1 Tèsàlonikà 2 - Mundani

ÀfaꞋa Pɔ̂l a Tèsàlonikà

¹ Bɔnyɨ ba, bɨ ko bɨ̀ambɔŋ nê, lèghȩ̀ȩ̀nè wa àpfəèa yɨ̧ li è ka tsě àku.

² Bɨ ko ndɨ bɔ li mbɨ̀ ngɨ̧̀ɨ̧̀nè àwa mè ntsɔ̧̀ɔ̧̀tè àwa a Filìpȩ ka ba kɨꞋɨ̀ abua yɨ̧ a Tèsàlonikà la. Bòt è li mbàte ndɔ̀Ꞌte a si àpfəa yɨ̧ mɨ̧̂ me pààbè àwa, ka Mbɔ̧ɔ̧mà bɔ̂ ŋà àwa mèntɨ̧ɨ̧ kèkweelè ba tsɔ̀tè Ntu̧ Ntsɔ̧̀ yu è dzəè abua tò la abua yɨ̧.

³ Ba li me nyɔ̀Ꞌta nkɨà bòt aa bɨ̧ɨ̧ne ànəa Ntu̧ Ntsɔ̧̀ Mbɔ̧ɔ̧mà ale, mèfà̧ kà wu adù̧, bà ka bɔ mèmɨ̀ɨ̀te kàbɔ̀ŋ, bà ka mê ngua fìbla wòt kǒ.

⁴ Bàa ngɨ̀ ba wua ndàꞋà wuê mènəè Mbɔ̧ɔ̧mà nàa nkɨà nê bà laꞋa la, nkàà nê tà lɨ̀ŋkè àwa ba kùꞋù èbe tàa zǐ Ntu̧ Ntsɔ̧̀ yu a tèkitebu ta la. Bà ka laꞋà àghɨa bɔbȩ àa nkɨà la. Baa ndàꞋà wuê ndɨ àa bɔ̌ abua Mbɔ̧ɔ̧mà wu tà ko mèntɨ̧ɨ̧ ma la.

⁵ Bɨ ko ntsɔ̧̀ Mbɔ̧ɔ̧mà mè nko mɨ̧̂ nê ba li bà ka làꞋà abua yɨ̧ ne ètsəê nendɨ̧, bà ka làꞋà èngà̧ àfible mbɨ̀Ꞌɨ̀ enɨ àghɨa ko abua wòt.

⁶ Ba li bà ka wua nyɔ̀Ꞌtà nkɨà bòt aa me kukte awa ka wuê bɨ̀a kò bòt ko tsa leꞋ, è wu àghɨa bàa mbɨ̀Ꞌɨ̀ bɔntu̧ Yesò Klistò e wu ko e ghɨ̀ la.

⁷ È li ngu àdziꞋa ya mbɨ̀Ꞌɨ̀ bɔntu̧ Yesò Klistò e ghɨ̌ bɨa me kukte awa, ka bà ka wua ngɨ̀à ale. Ba li mbɔ̀ɔ̀le awa a si me baãaã awɨ̧ wuê mbɨ̀Ꞌɨ̀ àvi nàa ngɨ̀ tà bɔ̀ɔ̀le avi me nyɔŋe bɔ̧ bi mè ndìà wɔb la.

⁸ Ba li ngua nkɔ̀ŋkà àwɨ̧ nyaŋ tè bà ka wua nkɨ etsɔ̀tè wuê ndàꞋ Ntu̧ Ntsɔ̧̀ yu è dzəè abua Mbɔ̧ɔ̧mà la abua yɨ̧. Ba li ŋà àwa nènkèm abua yɨ̧, nkàà nê bɨ li ndâ ngu a mèntɨ̧ɨ̧ ma.

⁹ Bɔnyɨ ba, ba ko nkûŋ nê bɨ bakà leenè ndɨ ba li ndâ ngua fàꞋà mbɔ̌ tèbəꞋtsə la. Ba li ngua fàꞋà ètsəꞋ bɔ̂ nèngû̧ mbɨ̀Ꞌɨ̀ bà me tsɔ̀te Ntu̧ Ntsɔ̧̀ yu è dzəè abua Mbɔ̧ɔ̧mà la, bà ka ŋa ngoꞋ abua wòt kǒ ane yɨ̧.

¹⁰ Bɨ ye mè nkoê, Mbɔ̧ɔ̧mà mè nkoê nê, mènəè ma a kètsìà wɨ̧ bɨ̀a bòt Yesò li ngua mbɔ̀. Ba li mbê ngua ngɨ̀à mbɨ̀Ꞌɨ̀ ba wuê ghɨ̀ la. Àghɨa ko wòt nàa fèèlè awa adù̧ la à ka wuê.

¹¹ Bɨ ko nê, ba li ngua mbà̧aã waa waa ane yɨ̧ wuê mbɨ̀Ꞌɨ̀ tǎt nàa mbà̧aã bɔ̧ bi la.

