Bìoball air-loidhne

2 Kɔlìn 13 - Mundani

Nkɨ̀atsə enɨ lìa

¹ Eyaa wu ngò̧ tetat màa nkɨ mě kɨꞋɨ eye awɨ̧ la. E nkɨ̀Ꞌà, bɔ nɨa ànəa kàbɔ̀ŋ wòt ghɨ̀ la nɨŋ nkɨ̀Ꞌɨ̂ abua am, ko maa nyi a èbèm na bòt babe kò batat leꞋ e me ghà ne mbì e shua nê bɔ li ndze ndɨ ŋut ghɨa àghɨa ngaa la.

² È li ngu àfɨꞋa mâ kɨꞋɨ ndzè àwɨ̧, è wù èka bɔ̧ bebe a mànkɨꞋa adzìꞋ yu la, e səèŋkè ètû̧ bòt bu bɔ̀ɔ ngɨa kàbɔ̀ŋ la, nè èbe waa waa nê e mè me kɨꞋɨ bɔ bela ngɨa kàbɔ̀ŋ, ko è nka sà wɔb a. E ngua mè səèŋkà ètû̧ bɔb àfɨ̀Ꞌ yaa e ntsě a si ŋu la nê, e me kɨꞋɨ bɔ bela ngɨa kàbɔ̀ŋ ko è nka sà wɔb a.

³ Maa ghɨ̀ anè ndɨ̀ wu bɨ̀a nkɨ ye nê e ndàꞋà ane mètàŋ Yesò Klistò la. Tàa ngɨ̀ tà me ghɨ àghɨ a kètsìà wɨ̧, tà kà nyɨꞋte nê yea njùa, ka tàa ngɨ̀à èghɨ a kètsìà wɨ̧ ane mètàŋ mi.

⁴ Bɔ li mbàte ngù̧ù̧te atò a mbɨ̧̀ mbasa mbɨ̀Ꞌɨ̀ wòt tàa njùa la, ka tà wu yû̧ àfɨ̀Ꞌ yaa ane mètàŋ Mbɔ̧ɔ̧mà. Bàa bòt Yesò Klistò e gha ane àbâ ko me yu mbɨ̀Ꞌɨ̀ tà lè wu la, ka bɨ bɔ̂ ngu eye nê baa ntsèka ane mètàŋ Mbɔ̧ɔ̧mà wuê mbɨ̀Ꞌɨ̀ Yesò nàa ntsèka la, faꞋa a kètsìà wɨ̧.

⁵ Bɨ̀ neeta ndȩ̀ àwɨ̧ bɨ̀ambɔŋ ndze nê kò bɨa ntsèka mbɨ̀Ꞌɨ̀ bòt bɔ zì mèntɨ̧ɨ̧ mɔb ane Yesò Klistò la, e bɔ ndɨ bɔ̀ɔ me tseke la leꞋ. Kò bɨ bakà ko nê Yesò Klistò wu a mèntɨ̧ɨ̧ mɨ̧ leè? È wu nê bɨ lâ ndzì mèntɨ̧ɨ̧ mɨ̧ ane tò ko tà wu nè nɨ̧̀.

⁶ È me wu awa, ko mâ mɨ̀ɨ̀tè nê bɨa ye nê ba lâ ngu bɔntu̧ Mbɔ̧ɔ̧mà.

⁷ Baa shù̧ù̧ta Mbɔ̧ɔ̧mà nê tà ghɨa bɨ̀ ka tsi ngɨ a kàbɔ̀ŋ. Ba shua àyaa nkàà nê ba ntsea nkɨà bɔɔ ko nê Mbɔ̧ɔ̧mà ka tà tsàà wa la. È màà ngu wuê nê bɨa kà ye awa mbɨ̀Ꞌɨ̀ bòt Mbɔ̧ɔ̧mà tsàà la, ko àghɨa ba kɨa la wu nê bɨ̀ me ghɨ̀ mènəè è kùꞋù la.

⁸ BetsiꞋa bà ka ghɨ àghɨa àa me shuke nkûŋ a si la. Baa me ghɨ̀ wuê àghɨa àa me lɔ̀ke yùà ntsaa a ègwet la.

⁹ Ba màà me yu ka bɨ bɔ̂ me kweele ane alu̧ Mbɔ̧ɔ̧mà, ko ànəa ngaa aa me bɔ̀ àwa. Ale, baà ntsàꞋta Mbɔ̧ɔ̧mà nê tà ghɨa bɨ̀ paa nkwèèle.

¹⁰ E ngua shɨa letà waa àfɨ̀Ꞌ yaa mbɨ̀Ꞌɨ̀ è nkɨ̀Ꞌɨ̂ è kwene ane yɨ̧, è nka tsi nɨ̀ àtɔŋ yu Yesò Klistò ŋa abua am la enɨ ŋȩ awɨ̧. Tà li ŋà àtɔŋ yàà nê è nɨŋ ngɨ̀ mèntɨ̧ɨ̧ mɨ̧ me kweele ane mènəè mi. Tà li tà kà ŋa nê è nɨŋ ntsòkè àwɨ̧.

MèntsàꞋte enɨ lìa

¹¹ Bɔnyɨ bɔ̧, enɨ lìa e ngua shua nê bɨ̀ tseke ntsɔ̧̀. Bɨ̀ kubte mènəè mɨ̧, mè me zə ànəa mâ shu la, ngɨ̀à mènəè mɨ̧ nè èntɨ̧ɨ̧ wemɔꞋ, mè ntsèka ane àlàŋkè bɨ bɔnyɨ bɨ̧. Bɨ me ghɨ̀ anè ko Mbɔ̧ɔ̧mà èkɔŋ nè àlàŋkè èntɨ̧ɨ̧ naa wu ne nɨ̧̀.

¹² Bɨ̀ taꞋa bɔnyɨ bɨ̧ bàgème ntsàꞋtè àwɔb mbɨ̀Ꞌɨ̀ bòt Mbɔ̧ɔ̧mà.

¹³ Bòt Mbɔ̧ɔ̧mà bu bàgème àdzìꞋ yaa la aa ntsàꞋtà wɨ̧.

¹⁴ Maà ntsàꞋtà nê Lefɨ̀Ꞌ Yesò Klistò nyɨꞋte a ntsɔ̧̀ vi abua yɨ̧, bɨ̀ mě ndzè èkɔŋ Mbɔ̧ɔ̧mà, Fo Kèfə e ghɨa bɨ̀ wu ane ètsəê wemɔꞋ bɨ̀agème.

« Roimhe

Air adhart »

Lean sinn:

Ceanglaichean taic

Sanasan