Bìoball air-loidhne

1 Kɔlìn 11 - Mundani

¹ Bɨ̀ me fɨŋe am ane mènəè mɔ̧ wuê mbɨ̀Ꞌɨ̀ màa fɨŋa Yesò Klistò la.

Ànəa mànkabta ètsə

² Maà ngùꞋtà wɨ̧ nkàà nê bɨa ntsèka nkù̧ù̧ta am ane àghɨ àgème e ndi ngua ngɨ̀à mè nyɨ̀Ꞌta la, mè me nɔ̀ŋè mènəè mu e ndi ndzi a tèkitebu tɨ̧ la.

³ Maà nkɨà bɨa ko nê Yesò Klistò bɔ àtɔŋ a ègwet mbâ̧, mbâ̧ bɔ̀ àtɔŋ a ègwet àvi, Mbɔ̧ɔ̧mà bɔ̀ àtɔŋ a ègwet Yesò Klistò.

⁴ Mbâ̧ tà kabte àtsəa zi ka me tsàꞋta Mbɔ̧ɔ̧mà, kò shua ànəa Mbɔ̧ɔ̧mà laꞋnê tà shu bòt la leꞋ, wua ndòa èku Yesò Klistò wu tà wu àtsəa tò la.

⁵ Àvi me tsàꞋta Mbɔ̧ɔ̧mà, kò shua ànəa Mbɔ̧ɔ̧mà laꞋnê tà shu bòt la leꞋ, kà kabte àtsəa zi, tà wua ndòa èku lu̧ vi. Tà ghɨ̀ ale, ko taa wu mbɨ̀Ꞌɨ̀ àvi bɔ mù àtsəa tò la.

⁶ Àvi bakà wu kabte àtsəa zi tà mù, mbə è wu ànəa lo èku abua tò e mù àtsəa zi, tà kàbte.

⁷ Mbâ̧ bakà bɔ ndɨ tàa kaba àtsəa zi la, nkàà nê Mbɔ̧ɔ̧mà ghɨ̌ atò tà fəə a Mbɔ̧ɔ̧mà, nè ènɨ̧ tò, ka àvi wua nyɨ̀Ꞌta ènɨ̧ mbâ̧.

⁸ (Bɔ li bɔ̀ ka nɨ àvi ka ghɨ̌ mbâ̧, bɔ li nɨ mbâ̧ ka ngɨ̀ àvi,

⁹ bɔ̀ ka mê ngua ngɨ̀à mbâ̧ abua àvi. Wu àvi ka bɔ li ngua ngɨa tò abua mbâ̧ la.)

¹⁰ Eyaa wu lə àvi bɔ ndɨ tàa me kabte àtsəa zi ka ntsàꞋta Mbɔ̧ɔ̧mà la, ambo bɔntu̧ Mbɔ̧ɔ̧mà.

¹¹ (Bòt àa ngɨ̀ bɔ̀ tsiꞋi àghɨ yeamɔꞋ nè Yesò, àvi ka wu àtsəa zi, mbâ̧ kà wu àtsəa zi mɨ̧̂.

¹² Mbɨ̀Ꞌɨ̀ bɔ li nɨ mbâ̧ ka ngɨ̀ àvi la, wu ndɨ àvi nàa mbia mbâ̧ àfɨ̀Ꞌ yaa la. Èghɨ bàagème e dzəa abua Mbɔ̧ɔ̧mà.)

¹³ Bɨ̀ lȩ̂ bɨ̀ambɔŋ ndze nê tè wu ànəa ntsɔ̧̀ abua àvi taa me tsàꞋta Mbɔ̧ɔ̧mà kà kabta àtsəa zi leꞋ.

¹⁴ Tè ndɨ Mbɔ̧ɔ̧mà ghɨ èghɨ la aa kà nyɨꞋte awɨ̧ nê àtsəa mbâ̧ àa nkèla nyaŋ è wu ànəa àtsəa kɔꞋɔ,

¹⁵ ka nyèmte àtsə àvi tè me sààte, è wu ànəa ènɨ̧ abua tò? Mbɔ̧ɔ̧mà li ŋǎ nyèmte àtsə àvi mbɨ̀Ꞌɨ̀ tea kabte àtsəa tò.

¹⁶ Ka wòt bakà ye ne nà̧ ane ànəê yaa, ko ndàꞋ ànəa màa shu la wu nê, bàa nè bèchɔsì Mbɔ̧ɔ̧mà e bakà bɔ èlɨ̀ ko tsa bàa nɨa ntsàꞋta Mbɔ̧ɔ̧mà la.

Èghɨjɨ Lefɨ̀Ꞌ
( Mat 26:26-29 ; Mk 14:22-25 ; Lk 22:14-20 )

¹⁷ Maa me shu maa nè mènəè ale, ka è nka wuê wùꞋtè àwɨ̧ nkàà nê bɨ̀a ngɨ̀ bɨ̀ bu̧u̧ta ane èlen Mbɔ̧ɔ̧mà, bɨ paa me tsòkè mènəè tè ntsè ndɨ bɨ̀a nèètà la.

¹⁸ Ànəa mbì wu nê, mâ zə nê bɨ̀a ngɨ̀ bɨ̀ bù̧ù̧tè mbɨꞋɨ̀ bòt chɔsì, àghàbtè a wu a kètsìà wɨ̧, e mbɔ̂ nko nê, àdziꞋ nkûŋ aa ane ànəa mbɔŋ.

