2 Tɔ̀màtià 2 - Mundani

Shujà tàa nùà nè èntɨ̧ɨ̧ wemɔꞋ la

¹ È me wu awê à waã am, à me kweele ane mènəè Mbɔ̧ɔ̧mà mu è wuê ma, ndɨ̀ wu ba tsiꞋi àghɨ yeamɔꞋ ane Yesò Klistò la.

² Nɨ mèngǎ̧ Mbɔ̧ɔ̧mà mu à li ndzə e ndàꞋ abua bòt nyaŋ la ndzì a tèkitebu ngule bòt bu bɔ kùꞋu a mànyɨꞋta bòt ko la mɨ̧̂.

³ Fɔte am ndzě yê nè ngoꞋ, mbɨ̀Ꞌɨ̀ shujà tàa nùà èbet Yesò Klistò nè èntɨ̧ɨ̧ vi wemɔꞋ la.

⁴ Ko nê, shujà nàa ngɨ̀ tà gha a èbet, tà me nùa nkɨ̀a ndɨ àà me bɔ̀ wòt wu tà wu àtsə ayɔb la. Ale, tà kà wua ndzìà àbu àzi a èbem mènəè bòt kà wu bèshujà.

⁵ Ko mɨ̧̂ nê, wòt me lùùla àlùùlà, tè mbakà wua ndùùlà mbɨ̀Ꞌɨ̀ mbɨ̧te àlùùlà yu te kɨa la, tà kà tse àyùà.

⁶ È me wu ane ànəa mbȩ ko wòt tàa mbɨ̀à njùta èghɨ mbȩ àfɨꞋa e kweele la wu tòà wu tà ghɨ̌ àfàꞋa kekweelè la.

⁷ Me ku̧u̧te mènəè maa e shu awê la, na à me ku̧u̧te, ko Tǎt wa naa tɨŋe awê aa ko mènəè ègème la.

⁸ Me ku̧u̧te a Yesò Klistò, tà li mpfə mè njù̧ù̧mê la. Tà lè wu wòt àndǎ̧ Fɔ̧̀ Dàbid, mbɨ̀Ꞌɨ̀ Ntu̧ Ntsɔ̧̀ yàa e ntsɔ̀tà la nàa nyɨ̀Ꞌta la.

⁹ Wu ànəa yùà ka a ghɨ̂ e me ye ngoꞋ tè bɔ kuule am mbɨ̀Ꞌɨ̀ wòt tà ghɨ ànəa kàbɔ̀ŋ la. Bɔ batè nkùùlè am ale, ka bɔ̀ ka kuulè Ntu̧ Ntsɔ̧̀ yu.

¹⁰ Mbɨ̀Ꞌɨ̀ àa anè la, maà nkìà ngoꞋ tègème nkàà bòt bu Mbɔ̧ɔ̧mà è làà àwɔb ane bòt ebi la. E nkìà ale mbɨ̀Ꞌɨ̀ Yesò Klistò naa ŋa awɔb mèmpème mi, bɔɔ ghǎ me tseke a èbem Kèfɔ̧̀ nɨ̧ tò wu kà wu li elìa la.

¹¹ Èngà̧ waa wu èngǎ̧ nkûŋ: “È wu nê ba pfə nè tò, ko ba tò ba aa me tseke nɔ̂ mɨ̧̂.

¹² Nkùùla mèntɨ̧ɨ̧ ma, ko ba tò ba aa li me baãaã mènəè mbɨ̀Ꞌɨ̀ bèfɔ̧̀ mɨ̧̂. Ba tu̧u̧ atò, ko taa tu̧ awa mɨ̧̂.

¹³ Ba tsì mèntɨ̧ɨ̧ ma ane tò, ko tàà ndɨ̀ŋkà wu awa àfɨ̀Ꞌ àgème, mbɨ̀Ꞌɨ̀ nê betsiꞋa tà kà kubtè ànəa tà shu zìambɔŋ la.”

Wɔ̀fàꞋ Mbɔ̧ɔ̧mà bɨ̧ɨ̧ne la

¹⁴ Ghɨ̌ bòt bê è ku̧u̧te mèngà̧ mu e shu awê la, mè nèètè səèŋkè ètû̧ bɔb a mbì Mbɔ̧ɔ̧mà nê, bɔ̀ ka me yɔ̌ a ègwet mèngǎ̧ àku. Nê, lə mèngǎ̧ àku è ntsě, nàà ntsòkà wuê mèntɨ̧ɨ̧ bòt bu bɔ̀ɔ njùtâ mèngǎ̧ mbɔŋ la.

¹⁵ È wu awê, à nyɔ̀Ꞌtè fàꞋà ndɨ Mbɔ̧ɔ̧mà nàa bɨ̧ɨ̧ne la. FàꞋà mbɨ̀Ꞌɨ̀ wɔ̀fàꞋ kà wu li elɔ̀Ꞌɔ ebɔ àtsəa kɔꞋɔ ane àfàꞋ àzi, mè fàꞋà mbɨ̀Ꞌɨ̀ wòt tàa nèètà nyɨ̀Ꞌta bòt èngǎ̧ nkûŋ wu e dzəâ abua Mbɔ̧ɔ̧mà la.

