1 Pità 2 - Mundani

Èti yu̧ Mbɔ̧ɔ̧mà

¹ Mbɨ̀Ꞌɨ̀ àa nè la, bɨ̀ waꞋa mènəè kàbɔ̀ŋ ègème bɨ̀a ngɨ̀à la. Bɨ̀ ka tsi ndàꞋ mèfà̧; bɨ̀ ka me ghɨ̀ mènəè nɨa mvəèəèlà àghɨ a bòt; bɨ̀ ka tsi ngòꞋnè bòt; bɨ̀ ka tsi me làꞋa ntsò̧ò̧tà bòt mɨ̧̂.

² Bɨ̀ la me nkɨ ngule èghɨjɨ bu Fo Mbɔ̧ɔ̧mà nàà ŋǎ la, wuê mbɨ̀Ꞌɨ̀ bɔkefi àa ngɨ̀ bɔ me kɨ èbɨ̧ bènyɨ̌ bɔb la, mbɨ̀Ꞌɨ̀ me tsə ane mèmpème mu Mbɔ̧ɔ̧mà ŋa abua yɨ̧ la.

³ Eyaa wu àghɨa bɨ bɔ ndɨ̀ bɨ̀a me kɨ la, ndɨ̀ wu bɨ yute tê ndzě ndɨ Yesò Klistò nàa nkɔ̀ŋkà àwɨ̧ la.

⁴ Bɨ̀ kɨꞋɨ abua tò. Tà wu èti lu bòt e li ngwaꞋ, Mbɔ̧ɔ̧mà bɔ̂ ndàà lùà nɨ ane ele ntsɔ̧̀ la. Ale, tà wu èti è wu ele yu̧ la.

⁵ Bɨ̀a anè ntsìꞋi àti a yu̧ mɨ̧̂. È wu ale, bɨ̀ səèꞋtè àwɨ̧ ngà mbɨ̧̀ tò tà nɨ awɨ̧ mvəèəè lob Mbɔ̧ɔ̧mà, è wu ye Fo tò yu ane yɨ̧ la. À wu ale mbɨ̀Ꞌɨ̀ bɨa me fàꞋa a èbèm mbɨ̀Ꞌɨ̀ bèntsìà mèpɨ̧̀ èntɨ̧ɨ̧ kèfə, e me tsì mèpɨ̧̀ Fo Mbɔ̧ɔ̧mà, è kùꞋu a mbì tò nkàà àghɨa Yesò Klistò è ghɨ̀ la.

⁶ A bê ngu wuê mbɨ̀Ꞌɨ̀ Mbɔ̧ɔ̧mà shu a èbem Àkatè zi la nê: “Bɨ̀ ye; E ngua nɔ̀ŋà èti a Zayɔ̀n è wù èti àa tɔ̀ke tɔ̀Ꞌɔ̀ lob la. Mmɔ̌ ka mâ làa lùà, e bɔ̂ ntaꞋa wua mbɔ̀ la. Wòt zì èntɨ̧ɨ̧ vi ane wòt waa mâ làà la ŋut li tà kà bɔ àtsəa kɔꞋɔ.”

⁷ Tà wu ngule wòt abua yɨ̧ wu bɨ zi èntɨ̧ɨ̧ wɨ̧ ane tò la. È me wu bòt bu bɔ̀ baka zi èntɨ̧ɨ̧ wɔb ane tò la ko Àkata Mbɔ̧ɔ̧mà a làꞋa ànəa yɔb nê, “Èti lu bèmbɔ̧ɔ̧ lob e li ngwaꞋ la, e tsiꞋi ngule èti tɔ̀Ꞌà lob.”

⁸ Mè nê, “Eyaa wu èti lu àa ghɨ̌ bòt aa sèmne la, mè ngu èwu lu àa ghɨ̌ bɔɔ sèmne ekwene la.” Bòt bu bɔ tu̧u̧ ebɨ̧ɨ̧ne èngǎ̧ Mbɔ̧ɔ̧mà la, àa sèmnà nkwèna a èlɨ̀ waa. A bê ngu wuê mbɨ̀Ꞌɨ̀ Mbɔ̧ɔ̧mà li nê aa li ewu ane èwuu bòt mbɔŋ la.

