Bìoball air-loidhne

ÀfaꞋa 14 - Mundani

Ntu̧ Ntsɔ̧̀ a Èkonìòm

¹ Pɔ̂l bɔ̂ Bànabasì e li nga a Èkonìòm ale, mènəè bê nguê mbɨ̀Ꞌɨ̀ è li ntse a Antìɔ̀k la. Bɔ li nyi a èbem lob Mbɔ̧ɔ̧mà ndàꞋ èngǎ̧ e kweelè tè Bèjuê nyaŋ nè bòt kà wu Bèjuê e zì mèntɨ̧ɨ̧ mɔb ane Yesò.

² Ka Bèjuê bu bɔ tu̧ ezə èngǎ̧ Mbɔ̧ɔ̧mà la e lute bòt kà wu Bèjuê tè ntsòkè ètsə bɔb bɔ tsiꞋi me pààbe bɔnyɨ ba bu.

³ Bɔntu̧ Yesò bu e bɔ̂ ngɨ̀ ale ntsèkê abàꞋ və ane àfɨ̀Ꞌ à seè, me làꞋà ka bɔ̌, shua bòt bu ndɨ Mbɔ̧ɔ̧mà nàa nkɔ̀ŋkà àwɔb la. Mbɔ̧ɔ̧mà li mè ŋà àwɔb mètàŋ bɔ me nɨa ngɨ̀à tèwuute ènəê kà ye fɨ̀Ꞌ nɨa nyɨ̀Ꞌta mètàŋ tò mè ngɨ̀à ngɨŋa mènəè nɨa nyɨ̀Ꞌta nê ànəa bɔ làꞋà la wu nkûŋ.

⁴ Ènɔ̧̂ bòt bu àpfəèà nɨ̧ yu la e ghàbtè èbà bebe, bòt ko e tɨ̧ɨ̧ akwene Bèjuê, èbeko e tɨ̧ɨ̧ akwene bɔntu̧ Yesò bu.

⁵ Bɔ lɔ̀Ꞌɔ àfɨꞋa mbɔŋ, Bèjuê bɔ̂ bɔɔjuŋ ayɔɔ yɔb nè bòt kà wu Bèjuê e làŋkè nê bɔ̀ ghɨ̧̀ɨ̧̀nè bɔntu̧ Yesò bu ntèmte awɔb ane àti.

⁶ Bɔntu̧ bu e me ghɨ̀ tê ndzə ànəa ngaa ndùùlà ngà àwɔb àlaꞋ a Lȩ̀konià a èbem èpfəè bu è wu Lislà nè Debì là, fɔ̀ɔ̀le a èdzìꞋ bu a ngèt èpfəè nɨ̧ ngaa la.

⁷ Bɔ gha abot ale, me tsɔ̀te Ntu̧ Ntsɔ̧̀ Yesò.

Ntu̧ Ntsɔ̧̀ a Lislà nè Debì

⁸ Wòt kǒ li ngu a Lislà èka tò e ŋɔꞋte la. Mbɨ̀Ꞌɨ̀ bɔ̀ le bi atò la, tà me ŋɔ̧̀ɔ̧̀mè ŋɔ̧ɔ̧me, kà li mè ghȩ̀ȩ̀ne àtatsi.

⁹ È li ngu ane àli ako tà wu a si tà tsekè me yute Ntu̧ Ntsɔ̧̀ yu Pɔ̂l tsɔ̀tà la. Pɔ̂l ye nê, betsiꞋa tà zì èntɨ̧ɨ̧ vi ane Yesò tè tà bə atò. Ale, tà tsìte àghɨ azi ane tò,

¹⁰ mbɔ̂ ŋȩ nê, “LɔꞋɔ ntɨ̧ àtatsi.” Mbê wu bê nkȩ ndɔ̀Ꞌ a si me ghȩ̀ȩ̀ne.

¹¹ AfɨꞋa ènɔ̧̂ bòt bu e ye àghɨa Pɔ̂l è ghɨ̀ la, bɔ bùꞋ me ŋȩa shua ane ndɨ̧ yɔb bɔ̀ɔ bòt àlaꞋ a Lȩ̀konià nê, “Bèmbɔ̧ɔ̧mà e tsiꞋi chu a kètsìà wa mbɨ̀Ꞌɨ̀ bɔbȩ!”

¹² Mbɔ̂ ntsì èlen Bànabasì ane Ziyù è wu mbɔ̧ɔ̧mà kǒ la, ntsì è le Pɔ̂l ane Emès nkàà nê tà lè wu wòt tàa ndàꞋà èngǎ̧ wu la.

¹³ Ntsìà mèpɨ̧̀ lob mbɔ̧ɔ̧mà Ziyù yu mpɨ̀Ꞌne tò wu a ngèt àpfəèà nɨ̧ yu la, li nɨ bèlu̧ mpɔ̀ŋ, ndzì tèfəꞋte èyɨt ane yɔb nkɨ̀Ꞌɨ̂ èsele ètsələèꞋ wu bòt àa ntsèà la. Bɔ̂ ènɔ̧̂ wu e li ngua nkɨ tsǐ èpɨ̧̀ eŋa abua bɔntu̧ Yesò bu.

¹⁴ Bànabasì bɔ̂ Pɔ̂l e zə àghɨa bɔ kɨ e ghɨ̌ la, ànəa ngaa a sàà awɔb tè bɔ saãaãtè ndǐ tɔb me ŋȩa ndùùlà nga a kètsìà ènɔ̧̂ bòt bu.

