Bìoball air-loidhne

1 Kɔlìn 14 - Mundani

Èghɨ ko tsa Fo Kèfə nàa ŋǎ la

¹ Bɨ̀ ghɨa èkɔŋ e wua àghɨa mbì abua yɨ̧, mè ndâ me kɨ èghɨ Fo Mbɔ̧ɔ̧mà nàa ŋǎ la. Ane èghɨ mbɔŋ, màndaꞋa ane àtɔŋ Mbɔ̧ɔ̧mà à wu mbì.

² Wòt tàa ndaꞋa ane ndɨ̧ kà bòt e koê la, ka laꞋa abua bɔbȩ, tà laꞋa abua Mbɔ̧ɔ̧mà nkàà nê, wòt kǒ tàa ndzəa ànəa tà shua la ntsě. Tà wua ndàꞋà mènəè ane mètàŋ Fo Mbɔ̧ɔ̧mà è wù mènəè ndò̧ ègème la.

³ Ane àbâ ko, wòt wu tàa ndaꞋa ane àtɔŋ Mbɔ̧ɔ̧mà la laꞋa abua bɔbȩ, ntɨ̀ŋa bɔnyɨ bɔb ngɨ̀à mèntɨ̧ɨ̧ mɔb kweelà, mè ndzìà mèntɨ̧ɨ̧ mɔb.

⁴ Wòt tàa ndàꞋà ndɨ̧ tsǎ la, wua ndɔ̀ktà èntɨ̧ɨ̧ vi zìambɔŋ, ka wòt tàa ndàꞋà ane àtɔŋ Mbɔ̧ɔ̧mà la, wua ndɔ̀ktà mèntɨ̧ɨ̧ bòt chɔsì bàgème.

⁵ Maà nkɨà nê bɨ̀agème è me làꞋa ndɨ̧tsə tsa tsa, ka e mbɔ̂ me kɨ nê bɨ̀ làꞋà nyaŋ wuê ane àtɔŋ Mbɔ̧ɔ̧mà. Wòt tàa ndàꞋà àtɔŋ Mbɔ̧ɔ̧mà la è tsě wòt tàa ndàꞋà ndɨ̧tsə tsa tsa la, na wòt bakà wuê tàa ghaꞋte mènəè mu tà laꞋa ane ndɨ̧ tsǎ la e shu e tɨŋe bòt chɔsì la.

⁶ Bɔnyɨ bɔ̧, e nkɨ̀Ꞌa abua yɨ̧ me làꞋa ndɨ̧tsə tsa tsa, ko màa tɨŋe awɨ̧ ane ghà à? BetsiꞋa è nka tɨŋe awɨ̧ kà wu nê mâ nɨ ànəa Mbɔ̧ɔ̧mà nyɨꞋte abua am la e kɨꞋɨ shu awɨ̧, ko ghaꞋte èghɨ mâ ko la e shu bòt leꞋ, kò ndaꞋa ane àtɔŋ Mbɔ̧ɔ̧mà leꞋ, kò nyɨ̀Ꞌta wɨ̧ mènəè leꞋ.

⁷ Ka wuê afɨ̀ nè àkèkwàꞋ, è wù èghɨ kà wua ndzèènà la, e bakà laꞋa tsa tsa bɔ ghɨ̀ na ka nko ànəa e shua la à?

⁸ Wòt foa èsɔndɨk la bakà lâ ŋǎ ndɨ̧ èbet, bòt e ghɨ̀ na ka ntàŋke a mànga a èbet à?

⁹ Ale, wòt ane yɨ̧ làꞋà ànəê ane ndɨ̧ kà bòt e koê, ko bɔ̀ɔ ghɨ̀ na ka ko ànəa tà shua la à? Wòt ghɨ̀ ale, ko èngǎ̧ tò aa nyɔ a èbem fo.

¹⁰ Ndɨ̧tsə te batè ngu a ngɔ̀ŋ ŋaa nyaŋ, ka ye kǒ kà bɔ wua ndzəa ànəa è shua la ka wuê.

¹¹ Ka e mbakà ko ndɨ̧ yu bɔ làꞋà la, ko wòt wu ndàꞋà yùà la naa wu mbɨꞋɨ̀ gɨ̧̀ abua am, e mè ngu mbɨ̀Ꞌɨ̀ gɨ̧ abua tò.

¹² Ndɨ̀ wu bɨ̀a nùà nkɨ bɔ èghɨ Fo Mbɔ̧ɔ̧mà nàa ŋǎ la, bɨ̀ nyɔ̀Ꞌte a mbì àghɨ àgème ndze nê bɨ ghɨ̀ bu àa me tɨŋa ndɔ̀ktà mèntɨ̧ɨ̧ bòt chɔsì la.

¹³ È wu ale, wòt ndaꞋa ane ndɨ̧ tsǎ la ye nê ye tsàꞋta Mbɔ̧ɔ̧mà shù̧ù̧ta tò nê tà ghɨa ye ko shu mènəè mu ye làꞋà ane ndɨ̧ tsǎ la abua bòt ntsɔ̧̀.

