Yohanes 8 - Muna Southern Dialect

¹ tamaka Yesus nofoni te kabhawono Zaitun.

² Same-samentaeno nohatomo toha we Lambuno Lahataꞌala. Kosasawindo raꞌeati domai se Anoa, dadiꞌanomo nengkohamo maka nofoinaꞌuda.

³ Gahaꞌa pande-pande Kitabi bhe miendo Farisi deowaanemo seemie hobhine nehatofindo nomonsule. Hobhine anaꞌa dofoehe-eheemo ne wunta-wuntando,

⁴ maka dopugau ne Yesus ambado, “Guru, hobhine aini tahatofie nandoo nomonsule.

⁵ Weo Kitabino pahintano Musa nofotudu hobhine medando aini dabhatuhiane kontu sampe namate. Peda ae bhahaa fekihimu?”

⁶ Kafeenando maitu mbali kaowu damansoꞌalaiꞌao Yesus, bhahaꞌi kaowu daewoha tingku damoꞌalae. Gahaꞌa Yesus tanolongko maka nebuhi-buhiꞌao wunano limano ne wite.

⁷ Tamaka mbaꞌinomo dofeenae kansuhu, Yesus nofowanumo fotuno maka nopugau ambano, “Laꞌae tapa kodhosano ne olotamiu itu, naetaa namaꞌindulumo nabhatumbu hobhine aini.”

⁸ Pada anaꞌa Yesus nolongkomo toha maka nebuhi ne wite.

⁹ Dofetingke kaowu pugauno Yesus naꞌa, dokalamo seemie-seemie nopaꞌinduluanda foliuno kakamungkula. Panda-pandano Yesus tanomoisa bhe hobhine anaꞌa daa-daaꞌe ne kaeehe-eheꞌano.

¹⁰ Yesus nofowanumo toha fotuno, maka nopugau ne hobhine anaꞌa ambano, “Ne amaidamo bhahaa mie saꞌituini waꞌina? Gahaꞌa miina bhe humukumuko?”

¹¹ Ambano hobhine anaꞌa, “Ingka miina Waompu.” Nopugaumo toha Yesus, “Idi pae dua ahumukumukoa. Kalamo, tamaka notanda aitu koemo toha mehabu dhosa.”]

Yesus tilangano dhunia 8:12-20

¹² Nopugaumo dua Yesus ne mie bhahi ambano, “Idimo ini tilangano dhunia, sasuka mangkafi kanau paise naekala-kala weo kahohondo, tamaka naeꞌawa tilanga meowano dadi.”

¹³ Ambado miendo Farisi, “Hintu ini membali sakusiino wutomu, dadiꞌanomo wambamu miina nakumotuꞌua.”

¹⁴ Yesus notobhoosidamo ambano, “Mahinggamo aembali sakusiino Wutoku, wambaku ini nokotuꞌu, hampano apandeꞌaane kamaiꞌaoꞌaku bhe so kakalaꞌaku. Tamaka hintimiu ini miina mandeꞌaaneomua kamaiꞌaoꞌaku bhe so kakalaꞌaku.

¹⁵ Hintimiu mebhotusiomu ampa pomatando manusia, Idi miina akonibhotusia maumo seemie.

¹⁶ Tamaka ane afobhotusi, kabhotusiku nakotuꞌu, hampano miina amoisa tamaka apobhai bhe Amaku tumudu kanau.

¹⁷ Weo Kitabino Musa nefintahakimiu notibuhi, ‘⸤ Ane debhitahaki mie⸥ , nandoo kasakusiino mie hodua pototoꞌano, nosahamo.’

¹⁸ Idi asakusii so Wutoku bhe Amaku tumudu kanau nosakusii kanau dua.”

¹⁹ Ambado toha, “Ne amai gahaꞌa Amamu?” Ambano Yesus, “Naetaa Idi naetaa Amaku miina mandeꞌaaneomua. Ane mandeꞌaaneomu laꞌae Idi ini, tetewei mandeꞌaaneomu dua Amaku.”

²⁰ Kosasawiꞌae naꞌa nopugauane Yesus wakutuuno nofofoinaꞌu weo Lambuno Lahataꞌala ne owano sohongano sadhakaa. Tamaka bhe seemie miina bhe humakoe hampano miinaꞌo nahumato tempono.

