Bìoball air-loidhne

1 Kɔlìn 10 - Mundani

Nkɨ̀atsə ane ànəa bènàmbəa

¹ Bɔnyɨ bɔ̧, maà nkɨà bɨa ku̧u̧te nê, è li ngu àfɨ̀Ꞌ yu bètǎt nyaꞋ ba àa nkuŋa Musì àbâ àlaꞋ àyuube la, mbàꞋ me nyɨꞋte awɔb alu̧, bɔ mè ntsè a èbem *Èdzî Mèmbaŋ wu kà àghɨ a ghɨ̀ àwɔb.

² Bɔ li ndzì àwɔb a èdzî nè a èbem mbàꞋ bɔ tsiꞋi bòt bɔ̀ɔ nkuŋa Musì la.

³ Bɔ̀ɔgème e li njɨ̀ èghɨjɨ bu e chu a ègwet la,

⁴ mè nù mèleb mu Mbɔ̧ɔ̧mà li ntsaa abua yɔb la. Bɔ li nù mèleb mu è dzəâ a èbem èwu lu Mbɔ̧ɔ̧mà li ntsaa abua yɔb la. Èwu lu li ngu Yesò Klistò zìambɔŋ nkùŋà wɔb la.

⁵ Bɔ li mbàte nko èghɨ bu Mbɔ̧ɔ̧mà li ngɨ ane yɔb la, ka àbəèꞋ àyɔb nyaŋ a li ngɨ̀ Mbɔ̧ɔ̧mà me tsoo ane yɔb tè mbùŋè àwɔb, èpfəꞋte bɔb e saŋa àbâ àlaꞋ àyuube.

⁶ Èghɨ baa ègème e li ngɨ ane bètǎt nyaꞋ ba la e wu mbɨ̀Ꞌɨ̀ baa nɨ nkɨà àfɨ̀Ꞌ yaa, mbɨ̀Ꞌɨ̀ e baka wua nkɨ me ghɨ̌ a kàbɔ̀ŋ mbɨ̀Ꞌɨ̀ bɔ li ngɨ̀ la.

⁷ Bɨ̀ ka ngu bòt bɔ̀ɔ nkùkta bènàmbəa la, mbɨ̀Ꞌɨ̀ àbəèꞋ àyɔb ako a li nguê la. Àkata Mbɔ̧ɔ̧mà a làꞋa ànəa yɔb nê “Bòt ngaa e li ntsèke a si me jɨa nua, mè ndɔ̀Ꞌ a si mbèna nkùkta nàmbəa.”

⁸ Bà ka me mpàꞋte àbɨ̧ mbɨ̀Ꞌɨ̀ àbəèꞋ àyɔb ako a li ngɨ̀, Mbɔ̧ɔ̧mà ghɨ̀ bòt bètɔsì èghem yebe ntsɔ̀b batat e pfəꞋte ane àli yeamɔꞋ la.

⁹ Bà ka nkɨka a Mbɔ̧ɔ̧mà nê ba kɨ e ye àghɨa tàa ghɨ̌ ane ya la, mbɨ̀Ꞌɨ̀ àbəèꞋ àyɔb ako a li ngɨ̀ nyaãtekàbɔ̀ŋ te bùŋè àwɔb la.

¹⁰ Bɨ̀ ka mè me lème a tèbèm tɨ̧ mbɨ̀Ꞌɨ̀ àbəèꞋ àyɔb ako a li ngɨ̀, wantu̧ Mbɔ̧ɔ̧mà wu tàa bùŋà bòt la, bùŋè àwɔb la.

¹¹ Èghɨ baa ègème e li ngɨ ane yɔb mbɨ̀Ꞌɨ̀ bòt ko aa ye, bɔ mè shɨ bùà a si mbɨ̀Ꞌɨ̀ baa nɨ nkɨ̀à, ndɨ̀ wu bà wu àfɨꞋa ngɔ̀ŋ tsìꞋa ndìà lìa la.

¹² È wu ale, wòt tà mɨɨtè nê ye tɨ̧ɨ̧ ntsɔ̧̀ la me ko avi mbɨ̀Ꞌɨ̀ ka tà kwen.

¹³ Àghɨ a me kɨ ŋwèèlè àwê aa ghɨ̌ a kàbɔ̀ŋ, à ko nê wu àghɨa a li mè ye bòt ko la mɨ̧̂. Mbɔ̧ɔ̧mà wu wòt betsiꞋa bɨ lɨ̀Ꞌà wɨ̧ ane tò la. BetsiꞋa tà kà bɨ̧ɨ̧nè àghɨ a ŋwèèlè àwɨ̧ tè ngà ndzə àdziꞋa bɨ̀a ghɨ̀ àghɨa bɨ ghɨ̂ bɨ̀ ka wu ghɨ̀ la. Ka àghɨ a me kɨ ŋwèèlè àwɨ̧ bɨa ghɨ a kàbɔ̀ŋ ko Mbɔ̧ɔ̧mà naa ŋa wɨ̧ mètàŋ bɨa ko kìì tê dzə a èbèm kà ghɨ a kàbɔ̀ŋ.

¹⁴ È wu ale, bèshu̧ bɔ̧, bɨ̀ ka mbê me kukte bènàmbəa.

¹⁵ E ngua ndaꞋa abua yɨ̧ mbɨ̀Ꞌɨ̀ e ndaꞋa abua bòt èyì. Bɨ̀ kwàꞋtà àyɨ̧ ndze ànəa e shuà la.

