Bìoball air-loidhne

1 Kɔlìn 3 - Mundani

BɔfàꞋa Mbɔ̧ɔ̧mà

¹ Bɔnyɨ bɔ̧, e ndi ngu ba nɨ̧̀ ba ale, è nka laꞋa abua yɨ̧ mbɨ̀Ꞌɨ̀ bòt bɔ ko mènəè Mbɔ̧ɔ̧mà ntsɔ̧̀ la. E ndi ndàꞋ abua yɨ̧ mbɨ̀Ꞌɨ̀ e ndàꞋa abua bòt ngɔ̀ŋ, mè ndàꞋ mbɨ̀Ꞌɨ̀ e ndaꞋa abua bɔtechɨɨle ane mènəè Yesò Klistò.

² E ndi njɨ̀a wɨ̧ ane èbɨ̧. È ndi è ka jɨa wɨ̧ nè èghɨjɨ kekweelè, nkàà nê bɨ li bɨ̀ ka kuꞋ ane èghɨjɨ kekweelè. E màà ngu wu àfɨ̀Ꞌ yaa ko bɨ bakà kùꞋ,

³ nkàà nê bɨ bela ntsèka mbɨ̀Ꞌɨ̀ bòt ngɔ̀ŋ yaa. Ndɨ̀ wu bɨ̀ bela ngòꞋnà bɔnyɨ bɨ̧ mè nùà nè nɔ̀b la, a wua nyɨ̀Ꞌta nê bɨ bele mbɨ̀Ꞌɨ̀ bɔbȩ, mè ngɨ̀à mènəè mɨ̧̂ mbɨ̀Ꞌɨ̀ bɔbȩ ko.

⁴ Wòt wɨ̧ nàa ngɨ̀ tà me laꞋnê, è ngu wòt Pɔ̂l, wekǒ naa me laꞋ nê e ngu wòt Àpolòs ale, à ka wua nyɨ̀Ꞌta nê bɨ bela ngɨ̀à wuê mbɨ̀Ꞌɨ̀ bɔbȩ ko?

⁵ Àpolòs nàa nè ngu wàà? Pɔ̂l mè ngu wàà? Ba wu wuê bɔfàꞋ Mbɔ̧ɔ̧mà tà li ntsè ane ya ngɨ̀ bɨ zì mèntɨ̧ɨ̧ mɨ̧ ane Yesò Klistò la. Waa waa ane ya nàà ngɨ̀à wuê àfaꞋa Mbɔ̧ɔ̧mà ŋa nê tà ghɨa la.

⁶ E ndi nyɔ̀Ꞌ èsaãaãme, e tu, Àpolòs zì mèleb, ka è lè wu Mbɔ̧ɔ̧mà tà ghɨ̂ e tsə la.

⁷ Ale, wòt wu tà nyɔ̀Ꞌ la, nè wòt tà zì mèleb la ntsě àghɨa ko. Mbɔ̧ɔ̧mà ka tà wu àghɨ la, nkàà nê wu tòà ka tàa ngɨ̀à èghɨ e tsəa la.

⁸ Wòt wu tà nyɔ̀Ꞌ la, nè wòt tà zì mèleb la e wua ngɨ̀à wuê àfàꞋ yeamɔꞋ, Mbɔ̧ɔ̧mà na li ŋa àbȩ̀ waa waa mbɨ̀Ꞌɨ̀ tà ghɨ àfàꞋ àzi la.

⁹ Ba wu bòt bàa fɔta fàꞋà nɔ̂ abua Mbɔ̧ɔ̧mà la. Bɨ wu mbȩ Mbɔ̧ɔ̧mà, mè ngu lob Mbɔ̧ɔ̧mà.

¹⁰ E ndi nɨ̌ èyì wu Mbɔ̧ɔ̧mà ŋa abua am la nɨŋ mbɔ̧̀ɔ̧̀ àtetsi mbɨ̀Ꞌɨ̀ wòt tà ko àfàꞋ la. Wòt tsa wua mbɔ̧̀ɔ̧ adù̧. Ka wòt naa me bɔ̧ɔ̧ adù̧, tà me ko avi ndɨ ye bɔ̧ɔ̧ la.

