Yohanes 7 - Muna Southern Dialect

Yesus bhe bhahitieꞌino 7:1-13

¹ Pada anaꞌa Yesus nowaliligimo kadieno Galilea, hampano nokiido nalumili we kadieno Yudea, kapaꞌamo ne naꞌa miendo Yahudi dopatudhu damongkoe.

² Wakutuu aitu nomaꞌomo hohaeaꞌando Yahudi, nekonando hohaeaꞌano Bhantea.

³ Dopugaumo bhahitieꞌino Yesus ambado, “Ehemo maka kala we kadieno Yudea neanomo anaguhuꞌimu daoha dua sabhaha kahadhaa nehabumu.

⁴ Kapaꞌamo ane dopoindalo dofepandeꞌao ne mie bhahi, ingka miina naembalia dofebuni nehabundo. Dadiꞌanomo ane mehabu sabhaha tanda medando aitu, fotiwoha wutomu ne dhunia!”

⁵ Kapugauꞌando peda naꞌa, bhahitieꞌino miina dua damarasaeaꞌea.

⁶ Yesus notobhoosida ambano, “Tempoku miinaꞌo nahumatoa, nopoꞌala bhe hintimiu sadhia bhe kasalawamiu.

⁷ Dhunia pae bhe kapooli dabansikoomua, tamaka dobansi Idi, hampano Idi sadhia afeꞌulaianda kadaino habundo.

⁸ Kalamoomu hintimiu we hohaeaꞌa naꞌa, Idi pae akumalaa, hampano tempoku miinaꞌo nahumatoa.”

⁹ Pedamo naꞌa pugauno Yesus ne bhahitieꞌino, maka daa-daaꞌe neate we Galilea.

¹⁰ Gahaꞌa dokundo kaowu bhahitieꞌino, Yesus nokalamo dua we hohaeaꞌa naꞌa, tamaka miina naefemata-mataa.

¹¹ Kaomponano hohaeaꞌa naꞌa miendo Yahudi sadhia doꞌondofi Yesus ambado, “Ne amaiꞌe bhahaa?”

¹² Dobhahi raꞌeati mekamu-kamuntuno sadhia dopulaoꞌao Anoa. Nandoo mugauno, “Anoa maitu mie metaa.” Nandoo dua mugauno, “Miina, Anoa maitu nefekakolilino raꞌeati.”

¹³ Tamaka bhe naseemie miina bhe mokadono dasumambilie mentalea-mentalea, hampano doteꞌi kamungkulaꞌi miendo Yahudi.

Yesus nosakusiiꞌao Wutono 7:14-24

¹⁴ Ne pofelabuntaꞌano hohaeaꞌa naꞌa, gahaꞌa Yesus tadua nopesuamo weo Lambuno Lahataꞌala maka nofofoinaꞌu ne itu.

¹⁵ Miendo Yahudi tadomente ambado, “Peda amai mie anoa ini nopande peda ini, ingka miina nakosikolaa!”

¹⁶ Nopugaumo Yesus ne andoa ambano, “Kafoinaꞌuku ini miina namaiꞌao ne Wutoku, tamaka nomaiꞌao ne Tumudu kanau.

¹⁷ Sasuka moindalono nadhumalangi kapoindalono Lahataꞌala, namandeꞌaane bhahaꞌi kafoinaꞌuku ini nomaiꞌao ne Lahataꞌala tawa nomaiꞌao ne Wutoku.

¹⁸ Ane o mie nofofoinaꞌu nomaiꞌao ne fekihino wutono, mie aitu neꞌondofi kafosibhala so wutono. Tamaka mie meꞌondofino kafosibhala so Tumudue, mie aitu nelaa lalono, miina bhe modaiꞌano weo totono lalono.

¹⁹ Ingka anabii Musa nowaꞌangkoomu tubhono agama, tamaka ne olotamiu itu bhe naseemie miina bhe dhumalangie. Noafa bhahaa kopatudhuꞌao mongko kanauꞌomu?”

²⁰ Mie bhahi dotobhoosi ambado, “Ingka mobheemo, laꞌae bhahaa so mongkoko?”

²¹ Notobhoosimo Yesus ambano, “Kaneꞌo seꞌise kahadhaa nehabuku, ingka simente-menteꞌamoomu.

²² Anabii Musa nowaꞌangkoomu tutuhano kasuna (gahaꞌaitu tutuhano kasuna maitu sakotuꞌuꞌano miina namaiꞌao ne anabii Musa tamaka nomaiꞌao ne awuaꞌintoomu), dadiꞌanomo hintimiu fosunaomu mahingga ne oleono Sabat.

²³ Ane fosunaomu ne oleono Sabat keana notilempagi tubhono agama ne Kitabino Musa, noafa gahaꞌa amahaki kanauꞌomu mbaꞌinomo aefekaꞌosa mie koseꞌulu-uluno ne oleono Sabat?

²⁴ Koise mebhotusiomu ampa pomatamiu, tamaka mebhotusiomu fekaꞌadhilieꞌomu.”

Potaga-tagaliꞌao kamaiꞌaoꞌano Yesus 7:25-36

²⁵ Tangasano peda maitu seemie hodua miendo Yerusalem dopugau ambado, “Ingka anoamo ini mie neꞌondofindo so damongko?

²⁶ Tamaka ondoomu itu, Anoa tanewasamo nopugau, miina bhe kodiuno. Daesuhui ae neangkaꞌintoomu dopandeꞌaanemo Anoamo ini Mesias Omputo Fosalamatino.

²⁷ Tamaka mie aini dopandeꞌaane kamaiꞌaoꞌano. Gahaꞌaitu ane nahumato Mesias, bhe naseemie pae bhe so mandeꞌaane kamaiꞌaoꞌano.”