¹⁹ Ka àghàbtè wu ànəa ntsɔ̧̀ ndɨ̀ wu betsiꞋa a ghɨ̀ bɔ ko bòt nkûŋ ayɔɔ yɨ̧ la.

²⁰ Mbɨ̀Ꞌɨ̀ mâ wua ndàꞋà la, mâ ye nê èghɨjɨ bu bɨ̀a ngɨ̀ bɨ̀ bu̧u̧ta bɨ me jɨ la ntsě èghɨjɨ Lefɨ̀Ꞌ.

²¹ Bɨ̀a ngɨ̀ bɨ̀ me jɨ, waa waa me jɨ è bi, tè à me lìa bòt ko e tseke ndzìtsə, èbeko e be.

²² Eyaa wu kǎ èwuu ànəê à? Bɨ bakà bɔ lobtsə me jɨa nua a èbèm? Bɨ ghɨ̀ na me waa chɔsì Mbɔ̧ɔ̧mà tè ntsìꞋa ngɨ̀à bòt kà bɔ ayɔb e bɔ àtsəa kɔꞋɔ à? È ngu ane shu abua yɨ̧ nê ghà à? Tè betsiꞋa e ngùꞋtè àwɨ̧ ane àghɨ yaa bɨ ghɨ̀ la à? ChaꞋ, è nka ghɨ̀ ale a.

²³ E ndi nyɨ̀Ꞌte awɨ̧ àghɨa Lefɨ̀Ꞌ li nyɨ̀Ꞌte am la nê, è li ngu a nyèmtèsi wu bɔ fɨ̧̀ɨ̧̀na Yesò Lefɨ̀Ꞌ la, tà nɨ̀ a bled,

²⁴ ŋà mènkɔ̀ŋke abua Mbɔ̧ɔ̧mà, mboꞋ ŋǎ abua bɔkatè bi nê, “Eyaa wu mbɨ̧̀ ènyit yaã abua yɨ̧. Bɨ̀ me ghɨa nɨa mɨ̀ɨ̀tè am.”

²⁵ Tà lɔ̀Ꞌ mè ngɨ̀ wuê a èlɨ ngaa nè ndɔŋ yu, mbɔ̂ shu nê, “Ndɔŋ yaa wu mènkàꞋa kèkweelè fi Mbɔ̧ɔ̧mà, màa nɨ àlo̧ am nɨ ghɨ̀ la. Àfɨ̀Ꞌ àgème bɨ̀a nua la bɨ me nɨa mɨ̀ɨ̀tè am.”

²⁶ Àfɨ̀Ꞌ àgème bɨa njɨ̀a bled waa mè nua ndɔŋ yaa la, bɨ me nɨa shuà ànəa èvə Tè Yesò tè ndɨ tàa li mě kɨꞋɨ la.

²⁷ Ale, wòt tà jɨ a bled Tè Yesò waa, kò nu ndɔŋ tò yaa ane èlɨ è baka kùꞋ la, tà ko nê ye ghɨ a kàbɔ̀ŋ ane mbɨ̧̀ ènyit Tè Yesò nè àlo̧ atò.

²⁸ Wòt bàŋè àvi ntsɔ̧̀, ka njɨ a bled waa kò nu ndɔŋ yaa leꞋ.

²⁹ Wòt me jɨ a bled waa mè nua ndɔŋ yaa kà ko lə mbɨ̧̀ ènyit Yesò, tà ko nê ye wua nkɨà ngoꞋ zi zìambɔŋ abua Mbɔ̧ɔ̧mà.

³⁰ Eyaa wu lə àbəèꞋ àyɨ̧ ako àa njùa, èbeko è ghɔ̧̀ɔ̧̀nà, èbeko e mè mpfəèꞋta la.

³¹ Baa bàŋà wa ntsɔ̧̀ nkùbta mènəè ma ko Mbɔ̧ɔ̧mà ka tsi saꞋa wa a.

³² Ka Mbɔ̧ɔ̧mà nàa me saꞋa wa tà wua ngàꞋà àghɨ aya baa ye a kàbɔ̀ŋ wa, mbɨ̀Ꞌɨ̀ ka a ghɨ̀ me lìa Mbɔ̧ɔ̧mà ghɨ̀ a bɨɨ abà ya mbɨ̀Ꞌɨ̀ àa bɨɨ a yea bòt ngɔ̀ŋ la.

³³ È wu ale, à bɔnyɨ bɔ̧, bɨa wu bɨ̀ bù̧ù̧te a mànjɨa, bɨ chɨ̀Ꞌɨ̀ bɔnyɨ bɨ̧ ko.

³⁴ Ndzìtsə te me ku wòt ane yɨ̧, tà me dzə a lob zi tà jɨ àghɨ, mbɨ̀Ꞌɨ̀ ka tà kɨꞋɨ ayɔɔ bòt nkɨ ngoꞋ zi zìambɔŋ abua Mbɔ̧ɔ̧mà. Maa tsiꞋi shu ndɨ bɨ̀a me ghɨ̌ me kǒ nè mènəè la àfɨꞋa màa kɨꞋɨ la.

« Roimhe

Air adhart »

Lean sinn:

Ceanglaichean taic

Sanasan