¹¹ Nkàà nê Mbɔ̧ɔ̧mà tsia Yesò Klistò ane àtetsi tè ndɔ̀Ꞌ. Ale, àtetsia tsa à ka tsi nguê.

¹² Bòt ko aa nɨ a goêl, kò silbà, kò àti a ntsɔ̧̀ leꞋ, e nɨ bɔ̧ɔ̧ ègwet àtetsi yaa; èbeko e wu nɨ èyɨt, èbeko èbin, kò mèghȩ leꞋ.

¹³ Àghɨa àfaꞋa waa waa à wu yùà la aa li pùùla ayaã ane àli yu Yesò Klistò kɨꞋɨ saꞋa ngɔ̀ŋ la. Èwet aa li ghɨ̀ bɔ yè àfaꞋa waa waa, nkàà nê taa li nɨ èwet e yute àfaꞋa wòt ègème.

¹⁴ ÀfaꞋa wòt ghɨ a ègwet àtetsi yu la a bakà shɨà, ko ŋut naa bɔ àbȩ̀.

¹⁵ ÀfaꞋa wòt a lia shɨà, tà ko nê ye wu ane bia. Ka tà wu peme mbɨ̀Ꞌɨ̀ wòt tà saãaã èvə èwet la.

¹⁶ Bɨ bakà ko nê bɨ wu lob Mbɔ̧ɔ̧mà, Fo tò nàa ntsèka ane yɨ̧ la à?

¹⁷ Ale, wòt tsòkà lob Mbɔ̧ɔ̧mà ko Mbɔ̧ɔ̧mà naa li tsoke atò mɨ̧̂, nkàà nê lob Mbɔ̧ɔ̧mà wu abua tò zìambɔŋ, bɨ bɔ̂ ngu lob Mbɔ̧ɔ̧mà mbɔŋ.

¹⁸ Ko mbɨ̀Ꞌɨ̀ wòt fɨ̀te avi. Wòt kǒ ane yɨ̧ me mɨ̀ɨ̀te nê ye bɔ èyì ane ndɨ bòt ngɔ̀ŋ àa mɨ̀ɨ̀tà la, tà tsiꞋi nɨ avi mbɨ̀Ꞌɨ̀ àkèghɨ̧̀ mbɨ̀Ꞌɨ̀ lâ bɔ èyì.

¹⁹ Nkàà nê, àghɨa bòt ngɔ̀ŋ àa ntɔ nê wu èyì la, Mbɔ̧ɔ̧mà nàà nɨa nê wu àghɨ̧̀ɨ̧̀nè. Àkata Mbɔ̧ɔ̧mà a laꞋnê, “Mbɔ̧ɔ̧mà nàà nɨa bèyuŋ bòt èyì nɨa ntà̧aã awɔb.”

²⁰ A mee shu nê, “Mbɔ̧ɔ̧mà ko nê mèmɨ̀ɨ̀te bòt èyì wu àku.”

²¹ Ale, wòt ka me ŋeꞋe tèkwȩ ti a ègwet ane àghɨa wɔ̀bȩ̂ nàa ngɨ̀à la. Ane nkûŋ, èghɨ ègème wu èbɨ̧.

²² Kò wu Pɔ̂l, kò wu Àpolòs, kò wu Pità, kò wu ngɔ̀ŋ yaa, kò à wu yû̧, kò à pfə leꞋ, kò wu èghɨ è wu àfɨ̀Ꞌ yaa la, kò èbe nga kɨꞋɨ la leꞋ, ko ègème wu èbɨ̧,

²³ bɨ wu bòt Yesò Klistò, Yesò Klistò wu wòt Mbɔ̧ɔ̧mà.

« Roimhe

Air adhart »

Lean sinn:

Ceanglaichean taic

Sanasan