Bìoball air-loidhne

ÀfaꞋa 18 - Mundani

Ntu̧ Ntsɔ̧̀ a Kɔlìn

¹ Mbɨ̀Ꞌɨ̀ àyaa a tsè la, Pɔ̂l è lɔ̀Ꞌɔ Atèns nga Kɔlìn.

² Tà ghà ale, tà kwene ane wòt Juê kǒ èlen tò wu Àkwilà, bɔ bɔ̂ mbì atò àbâ àlaꞋ a Pontùs la, tà bela nkɨ̀Ꞌa kɨꞋɨ nè àlaꞋ a Itàlì bɔ̂ vi vi Plìsilà la. Tàa nkɨ̀Ꞌa ale, ngu ndɨ̀ wu Klɔdìàs wu, è wu empelɔ̀ la è laꞋ nê Bèjuê bàgème è sa Luêm me ghǎ la. Ale, Pɔ̂l gha eye awɔb,

³ ngà ntsèke me fàꞋà bɔ̂ tò ba, ndɨ̀ wu tà lè wu wòt tàa nɨa gubtenyà̧ ngɨ̀à bayò mbɨ̀Ꞌɨ̀ bòt ngaa la.

⁴ È ghɨ̀ è wu àliapfəèa àgème tà gha a lob Mbɔ̧ɔ̧mà me mù mènəè tò, nê ye kɨ e ghɨ̌ Bèjuê nè bòt kà wu Bèjuê aa zì mèntɨ̧ɨ̧ mɔb ane Yesò.

⁵ Sȩlàs bɔ̂ Tɔ̀màtià e li ndɔ̀Ꞌ a Màsèdonìà nkɨ̀Ꞌɨ̂, Pɔ̂l tsiꞋi ŋa àfɨ̀Ꞌ àzi àgème a màntsɔta Ntu̧ Ntsɔ̧̀ yu, nèètà nyɨ̀Ꞌta Bèjuê nê, Yesò wu Fɔ̧̀ wu Mbɔ̧ɔ̧mà li ndzɔꞋ etsàà la.

⁶ AfɨꞋa bɔ ntu̧ ànəa Pɔ̂l shua la, mè me làꞋà mènəè kàbɔ̀ŋ ane tò la, tà ŋȩ̀ àwɔb, nyìꞋì àbeb ntsi ane ndǐ ti ndèb kwen zi. Me shua wɔb nê, “Bɨ lia nyɔ̂, ko à yu a ye awɨ̧. È ntsě èsaꞋa am.” E bùꞋu àfɨ̀Ꞌ yaa me ghà ne mbì, maa sà àwɨ̧ eghǎ me làꞋa èngǎ̧ Mbɔ̧ɔ̧mà abua bòt kà wu Bèjuê.

⁷ Tà làꞋ ale, tà ghà me tseke avi a lob wòt kà wu Juê kǒ, tàa nkùkta Mbɔ̧ɔ̧mà, èlen tò wu Tȩtɔ̀s Justùs la. Lob ŋut bê ngu kwàꞋ a ngèt lob Mbɔ̧ɔ̧mà.

⁸ Klipùs wu tà lè wu àtsəa lob Mbɔ̧ɔ̧mà Bèjuê yu la li ndzì èntɨ̧ɨ̧ vi ane Tè Yesò bɔ̂ bòt bi bàgème. Bòt ko nyaŋ a Kɔlìn e li ndzəâ èngǎ̧ Pɔ̂l ale, e ghɨ̀ bɔ tsiꞋi bòt Yesò tè bɔ zì àwɔb a èdzî.

