ÀfaꞋa 21 - Mundani

Pɔ̂l ghà a Jèlusalèm

¹ Ba li ndàꞋnè àwɔb mbɔ̂ ngà nyi a èbem ànkànuꞋ mbê ngà ndɨŋndɨ̀ŋ tè nyi Kɔs. ÈtsəꞋ e tsi ba tsè a Lod, ndɔ̀Ꞌ abàꞋ və ngà a Pàtalà.

² Bà nyi abàꞋ və, ba ye taꞋà ànkànuꞋ ako nga nè àlaꞋ a Fònisìà la, ntsìꞋi dzə a èbem aya yu ngà nyi a èbèm me ghǎ.

³ Ba ghà tê bà tsiꞋa ndzèa Sȩplùs, ba tsè nè àtsɔꞋɔ ngà nè Silìà, ntɨ̧ a Tȩê ndzə àbȩ, è wu àdziꞋa bɔ̀ le wuê etsǐ èghɨ a èbem ànkànuꞋ yu la.

⁴ Ba dzə ale ndze bòt Yesò ko abàꞋ və, ntsèke èli besà̧à̧mbe ba tò ba. Fo Mbɔ̧ɔ̧mà è ghɨ̀ bɔ shu abua Pɔ̂l nê tà ka nga a Jèlusalèm.

⁵ Ba tseke abàꞋ və tè àfɨ̀Ꞌ aya a kùꞋ, ba dzəè mbà̧à̧ àtsəalu̧ aya. Bà me ghǎ, bòt Yesò bu bàgème nè bèzi bɔb bɔ̂ bɔ̧ bɔb, e dzəè àpfəèà nɨ̧ yu nga etsàà àwa. Ba tò ba e gha a ngèt èdzî wu, ba teme tènjùŋ ta a ègwet tèsoŋtsə ntsaꞋte a Mbɔ̧ɔ̧mà.

⁶ Ba ghɨ̀ ale, ba tò ba e làꞋnè àwa, ba bɔ̂ nyi a èbem taꞋà ànkànuꞋ yu, bɔ̀ɔmbɔŋ e kua akwèn me ghǎ àwɔb àpfəè.

⁷ Ba nɨ lèghȩ̀ȩ̀nè wa me ghà ne mbì ndɔꞋɔ a Tȩê nga àpfəè yu è wu Tòlemè la. Bà nyi abàꞋ və, ba tsàꞋtè bɔnyɨ ba mbɔ̂ ndì àli yeamɔꞋ ba tò ba.

⁸ ÈtsəꞋ e tsi, ba lɔ̀Ꞌ nga a àpfəè yu è wu Sìsalìà la, me tseke a lob Filìb kǒ tà lè wu wòt tàa ntsɔ̀tà Ntu̧ Ntsɔ̧̀ Yesò la. Filìb mbɔŋ li ngu wòt kǒ ane bòt bu basà̧à̧mbe bɔ̀ le lɔꞋɔ ndàà àwɔb a Jèlusalèm la.

⁹ Tà li mbɔ̀ bɔɔ̀zi bi ko bakwì kà yɔꞋ bɔ̀ɔ ndàꞋà mèngǎ̧ ane àtɔŋ Mbɔ̧ɔ̧mà la.

¹⁰ Bà tseke abàꞋ və ane èli ko, ndàꞋàtɔŋ Mbɔ̧ɔ̧mà kǒ bɔ̀ le wua ntɔ̀ atò nê Àgabùs la è lɔ̀Ꞌɔ a Jùdià nchu.

¹¹ Tà kɨꞋɨ tà kwene ane ya, tà nɨ nkànda Pɔ̂l, nkùùle èbu bi bɔ̂ èka bi, mbɔ̂ nê, “Fo Kèfə laꞋnê, Bèjuê bu a Jèlusalèm la aà nga ekuule wòt wu tà bɔ nkànda yaa la, ebɔ ŋa atò abua bòt kà wu Bèjuê.”

