Bìoball air-loidhne

1 Kɔlìn 2 - Mundani

Ntu̧ Yesò a mbɨ̧̀ mbasa

¹ Bɔnyɨ bɔ̧, e ndi nkɨ̀Ꞌɨ̂ me làꞋa mènəè mu Mbɔ̧ɔ̧mà ghɨ̂ ba ko ane ànəa Yesò la abua yɨ̧ ale, è nka wua nyɨ̀Ꞌta wɨ̧ nê maa nkòa ndàꞋà, è nka wua nyɨ̀Ꞌta èyì.

² E ndi nê è nka làꞋa ànəa ko tsa a, kà wu wuê ànəa Yesò Klistò ane ndɨ bɔ li ngù̧ù̧te atò a mbɨ̧̀ mbasa la.

³ E ndi ngu ba nɨ̧̀ ba me yu mè ntaꞋa wua mbènta mbɔ̀a.

⁴ E ndi è ka wua nyɨ̀Ꞌta mè ndàꞋà èngǎ̧ Mbɔ̧ɔ̧mà ane ètsəê ntsɔ̧̀ wu bɔbȩ àa nɨa èyǐ wɔb ndàꞋà la, ka Mbɔ̧ɔ̧mà li nɨ̌ Fo zi nyɨ̀Ꞌte mètàŋ mi, ngɨ̀ bòt e ko nê ànəa e ndàꞋà la wu nkûŋ.

⁵ E ndi ngɨ̀ àyea mbɨ̀Ꞌɨ̀ bɨ̀ me zǐ èntɨ̧ɨ̧ wɨ̧ ane Mbɔ̧ɔ̧mà è kà wu èyǐ bɔbȩ, è wu mètàŋ Mbɔ̧ɔ̧mà è ghɨ̀ la.

Èyǐ Mbɔ̧ɔ̧mà

⁶ Mâ batè ndàꞋ àyaa ale, ka bàa bɔntu̧ Mbɔ̧ɔ̧mà aa ndàꞋà èyì ayɔɔ bòt bɔ kweele ane mènəè Mbɔ̧ɔ̧mà la, ka è kà wu èyì wu bòt laane àa nyɨ̀Ꞌta la, kò èyì wu bòt bɔ̀ɔ mbà̧aã èlaꞋ ngɔ̀ŋ, è wu bòt ntsèa tsě la, àa nyɨ̀Ꞌta la.

⁷ Ba làꞋà ànəa èyǐ Mbɔ̧ɔ̧mà wu tà lè yaã ndò̧ la. Ngɔ̀ŋ li me bùꞋu tà yaŋe taŋke ayaa mbɨ̀Ꞌɨ̀ baa bɔ e waa ne èghàb ane ènɨ̧ tò.

⁸ Wòt kǒ ane bèfɔ̧̀ ngɔ̀ŋ, tà li nko àyaa la ntsě. Bɔ li ngɨ̀ ale nko ko bɔ li bɔ̀ ka wu̧u̧te a Lefɨ̀Ꞌ a mbɨ̧̀ mbasa.

⁹ Mbɨ̀Ꞌɨ̀ Àkata Mbɔ̧ɔ̧mà a shu la, “Àghɨa kà èghɨ e li mè ye, Nè àghɨa kà àtû̧ a li mè zə Nè àghɨa kà èntɨ̧ɨ̧ e li mè mɨ̀ɨ̀te, Wu àghɨa Mbɔ̧ɔ̧mà taŋke abua bòt bu bɔ̀ɔ nkɔ̀ŋkà tò la.”

¹⁰ Mbɔ̧ɔ̧mà nɨ Fo zi ngɨ̀ ba ko ànəa ndò̧ atò yaa. Fo Mbɔ̧ɔ̧mà nàà nkoa àghɨ àgème fɔɔle ka wuê mènəè Mbɔ̧ɔ̧mà mu è lò̧ò̧tè la.

¹¹ Wòt wu betsiꞋa tà ko mèmɨ̀ɨ̀te wòt kà wua èntɨ̧ɨ̧ ŋut la wu wàà? Eyaa wu ndɨ betsiꞋa wɔ̀bȩ̂ kà ko mèmɨ̀ɨ̀te Mbɔ̧ɔ̧mà kà wu Fo tò la.

¹² Ba bakà bɔ fo ngɔ̀ŋ yaa, ba bɔ Fo Mbɔ̧ɔ̧mà zìambɔŋ, mbɨ̀Ꞌɨ̀ naa ghɨ̌ baa ko èghɨ bu Mbɔ̧ɔ̧mà ŋǎ abua ya la.

¹³ Ale, bà ka wua ndàꞋà ane èyǐ bòt ngɔ̀ŋ. Baa ndàꞋà mbɨ̀Ꞌɨ̀ Fo Kèfə nàa nyɨ̀Ꞌta wa la, ndzààtà mènəè Fo Kèfə ndàꞋà abua bòt bu bɔ bɔ Fo mbɔŋ la.

¹⁴ Wòt kà bɔ Fo Mbɔ̧ɔ̧mà nàà kà bɔ èghɨ bu Fo Mbɔ̧ɔ̧mà nàa ŋǎ la, nkàà nê èghɨ mbɔŋ abua tò wu èghɨ àkèghɨ̧̀, tà kà mê ngu ko eko àghɨ adù̧ nkàà nê, wòt baka bɔ Fo Mbɔ̧ɔ̧mà, tà kà ko àghɨa èghɨ mbɔŋ wu bùà la.

¹⁵ Wòt tà bɔ Fo Mbɔ̧ɔ̧mà la nàà mbàŋà mènəè ègème, ka wɔ̀bȩ̂ kà wuê tàa bàŋa tò la.

¹⁶ Mbɨ̀Ꞌɨ̀ Àkata Mbɔ̧ɔ̧mà a shu la “Wàa ko mèmɨ̀ɨ̀te Tè Yesò à? BetsiꞋa wàa kɨɨta tò à?” Bàa bòt Mbɔ̧ɔ̧mà aa mɨ̀ɨ̀tà mènəè ndɨ Yesò Klistò nàa mɨ̀ɨ̀tà la.

« Roimhe

Air adhart »

Lean sinn:

Ceanglaichean taic

Sanasan