⁹ Ka bɨ wu bòt Mbɔ̧ɔ̧mà làà la, mè ngu bɔɔntɔꞋ Mbɔ̧ɔ̧mà bɔ̀ɔ ngɨ̀à mènəè tò la. Bɨ wu ngule àlaꞋ a Mbɔ̧ɔ̧mà, ale bɨ wu bòt Mbɔ̧ɔ̧mà. Tà tsì àwɨ̧ a èbem ndzěm nɨŋ nkɨ̀Ꞌɨ̂ a èbem èkaꞋà vi wu e ghe la, mbɨ̀Ꞌɨ̀ bɨa me làꞋà ànəa èghɨ bu ègème tàa ngɨ̀à, è wù èghɨ e ghe la.

¹⁰ È li ngu àfɨ̀Ꞌ àko bɨ̀ ka wu bòt Mbɔ̧ɔ̧mà, ka nè àfɨ̀Ꞌ yaa bɨ̀ tsiꞋi bòt tò. È li ngu àfɨ̀Ꞌ àko Mbɔ̧ɔ̧mà kà wua nkua tèsȩ tɨ̧, ka nè àfɨ̀Ꞌ yaa tà ku tèsȩ tɨ̧.

ÈbùꞋ Mbɔ̧ɔ̧mà

¹¹ Bèshu̧ bɔ̧, bɨ̀ wu bègɨ̧̀ mè ngu bòt ntsèa ntsě a ngɔ̀ŋ ŋaa la, è wu ale e me shu̧u̧te awɨ̧ nê bɨ̀ ka tsi ngɨ̀ èghɨ mbɨ̧te ènyit tɨ̧ tèa nkɨà la. Èghɨ mbɔŋ wu èghɨ bu àa nùà mèntɨ̧ɨ̧ mɨ̧ la.

¹² Bɨ̀ wu bòt mènəè ntsɔ̧̀ ayɔɔ bòt bu kà ko a Mbɔ̧ɔ̧mà la, mbɨ̀Ꞌɨ̀ bɔ̀ me shu nê bɨ wu bòt kàbɔ̀ŋ, bɔ ye mènəè ntsɔ̧̀ mu bɨ̀a ngɨ̀à la, ngùꞋtè a Mbɔ̧ɔ̧mà ane àli yu tàa li esaꞋa ngɔ̀ŋ la.

¹³ Bɨ̀ ghǎ ambo Mbɔ̧ɔ̧mà me zə bòt bu bɔ zì àwɔb bɔ me baãaã àlaꞋ la. Bɨ̀ me zə a empelɔ̀ wu tàa mbà̧aã àlaꞋ mè ngu àtsə àlaꞋ la.

¹⁴ Bɨ̀ mèe me zə bèkěm bu Fɔ̧̀ nɨ̧ wu tsaà nê bɔ̀ me ghɔɔ bòt bɔ̀ɔ ngɨ̀à èbɨꞋte ènəê, ngùꞋtà bòt bɔ̀ɔ ngɨa ntsɔ̧̀ la.

¹⁵ Àghɨa Mbɔ̧ɔ̧mà nàa nkɨà la wu nê bɨ̀ nɨ mènəè ntsɔ̧̀ mu bɨ̀a ngɨ̀a la nɨŋ ndììme mètsəê èkèghɨ̧̀ bòt bu kà ko ànəê la.

¹⁶ Bɨ̀ me tseke mbɨꞋɨ̀ bòt Yesò yàà àwɔb la, ka bɨ̀ ka nɨ̀ àyea ngaa mbɨ̀Ꞌɨ̀ alu̧ a màngɨa kàbɔ̀ŋ. Bɨ̀ tsiꞋi ŋa awɨ̧ abua Mbɔ̧ɔ̧mà mbɨ̀Ꞌɨ̀ èbùꞋ tò.

