Bìoball air-loidhne

2 Kɔlìn 3 - Mundani

BɔfàꞋ mènkàꞋa kèkweelè fi

¹ Tè aa a si anè ngu nê, ba mè ngua shua wɨ̧ àghɨa bà wu yùà la à? Ba bakà bɔ ndɨ bàa me shɨ mèkatè mbɨ̀Ꞌɨ̀ bòt ko, kò nkɨà me è dzə abua yɨ̧ la nàa me shu àghɨa bà wu yùà la.

² Bɨ wu àkata ya ba bɔ a èntɨ̧ɨ̧ wa betsiꞋa waa waa tɔ è nko àghɨ bà wu yùà la.

³ Bɨ lâ ngu àkata Yesò Klistò shɨŋ ndzi a tèkitebu ta ba nɨŋ nkɨ̀Ꞌɨ̂ ŋa la. Tà li tà kà nɨ mbȩ̀ àkatè ka shɨ letà waa mbɨ̀Ꞌɨ̀ bɔ̀ɔ shɨa la, tà li nɨ Fo Mbɔ̧ɔ̧mà yû̧ ka shɨŋ. Tà li tà kà shɨ a ègwet àti, tà li shɨ a mèntɨ̧ɨ̧ bɔbȩ.

⁴ Ba làꞋà ànəa àfàꞋ àyaa yaa ngu ndɨ̀ wu Yesò Klistò ghɨ̂ ba wu ko etɨ̧ɨ̧ e mbì Mbɔ̧ɔ̧mà elàꞋa ànəa yùà kà ye kèbɔɔ la.

⁵ Ba ntsea shua nê ba ghɨ̀à àfàꞋ yaa ane mètàŋ ma. Wu Mbɔ̧ɔ̧mà ka tà ŋa awa mètàŋ ba me nɨa ngɨ̀à àghɨa bàa ngɨ̀à la.

⁶ Tà ghɨ̀ àwa ba kùꞋù èbe bàa me làꞋà ànəa mènkàꞋa kèkweelè fi tò la. Ànəa mènkàꞋa mbɔŋ ntsě a màndzəa mènəè mbɨ̧ bɔ shɨ a si la, wu màndzəa mènəè Fo Mbɔ̧ɔ̧mà nàa shua la. Mènəè mbɨ̧ bɔ shɨ a si la nàà ngɨ̀à bòt e pfəꞋtà, ka mènəè Fo Mbɔ̧ɔ̧mà me ŋa mèmpème.

⁷ Mbɔ̧ɔ̧mà li me nɨ mènəè mbɨ̧ nɨa nkɨ̀Ꞌa shɨ a ègwet àti, ŋǎ abua Musì. ÀfɨꞋa Musì nɨŋ me kɨꞋɨ a mbì bòt Izəèlȩê la èkaꞋà Mbɔ̧ɔ̧mà e me kàꞋa èsi tò. Mbɨ̀Ꞌɨ̀ tàa nkɨ̀Ꞌa la èkaꞋà wu e me lema ngà kwèn kwèn, ka wòt kà koê ndɨ̀ŋkè èsi tò. È wu nê mbɨ̧ tu bɔ shɨ a ègwet àti la te wu ko enyɨꞋte mètàŋ Mbɔ̧ɔ̧mà,

⁸ ko àghɨa Fo Mbɔ̧ɔ̧mà nàa ngɨ̀à la à ka nyɨꞋte mètàŋ Mbɔ̧ɔ̧mà te tsè a?

⁹ Ale, àghɨa a li ngua ngɨ̀à bòt e ye awɔb nê bɔ bakà kuꞋu e mbì Mbɔ̧ɔ̧mà la a wu enyɨꞋte mètàŋ Mbɔ̧ɔ̧mà, ko àyea àa ngɨ̀à bòt e kuꞋa a mbì Mbɔ̧ɔ̧mà la aa nyɨꞋte mètàŋ mbɔŋ tè tsě.

¹⁰ Ane nkûŋ, mètàŋ alu̧ nyǎꞋ waa te ntsě àghɨ nkàà mètàŋ alu̧ fi waa è taꞋa tsě me ngaa la.

¹¹ Bɔ wu eye mètàŋ Mbɔ̧ɔ̧mà ane àghɨa à wu wu ane àtem àfɨ̀Ꞌ la, ko bɔɔ ye mètàŋ mbɔŋ te tsě ane àghɨa à wu ane àlia nè àlia la.

MènkàꞋa Kèkweelè Fi nè mètàŋ Mbɔ̧ɔ̧mà

¹² Ndɨ̀ wu ba ko ayaa la, ba tsiꞋa ndàꞋà èngǎ̧ Mbɔ̧ɔ̧mà kà bɔ̀a.

¹³ Baa kà ghɨ mbɨ̀Ꞌɨ̀ Musì li ngɨ̀ la. Tà li nɨ ndǐ nkàbte èsi vi mbɨ̀Ꞌɨ̀ ka bòt Izəèlȩê e ye ndɨ èkaꞋa mètàŋ Mbɔ̧ɔ̧mà wu e lema la.

¹⁴ Bɔ li ngu bɔ̀ɔ ngɨ̀ bɔ̀ zə ndɨ wòt tɔ àkata mènkàꞋa kèkweelè nyǎꞋ Mbɔ̧ɔ̧mà la, bɔ̀ ka ko ànəa a shua la, ngu nê ètsə bɔb e li è ka ghaꞋtè. Eyaa wu èlɨ ètsə bɔb ngaa è bele ekɨꞋɨ dzəè laane la. Wòt nàa ngɨ̀ tà tsìꞋi àghɨ yeamɔꞋ nè Yesò Klistò, ka ndǐ mbɔŋ bɔ̂ ndzə a èsi tò.

¹⁵ Fɔɔle laane bɔ̀ɔ ngɨ̀ bɔ̀ tɔ mbɨ̧ Musì yaa ètsə bɔb è ka ghaꞋtè bɔɔ ko.

¹⁶ Ka wòt nàa ngɨ̀ tà kubte èntɨ̧ɨ̧ vi tà gha abua Mbɔ̧ɔ̧mà àtsəa tò a bɔ̂ ndzàà.

¹⁷ Mbɔ̧ɔ̧mà wu Fo. Fo Mbɔ̧ɔ̧mà nàa ngua adziꞋ è yààtè bòt.

¹⁸ Bàa gème aa anè bà ka tsi ngu mbɨ̀Ꞌɨ̀ bòt bɔ kaba mèsi mɔb la. Bɔɔ ndzea èkaꞋa mètàŋ Mbɔ̧ɔ̧mà ane ya àfɨ̀Ꞌ àgème. Wu Fo Yesò Klistò yaa ka nàa ngɨ̀à àyaa ane ya la. Nàà ngɨ̀à ba kubtà ntsìꞋa mbɨ̀Ꞌɨ̀ Yesò Klistò wu zìambɔŋ, nyɨ̀Ꞌta mètàŋ Mbɔ̧ɔ̧mà nɨa ngà nè mbì.

« Roimhe

Air adhart »

Lean sinn:

Ceanglaichean taic

Sanasan