀ Felìk la. Maà ntsàꞋtà awê.

²⁷ Bèjuê e li mbà̧aã a mbê waa me kɨ ebùŋe atò, e ngà ba banyà̧ bɔ̧ faa atò ngu nê mâ zə bɔ nê tà wu wòt Luêm.

²⁸ E ngɨ̀ ale, nɨ atò nɨŋ nga a mbì bòt èsaꞋa, ngua nkɨ ezə àghɨ yu a ghɨ̀ ka bɔ me kɨ àtsə atò enɨ la.

²⁹ Ngà ale, bɔ me làꞋà tê è nka ye ngule ànəê àko tà ghɨ̀ tê è wu àyea bɔ̀ɔ bùŋe atò la, kò àyea bɔ̀ɔ zi atò ka wuê a tèfȩ la leꞋ. Mènəè mu bɔ zǐ àtsə atò la wu mènəè mbɨ̧ tɔb.

³⁰ Mâ me ghɨ̀ tê ndzə nê Bèjuê ko aà ntà̧aã atò, ka e nê, tsiꞋ è ntsàa atò abua yê ale. Mâ shu abua bòt bu nkɨà àtsə atò enɨ la nê, bɔ̀ saꞋa atò a mbì lê.

³¹ Banyà̧ bu e ghɨ̀ mènəè ègème tà shu la, nɨ a Pɔ̂l ètsəꞋ mbɔŋ nga a endɨ̌ tè ngu àpfəè yu è wû Àntipatìs la.

³² ÈtsəꞋ e tsi, banyà̧ bu ngȩȩna a èka la e kua akwèn ngwènè a lob yɔb yu, sà èbu a ègwet bèloà la bɔ̀ nɨ a Pɔ̂l me ghà ne mbì.

³³ Bɔ nɨ atò tè bɔ̀ ghǎ bɔ̀ nyi a Sìsalìà, bɔ ŋa àkatè yu abua gɔvanɔ̀ wu, mbɔ̂ ndzi a Pɔ̂l a tèkitebu tò.

³⁴ Tà tɔ àkatè yu mbììte a Pɔ̂l àbâ àlaꞋ a tà dzəè ngaa la. ÀfɨꞋa tà zə nê Pɔ̂l è dzəa a Sìlisìà la,

³⁵ tà nê, “Bòt bu nkɨà àtsə ayê enɨ la aa kɨꞋɨ, ka ba tò ba aa tseke a lob èsaꞋa ezə ànəa ngaa.” Ale, tà tɔ bòt nê bɔ̀ nɨ a Pɔ̂l ngà nkȩ̀ a èbem tsâ̧ fɔ̧̀ Elɔ̀d.

« Roimhe

Air adhart »

Lean sinn:

Ceanglaichean taic

Sanasan