Bìoball air-loidhne

1 Jɔ̌n 5 - Mundani

Màndzia èntɨ̧ɨ̧ ane waã Mbɔ̧ɔ̧mà

¹ Waa waa tà bɨ̧ɨ̧nè nê Yesò wu Fɔ̧̀ wu Mbɔ̧ɔ̧mà yɔꞋ ntsà la, wu waã Mbɔ̧ɔ̧mà. Waa waa tàa nkɔ̀ŋkà Tǎt la, nàà nkɔ̀ŋkà Waã tò mɨ̧̂.

² Ba me kɔ̀ŋka Mbɔ̧ɔ̧mà ngɨ̀à àghɨa tà shu la, ba bɔ ndɨ bàa me kɔ̀ŋkè bɔ̧ tò la mɨ̧̂.

³ Àghɨa àa nyɨꞋte nê baa nkɔ̀ŋkà Mbɔ̧ɔ̧mà la wu màngɨa mènəè tà shu la. Mbɔ̂ betsiꞋa mènəè tò ngaa ka tse awa a màngɨa,

⁴ nkàà nê waa waa tà wù Waã Mbɔ̧ɔ̧mà la tà tsě ngɔ̀ŋ yaa. Àghɨa a ghɨ̂ ba tsè ngɔ̀ŋ yaa la wu ndɨ̀ wu ba bɨ̧ɨ̧nè nê Yesò wu Fɔ̧̀ wu Mbɔ̧ɔ̧mà li ndzɔꞋ ntsà la.

⁵ Wòt betsiꞋa tà tsè ngɔ̀ŋ yaa la wu ndàꞋà wòt tà bɨ̧ɨ̧nè nê Yesò wu Waã Mbɔ̧ɔ̧mà la.

Èghɨ àa nyɨ̀Ꞌta nê Yesò wu Waã Mbɔ̧ɔ̧mà la

⁶ Wu Yesò Klistò tà li nkɨ̀Ꞌɨ̂ a ngɔ̀ŋ ŋaa nè mèleb bɔ̂ àlo̧ atò a nchɨ̧̀ɨ̧̀te a si la. Tà li tà kà nɨ wuê ndàꞋ mèleb, àlo̧ atò a li nchɨ̧̀ɨ̧̀te a si mɨ̧̂. Fo Mbɔ̧ɔ̧mà yu nàa ka fɨ̀tê la zìambɔŋ è nyɨꞋtè nê eyaa wu nkûŋ.

⁷ Èghɨ aà betat àa nyɨ̀Ꞌta nkûŋ la:

⁸ Fo Mbɔ̧ɔ̧mà, mèleb nè àlo̧ Yesò yu a le chɨ̧ɨ̧te a si la. Èghɨ baa betat la àa nyɨ̀Ꞌta ànəê yeamɔꞋ.

⁹ Bɔbȩ àa ngɨ̀ bɔ̀ shu ànəa bɔ ye la, ba bɨ̧ɨ̧nè nê wu nkûŋ. È me wu a Mbɔ̧ɔ̧mà ko tàa ngɨ̀ tà shu ànəê, è wu nkûŋ tè ntsè àyea wɔ̀bȩ̂. Eyaa wu ànəa Mbɔ̧ɔ̧mà zìambɔŋ shu ane Waã vi la.

¹⁰ È wu ale, waa waa tà zi èntɨ̧ɨ̧ vi ane Waã Mbɔ̧ɔ̧mà la è bɨ̧ɨ̧ne nê mènəè maa Mbɔ̧ɔ̧mà shu la wu nkûŋ. Waa waa tà baka zi èntɨ̧ɨ̧ vi ane Mbɔ̧ɔ̧mà la wua shua nê Mbɔ̧ɔ̧mà wu wòt mèfà̧, nkàà nê tà bakà bɨ̧ɨ̧ne ànəa Mbɔ̧ɔ̧mà shu ane Waã vi la.

