1 Pità 1 - Mundani

¹ Letà Pità, wantu̧ Yesò Klistò, Abua bòt Mbɔ̧ɔ̧mà bu bɔ taa awɔb bɔ sàbtè ntsìꞋa ntsèkâ mbɨ̀Ꞌɨ̀ bègɨ̧̀ a Pontùs, nè Gàlashìà, nè Kàpàdosìà bɔ̂ Esìà nè Bìtinìà la.

² Tǎt wa Mbɔ̧ɔ̧mà li ndàà wɨ̧ ane mènkɔ̀ŋke mi, nɨ Fo zi ngɨ̀ bɨ tsiꞋi mbɨ̀Ꞌɨ̀ tò, mbɨ̀Ꞌɨ̀ bɨa me zəa Yesò Klistò, àlo̧ atò aa mèe shùù àwɨ̧. Maà shù̧ù̧ta nè Mbɔ̧ɔ̧mà me nyɨꞋta ntsɔ̧̀ vi abua yɨ̧ mè ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

Ntɨ̀ kà wu li yu

³ Bà wùꞋte a Mbɔ̧ɔ̧mà, Tǎt Yesò Klistò Lefɨ̀Ꞌ wa. Tà li nkù tèsȩ ta nyaŋ ale, mbi àwa a membǐ fi, ndɨ̀ wu tà li ngɨ̀ Yesò yù̧ù̧me ndzə a èbem èsî la. À yaa a ghɨ̂ ba bɔ ngule ntɨ̀ kà wu li eyu.

⁴ Mbɨ̀Ꞌɨ̀ àa ale la, ba tsiꞋa anè nchɨ̀Ꞌà èghɨ bu Mbɔ̧ɔ̧mà nɔ̀ŋe a ègwet abua bòt bi la. BetsiꞋa èghɨ mbɔŋ è ka bɨ, àghɨ à ka wuê etsòke, è ka meè ngu efəa.

⁵ Èghɨ mbɔŋ e wu abua yɨ̧ wu bɨ̀ zì mèntɨ̧ɨ̧ mɨ̧ ane Yesò Klistò la. Mbɔ̧ɔ̧mà nɨ̀ mètàŋ mi nkàbte awɨ̧ me chɨ̀Ꞌɨ̀ àli yu ngɔ̀ŋ nàa li elìà la. Taa li eŋa wɨ̧ mèmpème màa tà taŋke la.

⁶ Ànəa ngoꞋ tu bɨ̀a ndzea àfɨ̀Ꞌ yaa la a màà ngu me saa wɨ̧ ane àtem àfɨ̀Ꞌ àko, bɨ̀ me wùꞋtè wuê awɨ̧.

⁷ NgoꞋte mbɔŋ te ye awɨ̧ anè, mbɨ̀Ꞌɨ̀ bɔɔ ye nê bɨ zì mèntɨ̧ɨ̧ mɨ̧ ane Yesò nkûŋ nkûŋ. Ka è màà ngu wuê goêl wu è wù àghɨa betsiꞋa a bɨ la, ko bɔ̀ɔ ngɨ̀ bɔ to̧ a èbem èwet, ngɨ̀ mèkɔb mu adù̧ la dzəè. Mèntɨ̧ɨ̧ mɨ̧ mu bɨ zi ane Yesò la, è taꞋa tsèa goêl. Ale, ngoꞋtsə te bɔ ndɨ tèa nyìꞋì àwɨ̧ mbɨ̀Ꞌɨ̀ bɨa paa ezì mèntɨ̧ɨ̧ mɨ̧ ane Yesò la. A wu ale, ko Mbɔ̧ɔ̧mà naa li ewùꞋtè àwɨ̧, e mèe lɔ̀kè èlen lɨ̧ a ègwet ane àli yu Yesò Klistò nàa li kɨꞋɨ la.

