Bìoball air-loidhne

2 Kɔlìn 11 - Mundani

Pɔ̂l nè bɔntu̧ fɨte

¹ Mâ shu̧u̧te awɨ̧ nê bɨ̀ nyaꞋa njùte èngǎ̧ am, ka e màà ndzì àdziꞋa àkèghɨ̧̀ adù̧. Bɨ̀ kuule mèntɨ̧ɨ̧ mɨ̧ njùte!

² Bɨ̀ ko nê, mâ lâ mbɔ èntɨ̧ɨ̧ ane yɨ̧ mbɨ̀Ꞌɨ̀ Mbɔ̧ɔ̧mà bɔ la. Mâ nɨ awɨ̧ mbɨ̀Ꞌɨ̀ waàvi angɔ̧̀ kà ko mbâ̧, e ghɨ̌ bɨa yɔꞋɔ wuê mbâ̧ yemɔ̀Ꞌ. Ŋut wu Yesò Klistò à.

³ Maà mbɔ̀ɔ nê bòt ko aa fɨte awɨ̧ mbɨ̀Ꞌɨ̀ Satàn nyà̧kàbɔ̀ŋ li nɨ̀ àŋɔꞋte fɨ̀te a Ive la, etsòkè ètsə bɨ̧, bɨa baka tsi ŋà wɨ̧ nè èntɨ̧ɨ̧ wemɔꞋ abua Yesò Klistò.

⁴ E shua anè nkàà nê mâ ye nê bɨa mbeà mbɨ̧̀ɨ̧̀na ànəê àgème bɨ zə la. Wòt nàa ngɨ̀ tà kɨꞋɨ tà làꞋa ànəa Yesò tsǎ kà wu yu ba làꞋà la, kò ànəa fo tsǎ kà wu Fo Mbɔ̧ɔ̧mà yu bɨ li mbɔŋ la, kò ntsɔ̀tè ntu̧ tsǎ kà wu Ntu̧ Ntsɔ̧̀ Yesò Klistò yu bɨ li ndzə mbɨ̧̀ɨ̧̀ne la leꞋ, bɨ bê mbɨ̧̀ɨ̧̀ne kà kwàꞋtè.

⁵ Bɨa ŋèꞋa bòt bɨ̧ bu a ègwet shua nê bɔ ghe ka bɔ̀ ka tse am ane àghɨa ko.

⁶ È màà ngu wuê nê maa kà ko ndàꞋ, ko àghɨa ko bɔ ko tê ntsè am la a ntsě. Mâ ghɨ̂ bɨ ko àyaa a ngo̧ a ngò̧ ane àghɨ àgème mâ ghɨ̀ la.

⁷ Tè e ndi ngɨ a kàbɔ̀ŋ ndɨ̀ wu e ndi nkɨ̀Ꞌɨ̂ nɨ am a si, màa nkɨ mbɨ̀Ꞌɨ̀ eŋeꞋe awɨ̧ a ègwet, ndàꞋà Ntu̧ Ntsɔ̧̀ abua yɨ̧ kà lo̧o̧ àghɨ la à?

⁸ È li ngu àfɨꞋa è ngu ba nɨ̧ ba la, e me nɨ èkab abua bèchɔsì ko tsa mbɨ̀Ꞌɨ̀ e fàà fàa, mbɨ̀Ꞌɨ̀ etɨŋe awɨ̧.

⁹ E ndi nguê màa ngɨ̀ è me kɨ̀ŋke àghɨ, è nka lɨŋkè wòt kǒ ane yɨ̧ nkàà nê, bɔnyɨ ba bu bɔ dzə a Màsèdonìà la e li ngua ŋǎ èghɨ màa nkɨ̀ŋkà la. Maa me ghɨ̀ wuê a èlɨ̀ waa ngà nè mbì. E nka me lɨ̀ŋke wòt kǒ ane yɨ̧ a ebàꞋa àghɨa ko a.

¹⁰ Mbɨ̀Ꞌɨ̀ mènəè nkûŋ màa ane ànəa Yesò Klistò bele a èntɨ̧ɨ̧ am nkwèèla la, wòt kǒ tàa kele am nê è nka tsi ngàꞋtè am nê maa kà nɨ àghɨ abua yɨ̧ la ntsě. Wòt mbê ntsě ka wuê àbâ èlaꞋ Akayà àgème.

¹¹ Tè e ntsèka kà wua nɨa àghɨ abua yɨ̧ anè ngu shua nê maà kà kɔ̀ŋkè àwɨ̧? ChaꞋ a ntsě ale! Mbɔ̧ɔ̧mà ko nê maà nkɔ̀ŋkà àwɨ̧.

