2 Kɔlìn 2 - Mundani

¹ Ale, e ndi nkwàꞋtè nê e nka tsi kɨꞋa mbɨ̀Ꞌɨ̀ ka è nkɨ̀Ꞌɨ̂ mèntɨ̧ɨ̧ mɨ̧ mè me ghò̧ò̧ne.

² E ngu anè ngɨ̀ mèntɨ̧ɨ̧ mɨ̧ me ghò̧ò̧ne, ngule èsi bòt bu bɔ mè ngɨ̀ èntɨ̧ɨ̧ am e me bɔ̀ la wu wà ba à? Wu wuê bɨ̀a wàà mâ ghɨ̂ mèntɨ̧ɨ̧ mɨ̧ me ghò̧ò̧nè la.

³ E ndi ngua shɨa àkata ngaa a èlɨ mbɔŋ mbɨ̀Ꞌɨ̀ è ngɨa è nkɨ̀Ꞌɨ̂, bɨ̀a wu bɨ wuê è ghɨ̌ èntɨ̧ɨ̧ am aa me bɔ̀ la è ka ghɨ̂ èntɨ̧ɨ̧ am aa me ghò̧ò̧ne. Mâ lâ nko nê èntɨ̧ɨ̧ am e me bɔ̌ ko èntɨ̧ɨ̧ wɨ̧ bɨ̀agème aa me bɔ̌ mɨ̧̂.

⁴ E ndi me shɨ àkata ngaa, a taꞋa saa am a èntɨ̧ɨ̧ am tè mèsi chu àghɨ am kwàꞋ ànyaꞋne. E ndi me shɨ è nka wua nkɨà mèntɨ̧ɨ̧ mɨ̧ naa me ghò̧ò̧ne. E ndi ngua nkɨà bɨa ko ndɨ màa ndâ nkɔ̀ŋkà àwɨ̧ la.

MàngwaꞋa kàbɔ̀ŋ wòt tà ghɨ̌ a kàbɔ̀ŋ la

⁵ È wu nkûŋ nê wòt kǒ ghɨ a kàbɔ̀ŋ, ko tà bakà ghɨ̀ wuê abua am. Maà kà kɨ ŋwèèlè nyaŋ, ka tà li ngɨ̀ abua yɨ̧ bàgème.

⁶ NgoꞋ yaa àbəèꞋ àyɨ̧ nyaŋ a ghɨ̂ èwuu wòt waa ye la è kuêꞋ.

⁷ È wu ale, bɨ̀ tsiꞋi me kɨ ndɨ bɨ̀a waꞋa a kàbɔ̀ŋ tò ezǐ èntɨ̧ɨ̧ tò mbɨ̀Ꞌɨ̀ a saa tò nyaŋ tà màꞋà ànəê àgème a si la.

⁸ Ale, mâ shu̧u̧ta wɨ̧ nê bɨ̀ ghɨa tà ko nê bɨ bela nkɔ̀ŋkà vi.

⁹ E ndi me shɨ awɨ̧ ale ngua nkɨ enyɔ̀Ꞌtè àwɨ̧ eye nê kò bɨ bela ndzə am leꞋ.

¹⁰ Bɨ waꞋa kàbɔ̀ŋ wòt ko maa waꞋa wùà mɨ̧̂. È wu nê mâ lèènè kàbɔ̀ŋ wòt, ko e ngɨ̀à a mbì Yesò Klistò, nkàà àwɨ̧.

¹¹ Bà ghɨ̀ ale, mbɨ̀Ꞌɨ̀ ka Satàn jɨ̀ mèntɨ̧ɨ̧ ma nkàà nê ba ko àŋɔꞋta tò.

Pɔ̂l kubte a lèghȩ̀ȩ̀nè vi a Tloas

¹² E ndi nkɨ̀Ꞌɨ̂ a Tloas etsɔ̀te Ntu̧ Ntsɔ̧̀ Yesò Klistò. E me kɨꞋɨ ale, Tè Yesò Klistò ghaꞋa èlu̧ abua am.

¹³ Mbàte ngàꞋa ale ka èntɨ̧ɨ̧ am è ka nɔ̀ŋke a èbèm laã ntsɔ̧̀ nkàà nê e ndi è nka ye wanɔ̧ Tȩtɔ̀s abàꞋ və. Ale, e ndàꞋnè àwɔb ntsiꞋi ghà ne Màsèdonìà.

Etsě ane mètàŋ Yesò

¹⁴ Ka mèngùꞋte wu abua Mbɔ̧ɔ̧mà. Tà gha ambo èlɨ̀ wu bà tsiꞋi àghɨ yeamɔꞋ nè Yesò Klistò la ntse a mbì la me ghaꞋa èlu̧ ba me nû a Satàn ntsèà. Tà ghɨ̂ ba wu mbɨ̀Ꞌɨ̀ mèwet àghaa ntsɔ̧̀ bàa ntsèà àdziꞋ àgème ngɨ̀à bòt e koa àghɨa Yesò Klistò wu yùà la.

¹⁵ Baa anè ntsìꞋi mbɨ̀Ꞌɨ̀ mèwet àghaa ntsɔ̧̀ Yesò Klistò ŋa abua Mbɔ̧ɔ̧mà a kètsìà bòt pèma la nè èbe ndèma la.

¹⁶ Abua bòt mpfəèꞋta la, àghaa yaa wu àghaa èvə àa bùŋè àwɔb la, è me wu abua bòt bu mpèma la, àghaa mbɔŋ wu àghaa àa ghɨ̌ bɔɔ peme la. Wòt wu tà kùꞋu ane àfàꞋ yaa la wu wàà?

¹⁷ È me wu awa ko ba ntsě mbɨ̀Ꞌɨ̀ bòt ko bɔ̀ɔ ndàꞋà èngǎ̧ Mbɔ̧ɔ̧mà wuê ambo èkab la. Ka ndɨ̀ wu è wu Mbɔ̧ɔ̧mà ka tà tsàà àwa baa mè ngu a mbì tò la, baa ndàꞋà èngǎ̧ tò nè èntɨ̧ɨ̧ kèfə, mbɨ̀Ꞌɨ̀ bɔfàꞋ Yesò Klistò.