1 Tèsàlonikà 3 - Mundani

¹ Mbɨ̀Ꞌɨ̀ ba nyɔꞋtè nê ba kɨ eye awɨ̧ ngɨ̀ kekaŋ a me saa wa la, ba ye nê a bɔ̂ŋ nê bà tseke Atèns,

² bà tsàa wanyɨ wa Tɔ̀màtià, wɔ̀fàꞋ Mbɔ̧ɔ̧mà abua yɨ̧. Ba tò ba aà fàꞋà nɔ̂, a màntsɔta Ntu̧ Ntsɔ̧̀ Yesò Klistò. Ba li ntsà atò nê tà kɨꞋɨ ndɔ̀ktè mèntɨ̧ɨ̧ mɨ̧, ngɨ̀ bɨ̀ me kweele ane èntɨ̧ɨ̧ wɨ̧ wu bɨ zi ane Yesò Klistò la.

³ Ba li ngua ngɨ̀à ale mbɨ̀Ꞌɨ̀ ngoꞋ tu bòt e ghɨ̂ bɨ ye la te ghɨ̀ wòt kǒ ane yɨ̧ tsì èntɨ̧ɨ̧ vi ane Yesò. Bɨ̀a mbɔŋ bɨ ko nê èwuu ngoꞋ tàa wu àbəꞋa èghɨ e bɔ ndɨ àa ye awa bàa bòt Mbɔ̧ɔ̧mà la.

⁴ Ba li mbèle ba nɨ̧̀ ba ale ndzaŋe shu awɨ̧, nê bòt aa li me kɨ àtsəa ya ba nɨ̧̀ ba enɨ. Mènəè maa bê ntè wuê mbɨ̀Ꞌɨ̀ bɨ ko la.

⁵ Mbɨ̀Ꞌɨ̀ à yaa a ghɨ̀ e ntsiꞋa mbà̧aã èntɨ̧ɨ̧ am kekaŋ la, e tsàa a Tɔ̀màtià nê tà kɨꞋɨ ndzě ndɨ bɨ̀a mbà̧aã ànəa Yesò la. Me ghɨ̀ ale ngua mbɔ̀ɔ̂ mbɨ̀Ꞌɨ̀ ateko Satàn è kubte mèntɨ̧ɨ̧ mɨ̧ tè ngɨ̀ àfàꞋa ya yu ba li nkɨ̀Ꞌɨ̂ abàꞋ ŋu ngɨ̀ la a tsè àku.

⁶ Ka nè àfɨ̀Ꞌ yaa, Tɔ̀màtià è kua àpfəè ayɨ̧ tè shu awa ànəa ntsɔ̧̀ a ghɨ̀ mèntɨ̧ɨ̧ ma me bɔ̀ la. Tà shu awa nê mèntɨ̧ɨ̧ mɨ̧ bele ane Yesò, bɨ mè mbèla nkɔ̀ŋkà bɔnyɨ bɨ̧ mè shu nê bɨà ntsèka mɨ̀ɨ̀tà àwa ntsɔ̧̀, mè nkɨ eye awa wuê mbɨ̀Ꞌɨ̀ bàa nkɨà àwɨ̧ eye mɨ̧̂ la.

⁷ Bɔnyɨ ba, mbɨ̀Ꞌɨ̀ ba zə àfɨ̀Ꞌ yaa nê mèntɨ̧ɨ̧ mɨ̧ bela nkwèèla ane Yesò la, a taꞋa zì mèntɨ̧ɨ̧ ma a èbem ngoꞋ ta nè ngɨ̧̀ɨ̧̀nè yaa ba yea àdzìꞋ yaa la.

⁸ Mèntɨ̧ɨ̧ ma fi àfɨ̀Ꞌ yaa na bɨ bele àghɨ yeamɔꞋ nè Tè Yesò la.

⁹ BetsiꞋa ba ŋa mènkɔ̀ŋke abua Mbɔ̧ɔ̧mà àfɨ̀Ꞌ yaa nkàà wɨ̧. Ba kɔ̀ŋka Mbɔ̧ɔ̧mà nkàà mèngùꞋte mu bɨ ghɨ̂ ba bɔ a mbì tò la.

¹⁰ Baa shù̧ù̧ta Mbɔ̧ɔ̧mà ètsəꞋ nè nèngû̧ nè èntɨ̧ɨ̧ wa ègème nê, tà ŋa awa èlu̧ bàambɔŋ è kɨꞋɨ mè ngu nè nɨ̧̀, mbɨ̀Ꞌɨ̀ enyɨꞋte awɨ̧ ndɨ bɨ̀a paa me nèèta ndzìà mèntɨ̧ɨ̧ mɨ̧ ane Mbɔ̧ɔ̧mà la.

¹¹ Baa ntsàꞋtà nê, Tǎt wa Mbɔ̧ɔ̧mà zìambɔŋ bɔ̂ Yesò Lefɨ̀Ꞌ wa è ghaꞋa alu̧ bà kɨꞋɨ ndzè àwɨ̧.

¹² Ba mè ntsàꞋtà nê Lefɨ̀Ꞌ ghɨa èkɔŋ wɨ̧ ane bɔnyɨ bɨ̧ è me kweela ngà nè mbì, bɨ̀ mèe me nèèta nkɔ̀ŋkà waa waa wuê mbɨ̀Ꞌɨ̀ bàa nkɔ̀ŋkà àwɨ̧ la.

¹³ Bɨ me ghɨ̀ ane ko Mbɔ̧ɔ̧mà naa zì mèntɨ̧ɨ̧ mɨ̧ e mě ghɨ̌ bɨa tsiꞋi bòt tò nènkèm mbɨ̀Ꞌɨ̀ è li e wu ane àli yu Yesò Lefɨ̀Ꞌ wa nàa kɨꞋɨ ne bòt bi bàgème la, bɨ tɨ̧ɨ̧ a mbì Tǎt wa Mbɔ̧ɔ̧mà kà ye àghɨa wòt nàa fèèlè àwɨ̧ adù̧ la.