Yohanes 9 - Muna Southern Dialect

Yesus nefekaꞌosa mobuntono mpini pakalenteno 9:1-41

¹ Wakutuuno Yesus nekala-kala, nowohamo seemie moꞌane mobuntono mpini pakalenteno.

² Anaguhuꞌino dofeenaemo ambado, “Guru, laꞌae bhahaa kodhosano sampe mie aini nobunto mpini pakalenteno, wutono kaa kamungkulano?”

³ Notobhoosimo Yesus ambano, “Suano wutono, suano dua kamungkulano mehabuno dhosa, ampamo kaowu kakadhadhiaꞌano peda aini somo natiwohaꞌao kahadhaano Lahataꞌala ne anoa ini.

⁴ Tinangke nandoo ole-oleo, tetewei dadhumalangiomu kahadhaano Tumudu kanau. Kapaꞌamo naohondo kaowu oleo, ingka bhe naseemie paemo bhe so moolino kumahadhaanoa.

⁵ Tangasano aeate we dhunia ini, Idimo ini tilangano dhunia.”

⁶ Pada nopugau peda naꞌa Yesus nekapehamo ne wite, eluno naꞌa nobhelu-bheluane wite maka noꞌapuleiꞌe ne matano mobuntono naꞌa.

⁷ Nopugaumo ambano, “Kalamo meheꞌu we oe kaekadiuꞌa nekonando Siloam.” (Maꞌanano Siloam naꞌa “Mie netudu”). Mie amaitu nokalamo neheꞌu maka nosuli, gahaꞌa matano nofowohamo.

⁸ Santieneno bhe mie mandeꞌaane endefiꞌini mie amaitu mesalo-salono, dopugaumo ambado, “Ingka anoa ini mie mengkoha-ngkohano maka nesalo-salo?”

⁹ Nandoo dua pugauno, “Anoamo daanumo.” Ambado sigaoꞌano, “Suano, tamaka pototoꞌano ula.” Wutono nopugau ambano, “Nokotuꞌu, ingka idimo ini.”

¹⁰ Dofeenae ambado, “Peda amai kafowohaꞌamu?”

¹¹ Ambano, “Mie nekonando Yesus nehabu katomba seendai maka noꞌapuleiꞌe ne mataku. Pada anaꞌa notudu kanau akala aeheꞌu we oeno Siloam. Idi akalamo, gahaꞌa pada aeheꞌu afowohamo.”

¹² Ambado toha, “Ne amaiꞌe mie anaꞌa?” Ambano, “Miina amandeꞌaanea.”

¹³ Pada anaꞌa mie kabunto saꞌituini doowaemo ne miendo Farisi.

¹⁴ Tamaka oleono Yesus nebhelu wite mbali nofekantalea matano mie amaitu oleono Sabat.

¹⁵ Dadiꞌanomo miendo Farisi dofeenamo kabunto amaitu bhahaꞌi peda amai kafowohaꞌano. Notobhoosimo ambano, “Ingka noꞌapuleiane katomba ne mataku maka aeheꞌu, gahaꞌa afowohamo.”

¹⁶ Seemie hodua miendo Farisi dopugaumo ambado, “Tetewei mie anaꞌa miina namaiꞌao ne Lahataꞌala, kapaꞌamo miina namiarae oleono Sabat.” Sigaꞌa dopugau dua ambado, “Nada amai bhahaa mie kodhosa nehabu tanda timenteꞌaono peda ini?” Sampe dewalamo dopotaga-tagali sapada-pada andoa.

¹⁷ Pada aitu dopugaumo toha ne mie kabunto saꞌituini ambado, “Ane fekihimu hintu, laꞌae mie amaitu, ingka padamo nofekantalea matamu?” Notobhoosimo, “Anoa seemie anabii.”

¹⁸ Tamaka miendo Yahudi dokiido damarasaeaꞌa anoa ini daanumo nobunto endefiꞌini, kaneꞌomo nofowoha. Dadiꞌanomo dobhasimo kamungkulaꞌino.

¹⁹ Dofeenada ambado, “Anamiu gahaꞌa inia? Ingka ambamiu nobunto mpini pakalenteno. Tamaka peda ae ingka aitu nofowohamo?”

²⁰ Dotobhoosimo kamungkulaꞌino ambado, “Tapandeꞌaane ainimo ana mani. Tapandeꞌaane dua nobunto mpini pakalenteno.