¹⁵ Bɔ̀ gha abot bɔ biite bòt bu nê, “Bèshu̧ ba, bɨ ghɨ̀ na ka me ghɨ̀ èwuu ànəê yaa à? Ba wu bɔbȩ mbɨ̀Ꞌɨ̀ bɨ̀a mbɔŋ? Ba wu a si ŋàa nkɨ etsɔ̀te Ntu̧ Ntsɔ̧̀ Yesò abua yɨ̧, mbɨ̀Ꞌɨ̀ bɨa kubte ane ejuke ènəê baa, etsiꞋi me kùŋè wuê a Mbɔ̧ɔ̧mà yu̧ wu tà ghɨ̀ ègwet nè sitsǎꞋ, mè ngɨ̀ mèleb nè èghɨ ègème aa tèbèm la.

¹⁶ È li ngu àfɨꞋa mbì, tà sà àlaꞋ ègème a me sààla nga a vi ne alu̧.

¹⁷ Ka tà bɔ̂ me ghɨ̀ wuê èghɨ ntsɔ̧̀ nɨa nyɨ̀Ꞌta àlȩê nê yea və. Tàa ngɨ̀ tà shuke mbɨ̀ŋ a ègwet è chu, tà ghɨ̀ èghɨjɨ bɨ̧ e kɔꞋɔ àfɨꞋa bɨ̀a nkɨà la, tà ŋàa awɨ̧ èghɨjɨ mè ngɨ̀à mèntɨ̧ɨ̧ mɨ̧ lu̧a nè mèngùꞋte.”

¹⁸ Bɔntu̧ Yesò bu e li mbàtê ndàꞋ èngà̧ wa ale, ka mbɔ̂ ntaꞋa eye ngoꞋ ka ngɨ̀ ènɔ̧̂ bòt bu e tseke kà tsì èpɨ̧̀ wu abua yɔb.

¹⁹ Bèjuê ko e li ndɔ̀Ꞌ a Antìɔ̀k wu a Pìsidìà la, nè Èkonìòm nkɨ̀Ꞌɨ̂ ntsòkè àtsəa bòt bu, bɔ temte a Pɔ̂l ane àti, səŋne atò nɨŋ ndzə àpfəèà nɨ̧ yu ntanda nê tà pfə tê ndɔ̀Ꞌ.

²⁰ Ka àfɨꞋa bòt Yesò e bu̧u̧te a mbɨ̧̀ tò ntsàꞋte a Mbɔ̧ɔ̧mà la, tà bê ndɔ̀Ꞌ a si, ngwènè a pfəè və. ÈtsəꞋ e sàꞋà ntsi, bɔ̂ Bànabasì e ghà àwɔb a Debì.

Bɔntu̧ Yesò e wènè a Antìɔ̀k wu a Silìà la

²¹ Pɔ̂l bɔ̂ Bànabasì e li ntsɔ̀tè Ntu̧ Ntsɔ̧̀ yu a Debì tè bòt nyaŋ e tsiꞋi bɔkatè Yesò. Bɔ lɔꞋɔ abot nkua akwèn nga a Lislà, ndɔ̀Ꞌ nga a Èkonìòm, mbɔ̂ ntsè nga a Antìɔ̀k è wu a Pìsidìà la.

²² Ngà ale, me ghȩ̀ȩ̀ne a èdziꞋ baa ègème, ndɔ̀ktà mèntɨ̧ɨ̧ bɔkatè Yesò nê bɔ̀ me nɨ èngǎ̧ tò nɨa ngà wuê nè mbì. Bɔ ghɨ̀ bɔ nê, “Ba bɔ̂ ndɨ bàa taꞋa eye ngoꞋ ka enyi Kèfɔ̧̀ Mbɔ̧ɔ̧mà la.”

²³ AdzìꞋ àgème bɔ ghà la, bɔ yɔꞋɔ bɔɔjuŋ àtsəa bòt chɔsì bu. Bɔ ghɨ̀ ale, bɔ tsaꞋte a Mbɔ̧ɔ̧mà kà jɨ èghɨjɨ mbɔ̂ ndzì bòt mbɔŋ a tèkitebu Yesò wu bɔ zì mèntɨ̧ɨ̧ mɔb ane tò la.

²⁴ Mbɨ̀Ꞌɨ̀ bɔ ghȩ̀ȩ̀ne àbâ àlaꞋ a Pìsidìà tè ndɔ̀Ꞌ la, bɔ gha a Pàmfilìà.

²⁵ Bɔ li ndàꞋà èngǎ̧ Mbɔ̧ɔ̧mà a Pegà nchu nga a Àtalìà.

²⁶ Bɔ̀ lɔ̀Ꞌɔ abot, bɔ nyi a èbem ànkànuꞋ ngwènè a Antìɔ̀k, è wù àdziꞋa bɔ̀ le zi awɔb a tèkitebu Mbɔ̧ɔ̧mà nê tà baabe awɔb bɔ̀ gha ngɨ̀ àfàꞋ yaa bɔ wu anè mpààtâ la.

²⁷ ÀfɨꞋa bɔ nyi a Antìɔ̀k la, bɔ fetè bòt chɔsì bàgème adzìꞋ yeamɔꞋ. Mbɔ̂ shu awɔb ndɨ Mbɔ̧ɔ̧mà li ngɨ̀ nè nɔ̀b a lèghȩ̀ȩ̀nè wu la, mè shu awɔb ndɨ Mbɔ̧ɔ̧mà ghaꞋa alu̧ tè bòt kà wu Bèjuê e zì mèntɨ̧ɨ̧ mɔb ane Yesò la.

²⁸ Bɔ̂ bɔkatè Yesò bu e ntsèke abàꞋ və ane àfɨ̀Ꞌ à seè.

« Roimhe

Air adhart »

Lean sinn:

Ceanglaichean taic

Sanasan