Bìoball air-loidhne

ÀfaꞋa 10 - Mundani

Kɔ̀nelìà tɔ a Pità

¹ Wòt kǒ li ngu àpfəè ako bɔ̀ɔ ntɔ nê Sìsalìà la, èlen tò wu Kɔ̀nilìà. Tà wu tǎt bèshujà à Luêm. Bɔ li ngua ntɔ bèshujà tò nê, “Àlaã bèshujà Itàlì.”

² Ta li ngu wòt Mbɔ̧ɔ̧mà, me wùꞋtè a Mbɔ̧ɔ̧mà bɔ̂ bòt bi bàgème, mè ntàꞋa wua ntɨ̀ŋa bòt ntseb ayɔɔ Bèjuê, mè ntsàꞋtà a Mbɔ̧ɔ̧mà àfɨ̀Ꞌ àgème.

³ È me wu ane nyèm tetat ane àlia ko tà yè àtsə, mbê ndâ me ye wantu̧ Mbɔ̧ɔ̧mà kǒ nyi a lob, shu abua tò nê “Kɔ̀nelìà!”

⁴ Tà tsitè àghɨ azi ane tò, ènyit tò e kȩ. Tà bɔ̂ mbììte a wantu̧ wu nê, “Tê, à kɨa ghà à?” Wantu̧ wu bɨ̀ɨ̀lè nê, “Ntsɔ̧̀ wu àa ngɨa ane bòt ntseb la, nè ndɨ̀ wu àa ntsàꞋta Mbɔ̧ɔ̧mà la e ghɨ̂ tà kù̧ù̧te awê.

⁵ TsɔꞋɔ bòt ko àfɨ̀Ꞌ yaa ntù̧ àwɔb a Jopà nê, bɔ̀ gha ntɔ a Simùn wu bɔ̀ɔ ntɔ̀ atò nê Pità la, nê tà kɨꞋɨ.

⁶ Pità wu nàà ntsèka a lob Simùn wu tà wu wòt tàa fàꞋa ane gubtenyà̧ la. Lob tò wu a ngèt *èdzî.”

⁷ Wantu̧ Mbɔ̧ɔ̧mà wu tà wua ndàꞋa abua tò la è ghǎ, Kɔ̀nelìà tɔ ndaŋe bɔfàꞋ bi babe nè shujà kǒ, tà kǒ a Mbɔ̧ɔ̧mà mè ngu wòt tàa fàꞋà ngule mènəè Kɔ̀nelìà la.

⁸ Tà tɔ àwɔb shu ànəa a ghɨ̀ la, mbɔ̂ ntù̧ awɔb a Jopà.

⁹ MbɨꞋɨ ètsəꞋ e tsi, bɔ ghà tè ntsìꞋa nkɨ enyi a Jopà la, kwàꞋ àfɨꞋa mbɔŋ a kètsìà nèngû̧ Pità ko nê ye wu a èbem lob kǒ nkɔꞋ ngà a ègwet lob etsàꞋte a Mbɔ̧ɔ̧mà.

¹⁰ Mbɨ̀Ꞌɨ̀ tàa tsàꞋta Mbɔ̧ɔ̧mà la, ndzìtsə te baãaã atò, tà me kɨ àghɨa yèa jɨ la. Bɔ bela ntàŋkâ èghɨjɨ tò, tà yè àtsə,

¹¹ me ko ègwet e ghaꞋa, tà ye àghɨ ako mbɨ̀Ꞌɨ̀ taꞋà ndǐ, nchua ngaa mbɨ̀Ꞌɨ̀ bòt e baãaã ane betɔ̀Ꞌɔ̀ bakwì me shuke a si.

¹² Tà ye tèwuute banyà̧, èbe bèa ntsèka èdzî mè ntsèka àbȩ la, nè banɨ̧̀ bu bèa ndèa a ègwet la adù̧.