²¹ Tadua kafowohaꞌano itu, ingka miina tamandeꞌaanea. Laꞌae mekantaleano matano miina dua tamandeꞌaane. Feenaomu wutono, ingka nobhalamo namandemo napugauꞌao wutono.”

²² Kapugauꞌando kamungkulano peda maitu doteꞌi miendo Yahudi, kapaꞌamo miendo Yahudi domafakaanemo sasuka kumonano Yesus maitu Mesias Omputo Fosalamatino, daꞌumeleꞌaanda damesua weo lambu kasambaheaꞌa.

²³ Dadiꞌanomo kapugauꞌandomo kamungkulano, “Ingka nobhalamo, feenaomu wutono.”

²⁴ Pada amaitu fenduamo dua dobhasi kabunto saꞌituini maka dopugauane ambado, “Pugau kumotuꞌuꞌano ne wiseno Lahataꞌala, tapandeꞌaane mie amaitu mie kodhosa.”

²⁵ Notobhoosimo ambano, “Bhahaa mie amaitu mie kodhosa miina amandeꞌaanea, nepandeꞌaoku sehonda kaowu, saꞌituini aobunto, aitu afowohamo.”

²⁶ Ambado dua, “Noafaꞌiangko gahaꞌa? Peda ae nofekantaleaꞌe matamua?”

²⁷ Notobhoosimo ambano, “Ingka padamo afohatokoomu, gahaꞌa mokiido metingke kanauꞌomua. Noafaꞌao dua mendua metingkeaneomu? Gaomiu membaliomu dua anaguhuno?”

²⁸ Gahaꞌa tadofeꞌawuti bhe dopugau ambado, “Hintu kaowu anaguhuno mie anaꞌa, insaodi ini anaguhuno anabii Musa.

²⁹ Tapandeꞌaane, Lahataꞌala padamo nokobhoasao ne anabii Musa, tamaka mie anaꞌa, miina tamandeꞌaanea bhahaꞌi nomaiꞌao ne amai.”

³⁰ Notobhoosimo kabunto saꞌituini ambano, “Ingka amente dua. Kamenteꞌaku miina mandeꞌaaneomu kamaiꞌaoꞌanoa, gahaꞌaitumo padamo nofekantalea mataku.

³¹ Ingka dopandeꞌaaneomu Lahataꞌala miina naefetingke mie kodhosa, mpahinomo mie lumebeno dhumalangino kapoindalono.

³² Mpini pakatandano dhunia taꞌampamo dua aitu miinaꞌo natifetingkea putae nandoo seemie mefekantaleano matando mobuntono mpini pakalenteno.

³³ Ane mie amaitu pae namaiꞌao ne Lahataꞌala, tetewei pae nakonipoolia.”

³⁴ Dotobhoosimo ambado, “Hintu ini lente weo dhosa, maka patudhumu moinaꞌu kainsami gahaꞌa?” Pada aitu dogihasiemo, miinamo naembali namesua weo lambu kasambaheaꞌa.

³⁵ Nofetingke kaowu mie anaꞌa dogihasiemo, Yesus nokalamo noꞌondofie. Nopoꞌawaane kaowu nopugaumo ambano, “Parasaea bhahaa ne Anano Manusia?”

³⁶ Ambano, “Laꞌae bhahaa mie anaꞌa Waompu? Fohato kanau amarasaeaꞌao ne Anoa.”

³⁷ Ambano Yesus, “Ingka wohaemo; mie puga-pugauno bhe hintu ini, Anoamo itu.”

³⁸ Ambano, “Aparasaea Waompu.” Lasao nosudhu notaohao sombano ne Yesus.

³⁹ Ambano Yesus, “Kahatoꞌaku we dhunia ini so afobhotusiꞌao, neanomo sasuka tapa mohano nafowoha, sasuka fowohano naobunto.”

⁴⁰ Pugauno Yesus naꞌa dofetingkee dua seemie hodua miendo Farisi ne itu. Dofeenamo ne Yesus ambado, “Patudhumu insaodi taobunto dua gahaꞌa?”

⁴¹ Ambano Yesus, “Ane kotu-kotuꞌu mobuntoomu pae kodhosaomua, tamaka hampano ambamiu fowohaomu, dadiꞌanomo dhosamiu sadaa-daa.”