¹¹ Ànəê yaa Mbɔ̧ɔ̧mà shu la wu nê, tà ŋa awa mèmpème kàlìà. Wòt bɨ̧̀ɨ̧̀nâ ane Waã tò, ka tà bɔ̀ mèmpème mbɔŋ.

¹² Waa waa tà zǐ èntɨ̧ɨ̧ vi ane Waã tò wu la ko nê ye bɔ mèmpème, ka wòt kà zi èntɨ̧ɨ̧ vi ane Waã Mbɔ̧ɔ̧mà kà bɔ mèmpème.

Mèngà̧ enɨ lìa

¹³ E shɨa abua yɨ̧ wu bɨ zì mèntɨ̧ɨ̧ mɨ̧ ane Waã Mbɔ̧ɔ̧mà la mbɨ̀Ꞌɨ̀ bɨa ko nê, bɨ bɔ mèmpème kàlìà.

¹⁴ Lə bàa ngàꞋtà àwa a mbì Mbɔ̧ɔ̧mà la wu nê, bàa ndò̧a àghɨ mbɨ̀Ꞌɨ̀ tàa nkɨà la tè tà zə.

¹⁵ Ndɨ̀ wu ba ko nê bàa ngɨ̀ bà lo̧o̧ àghɨ tè tà zə la, ba ko mɨ̧̂ nê àghɨa àgème ba lo̧ abua tò la taa ŋa.

¹⁶ Wòt yea wanyɨ vi ngɨa kàbɔ̀ŋ kà wu ewe betsiꞋa è ghɨ̀ tà pfə la, tà tsaꞋte a Mbɔ̧ɔ̧mà àtsəa tò, ko Mbɔ̧ɔ̧mà naa ŋa atò mèmpème. E shua bòt bu bɔ̀ bakà ghɨ mènəè kàbɔ̀ŋ è wu me betsiꞋa è ghɨ̀ bɔ pfəꞋtè la. Ka mènəè kàbɔ̀ŋ kǒ nàà və betsiꞋa è ghɨ̀ wòt pfə la. E ntsea shua nê bɨ̀ tsaꞋte a Mbɔ̧ɔ̧mà ane èwuu kàbɔ̀ŋ mbɔŋ.

¹⁷ Mènəè kà kùꞋ ègème wu kàbɔ̀ŋ, ka bèkàbɔ̀ŋ ko e bɔ̂ ngu bèa ka ghɨ̀ wòt pfə la.

¹⁸ Ba ko nê waa waa tà tsiꞋi Waã Mbɔ̧ɔ̧mà la nàà kà ghɨa kàbɔ̀ŋ, nkàà nê Waã Mbɔ̧ɔ̧mà zìambɔŋ nàà mbààba ŋut mbɨ̀Ꞌɨ̀ Satàn wòt kàbɔ̀ŋ zì àlɔꞋ ane tò.

¹⁹ Ngɔ̀ŋ yaa è batè ngu a tèkitebu Satàn wòt kàbɔ̀ŋ, ka baa koê nê ba wu bɔ̧ Mbɔ̧ɔ̧mà.

²⁰ Ba meè nko nê, Waã Mbɔ̧ɔ̧mà è kɨꞋɨ̀ ŋà àwa èyì mbɨ̀Ꞌɨ̀ baa ko atò wu, tà wu nkûŋ la. Baa tsiꞋi àghɨ yeamɔꞋ nè Mbɔ̧ɔ̧mà ngua shua nê ba tsiꞋi àghɨ yeamɔꞋ nè Waã tò Yesò Klistò. Yesò lâ ngu Mbɔ̧ɔ̧mà mè ngu wòt tàa ŋǎ awa mèmpème kàlìà la.

²¹ Bɔ̧ bɔ̧, bɨ ko mbɨ̀Ꞌɨ̀ bɨ zì mèntɨ̧ɨ̧ mɨ̧ ane bènambəa.

« Roimhe

Air adhart »

Lean sinn:

Ceanglaichean taic

Sanasan