Bìoball air-loidhne

2 Kɔlìn 10 - Mundani

Pɔ̂l tàŋè ànəa àfàꞋ àzi

¹ Mmɔ̌ Pɔ̂l, mâ shu̧u̧te awɨ̧ ane èlen Yesò Klistò wu tà wu mbɔɔlà wòt, mè me yu ane mènəè mi la. Wu mmɔ̌ wu bòt àa shua nê màa ngɨ̀ è ngu ba nɨ̧̀ ba, èngǎ̧ am e me yu, ka è ngu a endɨ̌ è me shɨ àkatè abua yɨ̧ e me shɨ ne nkȩ la.

² Bɨ̀ ka ngɨ̀ mbɨ̀Ꞌɨ̀ ka e nkɨ̀Ꞌɨ̂ me làꞋa abua yɨ̧ ntsòòta tsoote. Eyaa wu àghɨa màa mɨ̀ɨ̀tà ekɨꞋɨ e ghɨ̀ ne bòt bu bɔ̀ɔ shua ne e faꞋa ambo èghɨ sitsǎꞋ la.

³ È batè ngu nkûŋ nê baa ntsèka a ngɔ̀ŋ, ka bà ka wua nua èbet wa ane ndɨ bòt ngɔ̀ŋ àa nùà la.

⁴ Èghɨ bàa nɨa nùà èbet wa la ntsě è bu bɔbȩ àa nɨa nùà èbet la. Ka wu èghɨ èbet bu e bɔ mètàŋ Mbɔ̧ɔ̧mà bàa nɨa ntsòkà èdziꞋi bɔmbù̧ Mbɔ̧ɔ̧mà àa ndò̧ò̧tà la.

⁵ Baa nɨa nkèla mènkwàꞋte kàbɔ̀ŋ ègème, nè àghɨ àgème bòt àa mɨ̀ɨ̀tà nê bɔ ko nyaŋ, a kela wɔb a mànkoa a Mbɔ̧ɔ̧mà la. Mbà̧aã mènkwàꞋte ègème mbɨ̀Ꞌɨ̀ ghɨ̌ bòt bu nè èwuu mènkwàꞋte mbɔŋ la aa me zəa Yesò Klistò.

⁶ Baa me ghɨ̀ tê nko bòt bu bàgème ayɔɔ yɨ̧ bɔ̀ɔ ndzəa Yesò Klistò la, ntàŋke nyɨ̀Ꞌte bòt bu bɔ̀ɔ ka zə atò la àghɨa bɔ kɨà la.

⁷ Bɨ̀ lɨ̀ŋkè èghɨ àa a mbì lɨ̧ la. Wòt me ye avi zìambɔŋ mɨ̀ɨ̀tà nê ye wu wòt Yesò Klistò, ta mè nkwàꞋtè, ko taa ye nê bàambɔŋ ba wu bòt Yesò Klistò mɨ̧̂ mbɨ̀Ꞌɨ̀ tòà.

⁸ È màà ngu wuê nê, mâ ghàꞋtè am tè ntsè ndɨ mâ wu ghɨ̀ la ane àtɔŋ yu Yesò Klistò ŋa abua am la, ko àtsə am aa kà kɔꞋ ane ànəa mbɔŋ. Tà li tà kà ŋa àtɔŋ yaa nê è nɨŋ ntsòkè mèntɨ̧ɨ̧ mɨ̧. Tà li ŋa nê è nɨŋ ngɨ̀ mèntɨ̧ɨ̧ mɨ̧ me kweele.

⁹ E ntsea nkɨ e ghɨ̌ bɨa me mɨ̀ɨ̀te nê e ngua fàŋà wɨ̧ ane èghɨ mâ shɨ a èbem èkatè bɔ̧ la.

¹⁰ Bɔɔ shua nê, màa ngɨ̀ è me shɨ letà am, e me tsoote a èbèm mè ngɨ̀ a bɔ nkȩ, ka è ngu ba nɨ̧̀ ba e me yu, mèngǎ̧ mɔ̧ ka wua nkwèèla.

¹¹ Bòt bu ndàꞋà anè la bɔ bɔ ndɨ bɔ̀ɔ ko nê àghɨa bàa ndaꞋa a èbem èkatè àfɨꞋa bà wu a endɨ̌ la, bele wuê àghɨa bàa ngɨ̀à àfɨꞋa ba kɨꞋɨ tê ntsìꞋi a si ba nɨ̧̀ ba la.

¹² BetsiꞋa bà ka me kɨ efɨ̀Ꞌnè àwa nè bòt bu ayɔɔ yɨ̧ bɔ̀ɔ shua nê bɔ ghe la. Bɔɔ̀ fɨ̀Ꞌnà wɔb nè bɔnyɨ bɔb nkɨ eye bòt bɔ tsè beko la. Àyaa a wua nyɨ̀Ꞌta nê bɔ bakà bɔ èyì.

¹³ Ka è me wu awa ko baa me ghàꞋtè awa wuê ane àfàꞋ yu Mbɔ̧ɔ̧mà ŋa abua ya la. Bà ka ghàꞋtà wa te ghǎ wu àdziꞋa kà wu aya a. Àghɨa bàa ngɨa a kètsìà wɨ̧ la wu àbəꞋa àfàꞋ yu Mbɔ̧ɔ̧mà ŋa abua ya la.

¹⁴ Bɨ wu ayɔɔ bòt Mbɔ̧ɔ̧mà lè ŋa abua am nè e nkɨꞋɨ ntsɔ̀tè Ntu̧ Ntsɔ̧̀ Yesò Klistò abua yɔb la. Ale, e ndi me kɨꞋɨ abua yɨ̧ ale è nka wua mɨ̀à àdziꞋa tà li nê è nga la. Bɨ li ngu bòt mbì ba le kɨꞋɨ̀ abua yɨ̧ ntsɔ̀tè Ntu̧ Ntsɔ̧̀ Yesò Klistò la.

¹⁵ Bà ka ghaꞋte awa te gha ewu àdziꞋa kà wu ayea Mbɔ̧ɔ̧mà ŋa abua ya la. Ka àghɨa ba kɨa la wu nê mèntɨ̧ɨ̧ mɨ̧ mu bɨ zi ane Yesò Klistò la me kweela ngà nè mbì, mbɨ̀Ꞌɨ̀ aa wu nê èlu̧ e ghaꞋà abua ya baa kwèꞋne àfàꞋ àya a kètsìà wɨ̧.

¹⁶ A wu anè ko baa ko etsɔ̀te Ntu̧ Ntsɔ̧̀ Yesò Klistò te egheebe awɨ̧ egha a èlaꞋ ko tsa. Bà ka me ghàꞋtè àwa ane àfaꞋa bòt ko e ghɨ a èdzìꞋ ko tsa la a.

¹⁷ Àkata Mbɔ̧ɔ̧mà a laꞋnê, “Wòt me kɨ ghàꞋte àvi tà me ghàꞋtè àvi ane àghɨa Yesò Klistò ghɨ̀ la.”

¹⁸ Wòt me shu zìambɔŋ nê ye wu àghɨa ko, ko tà ntsě àghɨ. Wu wòt Mbɔ̧ɔ̧mà shu nê tà wu àghɨ la, ka tà lâ ngu àghɨ la.

« Roimhe

Air adhart »

Lean sinn:

Ceanglaichean taic

Sanasan