1 Kɔlìn 5 - Mundani

Ànəa màmpaꞋta àbɨ̧ a kètsìà bòt chɔsì

¹ Bɔ shu am èwuu ànəa ko nê bòt ko aa mpàꞋta àbɨ̧ a kètsìà wɨ̧, tè ngɨ̀ fɔɔle ane ndɨ bòt kà ko a Mbɔ̧ɔ̧mà àa ka ghɨ̀ la. Bɔ shu am nê wòt kǒ paꞋte vi tǎt vi.

² Bɨ bɔ̂ me ŋeꞋe tèkwȩ a ègwet nê bɨ wu bòt Mbɔ̧ɔ̧mà, è bɔ̂ ngu àghɨa bɨ wuê tseke ane tèsȩ me shùù mèsi la. Bɨ̀ tsǐ wòt tà ghɨ̀ èwuu ànəê yaa la ayɔɔ yɨ̧.

³ Mâ batè è nka wu ba nɨ̧̀ ba ale, ka èntɨ̧ɨ̧ am e bɔ̂ ngu nè nɨ̧̀. Ndɨ̀ wu à wu mbɨ̀Ꞌɨ̀ è ngu ba nɨ̧̀ ba la, mâ saꞋa wòt wu tà ghɨ̀ èwuu ànəê ya la

⁴ ane èlen Yesò Lefɨ̀Ꞌ tè ndɔ̀Ꞌ. Bɨa bù̧ù̧te, èntɨ̧ɨ̧ am è wu ne nɨ̧̀, nè mètàŋ Yesò Lefɨ̀Ꞌ wa,

⁵ bɨ zì èwuu wòt waa a tèkitebu Satàn, mbɨ̀Ꞌɨ̀ tà ŋèꞋne mbɨ̧̀ ènyit tò ane kàbɔ̀ŋ tò, è wu ane àlia Yesò Lefɨ̀Ꞌ kɨꞋɨ la tà ghɨ̀ àlɨ̀ŋkè a ŋut a pem.

⁶ È ntsě ànəa ntsɔ̧̀ bɨa me ŋeꞋe tèkwȩ tɨ̧ a ègwet. Bɨ bakà ko laꞋ nê betsiꞋa adziꞋi yis ghɨ̀ apfəèꞋ fàlawà kɔꞋ ndû̧ èpfəêꞋ?

⁷ Ale, bɨ̀ tsia kàbɔ̀ŋ wu ayɔɔ yɨ̧, è wù mbɨ̀Ꞌɨ̀ yis nyǎꞋ la, mbɨ̀Ꞌɨ̀ tsiꞋi bòt fi nènkèm. Mâ ko nê wu ndɨ bɨ̀a la. Bɨ̀ ghɨ̀ ale, nkàà nê, Yesò Klistò pfə tê ndɔ̀Ꞌ nkàà bèkàbɔ̀ŋ bɨ̧ mbɔŋ. Tà wu mbɨ̀Ꞌɨ̀ wanjɨ̀ wu bɔ li ngua nkɨ̧̀ɨ̧̀ma ŋǎ abua Mbɔ̧ɔ̧mà àfɨꞋa èpǎ̧ Màntsea a ègwet la.

⁸ Bɨ̀ ghɨa bà jɨ èpǎ̧ wu, ka bà ka njɨ̀ ne bled wu è bɔ a yis nyǎꞋ, yis mbɔŋ wu mèmɨ̀ɨ̀te kàbɔ̀ŋ nè èbɨꞋte ènəê la. Bà jɨ wuê nè bled kà ye a yis adù̧, è wu èntɨ̧ɨ̧ kèfə nè màndaꞋa nkûŋ la.

⁹ E ndi shu awɨ̧ a èbem àkatè yu e ndi shɨ abua yɨ̧ la nê, bɨ̀ ka mbɔ̀ àghɨa ko a màngɨa ne bòt bu bɔ̀ɔ mpàꞋta àbɨ̧ la.

¹⁰ E ndi è nka wua shua bòt ngɔ̀ŋ bɔ̀ɔ mpàꞋta àbɨ̧ la, kò bòt aghàbà, kò bètsɔŋ, kò bòt bɔɔ nkùkta bènàmbəa la leꞋ. E ndi ngua shua nê bɨ̀ ka mbɔ̀ àghɨa ko a màngɨa ne nɔ̀b, ko bɨ bɔ ndɨ bɨ̀a sǎ ngɔ̀ŋ yaa nènkèm la.

¹¹ Ka e ndi ngua shɨa nê bɨ̀ ka mbɔ̀ àghɨa ko a màngɨa ne wòt tàa shua nê ye wu wanyɨ wa mbɔ̀ mbèla njɨ̀a ngò̧ò̧tètsə, kò ngɨa aghàbà, nkùkta bènàmbəa, njɨ̀a mènaŋ, nua mèlùꞋ mbea, kò ntsɔa la leꞋ. À ka mbê njɨ̀ àghɨ bɨ èwuu bòt mbɔŋ.

¹² Àghɨ yu mâ bɔ a màsaꞋa bòt bu kà zi mèntɨ̧ɨ̧ mɔb ane Yesò la wu ghà à? Tè è ntsě àdzìꞋa yɨ̧ e me saꞋa bòt chɔsì?

¹³ Ale, Mbɔ̧ɔ̧mà ka tàa saꞋa bòt bu àbȩ la. “Bɨ̀ fəâ wòt kàbɔ̀ŋ wu ayɔɔ yɨ̧ la.”