Bìoball air-loidhne

2 Kɔlìn 7 - Mundani

¹ Bɔnyɨ ba, ndɨ̀ wu Mbɔ̧ɔ̧mà kàꞋà wa èghɨ ba la, bà ka mbà̧à̧te àghɨa àa tsòkè àwa a èbèm nè àbȩ̂ a mbì Mbɔ̧ɔ̧mà la. Bà ŋa awa nènkèm abua Mbɔ̧ɔ̧mà me ŋa kènuke abua tò ntsèka mbɨ̀Ꞌɨ̀ tàa nkɨà la.

ÀghaꞋta Pɔ̂l

² Bɨ̀ ghaꞋa mèntɨ̧ɨ̧ mɨ̧ nɨ̀ awa. Wòt kǒ ba fâ̧ ànəê abua tò la ntsè, ba ka tsokè wòt, bà kà me fìble wòt.

³ È nka laꞋa anè shua nê bɨ bakà kùꞋ. Mâ yaŋe shu nê baa ndâ nkɔ̀ŋkà àwɨ̧, tè è màà ngu wuê èvə, è ka sabte awa ba nɨ̧̀ ba.

⁴ Mâ bɔ èntɨ̧ɨ̧ ane yɨ̧. Maà ndâ ngàꞋta am ambo yɨ̧. Bɨa ndzìà èntɨ̧ɨ̧ am, e mè ndâ me wùꞋtè am ka wuê a èbem ngoꞋ tu tègème bàa ndzea la.

⁵ È li ngu àfɨꞋa bà wu a Màsèdonìà la, wòt kǒ ane ya ka bê ndzètè. Ba li ndzě ngoꞋ ane èbâ ègème, me ntàktè nè bòt, kèbɔɔ ke mè ngu a mèntɨ̧ɨ̧ ma.

⁶ Bà bela ndzea ngoꞋ ale, Mbɔ̧ɔ̧mà wòt tàa ndzìà mèntɨ̧ɨ̧ bòt mèntɨ̧ɨ̧ mɔb ntsě ntsɔ̧̀ la, nɨa Tȩtɔ̀s nɨŋ nkɨ̀Ꞌɨ̂ ndzì mèntɨ̧ɨ̧ ma.

⁷ È ntsě wuê mènkɨ̀Ꞌɨ̂ Tȩtɔ̀s è li ndzì mèntɨ̧ɨ̧ ma la. Tà li shu awa nê bɨ zǐ èntɨ̧ɨ̧ vi ale, a paà ndzì mèntɨ̧ɨ̧ ma mɨ̧̂. Tà li shu awa nê bɨa ndâ nkɨ eye am, mè nê àghɨ yu a li ngɨ̀ la a li à ka bɔ awɨ̧. Tà li mè shu am ndɨ bɨ lâ mbɔ̌ èntɨ̧ɨ̧ a màngɨa àghɨa mâ shu la. Mènəè maa li ngɨ̀ e paa ngùꞋtè am.

⁸ È màà ngu wuê nê, letà wu e ndi shɨ abua yɨ̧ la è li sɔ̀ɔ̀bè mèntɨ̧ɨ̧ mɨ̧, ko aa kà saa am nè e ndi shɨ letà mbɔŋ. Èntɨ̧ɨ̧ am e li è kà nɔ̀ŋke a èbèm ntsɔ̧̀ àfɨꞋa e ndi shɨŋ la, ka aà kà tsi sàa am àfɨ̀Ꞌ yaa, nkàà nê, mâ ye nê letà mbɔŋ è li sɔ̀ɔ̀bè mèntɨ̧ɨ̧ mɨ̧ ale ka mbɔ̂ ngu wuê ane kètem àfɨ̀Ꞌ.