¹⁷ Bɨ̀ me kukte a waa waa mè nkɔ̀ŋkà bɔnyɨ bɨ̧ bu bɔ̀ wu bòt Yesò la. Bɨ̀ me mbɔ̀a Mbɔ̧ɔ̧mà mɨ̧̂, ndɔ̀Ꞌ nkùkta Fɔ̧̀ nɨ̧.

Mànkia ngoꞋ mbɨ̀Ꞌɨ̀ Yesò

¹⁸ Bɨ̀a wu bɨ̀ wu bɔfàꞋ la, bɨ̀ me zə bètǎt àfàꞋ bɨ̧ mè nèètà mbɔ̀a wɔb. Wòt ka me zə wuê wòt wu tàa ngɨa ntsɔ̧̀ mè njùa ane mènəè mi la. Tà me zəa fɔ̀ɔ̀la wòt tàa ntsòòta la.

¹⁹ Aa ale nkàà nê Mbɔ̧ɔ̧mà naa lɔ̀ɔ̀le bòt bu bɔ ghǎ ambo ndɨ bɔ̀ɔ nkɨ e ghɨ̀ àghɨa tàa nkɨà la, ndzě ngoꞋ kà wu yɔb la.

²⁰ Bɨ wu anè ngɨ̀ ànəa kàbɔ̀ŋ bɔ shu̧u̧ awɨ̧ bɨ me kìi, ko àbȩ̀ yɨ̧ wu ghàà? Ka bɨ yea ngoꞋ nkàà ànəa ntsɔ̧̀ bɨ ghɨ̀ la, ko Mbɔ̧ɔ̧mà naa lɔ̀ɔ̀lè àwɨ̧ ane ayùà.

²¹ Mbɔ̧ɔ̧mà li ntɔ awɨ̧ nê mènəè maa ye awɨ̧, mbɨ̀Ꞌɨ̀ è li ndzea Yesò Klistò la. Tòà zìambɔŋ li ndzě ngoꞋ ane yɨ̧ nɨŋ nyɨ̀Ꞌte nê bɨ̀ me ghɨ̀ mbɨꞋɨ̀ ye li ngɨ̀ la.

²² Tà li tà kà ghɨa kàbɔ̀ŋ, èngǎ̧ fɨte è ka li mè dzəa ètsəê tò.

²³ Bɔ li bɔ ghɨ̀ bɔ̀ tsò̧ò̧te atò, tà kà vəə ane kèntsɔ̧̀ɔ̧̀mè. Bɔ̀ me ghɨ̧̀ɨ̧̀ne atò tà kà kaà wòt. Mbɔ̂ tà li nɔ̀ŋè ntɨ̀ zi wuê ane Mbɔ̧ɔ̧mà wu tàa saꞋa ànəa wòt wuê mbɨ̀Ꞌɨ̀ àa la.

²⁴ Yesò Klistò zìambɔŋ li ŋèꞋe a kàbɔ̀ŋ wa àtsəa zi nɨŋ nga a mbɨ̧̀ mbasa mbɨ̀Ꞌɨ̀ e ghɨ̌ kàbɔ̀ŋ naa bakà tsi mbɔ̀ mètàŋ a ègwet la, baa me tseke mbɨꞋɨ̀ Mbɔ̧ɔ̧mà nàa nkɨà la. Tèfɨŋ tu tà li mbɔŋ la te ghɨ̂ bɨ pem.

²⁵ Bɨ li ndzaãaã ngua ndèma mbɨ̀Ꞌɨ̀ njɨ̀te tèa ngà tèbaꞋ tèbaꞋ la, ka nè àfɨ̀Ꞌ yaa bɨ kua akwèn tè nkɨ̀Ꞌɨ̂ abua mbaabà njɨ̀ wu è wu wòt tàa mbààba awɨ̧ la.