⁸ Bɨ bakà ye atò, mbɔ̂ me kɔ̀ŋkè atò, mè ndzì mèntɨ̧ɨ̧ mɨ̧ ane tò kà ye atò. Mèntɨ̧ɨ̧ mɨ̧ è lu̧u̧ àfɨ̀Ꞌ yaa nè mèngùꞋte è ghe tê fɨ̀Ꞌ kà wu la,

⁹ nkàà nê bɨ ko nê mbɨ̀Ꞌɨ̀ bɨ zì mèntɨ̧ɨ̧ mɨ̧ ane Yesò Klistò la, Mbɔ̧ɔ̧mà nàà ŋǎ wɨ̧ mèmpème.

¹⁰ BèndàꞋàtɔŋ Mbɔ̧ɔ̧mà be li ndàꞋà ànəa èlɔ̂t waa Mbɔ̧ɔ̧mà nàa li eŋa abua yɨ̧ la. Bɔ li ndâ ntùŋnê nkɨ ndɨ ànəa mèmpème màa àa la.

¹¹ Fo Yesò Klistò li ngu ane yɔb, nyɨ̀Ꞌte awɔb ndɨ Yesò nàa li kɨꞋɨ eye ngoꞋ naa ghǎ me lìa Mbɔ̧ɔ̧mà naa ghɨ̌ taa bɔ ènɨ̧ la. Ale, bɔ me nyɔ̀Ꞌta nkɨ eko àfɨꞋa èghɨ bàa àa ghɨ̀ la, mè nè ndɨ àa li ghɨ̀ la.

¹² Ale, Mbɔ̧ɔ̧mà nyɨ̀Ꞌte awɔb nê àfàꞋa yɔb a li à ka wuê ane ntsɔ̧̀ wɔb, ka a li ngu ane ntsɔ̧̀ wɨ̧. Èghɨ mbɔŋ wu èghɨ bàa bɨ zə àfɨ̀Ꞌ yaa a ètsəê bòt bu bɔ̀ kɨꞋɨ̀ ntsɔ̀tè Ntu̧ Ntsɔ̧̀ Yesò Klistò abua yɨ̧ la. Bɔ li ngua ndàꞋà ane mètàŋ Fo Kèfə yu è dzə a ègwet la. Èghɨ bàa wu èghɨ ka wuê bɔntu̧ Mbɔ̧ɔ̧mà àa ndâ ndɨ̀à nkɨ eko ndɨ àa la.

Màngɨa àghɨa Mbɔ̧ɔ̧mà nàa nkɨà la

¹³ Mbɨ̀Ꞌɨ̀ àa nè la, bɨ̀ taŋke awɨ̧ ntsɔ̧̀ ndɨ betsiꞋa bɨ ko ngɨ̀ àghɨ la, me baabe ènyit yɨ̧, mè nɔ̀ŋè ntɨ̀ yɨ̧ ègème ane mèmpème mu bɨ̀a bɔ ane àli yu Yesò Klistò nàa kɨꞋɨ la.

¹⁴ Bɨ̀ me zə wuê a Mbɔ̧ɔ̧mà mbɨ̀Ꞌɨ̀ bɔ̧ tò, bɨ̀ ka tsi ngɨ̀ mènəè kàbɔ̀ŋ mu mèntɨ̧ɨ̧ mɨ̧ li ndzaã ngua nùà nkɨà àfɨꞋa kà bɨ ko a Mbɔ̧ɔ̧mà la.

¹⁵ Bɨ̀ tɨ̧ɨ̧ wuê ndɨŋndɨ̀ŋ ane mènəè ègème bɨ̀a ngɨ̀à la, mbɨ̀Ꞌɨ̀ Mbɔ̧ɔ̧mà wu tà nɨ awɨ̧ ane bòt bi la nàa ndɨŋndɨ̀ŋ la.

¹⁶ Tà shu a èbem Àkatè zi nê, “Bɨ̀ tɨ̧ɨ̧ ndɨŋndɨ̀ŋ, nkàà nè mmɔ̌ mbɔŋ maà ndɨŋndɨ̀ŋ.”