¹³ Àtɔŋ ko a shu abua Pità wu nê, “Lɔ̀Ꞌɔ a si mbùŋè banyà̧ baa, nkwèt.”

¹⁴ Pità nê, “ÀwɔꞋ à Lefɨ̀Ꞌ, e mbakà li tè mè jɨ àghɨa mèshɨ̀kè.”

¹⁵ Àtɔŋ yu a mè shu abua tò nê, “Ko mbɨ̀Ꞌɨ̀ à me nɨ èghɨjɨ Mbɔ̧ɔ̧mà zìambɔŋ naŋè nê bɔ me jɨ la, nê wu èghɨjɨ mèshɨ̀kè.”

¹⁶ A li ngɨ̀ anè ngò̧ tetat, ndǐ yu wènè a ègwet.

¹⁷ Pità me màkè àghɨa àtsə yu tà ye la a nyɨꞋte atò la. Tà bela màkà ale, bòt bu Kɔ̀nelìà è tu̧u̧ awɔb la, e me biite te ndzəè àdziꞋa lob Simùn è wu la, ngà ntɨ̧ɨ̧ a ètsələèꞋ və.

¹⁸ Bɔ tɔ mbììta nê, “Gɨ̧̀ kǒ naa a lob ŋaa èlen tò wu Simùn Pità la à?”

¹⁹ Mbɨ̀Ꞌɨ̀ Pità bèla nkwàꞋtà àghɨa àtsə yu tà ghɨ̂ ndze la a shu atò la, Fo Mbɔ̧ɔ̧mà è tɔ atò nê, “Zə, bòt batat e kɨꞋɨ̀ adzìꞋ yaa me kɨ awê.

²⁰ È wu ale, à tàŋkê nchu a si ngà bɨ tò ba kà bɔ̀ɔ̂. Ghɨ̀ ale nkàà nê wu mmɔ̌ ka mâ tu̧u̧ awɔb la.”

²¹ Pità wu chu a si shu abua yɔb nê, “E ngu wòt wu bɨ kɨa atò la. Ghǎ a nɨ awɨ̧ nkɨ̀Ꞌɨ̂ adzìꞋ ya à?”

²² Bɔ bɨ̀ɨ̀lè nê, “Kɔ̀nelìà, tǎt bèshujà è tu̧u̧ awa. Tà wu wòt tàa nguꞋta Mbɔ̧ɔ̧mà la. Bèjuê bàgème e taꞋa wua nkùkta atò. Wantu̧ Mbɔ̧ɔ̧mà kǒ shu abua atò nê, tà kàꞋà àwê à kɨꞋɨ a lob tò, mbɨ̀Ꞌɨ̀ taa zə ànəa àa shu la.”

²³ Pità nê, bɔ̀ nyi a lob bɔ̂ tò ba è li. ÈtsəꞋ e tsi tà tàŋkê ngà bɔ̂ tò ba. ÀbəèꞋ àko ane bɔnyɨ bu bɔ dzəèa a Jopà la e gha bɔ̂ tò ba nɔ̂.

²⁴ ÈtsəꞋ e mè me tsi, tà kɨ̀Ꞌɨ̂ tè ndzə a Sìsalìà, àdziꞋ yu Kɔ̀nelìà bɔ̂ bòt bi nè bèshu̧ bi è lè wua nchɨ̀Ꞌà atò la.

²⁵ Mbɨ̀Ꞌɨ̀ Pità nàa nkɨ eghǎ a lob la, Kɔ̀nelìà kɨ̀Ꞌɨ̂ nkwène ane tò ŋɔꞋne a si a mbì tò, e kukta tò.

²⁶ Pità ghɨ̀ tà lɔꞋɔ a si. Tà shu abua tò nê, “Lɔ̀Ꞌɔ a si, nkàà nê e ngu wɔ̀bȩ̂ mbɨ̀Ꞌɨ̀ àwɔ̀.”

