1 Tɔ̀màtià 5 - Mundani

Màmbaãaã bòt Yesò

¹ À ka ŋȩ̂ ndènè wòt. LàꞋa abua tò mbɨ̀Ꞌɨ̀ tǎt wè. Baãaã bɔkèsà mbɨ̀Ꞌɨ̀ bɔnyɨ bè,

² mbà̧aã bèzi juŋ mbɨ̀Ꞌɨ̀ bènyɨ̌ bê, mbà̧à̧ bɔɔ̀zi techɨɨle mbɨ̀Ꞌɨ̀ bɔnyɨ bè, à kà bɔ mèmɨ̀ɨ̀te ko tsa.

Bènempfə

³ Me baãaã bènempfə bu bɔ̀ wu ndâ bènempfə la ntsɔ̧̀.

⁴ Ka nempfə bɔ bɔ̧ bi, kò bɔ̧ bɔ̧ tò e bi la leꞋ, bɔ̧ ngaa e bɨ̀ me tɨŋe bòt bɔb, mbɨ̀Ꞌɨ̀ bòt bɔ̀ɔ nkùŋà a Mbɔ̧ɔ̧mà la e wu me ghɨ̀ la. Bɔ ghɨ èlɨ̀ waa, bɔ ko nê bɔ wua mvəèà èsiꞋ lu bètǎt bɔb nè bètǎt nyaꞋ bɔb è li ndzì a èbem lɔb la. Eyaa wu àghɨa àa mbɔ̀ abua Mbɔ̧ɔ̧mà la.

⁵ Àvi wu tà wu ngule nempfə kà ye wòt tàa tɨŋe atò la, nàa ngɨ̀ tà me zì wuê ntɨ̀ zi ane Mbɔ̧ɔ̧mà, ntsèke ntsàꞋtà àli àgème ndò̧a ètɨŋe abua tò.

⁶ Ka nempfə wu tà zǐ èntɨ̧ɨ̧ vi ane èghɨ ngɔ̀ŋ la, batè mbèle kà pfə, ka mbɔ̂ ntsìꞋi mbɨ̀Ꞌɨ̀ wòt tà pfə te ndɔ̀Ꞌ la.

⁷ Shu abua bòt Yesò nê, bɔ̀ me ghɨ̀ a èlɨ̀ waa mâ shu la, mbɨ̀Ꞌɨ̀ bòt tsa e me làꞋa kàbɔ̀ŋ adù̧ yɔb.

⁸ Wòt bakà wua ndɨ̀ŋkà bòt àndà̧ àzi, tè ngwaꞋ fɔ̀ɔ̀le bòt èbem lob zi, ŋut ko nê ye tu̧ alu̧ Yesò. Tà ghɨ̀ ale, tà ko nê ye bɨɨ te ntsè wòt kà zì èntɨ̧ɨ̧ vi ane Yesò.

⁹ Nempfə bele kà tse èngùꞋ èghem yentùa, à ka shɨ̀ èlen tò ayɔɔ ète bènempfə bu bɔ bɔ ndɨ bɔ̀ɔ me tɨŋe awɔb la. À me shɨ èlen nempfə, à mè ndze nê, tà li me yɔꞋɔ wuê lu̧ wemɔ̀Ꞌ,

¹⁰ mè ngu àvi bòt e neetè nko nê tà lè wua ngɨ̀à mènəè ntsɔ̧̀ la. Shɨ wuê èlen àvi tà li ngùa nèètà ndìà bɔ̧ bi, mè sèà bègɨ̧̀ a lob zi, shùà èka bòt Mbɔ̧ɔ̧mà, ntɨ̀ŋa bòt ngoꞋ, mè ŋǎ èntɨ̧ɨ̧ vi a màngɨa èfàꞋ ntsɔ̧̀ ègème la.

¹¹ Ka à ka shɨ̀ tèlente bènempfə techɨɨle a si, nkàà nê naa wu àfɨꞋa ètsə bɔb e lɔ̀Ꞌtè la bɔ lèènè àghɨa bɔ li nkaꞋa Yesò Klistò la, ntsiꞋi me kɨ bèlu̧ eyɔꞋɔ.

¹² Bɔ ghɨ̀ ale, bɔ wua ngɨ̀à kàbɔ̀ŋ ndɨ̀ wu bɔ bəꞋə mènkàꞋa mbì mu bɔ̀ li nkàꞋ a mbì tò la.

¹³ Lə kǒ kà à wu shɨ tèlen tɔb wu nê, bɔɔ tsiꞋa nkua èlɔŋ, mè me nyi a lob a lob ndzəèà. Ànəa ko a mê mbɨ ntsè la wu nê, bɔɔ tseke tê mbùꞋ me ghɨ̀ mènàŋ, ndzìà mètsəê mɔb ane mènəè kà wu mɔb, mèà ndàꞋà mènəè bɔɔ bɔ̀ ka wu làꞋà la.