¹² Maa me ghɨ̀ àghɨa màa ngɨa àfɨ̀Ꞌ yaa la nɨa ngà nè mbì mbɨ̀Ꞌɨ̀ bòt bu bɔ̀ɔ ngà̧aã shua nê awɔb tsàà Mbɔ̧ɔ̧mà la è ka tsi eye èlu̧ bɔ̀ɔ me ghàꞋte àwɔb shua nê bɔɔ fàꞋà wuê mbɨ̀Ꞌɨ̀ mmɔ̌ la a.

¹³ Èwuu bòt mbɔŋ ntsě ngule bɔntu̧ Yesò. Bɔɔ nɨa àfàꞋ àyɔb mvəèəlà àghɨ a bòt nkɨà bɔɔ me mɨ̀ɨ̀te nê awɔb tsàà Yesò Klistò.

¹⁴ Wòt yea àyaa à ka ntsè atò ngu nê nàa ngɨ̀ è wu àfɨ̀Ꞌ àko ka wuê Satàn fɨ̀te bòt tè bɔ tsiꞋa mɨ̀ɨ̀tà nê tà wu wantu̧ Mbɔ̧ɔ̧mà tàa nɨa èkaꞋà nɨa nkɨ̀Ꞌa la.

¹⁵ Satàn wu ghɨ̀ anè, à ka ntsè àwɨ̧ nê bɔfàꞋ tò aa me ghɨ̀ wuê a èlɨ mbɔŋ. Mbɔ̧ɔ̧mà naa ŋa àbȩ̀ àyɔb ane ndɨ àfàꞋa yɔb a nyɨꞋte la.

NgoꞋ Pɔ̂l li ndze ane èlen Yesò Klistò la

¹⁶ TsiꞋ è mě shu awɨ̧ mbɨ̀Ꞌɨ̀ mâ zǐ shu la nê, wòt ka mɨ̀ɨ̀tè nê e ngu àkèghɨ̧̀. Bɨ màà me mɨ̀ɨ̀tè wuê nê e ngu àkèghɨ̧̀ bɨ tsiꞋ e nyaꞋà ngàꞋtà am mɨ̧̂.

¹⁷ Ànəê ya e ndàꞋà la ntsě ànəa Yesò Klistò shu abua am nê è ndaꞋa la. Maà ngàꞋtà am a èlɨ̀ wa ale a tsiꞋi ngaa mbɨ̀Ꞌɨ̀ e ngu àkèghɨ̧̀.

¹⁸ Ndɨ̀ wu bòt nyaŋ àa ngàꞋtà wɔb ane èlɨ bòt ngɔ̀ŋ àa ngɨ̀à la, maa me ghɨ̀ àyaã a èlɨ mbɔŋ mɨ̧̂.

¹⁹ Bɨa shua nê bɨ bɔ èyì, mbɔ̂ me bɨ̧ɨ̧ne ànəa èkèghɨ̧̀ àa shua la nè mèngùꞋte.

²⁰ Wòt nàa ngɨ̀ tà kɨꞋɨ bɨ sàŋ tà nɨ̀ àwɨ̧ mbɨ̀Ꞌɨ̀ èbùꞋ, me fible awɨ̧ nɨa èghɨ bɨ̧, ntsèka a ègwet lɨ̧, mè ntsò̧ò̧tà wɨ̧.

²¹ Eyaa wu ndɨ bɨ̀a ndzèa la, bɨ nɨŋ nê ma fâ̧ nkàà nê ba li bà ka bɔ mèntɨ̧ɨ̧ kèkweele e ghɨ̀ èwuu èghɨ mbɔŋ. Ka àghɨ a wuê betsiꞋa wòt me ghàꞋtè àvi adù̧ la ko maa ghàꞋtà am adù̧ mɨ̧̂. E ngua ndàꞋà anè mbɨ̀Ꞌɨ̀ àkèghɨ̧̀.

²² Bɨ̀ zə! Bɔ me shu nê bɔ wu bèlèkɔꞋasi bòt Ebùlù, ko e ngu àyaã wekǒ mɨ̧̂, me shu nê bɔ wu bòt Izəèlȩê, ko e ngu àyaã wekǒ mɨ̧̂, mè me shu nê bɔ wu bòt àndǎ̧ Abàlàghâm, ko e ngu àyaã wekǒ mɨ̧̂.

