1 Tèsàlonikà 4 - Mundani

Mèntsèke nàa mbɔ̀ a Mbɔ̧ɔ̧mà la

¹ Enɨ lìa à bɔnyɨ ba, ba li nyɨ̀Ꞌte awɨ̧ ndɨ bɨ bɔ ndɨ bɨ̀a tseke ka aa me bɔ̌ a Mbɔ̧ɔ̧mà la. Maa shua anè, mbɔ̂ nko nê eyaa wu ndɨ bɨ̀a ntsèka la. Ka nè àfɨ̀Ꞌ yaa, ba wua shù̧ù̧ta awɨ̧ mè ngù̧a wɨ̧ ane èlen Yesò Lefɨ̀Ꞌ nê, bɨ̀ me paa ngɨ̀à wuê ale ngà nè mbì.

² Bɨ ko nkɨ̀a tu ba li ŋǎ abua yɨ̧ ane èlen Yesò Lefɨ̀Ꞌ la.

³ Àghɨa Mbɔ̧ɔ̧mà nàa nkɨà la wu nê bɨ̀ bɔ èntɨ̧ɨ̧ kèfə mbɨ̀Ꞌɨ̀ zìa, wòt ka nɔ̀ŋkè nè àvi kà wu ewe tò.

⁴ Waa waa ane yɨ̧ baãaã vi vi ndɨ Mbɔ̧ɔ̧mà nàa nkɨ̀a la, tè bòt ko è ye mè nkɔ̀ŋkè.

⁵ Ko mbɨ̀Ꞌɨ̀ wòt me ghɔ̀Ꞌɔ akwen bèzi mbɨ̀Ꞌɨ̀ mbɨ̧̀ ènyit tò nàa nkɨà la. Bòt kà ko a Mbɔ̧ɔ̧mà ka bɔ̀ɔ ngɨ̀à ale la.

⁶ Wòt ane yɨ̧ ka fìble wanyɨ vi ngɨ a kàbɔ̀ŋ ane tò, nkàà nê bòt bu bɔ̀ɔ ngɨa kàbɔ̀ŋ la aa li ye ngoꞋ a tèkitebu Mbɔ̧ɔ̧mà mbɨ̀Ꞌɨ̀ ba li ndzaŋe shu awɨ̧ la.

⁷ Mbɔ̧ɔ̧mà li tà kà wua ntɔ̂ awa nê wòt me nɔ̀ŋkè ne àvi kà wu we tò. Tà li ngua ntɔ̂ awa nê bà ŋa awa nènkèm abua zi.

⁸ È wu ale, wòt tù̧a èngà̧ waa ba nyɨꞋtà la, tà ko nê ye tu̧a Mbɔ̧ɔ̧mà wu tà ŋa Fo Kèfə abua yɨ̧ la, tà kà ntu̧a wɔ̀bȩ̂.

⁹ Ba bakà tsi mbɔ̌ ndɨ bàa mě eshɨ àkatè abua yɨ̧ eshu awɨ̧ ndɨ bɨ̀a me kɔ̀ŋkè bɔnyɨ bɨ̧ bòt Yesò la. Mbɔ̧ɔ̧mà zìambɔŋ è nyɨꞋte awɨ̧ ndɨ bɨ̀a me kɔ̀ŋkè bɔnyɨ bɨ̧ la.

¹⁰ Bɨa ngɨa a èlɨ waa adù̧ bòt Yesò bàgème a Màsèdonìà ale à bɔnyɨ ba, baa shù̧ù̧ta awɨ̧ nê bɨ̀ me paa ngɨ̀à ale nɨa ngà nè mbì.

¹¹ Waa waa ane yɨ̧ nyɔꞋta me nyaꞋa ntsèke avi bò̧ bò̧, tà ka me ŋeꞋe avi nchɨ̧̀a a èbem mènəè bòt tsa. Bɨ̀ me nɨ èbu bɨ̧ fàꞋà nkɨà ètsəèjɨ wɨ̧ mbɨꞋɨ̀ ba li ndzaŋe shu awɨ̧ la.

¹² Bɨ me ghɨ̀ anè, ko bòt kà zi mèntɨ̧ɨ̧ mɔb ane Yesò aa me kukte awɨ̧, bɨ̀ ka mê ngu me lȩ̂ wòt kǒ ane àghɨa bɨ̀a nkɨ̀ŋkà la.

Mènkɨ̀Ꞌɨ̂ Lefɨ̀Ꞌ

¹³ Bɔnyɨ ba, baa kà kɨ laꞋ nê bɨ̀ tseke ane lèmàkè, ane ànəa bòt bu bɔ pfəꞋte la. Ba kɨ eshu awɨ̧ ale, mbɨ̀Ꞌɨ̀ ka bɨ me dɨ̌ a èlɨ̀ wu bòt bu kà bɔ ntɨ̀ ane Yesò àa ndɨ̀à la.

¹⁴ Ba ko nê Yesò li mpfə mè njù̧ù̧mê. Ale, ba ko mɨ̧̂ nê Mbɔ̧ɔ̧mà naa li ghɨ̌ Yesò naa nɨ bòt bu bɔ li ndzì mèntɨ̧ɨ̧ mɔb ane Yesò wu ka mpfəèꞋte la bɔ̂ tò ba aa ghà nɔ̂.

¹⁵ Ba wua shua wɨ̧ mbɨ̀Ꞌɨ̀ Lefɨ̀Ꞌ li nyɨ̀Ꞌte awa la nê, naa li ngu ane àli yu tàa kɨꞋɨ la, bàa wu bà bele ka pfəèꞋte la, è ka tse a mbì bòt bu bɔ pfəꞋte la.

¹⁶ Naa li ngu ane àlia mbɔŋ, bòt è zə àtɔŋ a ŋȩ la, tǎt bɔntu̧ Mbɔ̧ɔ̧mà ŋȩ, bòt e zə èsɔndɨk Mbɔ̧ɔ̧mà e làꞋà la, Tè Yesò Klistò zìambɔŋ bɔ̂ nchu a ègwet. Bòt bu bɔ li ndzì mèntɨ̧ɨ̧ mɔb ane Yesò ka mpfəèꞋte la e bɨ̀ njù̧ù̧mê.

¹⁷ AfɨꞋa mbɔŋ Mbɔ̧ɔ̧mà ŋèꞋe awa wu bà bele ka pfəèꞋte la, ba bòt ngaa e bu̧u̧te a kètsìà mbàꞋ è ngu nè Tè Yesò a ègwet. Ba tò ba aa me tseke nɔ̂ àfɨ̀Ꞌ àgème.

¹⁸ Mbɨ̀Ꞌɨ̀ àa anè la, bɨ̀ nɨ mèngà̧ maa nɨŋ ndzì èntɨ̧ɨ̧ waa waa.