2 Kɔlìn 5 - Mundani

¹ Ba ko nê mbɨ̧te ènyit ta tàa te wu mbɨꞋɨ̀ bayò bàa ntsèka a èbèm a sitsǎꞋ ŋàa la. Bɔ bùà bayò mbɔŋ ko baa bɔ lob a ègwet kà vəə bɔbȩ. Lob mbɔŋ wu lob Mbɔ̧ɔ̧mà zìambɔŋ è vəə nàa li ewu ane àlia nè àlia la.

² Ba ndâ ndɨ̀à a sitsǎꞋ ŋàa nkɨà nê Mbɔ̧ɔ̧mà zì àwa a èbem lob yu a ègwet la,

³ bà ka tsi ngu mbɨ̀Ꞌɨ̀ bòt kà bɔ mbɨ̧tsə.

⁴ Ane nkûŋ, baa ndâ ndɨ̀à ane mènəè ndzea wa la mbɨ̀Ꞌɨ̀ bà bele a èbem mbɨ̧te ènyit ta tàa tè wu mbɨ̀Ꞌɨ̀ bayò a sitsǎꞋ ŋàà la. Ba ntsea ndɨ̀à nê ba wu e pfəꞋte esǎ mbɨ̧te ènyit taa a sitsǎꞋ ŋàa la. Ba wua ndɨ̀à nkɨà nê Mbɔ̧ɔ̧mà è wèè àwa nè mbɨ̧̀ ènyit yu è dzə a ègwet la, mbɨ̀Ꞌɨ̀ mbɨ̧̀ ènyit yaa nàa mpfəa la naa kubte e tsiꞋi e ye kà wua mpfəa.

⁵ Wu Mbɔ̧ɔ̧mà ka tà taŋkè e ghɨ̀ àwa baa kubte anè la. Tà ŋa awa Fo zi enɨ nyɨꞋte nê baa li ebɔ àghɨ àgème ye kàꞋà wa la.

⁶ Bàa bɔ ntɨ̀ àfɨ̀Ꞌ àgème; ba ko nê mbɨ̀Ꞌɨ̀ ba bele a èbem mbɨ̧te ènyit tàà la, bàa wua endɨ̌ ane àpfəa Yesò Klistò.

⁷ Ba tseka nkàà mèntɨ̧ɨ̧ ma mu baa zi ane Mbɔ̧ɔ̧mà la, è ntsě ane èghɨ bàa ndzea la.

⁸ Ale, baa ngùꞋtà wa mè ndâ nko nê, aà mbɔ̀ nê bà sǎ mbɨ̧te ènyit ta tàa ngà ngu nè Tǎt wa Yesò Klistò àdziꞋa tà wù la.

⁹ Eyaa wu lə ba màà mbèle a sitsǎꞋ ŋàa, kò ngà tè ntsìꞋi nè tò leꞋ, ko ànəa mbì abua ya wu màngɨa àghɨa àa mbɔ̀ atò la.

¹⁰ Waa waa ane ya naa li tɨ̧ɨ̧ a mbì Yesò Klistò bɔɔ saꞋa tò ane mènəè tò. Waa waa naa li ebɔ àbȩ̀ àzi, kò wu ntsɔ̧̀ kò kàbɔ̀ŋ leꞋ, ane ndɨ mèntsèke tò a sitsǎꞋ ŋàa li ngu la.

Màntsea ane Yesò ekɨꞋɨ abua Mbɔ̧ɔ̧mà

¹¹ Ba ko àghɨa màmbɔ kèbɔɔ Mbɔ̧ɔ̧mà wu yùà la, ale baa ŋwète bòt nê bɔ̀ zì mèntɨ̧ɨ̧ mɔb ane Yesò Klistò. Mbɔ̧ɔ̧mà ko àghɨa bà wu yùà la, e mè me mɨ̀ɨ̀te nê bɨ̀a mbɔŋ e ko bòt bà wu bùà la mɨ̧̂.

¹² Ba ntsea mè shua wɨ̧ bòt bà wu bùà la, ka ba wua ŋǎ awɨ̧ èlu̧ bɨ̀a me ghàꞋtè àwɨ̧ ambo ya la. Ba ghɨ̀ anè mbɨ̀Ꞌɨ̀ bɨa ko ànəa bɨ̀a shu abua bòt bu bɔ̀ɔ ŋèꞋa tèkwȩ tɔb ane èghɨ nàbȩ̂ kà wu a èbem èntɨ̧ɨ̧ la.