¹⁴ Mbɨ̀Ꞌɨ̀ àa ale la, è wu nè mmɔ̌, ko bènempfə bu bɔ̀ bele bɔɔ̀zi techɨɨle la e mě ndzɔ̀Ꞌɔ bèlu̧, mbì bɔ̧ bɔb, mè ntsèke a si me taŋke lob tɔb. Bɔ ghɨ̀ ale, ko bɔmbù̧ ba è ka ye èlu̧ elàꞋa mènəè kàbɔ̀ŋ adù̧ ya a.

¹⁵ Ko nê, bènempfə ko e sà alu̧ Yesò tè ntsìꞋa kùŋe a Satàn.

¹⁶ Ka àvi tà zì èntɨ̧ɨ̧ vi ane Yesò la, è bɔ bènempfə a èbem ləlob zi, tà me lɨ̀ŋke àwɔb. Tà ka mɨ̀ɨ̀tè nê yea zǐ àbòꞋà adù̧ chɔsì, mbɨ̀Ꞌɨ̀ bɔɔ tsiꞋi me tɨŋe wuê ndâ bènempfə.

Bɔɔjuŋ ayɔɔ bòt Yesò

¹⁷ Bɨ̀ me nèèta mbà̧aã bɔɔjuŋ bu bɔ̀ɔ fàꞋà àfaꞋa Yesò la ntsɔ̧̀. È me wu èbu bɔ̀ɔ fàꞋà nyaŋ, ndàꞋà mè nyɨ̀Ꞌta èngǎ̧ Mbɔ̧ɔ̧mà la, bɨ baãaã awɔb ntsɔ̧̀ tè ntsè bòt bàgème.

¹⁸ Àkata Mbɔ̧ɔ̧mà a laꞋnê, “Wòt ka nkùùle ètsəê mpɔ̀ŋ àfɨꞋa tàa mbùꞋa mèku̧ la.” A mèe nê, “Wɔ̀fàꞋ ègème è bɔ ndɨ tàa bɔ àbȩ̀ àfàꞋ àzi la.”

¹⁹ Wòt wemɔ̀Ꞌ è shu ànəê àtsəa wajûŋ kǒ ayɔɔ bòt Yesò, à ka ndzə. TsiꞋ bòt mbɔ̀ŋè babe kò batat leꞋ è shu ànəa ngaa, ka à yùte.

²⁰ È me wu bòt bu bɔ̀ɔ ngɨ̀à mènəè kàbɔ̀ŋ nɨa ngà wuê nè mbì la, à me tsia wɔb a kètsìà bòt ŋȩ̀te awɔb, mbɨ̀Ꞌɨ̀ bòt ko aa ye e bɔɔ.

²¹ Mâ chɨɨme shù̧ù̧te awê a mbì Mbɔ̧ɔ̧mà nè Yesò Klistò nè bɔntu̧ bu tà làà la nê, yute nkɨ̀a tàa e ŋa la ntsɔ̧̀. Me ghɨ̌ àghɨ àgème kà wua ndɨ̀ŋkà mèsi, à ka mè ngɨ̀ ànəê nê ye kɨ efɨte etɨŋe wòt kǒ.

²² Ko mbɨ̀Ꞌɨ̀ à tèmnê, a mànɔŋa èbu bê àtsəa wòt kǒ nê, tà me fàꞋa àfàꞋ ako ayɔɔ bòt Yesò. Ko mbɨ̀Ꞌɨ̀ à zì àbu ayê a èbem mènəè kàbɔ̀ŋ wòt. Tsì awê a èbem mènəè kàbɔ̀ŋ.

²³ Ka tsi nu wuê mèleb mùà mùà. Me nu adzìꞋ mèlùꞋ nkàà èbèm lê lu àa ŋǎ wê ngoꞋ la, nè ndɨ̀ wu àa ntsèka ngɔ̧ɔ̧̀nà la.

²⁴ Bɔɔ ndzàŋà ndzea bèkàbɔ̀ŋ bòt ko àa ngɨ̀à la. Bɔ̀ɔ ngɨ̀ bɔ̀ me laꞋ nê bɔɔ̀ saꞋa bèŋût, bɔ yaŋe ebɨ̀ɨ eye mènəè kàbɔ̀ŋ mɔb. È wu bòt ko, a ghɨ̀ a nyɨꞋtè nê, bɔ̀ saꞋa awɔb, mbàŋè àwɔb ka ndzè mènəè kàbɔ̀ŋ mɔb.

²⁵ Wu wuê a èlɨ mbɔŋ bòt e taꞋa wua ndzàŋà ndzèa mènəè ntsɔ̧̀ wòt la. È màà ngu wuê mènəè ntsɔ̧̀ mu è lò̧ò̧tè la, ko betsiꞋa è kà tseke ka mpùùla ayaã.