¹⁶ Tè ba me nu ndɔŋ èlɔ̂t yu bàa nkɔ̀ŋka Mbɔ̧ɔ̧mà adù̧ la, à ka wu nê baa nua àlo̧ a Waã Mbɔ̧ɔ̧mà à? Bàa mě bà me kwela bled wu bàa mbòꞋta la, à ka wu nê baa kwela mbɨ̧̀ ènyit waã Mbɔ̧ɔ̧mà à?

¹⁷ Ndɨ̀ wu bled nàa wemɔ̀Ꞌ, bàagème e mè me jɨ a bled ngaa la, a wua nyɨ̀Ꞌta nê, baa mbàta ndzà̧aã ale ka mbɔ̂ ngu mbɨ̧̀ ènyit yemɔ̀Ꞌ.

¹⁸ Bɨ̀ lȩ̀ Bèjuê ndze. Bòt bu bɔ̀ɔ njɨ̀a èghɨ bɔ ŋa abua Mbɔ̧ɔ̧mà la aa njɨ̀a ayɔb bɔ̂ bòt ko àdzìꞋ yu bɔ̀ɔ ŋǎ èghɨ abua Mbɔ̧ɔ̧mà la.

¹⁹ È ngu anè shua nê ghà à? Tè e ngua shua nê bènàmbəa wu àghɨa nɨ̧ a ko, èghɨ bɔ nɨŋ njɨ̀a nàmbəa la mè ngu àghɨa ko?

²⁰ ChaꞋ! Ànəa e shua la wu nê bòt kà ko a Mbɔ̧ɔ̧mà àa me ŋa èghɨ abua bènàmbəa, bɔ wua ŋǎ abua fote kàbɔ̀ŋ, bɔ̀ ka ŋa abua Mbɔ̧ɔ̧mà. Maà kà kɨ bɨa bɔ àghɨa ko a màngɨa ne fote kàbɔ̀ŋ.

²¹ BetsiꞋa à kà me nu a èbem ndɔŋ Tè Yesò, mè nua a èbem ndɔŋ fote kàbɔ̀ŋ. BetsiꞋa à kà me jɨ èghɨjɨ Tè Yesò mè njɨ̀a èghɨjɨ fote kàbɔ̀ŋ.

²² Baa ghɨ̌ Tè Yesò naa me tsoo? Tè baa kweelè ntsè atò?

²³ Bòt aa shua nê “Mbɨ̧ kǒ nàa kele awa a màngɨa àghɨ la ntsě.” Ale, è ntsě àghɨ àgème àa ntɨ̀ŋa wòt la. Mbɨ̧ kǒ nàa kele awa a màngɨa àghɨ la ntsě, mbɔ̂ è kà wu àghɨ àgème àa ntɨ̀ŋa bòt la.

²⁴ Wòt me ghɨ̀ mènəè tà me mɨ̀ɨ̀tè bòt ko, tà ka me mɨ̀ɨ̀tè wuê avi zìambɔŋ.

²⁵ Bɨ yea nyà̧ a èwen bɔ̀ɔ fɨ̧̀ɨ̧̀nà la me yu̧u̧ bɨ̀ ka mbììte àdziꞋa è dzə la mbɨ̀Ꞌɨ̀ mèntɨ̧ɨ̧ mɨ̧ me fèèlè àwɨ̧.

²⁶ Àkata Mbɔ̧ɔ̧mà a laꞋnê, “SitsǎꞋ nè àghɨ àgème àa a èbèm la wu abua Tǎt wa Lefɨ̀Ꞌ.”

²⁷ Wòt kà ko a Mbɔ̧ɔ̧mà kàꞋà wê nê kɨꞋɨ a lob zi njɨ̀ èghɨjɨ, à gha, à jɨ̌ àghɨ àgème bɔ tsia a mbì lê la kà biite ànəê mbɨ̀Ꞌɨ̀ èntɨ̧ɨ̧ wê e me fèèlè àwê.

²⁸ (Ka wòt shu abua yê nê, “Eyaa wu èghɨjɨ bɔ nɨŋ njɨ̀a bènàmbəa la”, à ka njɨ ambo wòt wu tà shu awê la, nè ndɨ èntɨ̧ɨ̧ wê àa me fèèlè àwê la.

²⁹ E shu èntɨ̧ɨ̧ tò, è nka shu èwê.) Ndɨ wòt kǒ tsa nàa mɨ̀ɨ̀tà la, àa ghɨ̀ na e kele am nê è nka njɨ àghɨa màa nkɨ jɨ la à?

³⁰ E me jɨa nkɔ̀ŋkà Mbɔ̧ɔ̧mà adù̧, lə yu wòt nàa me tsǐ mpəè taã la wu ne ghàà?

³¹ Ale, ghàa ghàa wòt nàa ngɨ̀à la, kò wu àghɨa tà jɨa la, kò àyea tà nua la leꞋ, tà me ghɨ̀ àghɨa bòt àa ye me kukta Mbɔ̧ɔ̧mà la.

³² Bɨ̀ me tseke ntsɔ̧̀ ane ndɨ bɨ̀ ka ghɨ̌ ngoꞋ ane wòt Juê, kò wòt kà wu Juê, kò bòt chɔsì Mbɔ̧ɔ̧mà la leꞋ.

³³ Bɨ̀ ghɨ̀ anè wuê mbɨ̀Ꞌɨ̀ màa nyɔ̀Ꞌtà nkɨ ghɨ̌ èntɨ̧ɨ̧ waa waa aa me bɔ̌ ane àghɨ àgème màa ngɨ̀à la. È nka ghɨ ale nkɨà ntsɔ̧̀ kǒ abua am mmɔ̌ mbɔŋ. E nkɨà ntsɔ̧̀ bòt nyaŋ, mbɨ̀Ꞌɨ̀ bɔɔ peme.

« Roimhe

Air adhart »

Lean sinn:

Ceanglaichean taic

Sanasan