1 Pità 3 - Mundani

Bèzi nè bèlu̧ bɔb

¹ Bɨ̀a wu bɨ̀ wu bèzi nè bèlu̧ la, bɨ̀ me zə bèlu̧ bɨ̧. Bɨ̀ me ghɨ̀ ale, mbɨ̀Ꞌɨ̀ wòt wu ane yɔb kà bɨ̧ɨ̧ne èngǎ̧ Mbɔ̧ɔ̧mà, tà ye mènəè ntsɔ̧̀ mu bɨ̀a ngɨ̀à la ndzì èntɨ̧ɨ̧ vi ane Mbɔ̧ɔ̧mà. Bɨ bakà lem mbɔ̌ ndɨ bɨ̀a làꞋa èngà̧ ka wòt naa kubte la.

² Bɔɔ ye ndɨ mènəè mɨ̧ nàa mbɔ̀, bɨ mè me zə bèlu̧ bɨ̧ la, ekubte.

³ Bɨ̀ ka ndzì èntɨ̧ɨ̧ wɨ̧ ane kèbɔ̂ŋ fu bòt àa ndzea, è wû màneeta ètsə, nè mànkwaãaã èghɨ ngwȩ̀, nè ndìte tèa ntsòa èkab la.

⁴ Bɨ̀ tsiꞋ è wu mèntɨ̧ɨ̧ mɨ̧ ka nàa ndâ nyɨ̀Ꞌta nê bɨa mbɔ̀ la. Bɨ̀ me bɔɔle ènyit, mè njùa ane mènəè mɨ̧. Eyaa wu kèbɔ̂ŋ fu kèa ka lɔ̀Ꞌ mbɨ mè me bɔ̌ a Mbɔ̧ɔ̧mà la.

⁵ Eyaa wu ndɨ bèzi bu àfɨꞋa mbì bɔ li ngu bòt Mbɔ̧ɔ̧mà, nɔ̀ŋè ntɨ̀ yɔb ane tò la e li ngua nèètè àwɔb la. Bɔ li ngua dzəa bèlu̧ bɔb

⁶ mbɨ̀Ꞌɨ̀ Sàda li ngua ndzəa Abàlàghâm ntɔ atò ane tǎt lob vi la. Bɨa anè ntsìꞋi bɔ̧ Sàda na bɨ me ghɨ̀ mènəè ntsɔ̧̀ kà wua mbɔ̀ɔ àghɨa ko la.

⁷ Bɨ̀a mbâ̧tsə, bɨ̀ me tseke ntsɔ̧̀ nè bèzi bɨ̧ mɨ̧̂. Bɨ̀ me mbaãaã wɔb ntsɔ̧̀, nɨa wɔb mbɨ̀Ꞌɨ̀ bòt bɔ̀ɔ njùa la. Bɨ̀ me baãaã wɔb ntsɔ̧̀ ndɨ̀ wu Mbɔ̧ɔ̧mà nyɨꞋte a ntsɔ̧̀ vi ane yɨ̧ bɨ̀agème mbɨ̀Ꞌɨ̀ eŋa awɨ̧ mèmpème kàlìà la. Bɨ̀ ghɨ̀ ale mbɨ̀Ꞌɨ̀ bɨ̀ me tsàꞋte a Mbɔ̧ɔ̧mà, àghɨa ko à ka nket nê tà ka ndzə.

Màndzea ngoꞋ nkàà a ntsɔ̧̀

⁸ Enɨ lìà àyaa nè ànəê, tsiꞋ è shu abua yɨ̧ bɨ̀agème nê, bɨ̀ wu ane ètsəê wemɔꞋ, me ku tèsȩte bɔnyɨ bɨ̧, mè nkɔ̀ŋkà wɔb. Bɨ̀ me yu ane mènəè mɨ̧, mè mbɔ̌ èntɨ̧ɨ̧ ntsɔ̧̀ ane bòt.

⁹ Wòt ghɨa kàbɔ̀ŋ ane yê, à ka mvəèəè ane kàbɔ̀ŋ. Wòt tsɔ̧̀ɔ̧̀ àwê, à ka mvəèəè ane kèntsɔ̧̀ɔ̧̀mè. Ka wòt ghɨ̀ ànəa kàbɔ̀ŋ ane yê, à tsàꞋtè nê Mbɔ̧ɔ̧mà nyɨ̀Ꞌte a ntsɔ̧̀ vi abua tò. Bɨ̀ ko nê, Mbɔ̧ɔ̧mà li ngua ntɔ awɨ̧ mbɨ̀Ꞌɨ̀ e ghɨ̌ bɨa zə a ntsɔ̧̀.

¹⁰ Aà mbɨ̀Ꞌɨ̀ Àkata Mbɔ̧ɔ̧mà a shu la, nê, “Wòt tàa nkɨà nê ye wu etseke ntsɔ̧̀ e mèe bɔ èli ntsɔ̧̀ la, ka tsi ndàꞋà mènəè kàbɔ̀ŋ, tà ka tsi ndàꞋà mèfà̧ mɨ̧̂.

¹¹ Ŋut wu bɔ ndɨ tàa lùùla kàbɔ̀ŋ etsiꞋi me ghɨa ntsɔ̧̀ la; tà me kɨ àlàŋkè mè ngɨ̀à ayùà.