¹² AfɨꞋa ba zə èngà̧ waa la, ba bòt ko bu abot la e shu̧u̧te a Pɔ̂l nê tà ka nga a Jèlusalèm.

¹³ Ka Pɔ̂l shu abua ya nê, “Bɨ ghɨ̀ na ka me dɨ̀a èlɨ̀ waa ndòa èntɨ̧ɨ̧ am à? Maà kà lem nkɨ ghǎ a Jèlusalèm bɔɔ kuule am kuule, maa epfə abàꞋ və nkàà Yesò Lefɨ̀Ꞌ.”

¹⁴ Ba nyɔ̀Ꞌtè nê ba kɨ ekubte èntɨ̧ɨ̧ tò, nkùbte kekaŋ. A tsè àwa, ba tsiꞋi laꞋnê, “Ànəê àgème à tsè wuê mbɨ̀Ꞌɨ̀ Mbɔ̧ɔ̧mà è taŋke la.”

¹⁵ Mbɨ̀Ꞌɨ̀ ba nyàꞋâ mè ntsèke ane èli ko abàꞋ və la, ba taŋkè èghɨ ba me kɔꞋa nga a Jèlusalèm.

¹⁶ ÀbəꞋa bɔkatè Yesò ko a Sìsalìà və a nɨ awa nga ntsaa a lob wòt kǒ bà le wua nga me tseke a lob tò la. Èlen ŋut li ngu Masɔ̀n, tà bɔ̂ ngu wòt Sȩplùs. Tà li ngu wakatè Yesò e bùꞋù te ane èli mbì bu.

Pɔ̂l ghà mù a Jimsì

¹⁷ Ba li ngà tè bà nyi a Jèlusalèm, bɔnyɨ ba bu abàꞋ və la e taꞋa sèè awa.

¹⁸ ÈtsəꞋ e tsi, Pɔ̂l nɨ̀ awa nê bà gha ndzea Jimsì. Bɔɔjuŋ ayɔɔ bòt Yesò bu e li ngu a si bàgème.

¹⁹ Pɔ̂l è tsàꞋtè àwɔb, mbɔ̂ nèètè shu awɔb èghɨ ègème Mbɔ̧ɔ̧mà è ghɨ ye ghɨ a kètsìà bòt kà wu Bèjuê la.

²⁰ Mbɨ̀Ꞌɨ̀ bɔ zə èngǎ̧ tò la, bɔ wùꞋte a Mbɔ̧ɔ̧mà bàgème, mbɔ̂ shu abua Pɔ̂l nê, “Wanyɨ wa, à ye àwɔ̀ mbɔŋ ndɨ Bèjuê mbɔ̀ŋè bètɔsì kà pà̧ be zì mèntɨ̧ɨ̧ mɔb ane Yesò mbɔ̂ mbèla nkùŋà mbɨ̧ ta ntsɔ̧̀ la.

²¹ Bòt ko e shu awa nê, àà ngȩ̀ȩ̀nà shua abua Bèjuê bu bèa ntsèka ayɔɔ bòt kà wu Bèjuê la nê, bɔ̀ ka tsi nkùŋè mbɨ̧te Musì, bɔ̀ ka tsi nàŋe bɔ̧ bɔb, bɔ̀ ka tsi nkùŋè mènəè ndɨ̧ Bèjuê.

²² A ghɨ̀à nà leꞋ, ko bɔɔ zə nê à kɨꞋɨ̀. Bàa chɨɨme ghɨ̀ na lee?

²³ Ghɨ̀ mbɨꞋɨ̀ bàa shu awê la. Bòt aa a kètsìà awa anè bakwì bɔ zì nkà̧ a mbì Mbɔ̧ɔ̧mà la.

²⁴ Nɨ bòt baa bɨ tò ba è ghǎ shùù ènyit yɨ̧ mbɨ̀Ꞌɨ̀ ekùꞋu e mbì Mbɔ̧ɔ̧mà. Aa ghǎ, à ŋà èkab wu bɔ̀ɔ tsòke enɨ tsì mèpɨ̧̀ àdziꞋa èpà̧ wu la, bɔ bɔ̂ mù ètsə bɔb. À ghɨ̀ ale, ko waa waa naa ko nê mènəè mu ègème bɔ shua ane yê la wu àfɨte. Ko bɔɔ ko nê àwɔ̀ mbɔŋ aà nkùŋà mbɨ̧te Musì.