Yesus miina namaiꞌao ne dhunia ini 8:21-29

²¹ Yesus nopugaumo toha ne mie bhahi ambano, “Mada kaowu akumala, hintimiu umondofi kanauꞌomu tamaka tamomateomu weo dhosamiu, paise mooliomua maiꞌomu we kakalaꞌaku.”

²² Ambado miendo Yahudi, “Namongkomo wutono itu bhahaa, kapaꞌamo ambano, pae damooliomua dakumalaomu we kakalaꞌano?”

²³ Yesus nopugaumo dua ambano, “Hintimiu maiꞌaoꞌomu we panda. Idi amaiꞌao te wawo. Hintimiu maiꞌaoꞌomu we dhunia ini, Idi miina amaiꞌao ne dhunia.

²⁴ Kapugauꞌakumo saꞌituini, ‘Hintimiu mateomu weo dhosamiu’, kapaꞌamo ane pae marasaeaꞌomu Idimo ini nekonando Idi ndumandoono, hintimiu mateomu weo dhosamiu.”

²⁵ Ambado dua, “Laꞌae gahaꞌa hintu itu?” Notobhoosimo Yesus, “O ae fahalaano apugau bhe hintimiu?

²⁶ Nandoo nobhahi so nepugauꞌaoku, nobhahi dua kaꞌalamiu so nebhotusiku, tamaka Tumudu kanau nobanara. Ampa nefetingkeku ne Anoa, anaꞌamo nefohatoꞌaoku ne dhunia.”

²⁷ Gahaꞌa mie bhahi miina dalumosangiea putae Yesus nopulaoꞌao Amano.

²⁸ Ambano Yesus, “Mada kaowu sumangkeomu Anano Manusia te melangkeꞌano, kaneꞌomo mandeꞌaaneomu Idimo ini nekonando idi ndumandoono. Mandeꞌaanemoomu dua Idi ini miina akonihabu aeala kapooli ne Wutoku, tamaka apugauꞌao sabhaha nefoinaꞌuꞌaono Amaku ne Idi.

²⁹ Anoa tumudu kanau sadhia nopobhai kanau. Anoa miina nakumataho kanau amoisa, hampano sadhia akahadhaa posahataano bhe kapoindalono.”

Kabanara meowano kabebasi 8:30-36

³⁰ Pada nopugauꞌao kosasawiꞌae naꞌa dobhahi marasaeano ne Yesus.

³¹ Nopugaumo Yesus ne miendo Yahudi marasaeano maitu ambano, “Ane mintahakiomu kansuhu kafoinaꞌuku, hintimiu kotu-kotuꞌu anaguhuꞌiku.

³² Mada aitu mandeꞌaaneomu kabanara, kabanaramo anaꞌa so mobebasikoomu.”

³³ Ambado, “Insaodi ini ingka sampuꞌano Abraham, pakade miinaꞌo sepaliꞌa taembali bhatuando mie. Noafaꞌao dua pugauꞌao putae insaodi damobebasi kainsami?”

³⁴ Ambano Yesus, “Amohatokoomu, kotu-kotuꞌu sasuka mehabuno dhosa, anoamo bhatuano dhosa.

³⁵ Seemie bhatua miina natilentu kansuhu weo polambu, tamaka seemie anaꞌi sadhia notilentu weo polambu.

³⁶ Dadiꞌanomo ane Anano Lahataꞌala natumolosikoomu, hintimiu kotu-kotuꞌu bebasimoomu.”

Sampuꞌano Abraham tapa maiꞌaono ne Lahataꞌala 8:37-47

³⁷ “Apandeꞌaane hintimiu sampuꞌano Abraham, tamaka kopatudhu mongko kanauꞌomu hampano wambaku miina tumahimaeꞌomu weo totono lalomiu.

³⁸ Newohaku ne Amaku, aituꞌaemo dua nepugauꞌaoku. Pedamo dua naꞌa hintimiu, nefetingkemiu ne amamiu, anaꞌamo nehabumiu.”

³⁹ Andoa dotobhoosimo ambado, “Ama mani ingka Abraham.” Ambano Yesus, “Ane hintimiu kotu-kotuꞌu sampuꞌano Abraham, teteweimo mangkafiomu dua nehabuno Abraham.

⁴⁰ Ingka pada afohatoangkoomu kabanara nefetingkeku ne Lahataꞌala, gahaꞌa hintimiu kopatudhu mongko kanauꞌomu. Abraham miina naehabu medando ini.