¹⁷ Ndɨ̀ wu bɨ̀a ntɔa Mbɔ̧ɔ̧mà ane Tǎt wɨ̧ la, e wu tàa saꞋa wòt ègème kà lȩ mèsi mbɨ̀Ꞌɨ̀ mènəè tò nyɨꞋte la, bɨ̀ me ŋa kènuke abua tò, ndzəa tò ane mèntsèke mɨ̧ adzìꞋ yaa mbɨ̀Ꞌɨ̀ bègɨ̧̀.

¹⁸ Bɨ ko àghɨa Mbɔ̧ɔ̧mà li ŋa nɨŋ nchùꞋù àtsəa yɨ̧ ngɨ̀ bɨ peme ane èbɨꞋte ènəê bu bètǎt nyaꞋ bɨ̧ e li sa abua yɨ̧ la. È li è kà wu àghɨa ko mbɨ̀Ꞌɨ̀ silbà kò goêl leꞋ, betsiꞋa a bɨ la.

¹⁹ È li ngu àlo̧ a Yesò Klistò yu a tse àghɨ àgème la. Ale, Yesò wu mbɨ̀Ꞌɨ̀ wanjɨ̀ kà ye àlɔꞋ bɔ li nkɨ̧̀ɨ̧̀me àtsəa bòt la.

²⁰ Mbɔ̧ɔ̧mà li me laꞋnê yea ngɨ̀à ngɔ̀ŋ, ndaa Yesò mbɨ̀Ꞌɨ̀ wòt tàa li kɨꞋɨ e ghɨ̌ bɨa bɔ mèmpème la. Tà li ngua nkɨ̀Ꞌa mbɨ̀Ꞌɨ̀ e ghɨ̌ bɨa bɔ mèmpème àfɨ̀Ꞌ yaa ngɔ̀ŋ tsiꞋa ndìà lìa la.

²¹ Yesò ghɨ̂ bɨ zì èntɨ̧ɨ̧ wɨ̧ ane Mbɔ̧ɔ̧mà wu tà li njù̧ù̧me atò àfɨꞋa tà pfə la, ngɨ̀ tà bɔ̀ ènɨ̧ vi la. Eyaa wu àghɨa a ghɨ̂ ka bɨ zì mèntɨ̧ɨ̧ mɨ̧ ane Mbɔ̧ɔ̧mà, mè nɔ̀ŋè ntɨ̀ yɨ̧ ane tò la.

²² Àfɨ̀Ꞌ yaa bɨ tsiꞋa ngɨ̀à mbɨ̀Ꞌɨ̀ nkûŋ yu è dzə abua Mbɔ̧ɔ̧mà la nàa shua la, bɨ bɔ mèntɨ̧ɨ̧ kèfə tè ntsìꞋa ndâ nkɔ̀ŋkà bɔnyɨ bɨ̧ bòt Mbɔ̧ɔ̧mà. È wu ale, bɨ̀ me kɔ̀ŋkè bɔnyɨ bɨ̧ nɨa ngà nè mbì nè èntɨ̧ɨ̧ wɨ̧ ègème.

²³ Èngǎ̧ Mbɔ̧ɔ̧mà wu àa ŋǎ mèmpème, mè ngu ane àlia nè àlia la, e ghɨ̂ bɔ bi awɨ̧ a membǐ fi. Bɨa nè ntsìꞋi bɔ̧ Mbɔ̧ɔ̧mà wu tà wu ane àlia nè àlia kà wu epfə la.

²⁴ Aa ale mbɨ̀Ꞌɨ̀ Àkata Mbɔ̧ɔ̧mà a shu la, nê, “Bòt bàgème aa mbɨ̀Ꞌɨ̀ mèfəèꞋ, ènɨ̧ wɔb e wu mbɨ̀Ꞌɨ̀ ètesɔɔ mèfəèꞋ. MèfəèꞋ mbɔŋ nàa ngɨ̀ è yu̧, ètesɔɔ bu e kwente a si,

²⁵ Ka èngǎ̧ Mbɔ̧ɔ̧mà e bɔ̂ ngu etèꞋa ane àlia nè àlia.” Èngǎ̧ mbɔŋ wu Ntu̧ Ntsɔ̧̀ yu bɔ li ndàꞋ abua yɨ̧ la.