¹² Aa ale nkàà nê Mbɔ̧ɔ̧mà nàà ndzea bòt bu bɔ tɨ̧ɨ̧ ndɨŋndɨ̀ŋ a mbì li la, mè ndzəa ànəa bɔ̀ɔ ntsàꞋta atò shua la. Ka è wu bòt bu bɔ̀ɔ ngɨa kàbɔ̀ŋ la, Mbɔ̧ɔ̧mà kà wu nè nɔ̀b.”

¹³ Wòt me kɨ lâ e ghɨ a ntsɔ̧̀, ko wòt wu tàa zi àlɔꞋ ane tò la wu wàà?

¹⁴ Ka wòt màà me ye ngoꞋ nkàà ndɨ tàa ngɨa àghɨa Mbɔ̧ɔ̧mà nàa nkɨà la, tà nɨ̀ àvi mbɨ̀Ꞌɨ̀ wòt èsi ntsɔ̧̀. Bɨ̀ ka me bɔɔ bòt, mèntɨ̧ɨ̧ mɨ̧ ka me bente.

¹⁵ Ka bɨ tsiꞋ mèntɨ̧ɨ̧ mɨ̧ me kweele ane Yesò Klistò, bɨ̀ mě me ŋa kènuke abua tò mbɨ̀Ꞌɨ̀ Tǎt wɨ̧. Bɨ̀ taŋke awɨ̧ ane ndɨ wòt bììte awɨ̧ ànəa ntɨ̀ yu bɨ bɔ ane Yesò la, ka wuê a ka àfɨ̀Ꞌà leꞋ, bɨ̀ ka bu ànəê eshu la. Ka bɨ̀ me làꞋa bɨ nyaꞋà mbɔ̀ɔ̀le awɨ̧ me làꞋa bò̧ bò̧.

¹⁶ Bɨ̀ ka ngɨ̀ àghɨa èntɨ̧ɨ̧ wɨ̧ àa fèèlè awɨ̧ la, mbɨ̀Ꞌɨ̀ wòt tsɔ̧̀ awɨ̧ nkàà mènəè ntsɔ̧̀ mu bɨa ngɨ̀à mbɨ̀Ꞌɨ̀ bòt Yesò Klistò la, ŋut bɔ wuê àtsəa kɔꞋɔ.

¹⁷ Aa mbɔ̀ nê, wòt ye ngoꞋ nkaa ntsɔ̧̀ tà ghɨ̀ la, na a wu mbɨ̀Ꞌɨ̀ Mbɔ̧ɔ̧mà nàa nkɨà la, tè ntsè ndɨ wòt nàa ye ngoꞋ nkaa kàbɔ̀ŋ tà ghɨ̀ la.

¹⁸ Aa ale nkàà nê, Yesò Klistò wu tà li ngu wòt ntsɔ̧̀ la li mpfə ambo mènəè kàbɔ̀ŋ bòt. Tà li mbê mpfə anè ngò̧ yemɔ̀Ꞌ a kùꞋ ale, mbɨ̀Ꞌɨ̀ enɨ awɨ̧ enɨ kɨꞋɨ abua Mbɔ̧ɔ̧mà. Bɔ li mbuŋe atò nè mbɨ̧̀ ènyit yu è wû eye wɔ̀bȩ̂ la, tà yu̧u̧me ane Fo Mbɔ̧ɔ̧mà.

¹⁹ Mbɨ̀Ꞌɨ̀ tà yu̧u̧me la, tà ghà ndaꞋa abua èlɨ̀ŋkè bòt e li ngu a tèfȩ la.

²⁰ Èlɨ̀ŋkè baa wu èlɨ̀ŋkè bòt bu bɔ li bɔ̀ ka yute ànəa Mbɔ̧ɔ̧mà li shu àfɨꞋa Noà la. Mbɔ̧ɔ̧mà li ndâ ngua nchɨ̀Ꞌà wɔb bɔɔ kubte ane mènəè kàbɔ̀ŋ mɔb, tè ngà ndzəa àfɨꞋa Noà li mpàa ngɨ̀ ànkànuꞋ yu la. A li ngà me lìa è wu ndàꞋ bòt bafà̧aã bɔ li nyi a èbem ànkànuꞋ yu mèleb ŋeꞋe awɔb ngɨ̀ bɔ pem la.

²¹ Mèleb mu è li ŋèꞋe ànkànuꞋ yu la wu mbɨ̀Ꞌɨ̀, bɔ̀ɔ ngɨ̀ bɔ̀ zì àwa a èdzî àfɨ̀Ꞌ yaa, a nyɨꞋte nê bàà pem, mbɨ̀Ꞌɨ̀ Yesò Klistò li mpfə mè njù̧ù̧me la. Nàà kà tsi mèkɔb a mbɨ̧̀ ènyit wòt, mbɔ̂ me lo̧o̧ èntɨ̧ɨ̧ kà wua fèèlà wòt abua Mbɔ̧ɔ̧mà. Nàà ngɨ̀à ba pema ndɨ̀ wu Yesò Klistò li mpfə mè njù̧ù̧me la.

²² Yesò ghǎ a ègwet, tè ngu àbâ àbualu̧ a Mbɔ̧ɔ̧mà tà tseke la, nè bɔntu̧ Mbɔ̧ɔ̧mà nè ghàa ghàa a ègwet a bɔ àtɔŋ nè mètàŋ la a wu a èten tò.