²⁷ Bɔ̂ Kɔ̀nelìà e me ghȩ̀ȩ̀ne ndàꞋà tè nga nyi a lob ndzè ènɔ̧̂ bòt e bù̧ù̧te a èbèm və la.

²⁸ Tà shu abua yɔb nê, “Bɨ̀a mbɔŋ bɨ ko ntsɔ̧̀ ntsɔ̧̀ nê, mbɨ̧te Bèjuê te bakà bɨ̧̀ɨ̧̀ne nê wòt nyi ayɔɔ bòt kà wu Bèjuê. Ka Mbɔ̧ɔ̧mà è nyɨꞋte am nê, è nka nkwàꞋtê nê wòt kǒ bakà kùꞋu wòt màa bɔ lèmù ba tò la.

²⁹ Ale, mbɨ̀Ꞌɨ̀ à ntu̧u̧ bòt nê bɔ̀ kɨꞋɨ ntɔ am la, e mbê nkɨ̀Ꞌɨ̂ kà tàŋne. Maà mbììta awê nê, ghǎ ghɨ̂ ka à tu̧u̧ bòt abua am à?”

³⁰ Kɔ̀nelìà bɨ̀ɨ̀lè nê, “Nàà lɔ̀Ꞌ ngu àfɨ̀Ꞌ yaa anè, ane èli batat, e ngua ntsàꞋtà a Mbɔ̧ɔ̧mà a lob yaã ane nyèm tetat àfɨꞋa nèngû̧. AfɨꞋa mbɔŋ wòt kǒ kwaãaã ndìte tèa nkàꞋtà la, mbê nkɨ̀Ꞌɨ̂ ntɨ̧ɨ̧ a mbì laã

³¹ nê, ‘Kɔ̀nelìà! Mbɔ̧ɔ̧mà è zə àtsàꞋtè ayê, mè nkù̧ù̧te àfaꞋa ntsɔ̧̀ àyê adù̧ bòt ntseb.

³² Tu̧u̧ wòt a Jopà, tà ghǎ ntɔ a wòt wu èlen tò wu Simùn Pità la. Tà wu gɨ̧̀ àpfəèa Simùn wu tàa fàꞋa ane gubtenyà̧ la. Àpfəè atò a wu a ngèt *èdzî.’

³³ Ale, e mbê ntu̧ ntɔ awê. À ghɨ̌ ntsɔ̧̀ na à kɨꞋɨ la. Bàa gème e wu anè adzìꞋ yaa a mbì Mbɔ̧ɔ̧mà nkɨ ezə ànəa tà tu̧u̧ awê nê à kɨꞋɨ shu awa la.”

Èngǎ̧ Pità

³⁴ Pità bùꞋ me làꞋà nê, “Maà ndzèa àfɨ̀Ꞌ yaa nê, wu nkûŋ nê Mbɔ̧ɔ̧mà nàà mbà̧à̧tâ wòt ègème kà lȩ èsi.

³⁵ Waa waa tàa ngùꞋtà atò mè ngɨ̀à àghɨa tàa nkɨà la, ka tà màà ndzəèà wuê a ka àbâ àlaꞋ leꞋ, ko Mbɔ̧ɔ̧mà naa bɨ̧ɨ̧ne atò.

³⁶ Bɨ koê ntu̧ yu tà lè tsaa abua bòt Izəèlȩê la. Ntu̧ Ntsɔ̧̀ mbɔŋ nàà shua ndɨ baa bɔ àlàŋkè nè Mbɔ̧ɔ̧mà mbɨ̀Ꞌɨ̀ ba zì mèntɨ̧ɨ̧ ma ane Yesò Klistò wu, tà wu Fɔ̧̀ àtsəa bòt bàgème a sitsǎꞋ ŋàa la.

³⁷ Bɨ koê taꞋa ànəê yu a li ngɨ̀ a èbem àlaꞋ a Jùdià la, e bùꞋ àlaꞋ a Galìlî, afɨꞋa Jɔ̌n li ndàꞋ èngǎ̧ ànəa màndzia a èdzî la.