¹⁴ Màa ngɨ̀ è me tsàꞋta Mbɔ̧ɔ̧mà ane ndɨ̧ tsǎ, è wu fo yaã ndàꞋà abua Mbɔ̧ɔ̧mà la, ka è nka ko ànəa e shua la.

¹⁵ A wu ale ko màa ghɨ̀ na à? Ko maa tsàꞋta Mbɔ̧ɔ̧mà ane fo yaã, e mě me tsàꞋta nkoa ànəa e shu la, ko maa kɔ̧ e tsàꞋte a Mbɔ̧ɔ̧mà ane fo yaã, e mě kɔ̧ ànəa mâ ko la.

¹⁶ À me tsàꞋta Mbɔ̧ɔ̧mà nkɔ̀ŋkà tò wuê ane fo yùà yùà, ko wòt kànəè tà kɨꞋɨ a èbem àbù̧ù̧tà yɨ̧ la nàa ghɨ̀ na te ko shu nê “Àmèn” adù̧ kà lem nko ànəa à shua la à?

¹⁷ A teko, à wua ntsàꞋta Mbɔ̧ɔ̧mà nkɔ̀ŋkà tò ntsɔ̧̀, ka à ka bê ntɨ̀ŋe wekǒ nè wòt ane àghɨa ko.

¹⁸ Mâ kɔ̀ŋka Mbɔ̧ɔ̧mà nê maa ndàꞋà ndɨ̧tsə tsa tsa tè ntsè àwɨ̧ bàgème.

¹⁹ Ka e ngu àdziꞋa bòt chɔsì e bù̧ù̧tè la, ko maa kɔ̀ŋke a màndaꞋa èngà̧ yetà̧â̧ nkoa ànəa e shua la mbɨ̀Ꞌɨ̀ nɨ nyɨꞋte bòt, te tsě ndɨ màa làꞋà mèngǎ̧ bètɔsì èghem ane ndɨ̧tsə tsa tsa la.

²⁰ Bɔnyɨ bɔ̧, bɨ̀ ka ngu mbɨ̀Ꞌɨ̀ bɔtechɨɨle ane mènkwàꞋte mɨ̧. Ka è me wu ane ànəa kàbɔ̀ŋ, bɨ wu mbɨꞋɨ̀ bɔtechɨɨle, mbɔ̂ bɨ̀ wu mbɨ̀Ꞌɨ̀ bɔɔjuŋ ane mènkwàꞋte mɨ̧.

²¹ Mbɔ̧ɔ̧mà shu a èbem àkata mbɨ̧ zi nê, “Maa tsǎ bòt bɔ̀ɔ ndàꞋà ndɨ̧tsə tsa tsa la nè bègɨ̧̀ bɔɔ kɨꞋɨ làꞋà èngǎ̧ am abua bòt bɔ̧, mbɔ̂ ngu ghɨ̌ ale ka bɔ̀ ka lem ngu zə ànəa e shua la.”

²² Ale, màndaꞋa ndɨ̧tsə tsa tsa wu àlȩê abua bòt kà zi mèntɨ̧ɨ̧ mɔb ane Yesò Klistò, te ntsě abua bòt bɔ zì mèntɨ̧ɨ̧ mɔb ane Yesò Klistò la. Ka è me wu màndaꞋa àtɔŋ Mbɔ̧ɔ̧mà, ko a wu abua bòt bɔ zi mèntɨ̧ɨ̧ mɔb ane Yesò Klistò la, a ntsě abua bòt kà zi mèntɨ̧ɨ̧ mɔb ane Yesò Klistò.

²³ Tè bòt chɔsì bàgème e bù̧ù̧tà mbùꞋ me làꞋa ane ndɨ̧tsə tsa tsa bàgème, bòt kànəè kò bòt kà zi mèntɨ̧ɨ̧ mɔb ane Yesò Klistò e kɨꞋɨ ayɔɔ yɔb, ko bɔ̀ ka shu laꞋnê bɨ̀agème bɨ be à?

²⁴ Ka bɨ̀agème bɨ me làꞋa àtɔŋ Mbɔ̧ɔ̧mà, wòt kà zi èntɨ̧ɨ̧ vi ane Yesò Klisto kò wòt kànəè leꞋ kɨꞋɨ ayɔɔ yɨ̧, ko mènəè ngaa ègème tà zə la naa baãaãte èntɨ̧ɨ̧ tò, e ghɨ̌ taa ko nê ye wu wòt kàbɔ̀ŋ,

²⁵ e ghɨ̌ bɔɔ ko ènəê ndò̧ tò bu a èntɨ̧ɨ̧ tò la. Àyaa aa ghɨ̌ taa ŋɔꞋne a si e wùꞋte a Mbɔ̧ɔ̧mà, e shu laꞋnê ane nkûŋ Mbɔ̧ɔ̧mà wu ayɔɔ yɨ̧.

