2 Kɔlìn 8 - Mundani

Pɔ̂l ŋwètè bòt Kɔlìn nê bɔ̀ me ghààbè èghɨ bɔb

¹ Bɔnyɨ ba, ba wua nkɨ e shu awɨ̧ àghɨa bèchɔsì bu a Màsèdonìà la e ghɨ̂ nɨŋ nyɨ̀Ꞌte a ntsɔ̧̀ Mbɔ̧ɔ̧mà la.

² NgoꞋtsə te li ntàꞋa nyìꞋì àwɔb, ka bɔ bɔ̂ ntàꞋa wua ngùꞋtà wɔb tè bɔ̀ ka wua nkùꞋta àbu, ka wuê àfɨꞋa mbuŋ ghe ane yɔb la.

³ TsiꞋ è shu awɨ̧ nkûŋ nê, bɔ li ŋà àghɨa betsiꞋa bɔ ko eŋa la tè mè ntsè fɔɔle ale, kà wòt wu̧u̧ awɔb,

⁴ shù̧ù̧ta wa a ngo̧ a ngò̧ nê ba ghɨ̀ àwɔb a ntsɔ̧̀ ŋà wɔb èlu̧ bɔ̀ ghɨ̀ àyɔb ne àfàꞋ a màŋa èghɨ abua bòt Mbɔ̧ɔ̧mà bu a Jùdià la.

⁵ Bɔ li ngɨ̀ tè ntsè àghɨa ba li ngua mɨ̀ɨ̀tà nê bɔɔ ghɨ̀ la. Bɔ li mbɨ̀ ndzì àwɔb a èten Yesò, mè ndzì àwɔb a èten la mɨ̧̂, mbɨ̀Ꞌɨ̀ Mbɔ̧ɔ̧mà kɨa la.

⁶ Ndɨ̀ wu bòt Màsèdonìà è le wua ŋǎ nyaŋ la a ghɨ̂ ba me shu abua Tȩtɔ̀s nê, ndɨ̀ wu tà li ndzaŋe ebuꞋu àfàꞋ yaa la, tà kɨꞋɨ nkwene ane yɨ̧ mpàa àfaꞋa ntsɔ̧̀ a màfeta èghɨ bu bòt Mbɔ̧ɔ̧mà àa ŋǎ ambo èkɔŋ tò la.

⁷ Bɨa ndâ mbɨ̧̀ɨ̧̀ne èngǎ̧ Mbɔ̧ɔ̧mà. Bɨa nkoa ndàꞋà èngǎ̧ tò ntsɔ̧̀. Bɨ taꞋa bɔ èyì, mè ndâ ŋà wɨ̧ ane àfaꞋa Mbɔ̧ɔ̧mà. Bɨ taꞋa wua nkɔ̀ŋkà wa. Ane nkûŋ, bɨa ndâ ngɨ̀à àfaꞋa ntsɔ̧̀ yaa. Ale, baa ndâ nkɨà nê bɨ̀ la ŋǎ èghɨ ba ntsɔ̧̀ nè èntɨ̧ɨ̧ wɨ̧ wemɔꞋ.

⁸ E ntsea ŋwèèlà wɨ̧ nê bɨ̀ ghɨa. Ka e ngua nkɨ enɨ àghɨa bòt ko àa ngɨa la enyɔ̀Ꞌtè àwɨ̧ eye nê ko ane nkûŋ bɨa nkɔ̀ŋkà bòt ko mɨ̧̂ leꞋ.

⁹ Bɨ ko ndɨ Yesò Klistò Lefɨ̀Ꞌ wa li nyɨ̀Ꞌte a ntsɔ̧̀ vi abua ya la. Tà li ngu wòt nè èghɨ bi, ka nga ambo yɨ̧ ntsìꞋi wòt kà ye àghɨa zi. Tà li ngɨ anè mbɨ̀Ꞌɨ̀ bɨa tsiꞋi bòt bɔ bɔ àyɔb la a mbì Mbɔ̧ɔ̧mà.

¹⁰ Maà nkɨà bɨa ko ànəa màa nkwàꞋtà ane ànəa màfeta èkab wàa la. A bɔ̂ŋ nê bɨ̀ paa àghɨa bɨ li mbùꞋ èŋubȩ̂ la. Bɨ li ngu bòt mbì bɔ̀ɔ nkɨ eŋa la, mè ngu bòt mbì a màŋa.

¹¹ Bɨ̀ ŋa mbɨ̀Ꞌɨ̀ àbu ayɨ̧ a nyɨꞋte la, nɨŋ mpàa àghɨa bɨ li mɨɨtè e ghɨ la.