⁹ È wu ètsəꞋ ane àli ako, Pɔ̂l ye àtsə, Mbɔ̧ɔ̧mà shu abua tò nê, “Ko mbɨ̀Ꞌɨ̀ à bɔ̀â, me làꞋa èngà̧ wu ngà wuê nè mbì. Ko mbɨ̀Ꞌɨ̀ à tsèke kà tsi ndàꞋ,

¹⁰ nkàà nê e ngu baa nè. BetsiꞋa wòt ko ka ghɨ àghɨ ane yê. Ko nê mâ taꞋa làa bòt a èbem àpfəè ŋaa ane èbɔ̧.”

¹¹ Mbɨ̀Ꞌɨ̀ Mbɔ̧ɔ̧mà è làꞋ ale la, Pɔ̂l tsèke abàꞋ və ane èngùꞋebȩ wemɔꞋ nè àtem, me nyɨꞋte bòt èngǎ̧ tò.

¹² È li ngu àfɨꞋa bòt Luêm e yɔꞋɔ a Galiò ane gɔvanɔ̀ bòt àlaꞋ a Akayà la, Bèjuê e bù̧ù̧tè mbǎ̧ a Pɔ̂l nɨŋ nga a mbì èsaꞋa.

¹³ Bɔ̀ ghà ale bɔ nê, “Mbê waa nàà nyɔ̀Ꞌtà nkɨ eŋwèèle bòt ba, bɔɔ me wùꞋte a Mbɔ̧ɔ̧mà ane èwuu èlɨ̀ ko kà mbɨ̧tsə te bɨ̧ɨ̧nè.”

¹⁴ Pɔ̂l nê ye kɨ etsɔꞋɔ èngǎ̧ mbɔŋ, ka Galiò shu abua Bèjuê bu nê, “Ànəê yaa a ghɨ̀ ale ngû mbɨ̧ kǒ Pɔ̂l è fà̧ la, kò wuê ànəa kàbɔ̀ŋ ako tà ghɨ̀ la leꞋ, ko a nyɨꞋte ane èyì nê, è njute èngǎ̧ wɨ̧ bɨa Bèjuê.

¹⁵ Ka ndɨ̀ wu è wu ànəa bɨ kaana adù̧ mèngà̧, nè tèlentsə, nè mbɨ̧ tɨ̧ bɨ̀ambɔŋ la, bɨ bɔ̂ ndɨ bɨ̀a tsɔꞋte ayea ngaa bɨ̀ambɔŋ la. BetsiꞋa è nka saꞋa èwuu mènəè ale.”

¹⁶ Tà làꞋ ale, tà fəè àwɔb nê bɔ̀ dzəa lob èsaꞋa yu.

¹⁷ ÀfɨꞋa mbɔŋ, bɔ̀ɔgème e baãaã a Sostènès wu, tà lè wu àtsəa lob Mbɔ̧ɔ̧mà yɔb la, ndène atò a mbì èsaꞋa wu. Ka ànəa ngaa à ka lem mbùꞋ kèmbǎ̧ ane Galiò.

Pɔ̂l è lɔ̀Ꞌɔ Kɔlìn ngwènè Antìɔ̀k

¹⁸ Pɔ̂l li ntsèke bɔ̂ bɔnyɨ ba ko bu ane èli nyaŋ a Kɔlìn. Tà lɔ̀Ꞌɔ ebàꞋ və, bɔ̂ Plìsilà nè Àkwilà e nyi a èbem ànkànuꞋ me ghà ne àlaꞋ a Silìà. Me laꞋnê yea ngà ale, ndzì nkà̧ a mbì Mbɔ̧ɔ̧mà a Sènkliyà, tè mù fɔ̀ɔ̀lè àtsə azi.

¹⁹ Bɔ̀ ghà tê bɔ̀ nyi a Efesɔ̀s, è wû àpfəè yu tàa lɔ̀Ꞌɔ ntɔ a Plìsilà bɔ̂ Àkwilà abot la, tà ntsè nga a lob Mbɔ̧ɔ̧mà Bèjuê me kàànè bɔ̂ tò ba.