²⁵ È me wu bòt kà wu Bèjuê bu bɔ zì mèntɨ̧ɨ̧ mɔb ane Yesò la, ko bà le yaŋe tsàà àwɔb àkatè nê, bɔ̀ ka nkwèle nyà̧ bɔ nɨŋ ntsì èpɨ̧̀ adù̧ la, bɔ̀ ka nkwèle nyà̧ bɔ tɨ̀ŋè la, bɔ̀ ka mè njɨ̀ àlo̧, bɔ̀ ka mè ntsi nɔ̀ŋkè nè bèzi kà wu ebɔb.”

²⁶ Ale, ètsəꞋ e tsi, Pɔ̂l nɨ bòt bu bakwì la bɔ̂ tò ba e ghà fɔ̀te mbùꞋ ànəa mànshua lèsɔ̀t wu. Mbɔ̂ ndɔ̀Ꞌ nga a èbem lob nɨ̧ Mbɔ̧ɔ̧mà a Jèlusalèm, è shu a ntsìà mèpɨ̧̀ wu abot la àlia èpǎ̧ mbɔŋ àa lìa, bɔɔ ŋa àghɨ àtsəa waa waa ane yɔb enɨ nkɔ̀ŋka a Mbɔ̧ɔ̧mà la.

Bɔ baãaã a Pɔ̂l a èbem lob nɨ̧ Mbɔ̧ɔ̧mà

²⁷ Mbɨ̀Ꞌɨ̀ èli bu besà̧à̧mbe e tsiꞋa nkɨ emì la, Bèjuê ko bɔ dzə àbâ àlaꞋ a Esìà la e ye a Pɔ̂l a èbem lob nɨ̧ Mbɔ̧ɔ̧mà a Jèlusalèm. Bɔ ye atò, ntɔ̀te àtsəa ènɔ̧̂ bòt, a zì èbu ane tò.

²⁸ Bɔ baãaã atò ale, me ŋȩa shua nê, “Bòt Izəèlȩê, bɨ̀ tɨ̀ŋe awa. Eyaa wu mbê wu tàa ngȩ̀ȩ̀nà nyɨ̀Ꞌta bòt bàgème nê bòt Izəèlȩê, nè mbɨ̧te Musì, fɔ̀ɔ̀lè ne lob nɨ̧ Mbɔ̧ɔ̧mà a Jèlusalèm wu èghɨ aku la. Ye atò àfɨ̀Ꞌ yaa tà chɨɨmè nɨ bòt ko kà wu Bèjuê nyi a èbem lob nɨ̧ Mbɔ̧ɔ̧mà a Jèlusalèm tè ntsòkè lob ngaa la.”

²⁹ (Bɔɔ ndàꞋa ale, ngu ndɨ̀ wu bɔ li mbɨ̀ ndze a Tɨ̀lòfimùs wu tà dzə a Efesɔ̀s la ngȩ̀ȩ̀nà àpfəèà nɨ̧ və bɔ̂ Pɔ̂l la. Bɔ li ntanda nê Pɔ̂l è nɨ atò nyi a èbem lob nɨ̧ Mbɔ̧ɔ̧mà yu a Jèlusalèm la.)

³⁰ ÈdziꞋ ègème e li nyìꞋnè àpfəèà nɨ̧ yu tè bòt nyaŋ e lùùlà mbu̧u̧te adzìꞋ yeamɔꞋ, mbà̧aã a Pɔ̂l, səŋne atò ndzə a èbem lob nɨ̧ Mbɔ̧ɔ̧mà yu a Jèlusalèm mbɔ mbê nkȩ̀ mètsəê lob nɨ̧ Mbɔ̧ɔ̧mà yu a Jèlusalèm la.

