1 Kɔlìn 7 - Mundani

Mènəè ndzɔꞋɔ

¹ È me wu ànəa àkatè yu bɨ li shɨ abua am la, ko maà shua nê, a bɔ̂ŋ nê mbâ̧ ka mbà̧à̧te àvi.

² Ka enɨ kele mbɨ̀Ꞌɨ̀ bòt e me paꞋte àbɨ̧, mbâ̧ ègème bɔ vi vi, àvi ègème mě mbɔ̀ lu̧ vi.

³ Mbâ̧ ka tù̧u̧ a mànga a èku̧ bɔ̂ vi vi, àvi ka mè ntû̧ a mànga a èku̧ bɔ̂ lu̧ vi.

⁴ À wu ale nkàà nê àvi ntsě àtsəa zi, tà wu abua lu̧ vi, mbâ̧ kà mê ngu àtsəa zi, tà wu abua vi vi.

⁵ Wòt ka tù̧ù̧ èku̧ abua wekǒ kà wu ànəa bɨ làŋkè nê à wu ane kètem àfɨ̀Ꞌ, mbɨ̀Ꞌɨ̀ bɨa nɨ àfɨꞋa mbɔŋ e me tsàꞋte a Mbɔ̧ɔ̧mà la. Bɨ̀ paa bɨ mè me fɔte àdziꞋ mbɨ̀Ꞌɨ̀ Satàn kɨ̀kè àwɨ̧ nkàà ndɨ betsiꞋa bɨ̀ ka koê ntsèke kà fɔte èku̧ la.

⁶ È shua àyaa nê bɨ̀ kwaꞋta, è ntsě mbɨ̧.

⁷ Bòt bàgème e ghɨ̀ ale, ngu mbɨ̀Ꞌɨ̀ mmɔ̌, ko a bɔ̀ŋ am, ka Mbɔ̧ɔ̧mà nàà ŋǎ èghab wòt ègème tsa. Tàà ngɨ̀à wòt kǒ a èlɨ̀ waa, ngɨ̀à è via ane via nè èlɨ̀.

⁸ È me wu bòt kà yɔꞋ nè bènempfə, ko mâ shu nê aà mbɔ̀ bɔɔ tseke ka yɔꞋ mbɨ̀Ꞌɨ̀ mmɔ̌ mbɔŋ.

⁹ Ka bɔ bakà wu ko tseke ale bɔ yɔꞋ. Aà mbɔ̀ a màndzɔꞋɔ tè ntsè ndɨ wòt nàa me tseka nkwàꞋtà ànəa màmpaꞋta àbɨ̧ àfɨ̀Ꞌ àgème la.

¹⁰ È me wu bòt bu bɔ yɔꞋɔ la ko mâ shu nê, àvi ka sà lu̧ vi. È kà shu mmɔ̌, è shua Tè Yesò à.

¹¹ (Ka tà sà lu̧ vi, tà ka tsi ndzɔ̀Ꞌɔ wòt tsa, mbə tà wene a lob lu̧ vi bɔ̂ tò e ghɨ̀ àlàŋkè.) Ko mbɨ̀Ꞌɨ̀ mbâ̧ tù̧ù̧ vi vi mɨ̧̂.

¹² È me wu bòt ko tsa ko mâ shu nê wanyɨ waa kǒ bɔ àvi tà bakà ko a Mbɔ̧ɔ̧mà, àvi wu me kɔ̀ŋkè tseke bɔ̂ tò, tà ka tù̧u̧ atò. Àyaa ntsě ànəa Tè Yesò laꞋnê è shu la.

¹³ Àvi bɔ lu̧ vi kà wu wòt Mbɔ̧ɔ̧mà, lu̧ tò wu me kɔ̀ŋke tseke bɔ̂ tò, tà ka tù̧u̧ atò.

¹⁴ À wu ale nkàà nê, Mbɔ̧ɔ̧mà nɨ mbâ̧ yu kà wu wòt Mbɔ̧ɔ̧mà la mbɨ̀Ꞌɨ̀ wòt vi nkàà vi tò, mè nɨ àvi wu kà wu wòt Mbɔ̧ɔ̧mà la mbɨ̀Ꞌɨ̀ wòt vi nkàà lu̧ tò. A bakà wu ale ko bɔ̧ bɨ̧ è ka wu bòt Mbɔ̧ɔ̧mà a, ka mbɨ̀Ꞌɨ̀ àa la, Mbɔ̧ɔ̧mà nɨ awɔb ane bòt bi.

¹⁵ Ka wòt kà ko a Mbɔ̧ɔ̧mà me kɨ sà ndzɔꞋɔ, tà sàŋ. Ale, àghɨa ko mè nkùùla wanyɨ waa mbâ̧ kò àvi la leꞋ, a te ntsě. Mbɔ̧ɔ̧mà tɔ awa nê bà me tseke ane àlàŋkè.

