1 Tɔ̀màtià 6 - Mundani

ÈbùꞋ

¹ È me wu bòt bu bɔ wu èbùꞋ la, bɔ bɔ ndɨ bɔ̀ɔ me nèèta ndzəèa bòt bu bɔ bɔ awɔb la, mbɨ̀Ꞌɨ̀ wòt kǒ làꞋà kàbɔ̀ŋ ane èlen Mbɔ̧ɔ̧mà nè mènəè tò mu bàa nyɨ̀Ꞌta la.

² ÈbùꞋ bu bètǎt bɔb è wu bòt Yesò la, è ka ngà a mbɔ ndɨ bɔ̀ tsiꞋi mbɨ̀Ꞌɨ̀ bɔnyɨ bɔb la me ghɨ àtsə àkekweelè abua bèŋût. Bɔ bɔ ndɨ bɔɔ me zə bètǎt bɔb bu tè ntsèà ale la, nkàà nê bòt bɔ̀ɔ njɨ̀a àbȩ̀ àfàꞋ yɔb la wu bòt bu bɔ̂ tò ba e zi èntɨ̧ɨ̧ wɔb ane Yesò me kɔ̀ŋkè awɔb la. À bɔ ndɨ àa nyɨꞋte mènəè maa e kɨɨte bòt bɔɔ me ghɨ la.

NyɨꞋtà nkûŋ nè nyɨꞋtà àfɨte

³ Wòt ègème tàa nyɨ̀Ꞌta mènəè tsǎ, mè ntù̧ ngule mènəè Yesò Klistò Lefɨ̀Ꞌ wa, nè ndɨ bàa nyɨ̀Ꞌta mènəè Mbɔ̧ɔ̧mà ma la,

⁴ ŋut wua ŋèꞋa avi a ègwet, ntanda nê ye ko àghɨ ako ale, ka àghɨ à ka wu àtsə atò. ÀfàꞋ atò a kùꞋu ndɨ tàa me ghɨ̧̀ɨ̧̀na ndzɔ̀ mè nkàànà mèngà̧ la. Àyaa aà ndìꞋa ghòꞋnà, nè àyɔ̀ŋ, bɔ̂ tèntsɔ̧̀ɔ̧̀mètsə, mè ngɨ̀à bòt e mɨ̀ɨ̀tà kàbɔ̀ŋ adù̧ bɔnyɨ bɔb.

⁵ Àyaa aà mè ngɨ̀à bòt bu mèyǐ mɔb nàa ka tsi efàꞋ ntsɔ̧̀, ànəa nkûŋ à ka tsi ngu a èbem lɔb la, e tseka nkàànà wuê mènəè, mɨ̀ɨ̀tà nê e wu wòt Mbɔ̧ɔ̧mà wu alu̧ màmbɔ èkab nè èghɨ ko tsa nyaŋ.

⁶ Ka bòt bu bɔ̀ɔ ndzə wuê a Mbɔ̧ɔ̧mà, mě me yele àghɨa bɔ bɔ la, e lâ mbɔ̀ ngule àbȩ̀.

⁷ Ba li bà ka nɨ àghɨ ako enɨ kɨꞋɨ a ngɔ̀ŋ ŋaa, bà ka wu li me ghǎ enɨ àghɨ ako.

⁸ È wu ale, ba bɔ èghɨjɨ ba nè ndǐ ta, ba ka tsi nkɨ àghɨa tsa.

⁹ Ka, wòt nàa ngɨ̀ tà bela nkɨ̀a èghɨ nyaŋ, tà kwene a èbem àtaã Satàn, ntsìꞋi me kɔ̀ŋkè èkèghɨ̧̀ èghɨ bu àa ntsòkà wòt ndììma tò nènkèm la.

¹⁰ Aa ale nkàà nê, èkɔŋ èkab ka àa nɨ̀a mènəè kàbɔ̀ŋ ègème nkɨ̀Ꞌa sitsǎꞋ ŋàa la. Àtɔŋ bòt ko a kɨ èkab nyaŋ, tè bɔ tu̧ alu̧ Yesò, ngoꞋtsə te ghɨ̀ mèntɨ̧ɨ̧ mɔb lootè.

Nkɨ̀ate Pɔ̂l li ndɨ̀à ŋa abua Tɔ̀màtià la

¹¹ Ka àwɔ̀, wòt Mbɔ̧ɔ̧mà, à ka ndzì àbu ayê ane àghɨ ako ane èghɨ ba mâ tɨ̧ɨ̧ tê ndɔ̀Ꞌ la. NyɔꞋta me ghɨ̀ àghɨa Mbɔ̧ɔ̧mà nàa nkɨà la mè me zə wuê atò, mè ndzìà èntɨ̧ɨ̧ wê wuê ane tò, mè nèètà nkɔ̀ŋkà bɔbȩ ko. Me kuule èntɨ̧ɨ̧ wê mè njùa ane mènəè mê.