¹² Bɨ ŋa nè èntɨ̧ɨ̧ wemɔꞋ ko Mbɔ̧ɔ̧mà naa nɨ nkàà nê, tàà nɨa àghɨ abua wòt ndɨ àbu ŋut a nyɨꞋte la. Mbɔ̧ɔ̧mà nàà ka shu laꞋ nê wòt ŋa àghɨ kà bɔŋ.

¹³ E ntsea nkɨ enɔ̀ŋe àbòꞋà lelet a ègwet lɨ̧ mbɨ̀Ꞌɨ̀ bòt ko aa ŋeꞋe àyea àa ndzàŋà la.

¹⁴ Bɨ bɔ nyaŋ àfɨ̀Ꞌ yaa, è wu ale a me bɔ̌ nê bɨ̀ tɨŋe bòt bu kà bɔŋ la. A wu anè ko naa wu àfɨꞋa bɔ bɔ nyaŋ bɨ̀ ka bɔŋ la bɔ tɨŋe awɨ̧ mɨ̧̂. Bɨ ghɨ̀ anè ko bɨa tsiꞋi ndɨŋndɨ̀ŋ.

¹⁵ A wu anè ko aa wu mbɨꞋɨ̀ bɔ shɨ a èbem Àkata Mbɔ̧ɔ̧mà a la nê, “Wòt tà li fete èghɨjɨ nyaŋ la li tà kà bɔ nyaŋ tè aa me tsea tò, è we tà li fète mpìꞋ la ka bu àghɨa tàa jɨ la.”

Tȩtɔ̀s bɔ̂ bèshu̧ bi

¹⁶ Mâ kɔ̀ŋka Mbɔ̧ɔ̧mà nê tà ghɨ̂ Tȩtɔ̀s me kɨ etɨŋe awɨ̧ wuê mbɨ̀Ꞌɨ̀ màa nkɨ me ghɨ̀ la.

¹⁷ Tà li ndâ mbɨ̧̀ɨ̧̀ne ànəa ba shu la, tè me kɨ kɨꞋɨ etɨŋe awɨ̧ àtsəa zi.

¹⁸ Tà gha ekɨꞋɨ bɔ̂ wòt kǒ ba tsàà la. Wu wanyɨ wa wu bèchɔsì bàgème bèa ngùꞋta tò ane àfaꞋa to a màntsɔta Ntu̧ Ntsɔ̧̀ Yesò Klistò la.

¹⁹ Àyea ko nè ànəê ane tò wu nê bèchɔsì e làa atò nê tà ghȩ̀ȩ̀nè ba tò ba a màngɨa àfaꞋa ntsɔ̧̀ yaa. ÀfaꞋa mbɔŋ aa ghɨ Tè Yesò naa bɔ mèngùꞋte, e mě nyɨꞋte nê baa nkɨ etɨŋe bòt.

²⁰ Baà mbà̧à̧ta èkab bɨ̀a ŋa ane èntɨ̧ɨ̧ wemɔꞋ la ane ndɨ wòt ka fèèlè àwa ane ànəa wùà la.

²¹ Ba ghɨa anè nkàà nê ba kɨ e ghɨ̀ àghɨa àa mbɔ̀ a mbì Mbɔ̧ɔ̧mà, mè mbɔ̀ a mbì bɔbȩ la mɨ̧̂.

²² Ba wua mè ntsàà wanyɨ wa wòt Mbɔ̧ɔ̧mà ko bɔ̂ tò ba aa kɨꞋɨ nɔ̂. Ba ye ngò̧ nyaŋ nyaŋ nê tà lâ ŋà àvi ane àfaꞋa Mbɔ̧ɔ̧mà. Tàà nkɨ eŋa avi àfɨ̀Ꞌ yaa te tsè ale, nkàà nê tà lâ nko nê, bɨa ghɨ̀ àghɨa bɔ̀ kɨꞋɨ adù̧ la.

²³ È me wua Tȩtɔ̀s ko tà wu wòt ba tò àa fàꞋà nɔ̂ a màntɨŋa wɨ̧ la. È me wu bɔnyɨ ba ko bu nkɨ̀Ꞌa bɔ̂ tò ba la ko wu bòt bèchɔsì e tsàà la. ÀfàꞋ àyɔb aà ndɔ̀kà èlen Yesò Klistò ntsaa a ègwet.

²⁴ Bɨ̀ nyɨꞋte awɔb nê bɨa nkɔ̀ŋkà àwɔb mbɨ̀Ꞌɨ̀ bèchɔsì bàgème aa zə e mě ko nê bàa ngɨ̀ bà me ghàꞋta wa a mbì lɔb ane ànəa yɨ̧ ale è wu ànəa nkûŋ.