Bìoball air-loidhne

2 Kɔlìn 9 - Mundani

Màŋa ètɨŋe abua Bèklɨtèn

¹ E mbakà lâ ntsi ndzè lə màa mě e shɨ awɨ̧ àkatè ane ànəa màŋa èghɨ abua bòt Mbɔ̧ɔ̧mà la.

² Mâ ko nê bɨ yaŋe wua nkɨ eŋa, tè e me ghàꞋtà am ane ànəa yɨ̧ abua bòt Màsèdonìà. E ndi shu abua yɔb nê, “Bɔnyɨ ba bòt Mbɔ̧ɔ̧mà a Akayà e li ndzaŋe taŋke a màŋa tè èŋubȩ̂.” Èntɨ̧ɨ̧ waa bɨ bɔ a màŋa la e lɔ̀ktè mèntɨ̧ɨ̧ bòt nyaŋ ane yɔb.

³ Ka e ngua ntsàà bɔnyɨ ba baa mbɨ̀Ꞌɨ̀ àghɨa ba li ngua ngàꞋtà wa adù̧ ane yɨ̧ la a wu àku, mbɨ̀Ꞌɨ̀ e ndi shu abua bòt ko nê bɨ taŋke te ntsìꞋa nchɨ̀Ꞌà a màŋa la.

⁴ Bɨ bakà ghɨ anè e me kɨꞋɨ bòt Màsèdonìà ko e kɨꞋɨ ba tò ba me ye bɨ bakà taŋke tê e lɔ̀Ꞌɔ ko bɨa ghɨ̌ baa bɔ àtsəa kɔꞋɔ, nkàà nê ba li ndzaŋe shu nê bɨa ghɨ̌. Mâ mɨ̀ɨ̀tè nê àyea mbɔŋ aa ghɨ̌ bɨa bɔ àtsəa kɔꞋɔ mɨ̧̂.

⁵ Eyaa wu lə e ndi ndze nê a bɔ̂ŋ nê è ŋwètè bɔnyɨ ba baa bɔ̀ bɨa nkɨ̀Ꞌɨ̂ a mbì laã àfɨꞋa tsa, fete èkab wu bɨ li nkàꞋ nê bɨa ŋa la. Bɨ̀ ghɨ̀ ale, mbɨ̀Ꞌɨ̀ e nkɨꞋɨ a wu nê bɨ ŋa ane mènkɔ̀ŋke mɨ̧, è ka ngu nê mâ faalè àwɨ̧ ka bɨ ŋa.

Wòt nàa me ŋa Mbɔ̧ɔ̧mà me kwèꞋne

⁶ Bɨ̀ ku̧u̧te nê, wòt nàa ndìꞋa mpiꞋa, ta fùꞋù mpiꞋa, wòt liꞋi nyaŋ tà fùꞋù nyaŋ.

⁷ Wòt ŋa mbɨꞋɨ̀ èntɨ̧ɨ̧ tò e shu nê tà ŋa la. Wòt ka me ŋa səèa vi səâ. Tà ka me ŋa nkàà nê bɔ ngwèèlè àvi ka ye ŋa, ngu nê Mbɔ̧ɔ̧mà nàà nkɔ̀ŋkà bòt bu bɔ̀ɔ nkɔ̀ŋkà a màŋa la.

⁸ Mbɔ̧ɔ̧mà bɔ mètàŋ eŋa awɨ̧ àghɨ àgème bɨ̀a nkɨ̀ŋkà la, mbɨ̀Ꞌɨ̀ bɨa me bɔ nyaŋ nɨa bùà nɨa ngɨ̀à àfàꞋa ntsɔ̧̀ àgème.

⁹ Àkata Mbɔ̧ɔ̧mà a laꞋnê, “Tàà ngaaba abua waa waa, tàà ŋa abua bòt ntseb, ntsɔ̧̀ tò nàà kà lìà.”

¹⁰ Mbɔ̧ɔ̧mà wu tàa ŋa èsaãaãme bòt e sà, mè ŋa èghɨjɨ bòt e jɨa la naa paa kwèꞋnè èghɨ bɨ bɔ la, mbɨ̀Ꞌɨ̀ bɨa me nɨ bùà ngɨa ntsɔ̧̀.

¹¹ Tà ghɨ̂ bɨ wu bòt nè èghɨ mbɨ̀Ꞌɨ̀ me ko ŋǎ abua bòt àfɨ̀Ꞌ àgème kà kuꞋte àbu. Bɨ ghɨ ale ko bòt nyaŋ aa ŋa mènkɔ̀ŋke abua Mbɔ̧ɔ̧mà ane àghɨa bɨ̀a ŋǎ la.

¹² Bɨ ŋa èghɨ bàa bɨ kɨ eŋa la ko aa tɨŋe bòt Mbɔ̧ɔ̧mà bu bɔ̀ɔ nkɨ̀ŋkà la. Àyea mbɔŋ a wuê ghɨ̌ bòt aa mě taꞋa ekɔ̀ŋke a Mbɔ̧ɔ̧mà.

¹³ ÀfàꞋ yaa bɨ̀a ghɨ̀ la aa ghɨ̌ bòt aa me wùꞋte a Mbɔ̧ɔ̧mà, nkàà nê bɔ ye nê bɨa ngɨ̀à àghɨa Ntu̧ Ntsɔ̧̀ Yesò Klistò yu bɨ̀a shua nê bɨ bɨ̧ɨ̧ne la, è laꞋ nê bɨ̀ me ghɨ̀ la. Bɔɔ mě me wùꞋte a Mbɔ̧ɔ̧mà nê, bɨ ŋa abua yɔb mè ŋǎ abua bòt ko tsa bàgème kà kuꞋte àbu.

¹⁴ Ale, bɔɔ me tsàꞋta Mbɔ̧ɔ̧mà ane yɨ̧ nè èkɔŋ nkaa a ntsɔ̧̀ Mbɔ̧ɔ̧mà wu è ghe tà ghɨ ane yɨ̧ la.

¹⁵ Bà nkɔ̀ŋkà Mbɔ̧ɔ̧mà ane taꞋà àghɨa tà ŋa abua ya betsiꞋa wòt kà ko ndàꞋ ànəa yùà la.

« Roimhe

Air adhart »

Lean sinn:

Ceanglaichean taic

Sanasan