¹⁶ Àwɔ̀ àvi, à bakà ko laꞋ nê betsiꞋa à ghɨ̀ lu̧ wê zì èntɨ̧ɨ̧ vi ane Mbɔ̧ɔ̧mà mpem? Àwɔ̀ mbâ̧ à kà mê nko laꞋ nê betsiꞋa à ghɨ̀ vi wè zì èntɨ̧ɨ̧ vi ane Mbɔ̧ɔ̧mà mpem?

Bɨ̀ me tseke mbɨ̀Ꞌɨ̀ Mbɔ̧ɔ̧mà li tɔ awɨ̧ la

¹⁷ Mbɨ̀Ꞌɨ̀ àa la, waa waa me ghɨ̀ wuê àghɨa Mbɔ̧ɔ̧mà li ŋǎ abua tò la, mè me tseke wuê mbɨ̀Ꞌɨ̀ tà li ngu ka Mbɔ̧ɔ̧mà naa tɔ atò ane wòt vi la. Eyaa wu àghɨa màa nyɨ̀Ꞌta bèchɔsì a èdzìꞋ ègème la.

¹⁸ È wu nê Mbɔ̧ɔ̧mà me tɔ wòt bɔ naŋe tò tè ndɔ̀Ꞌ, tà ka me nyɔ̀Ꞌta nkɨ tsǐ àlȩê yu àa nyɨ̀Ꞌta nê bɔ naŋe tò la. È wu nê Mbɔ̧ɔ̧mà me tɔ wòt bɔ̀ ka zîꞋ nàŋe atò, tà ka me kɨ nê bɔ̀ naŋe avi.

¹⁹ Kò bɔ naŋe wòt kò bɔ bakà nàŋe leꞋ, ko à yu ntsě ànəa ko. Àyea è wu ànəê la wu mànɔŋe mbɨ̧te Mbɔ̧ɔ̧mà.

²⁰ Waa waa me tseke mbɨꞋɨ̀ Mbɔ̧ɔ̧mà li me tɔ tò tà wuê la.

²¹ È wu nê Mbɔ̧ɔ̧mà li me tɔ awê ane wòt vi ale, à wu àbùꞋ, ànəa mbɔŋ à ka sàa wê. Ka èlu̧ e dzə a si àa baka tsi ngu àbùꞋ la, à wu dzəâ à dzəè.

²² Bɨ̀ ko nê Mbɔ̧ɔ̧mà me tɔ wòt tà wua àbùꞋ, ko Yesò Klistò yaa tò tè sàŋ. We Mbɔ̧ɔ̧mà me tɔ atò tà kà wu àbùꞋ la è tsìꞋi àbùꞋ a Yesò.

²³ Yesò Klistò li njù̧ù̧ àwɨ̧, è wu ale bɨ̀ ka mbɨ̧̀ɨ̧̀ne èbùꞋ abua wòt.

²⁴ Bɔnyɨ bɔ̧, waa waa me tseke ane Mbɔ̧ɔ̧mà mbɨ̀Ꞌɨ̀ Mbɔ̧ɔ̧mà li me tɔ atò tà wuê la.

Ànəa bòt kà yɔꞋ nè bènempfə

²⁵ È me wu ane ànəa bòt kà yɔꞋ, ko ànəa ko Tè Yesò shu am nê è ndaꞋa la a ntsě, ka maa shu ndɨ màa ndzea la, mbɨ̀Ꞌɨ̀ wòt Tè Yesò nɨ tèsȩ ti ngɨ̀ tà kùꞋù è we bòt àa lɨ̀Ꞌɨ̀ àwɔb ane tò la.

²⁶ Mâ mɨɨtè nê wu ànəa ntsɔ̧̀ mbâ̧ naa tseke ka yɔꞋ nkàà ngoꞋ taa àfɨ̀Ꞌ yaa la.

²⁷ È wu nê wòt yɔꞋ, tà ka me kɨ èlu̧ tàa fəè àvi wu la. È wu nê wòt bakà yɔꞋ, tà ka me kɨ èlu̧ tàa yɔꞋɔ la.

²⁸ Ka mbâ̧ kò waàvi leꞋ yɔꞋa, ko è ntsě kàbɔ̀ŋ tà ghɨ̀ la, mbɔ̂ bòt bɔ yɔꞋɔ la aa me bɔ ngoꞋtsə a ngɔ̀ŋ ŋaa, mbɔ̂ è wu nè nà̧ ko bɨ tseke ale mbɨ̀Ꞌɨ̀ baka ye ngoꞋ taa.

²⁹ Bɔnyɨ bɔ̧, ànəa e shua la wu nê, àfɨ̀Ꞌ a tsiꞋa nyɨ̀Ꞌa, è wu ale, e bùꞋu àfɨ̀Ꞌ yaa me ghà ne mbì, bòt bu bɔ bɔ bèzi la è tsiꞋi me tseke mbɨꞋɨ̀ bɔ bakà bɔ bèzi.

