Bìoball air-loidhne

1 Kɔlìn 16 - Mundani

Màfeta èghɨ etɨŋe bòt Mbɔ̧ɔ̧mà

¹ Maà nkɨ làꞋa ane ànəa màfeta èkab e nɨ tɨŋe bòt Mbɔ̧ɔ̧mà bu a Jèlusalèm la, nê, bɨ bɔ ndɨ bɨ̀a ghɨ̀ àghɨa e ndi shu abua bèchɔsì bu a Gàlashìà nê bɔ̀ me ghɨ̀ la.

² Waa waa ane yɨ̧ ye nê ye fete èkab ye bɔ la ane àlia mbì ane nkàb ègème nɔ̀ŋè me chɨ̀Ꞌɨ, mbɨ̀Ꞌɨ̀ è nkɨꞋɨ, bɨ̀ ka tsi fete èghɨ.

³ Bɨ̀ ghɨ̀ ale, mbɨ̀Ꞌɨ̀ è nkɨꞋɨ, e shɨ èkatè ŋǎ abua bòt bɨ làà la bɔ nɨ ne èbɨ̧ ne èghɨ nga a Jèlusalèm.

⁴ A nyɨ̀Ꞌta nê, wu ànəa ntsɔ̧̀ nê è nga mɨ̧̂, ko bɔɔ kùŋà am ba tò ba aa ghǎ nɔ̂.

MènkwàꞋte Pɔ̂l

⁵ Maa li ntse a Màsèdonìà nkɨ̀Ꞌɨ̂ ndzè àwɨ̧. E shua ale nkàà nê, maa nkɨ tsě a èlu̧ Màsèdonìà ka kɨꞋɨ.

⁶ Maa li tseke ba nɨ̧̀ ba te a teko àbɨ̂ŋ aa tsě, mbɨ̀Ꞌɨ̀ bɨa tɨŋe am ane lèghȩ̀ȩ̀nè am etsǎ am maa ghǎ àdzìꞋ àgème màa nkɨ ghà la.

⁷ Maa kà kɨ kɨꞋɨ tseke ba nɨ̧̀ ba wuê ane kètem àfɨ̀Ꞌ. Maà nkwàꞋtà kɨꞋɨ tseke ba nɨ̧̀ ba tè àfɨ̀Ꞌ aa nyaꞋa wu na Tè Yesò bɨ̧̀ɨ̧̀na la.

⁸ Ka maa tseke a Efesɔ̀s tè àlia Pentekɔ̀s aa kɨꞋɨ,

⁹ nkàà nê, èlu̧ e lâ ngàꞋa abua am maa ghɨ àfaꞋa ntsɔ̧̀, ka bɔmbù̧ e bɔ̂ me yaãaã.

¹⁰ Tɔ̀màtià naa kɨꞋɨ bɨ me baãaã atò ntsɔ̧̀, nkàà nê, tà wua ngɨ̀à àfaꞋa Tè Yesò mbɨ̀Ꞌɨ̀ màa ngɨ̀à la.

¹¹ Ale, wòt ka ngwàa tò, ka bɨ̀ tɨŋe atò ntsaa tò tà ghȩ̀ȩ̀ne ane àlàŋkè, mè nkɨ̀Ꞌɨ̂ abua am nkàà nê, maà nchɨꞋa tò bɔ̂ bɔnyɨ ba ko bu.

¹² È me wu wanyɨ wa Àpolòs, ko mâ ŋwèta atò ngò̧ nyaŋ nyaŋ nê tà kɨꞋɨ bɔ̂ bòt Yesò ko bu ndzè àwɨ̧, ka a li à ka wu a èntɨ̧ɨ̧ tò nê tà kɨꞋɨ àfɨ̀Ꞌ yaa. Taa kɨꞋɨ àfɨꞋa èlu̧ e dzə a si la.

Èngà̧ enɨ lìa

¹³ Bɨ̀ me ko awɨ̧, ntɨ̧̀ɨ̧ ntsɔ̧̀ ane èntɨ̧ɨ̧ wɨ̧ wu bɨ zi ane Yesò la, ntɨ̧ɨ̧ mbɨ̀Ꞌɨ̀ mbâ̧ mè me kweele.

¹⁴ Bɨ̀ me ghɨ àghɨ àgème nè èkɔŋ.

¹⁵ Bɔnyɨ bɔ̧, bɨ ko nê Stefanàs bɔ̂ bòt lob zi wu bòt mbì a èbem Akayà bɔ li ndzì mèntɨ̧ɨ̧ mɔb ane Yesò, mè ŋà wɔb e me faꞋa ntɨ̀ŋa bòt Mbɔ̧ɔ̧mà la.

¹⁶ Mâ shu̧u̧te awɨ̧ nê bɨ̀ me zə èwuu bòt baa, nè bòt ko tsa bɔ̀ɔ fɔta fàꞋà nè Stefanàs ba la.

¹⁷ A taꞋa bɔ̌ am nê, Stefanàs bɔ̂ Fɔ̀tùnatùs nè Àkekùs e kɨꞋɨ̀ nkàà nê bɔ nɨ àdziꞋa yɨ̧ ndɨ̀ wu bɨ ntsě a si la.

¹⁸ Bɔ zǐ èntɨ̧ɨ̧ am mbɨ̀Ꞌɨ̀ bɔ zì è wɨ̧ la. Bɨ̀ me zə ànəa èwuu bòt baa àa shua la.

¹⁹ Bèchɔsì bu a Esìà la aa ntsàꞋtà wɨ̧. Àkwilà bɔ̂ Plìsilà nè ènɔ̧̂ bòt Mbɔ̧ɔ̧mà bu bɔ̀ɔ mbu̧u̧ta a lob yɔb la aa ntsàꞋtà wɨ̧ nè èkɔŋ bòt Mbɔ̧ɔ̧mà.

²⁰ Bòt Mbɔ̧ɔ̧mà bu bàgème àdzìꞋ yaa la aa ntsàꞋtà wɨ̧. Bɨ̀ taꞋa bɔnyɨ bɨ̧ bàgème ntsàꞋtè àwɔb mbɨ̀Ꞌɨ̀ bòt Mbɔ̧ɔ̧mà.

²¹ Wu mmɔ̌ Pɔ̂l mâ nɨ àbu am mmɔ̌ mbɔŋ ka shɨ̀ mèntsàꞋte màa la.

²² Wòt bakà wua nkɔ̀ŋkà Lefɨ̀Ꞌ, ndɔ̀ nɔ̀ŋke àtsəa tò. Lefɨ̀Ꞌ wa, kɨꞋɨ!

²³ Maà shù̧ù̧ta nê Yesò Lefɨ̀Ꞌ nyɨꞋte a ntsɔ̧̀ vi abua yɨ̧.

²⁴ Maà nkɔ̀ŋkà àwɨ̧ bɨ̀agème ndɨ̀ wu bà wu àghɨ yeamɔꞋ ane Yesò Klistò la. Àmèn.

« Roimhe

Air adhart »

Lean sinn:

Ceanglaichean taic

Sanasan