¹² Tsì ètɨ̧̂ wê ntsènè è nù èbele Mbɔ̧ɔ̧mà. Ghɨ̌ ndɨ àa bɔ mèmpème kàlìà la, nkàà nê Mbɔ̧ɔ̧mà li ndȩ̀ awê nê kɨꞋɨ mbɔ̀ mùà, àfɨ̀Ꞌ yu à li mbɨ̧̀ɨ̧̀nê a mbì bòt nyaŋ nê ye zǐ èntɨ̧ɨ̧ vi ane Yesò Klistò la.

¹³ E ngu nkɨ e mě shu awê àyaa nè ànəê. E ngua shua a mbì Mbɔ̧ɔ̧mà wu tàa ndzìà fo ane èghɨ ègème la, bɔ̂ Yesò wu tà li ntɨ̧ a mbì Pontìùs Pȩlèt ngàꞋte shu wòt ye wu wùà la.

¹⁴ Mâ shu awê nê, ghɨ àghɨ àgème e shua nê à ghɨa la kà ŋɔꞋte ànəê adù̧. Ko mbɨ̀Ꞌɨ̀ à ghɨ̀ ànəê àko ndɨ bòt àa fèèlè awê la, tè ndɨ Yesò Klistò Lefɨ̀Ꞌ wa nàa li e mě kɨꞋɨ la.

¹⁵ Taa li kɨꞋɨ àfɨꞋa ntsɔ̧̀ yu Mbɔ̧ɔ̧mà è taŋke la. Wu ndàꞋà tòà tà wu àtsəa bɔbȩ bàgème la. Bɔ̀ɔ ngùꞋtà wuê atò. Tà wu Fɔ̧̀ bèfɔ̧̀, mè ngu Tǎt bètàt.

¹⁶ Tà wu ndàꞋà wòt kà wu li epfə, mè me tsèke a kètsìà èkaꞋa vi wu betsiꞋa wòt kà ko ntsě abot la. Wɔ̀bȩ̂ bakà li mè ye atò, wòt kà mè ngu eko eye atò. TsiꞋ bɔbȩ è wùꞋte atò mè ŋeꞋe atò a ègwet tè ndɨ ngɔ̀ŋ naa li ghǎ elìa la. Àmèn.

¹⁷ Shu abua bòt bu bɔ bɔ èghɨ ngɔ̀ŋ baa nyaŋ la nê, bɔ̀ ka me ŋeꞋe awɔb a ègwet, mè ndzìà ntɨ̀ yɔb ane èghɨ ngɔ̀ŋ baa àa li elɔ̀Ꞌɔ ebɨɨ la. Bɔ̀ zǐ ntɨ̀ yɔb wuê ane Mbɔ̧ɔ̧mà wu tà taꞋa wua ŋǎ awa èghɨ ègème nê bà me wùꞋtè ènyit ya adù̧ la.

¹⁸ Shu awɔb nê, bɔ̀ me ghɨ̀ mènəè ntsɔ̧̀, mè me nyɨꞋte ènɨ̧ wɔb ane àfàꞋa ntsɔ̧̀ yu bɔ̀ɔ ngɨ̀à la. Nê, bɔ̀ ka me kuꞋte àbu, bɔ̀ me ghàbtè èghɨ bɔb ŋǎ èbe bòt bu bɔ̀ɔ nkɨ̀ŋkà la.

¹⁹ Bɔ ghɨ̀ anè, bɔ ko nê bɔ wua nɔ̀ŋà èghɨ bɔb adzìꞋa ntsɔ̧̀, mbɨ̀Ꞌɨ̀ wòt ntàŋka mèntsèke ntsɔ̧̀ mi nàa li ewu ane àli ako la. ÀfɨꞋa mbɔŋ àa kɨꞋɨ bɔɔ bɔ ngule mèmpème mbɔŋ.

²⁰ Tɔ̀màtià, baãaã àghɨ yu Mbɔ̧ɔ̧mà è zì a èkibu lê nê me lɨ̀ŋkè la ntsɔ̧̀. Ko mbɨ̀Ꞌɨ̀ à zì ètsəê wê a èbem mèngǎ̧ àku mu kà bɔ ànəê ane mènəè Mbɔ̧ɔ̧mà la. Ko mbɨ̀Ꞌɨ̀ à tseke adzìꞋa bòt àa ngɨ̧̀ɨ̧̀nà nkàànà ànəa àghɨ yu bòt ko àa ntɔ nê wu “Èyì”, kà e wu èyì la.

²¹ Bòt ko e tanda nê bɔ bɔ wùà, tè sà alu̧ Yesò ntsì mèntɨ̧ɨ̧ mɔb ane tò. Maà shù̧ù̧ta nê Mbɔ̧ɔ̧mà è me nyɨꞋte a ntsɔ̧̀ vi abua yɨ̧ bɨ̀agème.