¹³ Ba wu anè ntsìꞋi bòt àtsəa bɨɨ ko ba wu nkɨà nê bòt eŋa mèngùꞋte abua Mbɔ̧ɔ̧mà, mbə è wu nê mèmɨ̀ɨ̀te ma bele ntsɔ̧̀, ko ba kɨ etɨŋe awɨ̧.

¹⁴ Èkɔŋ wu Yesò Klistò bɔ ane ya la àà ŋwètà wa ba ghɨ̀à àghɨa baa ngɨ̀à la. Mbɨ̀Ꞌɨ̀ ba ye àfɨ̀Ꞌ yaa nê wòt wemɔ̀Ꞌ li mpfə ane ànəa bòt bàgème la, a tsiꞋi nê waa waa li mpfə.

¹⁵ Tà li mpfə ane ànəa bòt bàgème, mbɨ̀Ꞌɨ̀ bòt bu tà ŋa awɔb mèmpème la è ka tsi me ghɨ̀ àghɨa àa mbɔ̀ wɔb la a. Bɔɔ tsiꞋi me ghɨ̀ àghɨa àa mbɔ̀ wòt wu tà li mpfə ambo yɔb Mbɔ̧ɔ̧mà yù̧ù̧me atò la.

¹⁶ Ale, ebuꞋu àfɨ̀Ꞌ yaa e me ghà ne mbì, ba kà tsi ndzè àghɨa wòt wu yùà la ane ndɨ bɔbȩ àa ndzea la. Wu nkûŋ nê e ndi mbàte ngua ndzea Yesò Klistò ane èlɨ bɔbȩ àa ndzea la, ka maa kà tsi ndze a èlɨ mbɔŋ àfɨ̀Ꞌ yaa.

¹⁷ Ale, wòt nàa ntsìꞋa àghɨ yeamɔꞋ nè Yesò Klistò, tà tsiꞋi wòt fi. Mènəè nyǎꞋ tà li ngua ngɨ̀à la è tsê, mènəè tàa ngɨ̀à la tsiꞋi me fi.

¹⁸ Mènəè maa ègème ghɨ̀à Mbɔ̧ɔ̧mà. Tà li nɨa Yesò Klistò ngɨ̀ àlàŋkè a wu a kètsìà wa ba tò ba, ŋà àwa àfaꞋa bàa me nɨ bòt nkɨ̀Ꞌa bɔ ghɨ̀à àlàŋkè nè tò la.

¹⁹ Ànəa ba shua la wu nê Mbɔ̧ɔ̧mà li nɨ èvə Yesò Klistò nɨŋ ngɨ̀ àlàŋkè bɔ̂ bɔbȩ bàgème. Tà li tà kà tsi ngua mpà̧à̧ bèkàbɔ̀ŋ bɔb nɔ̀ŋà àtsəa yɔb, mbɔ̂ ndzì èngǎ̧ vi a tèkitebu ta nê ba me laꞋa shua nê bòt èkɨꞋɨ ngɨ̀ àlàŋkè nè Mbɔ̧ɔ̧mà.

²⁰ Ale, ba wu bòt Yesò Klistò tsàà àwa nê bà me làꞋà àdziꞋa zi la. A wu mbɨ̀Ꞌɨ̀ Mbɔ̧ɔ̧mà nɨ mètsəê ma ka me laꞋa abua bòt. Ba shu̧u̧te awɨ̧ ane èlen Yesò Klistò nê, bɨ̀ kɨꞋɨ ngɨ̀ àlàŋkè nè Mbɔ̧ɔ̧mà!

²¹ Mbɔ̧ɔ̧mà li nga ambo ya nɔŋa kàbɔ̀ŋ bɔbȩ a ègwet Yesò Klistò wu tà li tà kà ko a kàbɔ̀ŋ la. Mbɔ̧ɔ̧mà li ngɨ̀ àyaa mbɨ̀Ꞌɨ̀ baa kùꞋù èbe Mbɔ̧ɔ̧mà kɨà la ndɨ̀ wu ba Yesò Klistò ba è tsiꞋi àghɨ yeamɔꞋ la.