³⁸ Bɨ koê ndɨ Mbɔ̧ɔ̧mà ŋa mètàŋ Fo Kèfə abua Yesò wu tà wû wòt Nazàlet la, mè nkoê ndɨ Yesò lè wua ngà̧aã a èdzìꞋ ègème ngɨa a ntsɔ̧̀ ane bòt, mè mbəèa bòt bàgème Satàn lè wua mbà̧à̧ta awɔb la. Tà lè wua ngɨ̀à ale nkàà ndɨ mètàŋ Mbɔ̧ɔ̧mà lè wu ane tò la.

³⁹ “Bà le ye mè nkoê àghɨ àgème tà ghɨ a èbem àpfəèa Jèlusalèm, nè àlaꞋ a Bèjuê la. Bɔ li ngù̧ù̧tè atò a mbɨ̧̀ mbasa mbùŋè atò.

⁴⁰ Ka èli e me tsè betat Mbɔ̧ɔ̧mà yù̧ù̧me atò, ngɨ̀ tà kɨ̀Ꞌɨ̂ nyɨ̀Ꞌte avi abua ya.

⁴¹ Tà lè kaꞋa nyɨ̀Ꞌte avi abua waa waa, ka mbɔ̂ nyɨ̀Ꞌte avi abua ya wu Mbɔ̧ɔ̧mà laa nê bà ye, mè nkoê nê tà pfə mè njù̧ù̧me la. Baa li njɨ mè nu ne tò àfɨꞋa tà yu̧u̧me la.

⁴² Tà li shu abua ya nê, bà gha ntsɔ̀tè Ntu̧ Ntsɔ̧̀ Mbɔ̧ɔ̧mà abua bòt bàgème, me shu abua yɔb nê ye wu wòt wu Mbɔ̧ɔ̧mà è laa nê taa li esaꞋa bòt yu̧ nè bèmpfəà la.

⁴³ BèndàꞋàtɔŋ nyaꞋ Mbɔ̧ɔ̧mà bàgème è le laꞋa ànəa tò nê, wòt ègème tà zi èntɨ̧ɨ̧ vi ane tò la, Mbɔ̧ɔ̧mà naa waꞋa a kàbɔ̀ŋ ŋut ane mètàŋ èlen Yesò.”

Fo kèfə kɨꞋɨ adù̧ bòt kà wu Bèjuê

⁴⁴ Pità bela ndàꞋà ale, Fo Kèfə nyi ane bòt bu bɔ̀ wua njùtâ ntu̧ yu tà tsɔ̀tà la.

⁴⁵ Bòt Yesò bu bɔ̀ wu Bèjuê, bɔ li ndzə a Jopà nkɨ̀Ꞌɨ̂ bɔ̂ Pità ba la, e ye ndɨ Mbɔ̧ɔ̧mà zi Fo Kèfə ane bòt kà wu Bèjuê la, a taꞋa tsè àwɔb.

⁴⁶ Ngu ndɨ bɔ zə bɔ me làꞋà ane èwuu ndɨ̧te ko tsa nɨa ngùꞋtà ènɨ̧ Mbɔ̧ɔ̧mà la. Pità shu nê,

⁴⁷ “Mbɔ̧ɔ̧mà ŋa Fo Kèfə abua bòt bàa mbɨ̀Ꞌɨ̀ tà li ŋǎ abua ya la. Ale, betsiꞋa wàa kele awɔb nê, bɔ̀ ka ndzì àwɔb a èdzî à?”

⁴⁸ Ale, tà nê bɔ̀ zì àwɔb a èdzî ane èlen Yesò Klistò. Mbɨ̀Ꞌɨ̀ bɔ ghɨ̀ tè ndɔ̀Ꞌ la, bɔ shu abua tò nê tà tseke bɔ̂ tò ba ane èli ko ka ngà.

« Roimhe

Air adhart »

Lean sinn:

Ceanglaichean taic

Sanasan