²³ Bɔ me shu nê bɔ wu bɔfàꞋ Yesò Klistò, ko maa tsiꞋi làꞋà mbɨ̀Ꞌɨ̀ wòt àbààla nê e ngu wɔ̀fàꞋ Yesò tè ntsè àwɔb. Mâ faꞋa àfàꞋa nyaŋ tè ntsè àwɔb, bɔ zì am a tèfȩ ngò̧tsə nyaŋ tè ntsè àwɔb, shu̧u̧ am tè ntsè àwɔb, èvə e mè nəꞋə a tèdzi taã ngò̧ nyaŋ.

²⁴ Mâ ye ngoꞋ a tèkitebu Bèjuê bɔ̀ɔ shu̧u̧ am la ngò̧ tetà̧â̧. Àfɨ̀Ꞌ àgème bɔ̀ɔ shù̧u̧ am la bɔ ŋa am ngɔt èghem yetat ntsɔ̀b tebəèꞋa.

²⁵ Bòt Luêm e shu̧u̧ am ngò̧ tetat nè fȩtsə, bòt e mè ntèmte am nè àti ngò̧ yemɔ̀Ꞌ. ÈnkànuꞋ betat e bɨɨ a *èdzî ngò̧ tetat nè mmɔ̌ a èbèm, e mè ndzii nkua ndi a èbem *èdzî ane àliabȩ yeamɔꞋ.

²⁶ Ane bèlèghȩ̀ȩ̀nè nyaŋ, e ndɨ ngua ndzea ngoꞋ a èbem mèdzî è lu̧u̧ la, ndzě ngoꞋ abua bètsɔŋ, mè ndzě ngoꞋ a tèkitebu bòt àlaꞋ bɔ̧. Mâ ye ngoꞋ a tèkitebu bòt kà wu Bèjuê, ndzě ngoꞋ a èbem èpfəè nɨ̧, ndzě ngoꞋ a èbem èlaꞋ yuube. Mâ ye ngoꞋ fɔɔle a èbem *mèdzî mè ndzě ngoꞋ a tèkitebu bòt bɔ̀ɔ fɨ̀ta shua nê bɔ wu bòt Yesò Klistò la.

²⁷ Mâ fâꞋ mbɔ̀ tèbəꞋtsə, ndì àtatsi ngò̧ nyaŋ, ntsèka kà ye èghɨjɨ ejɨ kò mèleb enu leꞋ. Mâ tsèke ngò̧ nyaŋ kà jɨ àghɨ, è nka mê ndzè lob e tseke a èbèm, è nka mê ndzè ndǐ ekwaãaã a èfɨ̀Ꞌ ko.

²⁸ E mbakà bàte ntɨ̧̀ɨ̧ èghɨ ba ègème, ka ànəa ko a bɔ̂ nguê àa ndèlà a èntɨ̧ɨ̧ am àfɨ̀Ꞌ àgème la. Ànəa mbɔŋ wu nê maà ntsèka mɨ̀ɨ̀tà bèchɔsì bàgème.

²⁹ Wòt nàa me yu ane mènəè Mbɔ̧ɔ̧mà, è nka wu ntsɔ̧̀ wuê mbɨ̀Ꞌɨ̀ e ntsiꞋi tòà. Wòt nàa ngɨ̀à wekǒ ghɨ a kàbɔ̀ŋ, e ntsiꞋi a èbem ngoꞋ.

³⁰ A ghà tè ntsìꞋi àyea màa ŋeꞋe tèkwȩ taã a ègwet la, ko e nga me ŋeꞋe tèkwȩ taã adù̧ èghɨ bu àa nyɨ̀Ꞌta nê e mbakà bɔ mètàŋ la.

³¹ Mbɔ̧ɔ̧mà Tǎt Yesò Lefɨ̀Ꞌ ko nê ànəa mâ shu la wu nkûŋ. Bà me wùꞋte atò ane àlia nè àlia.

³² È li ngu àfɨꞋa è ngu a Dàmaskɔ̀s la, gɔvanɔ̀ wu tà li ngu a ètene fɔ̧̀ Àletàs la tsite bòt a mètsəêkaã yu bɔ kut ndzì àpfəa nɨ̧ yu a èbèm la nê bɔ̀ baãaã am.

³³ Ka bèshu̧ bɔ̧ e zì am a èbem ankà̧ ntsaa àbȩ ane wundù a mbɨ̧̀ àkaã yu e ndùùlà.

« Roimhe

Air adhart »

Lean sinn:

Ceanglaichean taic

Sanasan