³⁰ Bòt bu bɔ̀ɔ ŋȩ̀a ndɨ̀à la è tsiꞋi me tseke mbɨꞋɨ̀ ànəa kàbɔ̀ŋ a ntsě, bòt bɔ̀ɔ ngùꞋtà àwɔb la è tsiꞋi me tseke mbɨꞋɨ̀ bɔɔ kà wuꞋta awɔb, bòt bɔ̀ɔ njù̧a èghɨ la è tsiꞋi me tseke mbɨꞋɨ̀ bɔ bakà bɔ àghɨ.

³¹ Bòt bu bɔ̀ɔ ngɨ̀à mènəè ngɔ̀ŋ la è mě ntsiꞋi me tseke mbɨꞋɨ̀ bɔɔ kà ghɨ mènəè nè ngɔ̀ŋ mbɔŋ. Bɨ̀ ghɨ̀ ale nkàà nê ngɔ̀ŋ yaa nè mènəè mi tsèà tsě.

³² Maà kà kɨ nê bɨ̀ me mɨ̀ɨ̀tè mènəè nyaŋ. Mbâ̧ kà yɔꞋ è wu wòt Mbɔ̧ɔ̧mà la nàa ngɨ̀ tà nɔ̀ŋè èntɨ̧ɨ̧ vi a màngɨa wuê mènəè Tè Yesò, mɨ̀ɨ̀tà wuê ndɨ yèa me ghɨ̀ mènəè nàa mbɔ̀ Tè Yesò la.

³³ Ka mbâ̧ tà yɔꞋɔ la nàa ngɨ̀ tà nɔ̀ŋè èntɨ̧ɨ̧ vi a màngɨa mènəè ngɔ̀ŋ yaa, mɨ̀ɨ̀tà wuê ndɨ yèa me ghɨ̀ mènəè nàa mbɔ̀ vi vi la.

³⁴ Ale, ŋut nàa ngɨ̀ tà tsiꞋi èntɨ̧ɨ̧ tebe. Àvi kà bɔ lu̧, kò waàvi tèchɨɨle leꞋ, nàa ngɨ̀ tà nɔ̀ŋè èntɨ̧ɨ̧ vi a màngɨa wuê mènəè Tè Yesò, mɨ̀ɨ̀tà wuê ndɨ yèa ŋa èntɨ̧ɨ̧ vi nè mbɨ̧̀ ènyit zi nènkèm wuê abua Mbɔ̧ɔ̧mà la. Ka àvi tà yɔꞋɔ la nàa ngɨ̀ tà nɔ̀ŋè èntɨ̧ɨ̧ vi a màngɨa wuê mènəè ngɔ̀ŋ, mɨ̀ɨ̀tà wuê ndɨ yèa me ghɨ̀ mènəè nàa mbɔ̀ lu̧ vi la.

³⁵ E ndàꞋà mènəè maa nkɨ tɨŋe awɨ̧, è nka kɨ e tsia mantsàꞋ nê mbɨ̀Ꞌɨ̀ bɨ yɔꞋ. Ka e ngua nkɨà bɨa me tseke ane èlɨ àa mbɔ̀ la, mbɨ̀Ꞌɨ̀ bɨa me faꞋa abua Tè Yesò kà ye àghɨa ko àa kele awɨ̧ la.

³⁶ Wòt ye nê, ye tseke ka yɔꞋɔ waàvi ye wua nkɨ yɔꞋɔ la, me baãaã ènyit zi kekaŋ, ntsiꞋi me mɨ̀ɨ̀te nê bɔ wu yɔꞋɔ, tà ghɨ̀ mbɨ̀Ꞌɨ̀ tàa mɨ̀ɨ̀tà la, ndzɔꞋ. È ntsě kàbɔ̀ŋ tà ghɨ̀ la.

³⁷ Ka wòt wu ko kuule èntɨ̧ɨ̧ vi, kà ye àghɨa ŋweela tò la, te ko baãaã ènyit zi ntsɔ̧̀, e nɔ̀ŋe a èntɨ̧ɨ̧ vi nê ye ka baãaãte waàvi wu yea nkɨ yɔꞋɔ la, ko wu ànəa ntsɔ̧̀ tà ghɨ̀ la.

³⁸ Ale, wòt yɔꞋɔ waàvi tàa nkɨ yɔꞋɔ atò la, ko wu ànəa ntsɔ̧̀ tà ghɨ̀ la. È we tà tu̧u̧ yɔꞋɔ la, ghɨ̀ àyea a bɔ̀ŋ tê ntsè la.

³⁹ Àvi yɔꞋa tà bɔ̌ ndɨ tàa wu wuê bɔ̂ lu̧ vi mbɨ̀Ꞌɨ̀ lu̧ tò bele yû̧ la. Ka lu̧ tò pfəa tà mè nko ndzɔꞋ, mbɔ̂ tà me yɔꞋɔ, tà yɔ̀Ꞌɔ̀ wuê wòt Mbɔ̧ɔ̧mà.

⁴⁰ A batè ngu ale ka ndɨ màa ndzea la wu nê, naa wu ànəa ntsɔ̧̀ abua tò taa tseke ka yɔꞋ, mbɔ̂ mâ mɨɨtè nê, Fo Mbɔ̧ɔ̧mà naa ane yaã.