¹⁶ Ko mbɨ̀Ꞌɨ̀ à zì ètsəê wê ane mènəè àku mu kà bɔ àbu ane mènəè Mbɔ̧ɔ̧mà la. Èwuu mènəè mbɔŋ nàà mpàa ntsìà bòt tsǐ ane Mbɔ̧ɔ̧mà.

¹⁷ Mèngǎ̧ mu bɔ̀ɔ nyɨ̀Ꞌta la bê ngu wuê mbɨ̀Ꞌɨ̀ taꞋa fɨŋ, nàa nkwèla nyà̧ ènyit wɔ̀bȩ̂ la. Bòt babe ane bènyɨꞋtà èwuu mèngà̧ maa wu Ghɨ̀menɔ̀s bɔ̂ Fìletùs.

¹⁸ Bɔ sà alu̧ nkûŋ me gheeba ntsòkà ètsə bòt Yesò ko è shùa nê, Mbɔ̧ɔ̧mà è yu̧u̧me bòt bɔ pfəꞋte la tè ndɔ̀Ꞌ.

¹⁹ Ka, betsiꞋa àtetsi àkekweelè yu Mbɔ̧ɔ̧mà li mbɔ̧ la à ka nyiꞋnè. Bɔ shɨ mèngà̧ maa adù̧ və nê, “Mbɔ̧ɔ̧mà è ko bi ne bòt.” Mè shɨŋ nê, “Wòt tà laꞋnê ye wu wòt Mbɔ̧ɔ̧mà la è bɔ ndɨ tàa waꞋa mènəè kàbɔ̀ŋ mi la.”

²⁰ Àa ngɨ̀ à nyi a èbem lob nɨ̧, à ye tèwuute bapfəèꞋ tègème, èbe bɔ ghɨ ane silbà nè goêl la, nê èbe bɔ ghɨ ane èyɨt la mè nè èbe bɔ ghɨ ane ètsaꞋ la. Beko wu èbe bɔ̀ɔ mbà̧à̧ta a lob àli àgème la, beko wu èbe èpà̧.

²¹ È wu ale, wòt me kɨ ewu mbɨ̀Ꞌɨ̀ bapfəèꞋ bu bɔ̀ɔ mbà̧à̧ta wuê àfɨꞋa ngule ànəê a saꞋa la, tà yòò èntɨ̧ɨ̧ vi ane mènəè kàbɔ̀ŋ mi ègème, ko Mbɔ̧ɔ̧mà naa enɨ atò enɨ fàꞋà ngule efàꞋ ebi. Mbɔ̧ɔ̧mà naa ghɨ̌ ale nkàà nê ŋut tsiꞋi wòt èntɨ̧ɨ̧ kèfə, mè nkùꞋ abua tǎt vi a màngɨa àfaꞋa ntsɔ̧̀ àgème.

²² Ko mbɨ̀Ꞌɨ̀ à zì àbu ayê a èbem èghɨ kàbɔ̀ŋ bu bɔkèsà àa nkɔ̀ŋkà a màngɨa la. Me ghɨ̀ wuê àghɨa Mbɔ̧ɔ̧mà nàa nkɨà la, ndzìà èntɨ̧ɨ̧ wê ane Yesò, nkɔ̀ŋkà bòt mè ntsèka ane àlàŋkè bɨ bòt bɔ̀ɔ ntsàꞋta Mbɔ̧ɔ̧mà nè èntɨ̧ɨ̧ kèfə, nê tà tɨŋe awɔb la.

²³ Ko mbɨ̀Ꞌɨ̀ à zì ètsəê wê a èbem mèngǎ̧ àku mu bòt àa ndàꞋà kà ko ànəa bɔ shua la. Ko nê, mèngǎ̧ mbɔŋ nàà ndìà wuê nè àyɔ̀ŋ.

²⁴ Wɔ̀fàꞋ Mbɔ̧ɔ̧mà bakà bɔ ndɨ tàa me yɔ̌ bɔ̂ bòt la. Tà bɔ ndɨ tàa me ghɨ̌ a ntsɔ̧̀ abua waa waa, e mě ewu nyɨꞋtà ntsɔ̧̀ tà bɔ àbɔɔla èntɨ̧ɨ̧ la.

²⁵ Tà bɔ ndɨ tàa baãaã èntɨ̧ɨ̧ vi ka me kɨɨte bòt bu ntù̧a èngà̧ wu tàa nyɨ̀Ꞌta la. Tà ghɨ anè ko ateko Mbɔ̧ɔ̧mà naa ŋa awɔb èlu̧ bɔɔ kubte mènəè kàbɔ̀ŋ mɔb e mě eko nkûŋ la.

²⁶ A wu ale, ko ateko mèyǐ mɔb naa mě ekua tê bɔɔ dzəâ a èbem àtaã Satàn yu a li mbà̧à̧ àwɔb bɔ tsiꞋa nkùŋà mènəè tò la.