³¹ Ènɔ̧̂ bòt bu aa nkɨ ebùŋe a Pɔ̂l ale, wòt kǒ lùùlà ngà shu abua tǎt banyà̧ Luêm nê ngoꞋ è dzə a Jèlusalèm ègème.

³² KwàꞋ àfɨꞋa mbɔŋ, tǎt banyà̧ wu nɨ banyà̧ ko bɔ̂ bɔɔjuŋ ko ane yɔb ndùùlà nchu ngà nkwène ane ènɔ̧̂ bòt bu. ÀfɨꞋa bòt bu e ye atò nè banyà̧ akwèn zi la, bɔ̀ ka tsi ndènè a Pɔ̂l.

³³ Tǎt banyà̧ wu gha a mbɨ̧̀ Pɔ̂l, ndzì èbu ane tò, mbɔ̂ ngɨ̀ bɔ kuule atò ane fȩ tebe. Tà bɔ̂ mbììte nê, “Mbê waa wu wàà à? Tà ghɨ̀ ghà à?”

³⁴ Bòt ko a kètsìà ènɔ̧̂ bòt bu e me ŋȩa shua ànəê ako, èbeko e me ŋȩa shua àyea tsa. Bòt e làꞋà nèmbuꞋ tè a tsè a tǎt banyà̧ wu taa chɨɨme eko ngule àghɨ yu a ghɨ̂ ngɨ̀ la. Ale, tà tsiꞋi shu abua banyà̧ bi nê, bɔ̀ nɨ a Pɔ̂l nkɔꞋ nga a èbem lob kèkweelè yɔb yu.

³⁵ Bɔ nɨ a Pɔ̂l, bɔ̀ gha ane ntɨ̀a tu tèa nkɔ̀Ꞌa nga a èbem lob yu la, banyà̧ bu e tsiꞋi ŋeꞋe atò ŋeꞋe nkàà nê, ènɔ̧̂ bòt bu e li ntsòò tê mè me kɨ ebaãaã atò.

³⁶ Ènɔ̧̂ bòt bu bàgème e li ngua ndùùlà akwèn ŋȩ̀a nê, “Bɔ̀ bùŋe atò.”

Pɔ̂l tsì ànəê àtsə azi

³⁷ Mbɨ̀Ꞌɨ̀ bɔ tsiꞋa nkɨ enɨ a Pɔ̂l eghǎ a èbem lob kèkweelè yu la, tà shu abua a tǎt banyà̧ wu nê, “TsiꞋ è shu awê ànəê àko?” Tǎt banyà̧ wu biite nê, “Ɔ̀ɔ̀, àà nyǎ̧ ndàꞋà ndɨ̧ bòt Glɨ̂k?

³⁸ Ale, ko à ntsě mbê wu tà lè dzə àlaꞋ a Ejìb nkɨ̀Ꞌɨ̂ mbùꞋ ngoꞋ àlaꞋ ŋàa tè nɨ̀ bemàkìà bètɔsì bakwì nkȩ nga àbâ àlaꞋ àyuube la.”

³⁹ Pɔ̂l bɨ̀ɨ̀lè nê, “E ngu wòt Juê bɔ bi am àpfəèà nɨ̧ yu è wu Tasɔ̀s àbâ àlaꞋ a Sìlisìà la. E ngu waã àpfəèà nɨ̧ àkekweelè àlaꞋ ŋàa. Wɔ̀jûŋ, chɨɨme sà am è ndaꞋa abua bòt baa.”

⁴⁰ Tǎt banyà̧ wu bɨ̧ɨ̧nè nê Pɔ̂l è laꞋa ale, Pɔ̂l tɨ̧ɨ̧ a ègwet ntɨ̀a tu ndèbè èbu bi nê bòt bu è buŋ. AfɨꞋa bɔ bu la, tà bùꞋ me làꞋa abua ayɔb ane ndɨ̧ àlaꞋ a yɔb, bɔ̀ɔ bòt Ebùlù.