⁴¹ Hintimiu habuomu kahadhaano amamiu wutomiu.” Dotobhoosimo ambado, “Insaodi ini suano bulea. Ama mani seemie-mieno, Wutono Lahataꞌala.”

⁴² Ambano Yesus, “Ane amamiu Lahataꞌala, tetewei moasi kanauꞌomu hampano Idi ini amaiꞌao ne Lahataꞌala. Kahatoꞌaku ini suano kapoindaloku Wutoku, tamaka kapoindalono Tumudu kanau.

⁴³ Noafa bhahaa miina lumosangianeomu wambaku? Ingka mbaꞌinomo mokiidoomu metingkeomu pugauku.

⁴⁴ Amamiu Kafeompuꞌando seetani, sadhia gaomiu mangkafiomu kapoindalono amamiu naꞌa. Anoamo itu mongkono manusia mpini kabhao-bhaono, miina natumai ne kabanara, kapaꞌamo weo totono lalono miina bhe kabanarano. Ane nakopaha, nopantasimo, kahabuaonomo. Anoa itu pande gau-gau, amandomo sabhaha paha.

⁴⁵ Tamaka hampano afohatoangkoomu kabanara, tapamo kaparasaeaꞌamiu ne Idi.

⁴⁶ Laꞌae bhahaa ne olotamiu itu so mefotiwohano bukutii putae Idi ini aehabu dhosa? Ane afohatoangkoomu kabanara, noafa miina marasaeaꞌomu ne Idi?

⁴⁷ Sasuka maiꞌano ne Lahataꞌala nofetingke bhoasaono Lahataꞌala. Hintimiu miina maiꞌaoꞌomu ne Lahataꞌala, kanandooꞌanomo miina metingkeeꞌomu.”

Nonandoo wawo Yesus bhe Abraham 8:48-59

⁴⁸ Dotobhoosimo miendo Yahudi ne Yesus ambado, “Ingka nokotuꞌumo pugau mania, hintu itu miendo Samaria nopesuakikomo seetani.”

⁴⁹ Ambano Yesus, “Idi miina namesuaki kanau seetani, tamaka afosibhala Amaku, gahaꞌa hintimiu fekandidiki kanauꞌomu.

⁵⁰ Idi miina aeꞌondofi kafosibhala so Wutoku, tamaka nandoo meꞌondofi kanau kafosibhala, Anoamo dua fobhotusinoa.

⁵¹ Amohatokoomu, kotu-kotuꞌu sasuka mangkafino pugauku paise naenamisi mate ampa suhue dhamani.”

⁵² Ambado miendo Yahudi, “Aitu tapandeꞌaanemo mpuu nopesuakikomo seetani, kapaꞌamo Abraham nomatemo, pedamo dua kosasawindo anabii, tamaka ingka hintu pugau sasuka mangkafino pugaumu pae naenamisi mate ampa suhue dhamani.

⁵³ Bhahaa foliuꞌe dua hintu bhe amantoomu Abraham mateno maitu? Pedamo dua anabii sigaoꞌano domatemo. Abhi wutomu laꞌae bhahaa hintu itu?”

⁵⁴ Ambano Yesus, “Ane amosibhala kaowu Wutoku, miina nakoꞌulu-uluꞌa. Tamaka mosibhala kanau ingka Amaku, Anoamo itu nekonamiu Lahataꞌalamiu.

⁵⁵ Gahaꞌaitumo miina mandeꞌaaneomua, tamaka Idi apandeꞌaane. Ane apugau miina amandeꞌaane ingka akopaha, pedamo dua hintimiu. Tamaka Idi apandeꞌaane bhe aangkafi bhoasaono.

⁵⁶ Weo dadino, amamiu Abraham nowula lalono naembali namoha oleo kahatoꞌaku, ingka daanumo nowohaemo bhe noꞌia sepaliꞌa lalono.”

⁵⁷ Ambado dua miendo Yahudi, “Umuhumu miinaꞌo nakumapoa bhe lima fulu taꞌu, wohamo dua Abraham?”

⁵⁸ Ambano Yesus, “Amohatokoomu, kotu-kotuꞌu miinaꞌo bhe Abraham, IDI NDUMANDOONO anandoomo.”

⁵⁹ Miendo Yahudi lasao deꞌenepi kontu dabhatumbue, tamaka Yesus nekaꞌuko maka nekalisu nohunsamo Lambuno Lahataꞌala.