²⁰ Bɔ shu abua tò nê, tà tseke bɔ̂ tò ba ane àfɨ̀Ꞌ à seè ka tà tu̧,

²¹ mbɔ̂ shu abua yɔb wuê nê, “Mbɔ̧ɔ̧mà è bɨ̧̀ɨ̧̀nâ nê e mě nkɨ̀Ꞌɨ̂, ko maa kɨꞋɨ.” Tà làꞋ ale, tà nyi a èbem ànkànuꞋ a Efesɔ̀s və me ghǎ.

²² Tà ghà tê tà nyi Sìsalìà, tà tsiꞋi ghȩ̀ȩ̀ne a èka nga a Jèlusalèm, ntsàꞋtè bòt chɔsì abàꞋ və, mbɔ̂ ntsè ngà nè Antìɔ̀k.

²³ Tà tseke ane àfɨ̀Ꞌ àko abàꞋ və, tà bɔ̂ ndɔ̀Ꞌ mè me ghȩ̀ȩ̀na ntsea àbâ àlaꞋ a Fligìà bɔ̂ Gàlashìà ndɔ̀ktà bɔkatè Yesò bu bàgème a èdziꞋi mbɔŋ la.

Àpolòs tsɔ̀tè Ntu̧ Ntsɔ̧̀ a Efesɔ̀s bɔ̂ Kɔlìn

²⁴ Wòt Juê kǒ li nkɨ̀Ꞌɨ̂ a Efesɔ̀s èlen tò wû Àpolòs la. Bɔ̀ le bi atò a Àlèkzandìà, tà bɔ̂ ntaꞋa ko a màndaꞋa, mè ntaꞋa ko mènəè bɔ shɨ a èbem èdziꞋi èkatè Mbɔ̧ɔ̧mà la.

²⁵ Tà li nko mènəè Yesò mbɨ̀Ꞌɨ̀ bɔ nyɨꞋte atò la, tè me nèèta ndàꞋà mènəè mbɔŋ mbɨ̀Ꞌɨ̀ wòt tà ko nê ànəa ye làꞋà la wu ngule ànəê la. Mbàte ngɨ̀ ale, ka nko wuê mènəè mu Jɔ̌n li ngua ndaꞋa ane Yesò àfɨ̀Ꞌ yu tà li ngua ndzìà bòt a èdzî la.

²⁶ Mbɨ̀Ꞌɨ̀ tà kɨꞋɨ a Efesɔ̀s ale la, tà bùꞋ me làꞋa èngǎ̧ Mbɔ̧ɔ̧mà a èbem lob tò. AfɨꞋa Plìsilà bɔ̂ Àkwilà e zə mènəè tà làꞋà la, bɔ nɨ atò nga àpfəa yɔb me paa nèètà ngàꞋte alu̧ Mbɔ̧ɔ̧mà nyɨ̀Ꞌta tò.

²⁷ Àpolòs tsèkê tè nê yea ghǎ Akayà, ale bɔnyɨ ba bu a Efesɔ̀s la e tɨŋe atò, è shɨ àkatè ntsaa abua bòt bu a Glɨ̂k və la nê bɔ̀ baãaã atò ntsɔ̧̀. AfɨꞋa tà nyi abàꞋ və la, tà wu taꞋà ètɨŋe abua bòt bu Mbɔ̧ɔ̧mà è kɔ̀ŋkè àwɔb tè ngɨ̀ bɔ tsiꞋi bòt Yesò la.

²⁸ Bɔ̂ Bèjuê e li ngua nkàànà mènəè Yesò àsà̧aã èwen, tà tɔ èdziꞋ èkatè Mbɔ̧ɔ̧mà nyɨ̀Ꞌte awɔb ndɨ Yesò wu Fɔ̧̀ wu Mbɔ̧ɔ̧mà li ndzɔꞋ ntsà la, tè mètsəê mɔb lem.

« Roimhe

Air adhart »

Lean sinn:

Ceanglaichean taic

Sanasan