²⁸ Tangasano Yesus nofofoinaꞌu weo Lambuno Lahataꞌala nopugau ampa kabhalano suahano, “Kotu-kotuꞌu pandeꞌa kanauꞌomu gahaꞌa? Pandeꞌaaneomu dua kamaiꞌaoꞌaku? Ampamo kaowu kahatoꞌaku suano kapoindaloku Wutoku, tamaka notudu kanau Lahataꞌala. Anoamo banarano, gahaꞌa miina mandeꞌaaneomua.

²⁹ Tamaka Idi apandeꞌaane, kapaꞌamo amaiꞌao ne Anoa, Anoamo tumudu kanau.”

³⁰ Ne naꞌa o mie dokopatudhu dahumakoe, tamaka bhe naseemie miina bhe dumingkue, hampano miinaꞌo nahumato tempono.

³¹ Ne olotando mie bhahi maitu nandoo dobhahi dua marasaeano ne Anoa. Ambado, “Ane nahumato Mesias, bhahaa nalumiuꞌe dua kabhahino tanda-tanda timenteꞌaono nehabuno Anoa ini?”

³² Miendo Farisi dofetingke mie bhahi dopokamu-kamuntui peda anaꞌa dosambili Anoa maitu, dadiꞌanomo neangkaꞌindo imamu bhe miendo Farisi detudumo dhagano Lambuno Lahataꞌala dahumakoe.

³³ Ambano Yesus, “Paemo naomponaa aeate bhe hintimiua, mada anaꞌa asumulimo te Tumudu kanau.

³⁴ Hintimiu umondofi kanauꞌomu, tamaka paise poꞌawa kanauꞌomu, kapaꞌamo pae mooliomua maiꞌomu we kaeateꞌaku.”

³⁵ Miendo Yahudi dopugau-gaumo sapada-pada andoa ambado, “Nakumala ne amai bhahaa mie aini sampe pae dapoꞌawaaneomua? Bhahaa patudhuno nakumala ne miendo Yahudi meateno we koliwuno, we witeno Yunani? Bheanea namoinaꞌu miendo Yunani naꞌa?

³⁶ Ampamo kaowu, o ae bhahaa maꞌanano pugauno saꞌituini, ‘Hintimiu umondofi kanauꞌomu, tamaka paise poꞌawa kanauꞌomu, bhe pae mooliomua maiꞌomu we kaeateꞌakua?’ ”

Oe meowano dadi 7:37-44

³⁷ Ne oleo kapuliaono hohaeaꞌa naꞌa, matanomo hohaeaꞌa, Yesus noehemo bhe nopugau nofekabhala-bhala suahano, “Sasuka mokekeleno wuꞌu naetaa namai ne Idi maka naohoꞌu!

³⁸ Sasuka marasaeano ne Idi, tapedamo wambano Kitabi, ‘Namaiꞌao weo totono lalono namawa oe meowano dadi.’ ”

³⁹ Nepulaoꞌaono Yesus naꞌa Rohino Lahataꞌala so netahimando marasaeano ne Anoa. Wakutuu anaꞌa Rohi amaitu miinaꞌo nahumatoa, mbaꞌinomo Yesus miinaꞌo naꞌumawa kakalabhiano ⸤ weo mateno⸥ .

⁴⁰ Seemie hodua ne olotando mie bhahi metingkeno pugauno maitu, dopugaumo ambado, “Anoa ini kotu-kotuꞌumo o anabii so humatono neanta-antagintoomu itu.”

⁴¹ Ambado dua sigaoꞌano, “Anoa ini Mesias Omputo Fosalamatino.” Tamaka ambado dua sigaoꞌano, “Kunaꞌemiu o Mesias namaiꞌao we Galilea gahaꞌa?

⁴² Ingka notibuhi weo Kitabi, o Mesias namaiꞌao ne sampuꞌano Daud, we liwuno Betlehem kaeateꞌanomo Daud endefiꞌini.”

⁴³ Maka mie bhahi dewala dopotagaliꞌao Anoa.

⁴⁴ Seemie hodua ne olotando andoa maitu dokopatudhu dahumakoe tamaka miina bhe dumingkuea.

Yesus nopotunduꞌaane Nikodemus 7:45-52

⁴⁵ Dhagaꞌino Lambuno Lahataꞌala dosulimo ne meangkaꞌindo imamu bhe miendo Farisi. Andoa maitu dofeenamo, “Noafa ingka miina wowoꞌoeꞌomua?”

⁴⁶ Dotobhoosimo dhaga andoa maitu ambado, “Miinaꞌo nandumandoo seemie manusia pugauno medando mie amaitu!”

⁴⁷ Ambado miendo Farisi ne andoa, “Bhahaa hintimiu nofekakolilinokoomu dua?

⁴⁸ Nandoo bhahaa neangkantoomu tawa miendo Farisi marasaeano ne Anoa?

⁴⁹ Tamaka o raꞌeati ini tapa mandeꞌaono Kitabino Musa, nakumangkanaidamo balaa!”

⁵⁰ Seemie ne olotando andoa maitu neano Nikodemus. Anoamo ini maino ne Yesus endefiꞌini. Nopugaumo ambano,

⁵¹ “Ingka weo tubhono agama nefintahakintoomu, kunaꞌekumo pae naembali tadaebhotusimo seemie ane paeꞌo dametingkee bhe damandeꞌaane o ae nehabuno.”

⁵² Ambado, “Gahaꞌa hintu ini mieno Galilea dua? Soba lengka Kitabi itu! Ne itu mandeꞌaanemo miina nandumandoo seemie anabii maiꞌaono we Galilea.”

Hobhine monsuleno 7:53—8:11

⁵³ [Pada anaꞌa dosulimo we lambudo seemie-seemie,