⁹ Mbɨ̀Ꞌɨ̀ àa la, maà ngùꞋtà am àfɨ̀Ꞌ yaa, ka è nka wua ngùꞋtà nê e ndi sɔ̀ɔ̀bè mèntɨ̧ɨ̧ mɨ̧. E ngùꞋtà nê mèntɨ̧ɨ̧ mɨ̧ mbɔŋ li mbɨ ale ngɨ̀ bɨ kubte mènəè mɨ̧. Àbu a Mbɔ̧ɔ̧mà a li ngu ane mèntɨ̧ɨ̧ mɨ̧ mu è bɨɨ la, mbɨ̀Ꞌɨ̀ àa ale la, baa li bà ka zi fɨŋ a èntɨ̧ɨ̧ wòt kǒ.

¹⁰ Àbu a Mbɔ̧ɔ̧mà àa ngua ane ànəa àa sàa wòt la, a ghɨ̀ ŋut kubtè èntɨ̧ɨ̧ vi nè mèntsèke mi. Àyaa aa ngɨ̀à wòt pèma, tè à ka wu esaa wòt. Èntɨ̧ɨ̧ àa me saa wòt mbɨ̀Ꞌɨ̀ èntɨ̧ɨ̧ àa sàa bòt ngɔ̀ŋ la, è nɨ èvə nɨŋ nkɨ̀Ꞌɨ̂.

¹¹ Bɨ̀ lâ ndzè àghɨa ànəê yaa a saa awɨ̧, àbu a Mbɔ̧ɔ̧mà àa adù̧ la, a ghɨ ane yɨ̧ la. Bɨ li ngɨ̀ ntsɔ̧̀ a mànkubta mèntɨ̧ɨ̧ mɨ̧, mè ntso ane àghɨa bòt e ghɨ̀ la. A li ngɨ̀ bɨ lâ me kɨ eye am, mè me kɨ etàŋe ànəê am, mè ndɔ̀Ꞌ me kɨ enɔ̀ŋe ngoꞋ àtsəa wòt tà ghɨ a kàbɔ̀ŋ la. Bɨ nyɨꞋte ane balu̧ bàgème nê àbu ayɨ̧ a ntsě ane ànəa mbɔŋ.

¹² E ndi mbàte shɨ̀ letà abua yɨ̧, ka e ndi è nka wua shɨa ambo wòt wu tà ghɨ a kàbɔ̀ŋ la, è nka wua shɨa abua wòt wu bɔ ghɨ a kàbɔ̀ŋ ane tò la. E ndi ngua shɨa mbɨ̀Ꞌɨ̀ bɨa ye ndɨ bɨ̀a ndâ nkɔ̀ŋkà wa a mbì Mbɔ̧ɔ̧mà la.

¹³ Ale, àyaa a zì mèntɨ̧ɨ̧ ma. È ntsě wuê ndàꞋà àyaa a li ndzì mèntɨ̧ɨ̧ ma la. Ba li mpàa ngùꞋtà wa nê bɨ li ngɨ̀ Tȩtɔ̀s me wùꞋtè àvi, nkàà nê bɨ̀agème e li ngɨ̀ èntɨ̧ɨ̧ tò e nɔ̀ŋke a èbèm ntsɔ̧̀.

¹⁴ E ndi ngàꞋtà am a mbì Tȩtɔ̀s ane ànəa yɨ̧, tà kɨꞋɨ bɨ̀ ka ghɨ̂ maa bɔ àtsəa kɔꞋɔ. Ànəa gème ba li shu abua yɨ̧ la li ngu nkûŋ. Ànəa ba ghàꞋtà wa adù̧ a mbì Tȩtɔ̀s la, a mè ndzəè ngu nkûŋ.

¹⁵ Tȩtɔ̀s nàa ngɨ̀ tà mɨ̀ɨ̀te ndɨ bɨ̀agème e li ngua nkɨ e ghɨ àghɨa ye shu la, mè mɨ̀ɨ̀tè nê bɨ li me sèe àvi me bɔa mè mbènta, tà me paa nkɔ̀ŋkà àwɨ̧ nɨa ngà nè mbì.

¹⁶ Maà ngùꞋtà am nkàà nê betsiꞋa e ndɨ̀Ꞌa am ane yɨ̧ nènkèm.

« Roimhe

Air adhart »

Lean sinn:

Ceanglaichean taic

Sanasan