¹² Ba li ngua ndɔ̀ktà wɨ̧, ndzìà mèntɨ̧ɨ̧ mɨ̧, mè nkɨ̀ɨ̀ta wɨ̧ nê bɨ̀ me ghɨ̀ mènəè mɨ̧ wuê mbɨ̀Ꞌɨ̀ Mbɔ̧ɔ̧mà nàa nkɨà la. Wu tòà tà tɔ awɨ̧ nê bɨ̀ kɨꞋɨ bɔ̂ nɨ̧̀ ba è fɔte ngu a èbem kèfɔ̧̀ vi nè ènɨ̧ vi la.

¹³ Lə kǒ bàa mè ntsèka nkɔ̀ŋkà a Mbɔ̧ɔ̧mà la wu nê, ba li ndàꞋà èngà̧ wu e dzə abua Mbɔ̧ɔ̧mà la abua yɨ̧ ale, bɨ zə mbɨ̧̀ɨ̧̀nê. Bɨ li mbɨ̧̀ɨ̧̀nê nê, è ntsě èngǎ̧ wɔ̀bȩ̂, nê wu èwe Mbɔ̧ɔ̧mà, è bɔ̂ ngu kwàꞋ èngǎ̧ Mbɔ̧ɔ̧mà. Wu èngǎ̧ mbɔŋ Mbɔ̧ɔ̧mà nɨŋ me fàꞋa ane yɨ̧ wu bɨ zì mèntɨ̧ɨ̧ mɨ̧ ane tò la.

¹⁴ Bɔnyɨ bɔ̧, àghɨ yu a li ngɨ̀ ane bèchɔsì Mbɔ̧ɔ̧mà bu a Jùdià bè wu àghɨ yeamɔꞋ nè Yesò Klistò la, a bê ngɨ ane yɨ̧. Bòt àlaꞋ ayɨ̧ e li ngua nkɨà àtsəa yɨ̧ enɨ wuê mbɨ̀Ꞌɨ̀ Bèjuê e li ngua nkɨà àtsəa bòt Jùdià enɨ la.

¹⁵ Bèjuê ngaa e li mbuŋe a Yesò Lefɨ̀Ꞌ, mbɨ̀Ꞌɨ̀ bɔ̀ le lɔ̂Ꞌ mbùŋè bèndàꞋàtɔŋ Mbɔ̧ɔ̧mà, mè me kɨ ètsə ba enɨ àfɨ̀Ꞌ yaa la. Bɔɔ ngɨ̀à ale, a bɨa Mbɔ̧ɔ̧mà, bɔ mè ntsìꞋi bɔmbù̧ ba,

¹⁶ nkàà nê bɔɔ nkèla awa mbɨ̀Ꞌɨ̀ ba tsɔ̀Ꞌtè Ntu̧ Ntsɔ̧̀ Mbɔ̧ɔ̧mà yu tàa nɨa ngɨ̀à bòt e pema la abua bòt kà wu Bèjuê. Àyaa wu kàbɔ̀ŋ bɔ paà ngɨ̀ wuê mbɨ̀Ꞌɨ̀ bɔ̀ɔ ndzìà ngɨ̀à àfɨ̀Ꞌ àgème la. Ntsǒ Mbɔ̧ɔ̧mà bê nɔ̀ŋke àtsəa yɔb àfɨ̀Ꞌ yaa tè ndɔ̀Ꞌ.

Pɔ̂l me kɨ ghǎ ye bòt Tèsàlonikà

¹⁷ Bɔnyɨ ba, mbɨ̀Ꞌɨ̀ mâ sà àwɨ̧ ane àtem àfɨ̀Ꞌ àko la, mèntɨ̧ɨ̧ ma me tseka nkɨà wuê awɨ̧. Ba li mbàte ngà nè nkem ya ale, ka mèntɨ̧ɨ̧ ma bɔ̂ ntèꞋa akwèn nè nɨ̧̀. Ba li ntaꞋa nyɔ̀Ꞌte nê ba wu kɨꞋɨ e mě ye awɨ̧.

¹⁸ Ba li ngua nkɨ ekua akwèn ekɨꞋɨ àpfəè ayɨ̧. Mmɔ̌ Pɔ̂l e ndi nyɔꞋte a ngo̧ a ngò̧ nê bà mě nkɨ̀Ꞌɨ̂, ka Satàn kèlè awa.

¹⁹ Ane nkûŋ, wu bɨ̀a ka bɨ ghɨ̂ ba bɔ ntɨ̀ nè mèngùꞋte mè mbɔ̀ lə bàa me ghàꞋtè àwa a mbì Yesò Lefɨ̀Ꞌ ane àlia tàa kɨꞋɨ la.

²⁰ Bɨ wu àghàꞋtè àya, mè ngu mèngùꞋte ma.