Èlɨ bɔɔ mè ghɨ̌ mènəè a chɔsì la

²⁶ Bɔnyɨ bɔ̧, ye ndɨ bɨ̀a me ghɨ̀ la. Bɨ bù̧ù̧tà, wòt ane yɨ̧ bɔa èkù̧, wekǒ bɔa àghɨa tàa nyɨꞋte la, wekǒ bɔa ènəê Mbɔ̧ɔ̧mà nyɨꞋte atò la, wekǒ bɔa èngǎ̧ tàa làꞋa ane ndɨ̧ tsǎ la, ko ghaꞋte ànəa bɔ làꞋa ane ndɨ̧ tsǎ la e shu leꞋ, bɨ ghɨ̀ àghɨ àgème ane ndɨ àa tɨŋe lɔ̀ktè mèntɨ̧ɨ̧ ènɔ̧̂ bòt Mbɔ̧ɔ̧mà la.

²⁷ Wòt me kɨ làꞋa ndɨ̧ tsǎ, bɨ ye nê wu wuê bòt babe kò batat leꞋ bɔ làꞋà la, mbɔ̂ ndàꞋ wemɔ̀Ꞌ wemɔ̀Ꞌ. Bɔ laꞋa, wòt wemɔ̀Ꞌ è ghaꞋtè ànəa bɔ làꞋà la shuê.

²⁸ Ka wòt bakà wuê tàa ghaꞋte ànəa bɔ làꞋà shua la, wòt wu nkɨ laꞋa ane ndɨ̧ tsǎ la ka ndàꞋ ayɔɔ ènɔ̧̂ bòt Mbɔ̧ɔ̧mà, tà me làꞋa a èntɨ̧ɨ̧ vi, mè ndaꞋa abua Mbɔ̧ɔ̧mà.

²⁹ BèndàꞋàtɔŋ Mbɔ̧ɔ̧mà babe kò batat leꞋ, è laꞋa, èbeko nè bòt è baŋa ànəa mbɔŋ bɔ làꞋà la ndze.

³⁰ Mbɔ̧ɔ̧mà nyɨ̀Ꞌta ànəê abua wekǒ nè wòt tà tseke a si la, we mbì wu ndàꞋà la buŋ.

³¹ Bɨ̀agème e làꞋà ànəa bɨ zə abua Mbɔ̧ɔ̧mà la wemɔ̀Ꞌ wemɔ̀Ꞌ, mbɨ̀Ꞌɨ̀ waa waa naa bɔ èyì, aa mě zǐ èntɨ̧ɨ̧ waa waa.

³² BetsiꞋa ndàꞋàtɔŋ Mbɔ̧ɔ̧mà koê mbà̧aã èngǎ̧ vi, tè ntsiꞋi làꞋà wuê àfɨꞋa tà bɔ ndɨ tàa làꞋà la,

³³ nkàà nê Mbɔ̧ɔ̧mà nàà kà kɔ̀ŋkè ànəèꞋnè, tà wu Mbɔ̧ɔ̧mà àlàŋkè. Mbɨ̀Ꞌɨ̀ àa èbem bèchɔsì bòt Yesò a èdzìꞋ ègème la,

³⁴ bèzi è ka me làꞋa a èbem bèchɔsì. Bɔ bakà bɔ ndɨ bɔ̀ɔ me làꞋà la. Bɔ bɔ ndɨ bɔ̀ɔ wu a èten mbâ̧tsə mbɨ̀Ꞌɨ̀ mbɨ̧ è shu la.

³⁵ Bɔ me kɨ ko ànəê, bɔ̀ ghǎ a lob, bɔ biite bèlu̧ bɔb. Wu ànəa àtsəa kɔꞋɔ àvi naa me làꞋa a èbem chɔsì.

³⁶ Bɨ tu̧a ànəa mâ shu la, bɨ̀ ko nê èngǎ̧ Mbɔ̧ɔ̧mà e li è ka dzə abua yɨ̧, è ka mê ndìà wuê abua yɨ̧.

³⁷ Wòt me shu nê ye wu ndàꞋàtɔŋ Mbɔ̧ɔ̧mà, kò shua nê Fo Mbɔ̧ɔ̧mà ŋa avi àghɨa ko leꞋ, tà zì àyaa àtsəa zi nê, èghɨ mâ shɨ la wu mbɨ̧te Lefɨ̀Ꞌ.

³⁸ Wòt tû̧ e ghɨ̌ ànəê yaa mâ shu la, bɨ̀ ka nɨ atò mbɨ̀Ꞌɨ̀ àghɨa ko mɨ̧̂.

³⁹ È wu ale, à bɔnyɨ bɔ̧, bɨ̀ la ndzì èntɨ̧ɨ̧ me làꞋà àtɔŋ Mbɔ̧ɔ̧mà, mbɔ̂ bɨ̀ ka nkèle bòt Mbɔ̧ɔ̧mà nê bɔ̂ ka ndàꞋà ndɨ̧tsə tsa tsa.

⁴⁰ Bɨ̀ me ghɨ̀ mènəè ègème ane ndɨ àa mbɔ̀ la, nè ndɨ è kùꞋù la.

« Roimhe

Air adhart »

Lean sinn:

Ceanglaichean taic

Sanasan